Incwadzi Yesibili YaSamuweli
10 Ngemuva kwesikhatsi, inkhosi yema-Amoni+ yafa futsi indvodzana yayo Hanuni, yaba yinkhosi esikhundleni sayo.+ 2 Davide wabese utsi: “Ngitamentela umusa Hanuni indvodzana yaNahashi njengobe kwenta babe wakhe kimi.” Ngako Davide watfumela tinceku takhe kutsi tiyodvudvuta Hanuni ngenca yekufelwa ngubabe wakhe. Kodvwa ngesikhatsi tinceku taDavide tifika eveni lema-Amoni, 3 tindvuna takhona tatsi kuHanuni inkhosi yato: “Ucabanga kutsi Davide uhlonipha babe wakho yini ngekutfumela bantfu kutsi batokudvudvuta? Awucabangi yini kutsi utfumele letinceku takhe kuwe kuze titohlola lelidolobha tiphindze tilibukisise bese uyalincoba?” 4 Ngako Hanuni watsatsa letinceku taDavide watihhula tilevu+ futsi wajuba netembatfo tato ekhatsi macondzana netibunu wase uyatijikisa. 5 Davide watsi nakatjelwa ngaloko, wavele watfumela emadvodza kutsi ayotihlangabeta ngobe letinceku betihlaziswe kakhulu. Inkhosi yatsi kuto: “Hlalani eJerikho+ tize tikhule letilevu tenu bese niyabuya.”
6 Ngekuhamba kwesikhatsi, ema-Amoni abona kutsi sekaliphunga lelibi kuDavide, ngako acasha emasotja emaSiriya lahlala eBhethi-rehobu+ nalahlala eSobha.+ Bekangu-20 000 emasotja lebekahamba ngetinyawo; inkhosi yaseMakha+ yona beyihamba nalangu-1 000; lasuka e-Ishithobi* bekangu-12 000.+ 7 Nakeva ngaloko Davide watfumela Jowabe nalo lonkhe libutfo, lokufaka ekhatsi emasotja akhe langemachawe.+ 8 Ema-Amoni aphuma futsi atihlela aba libutfo lemphi ekungeneni kwalelidolobha. Ngesikhatsi lesifananako, libutfo lemaSiriya aseSobha kanye nelemaSiriya aseRehobu nelase-Ishithobi* kanye nelaseMakha bekeme odvwana endzaweni levulekile.
9 Ngesikhatsi Jowabe abona kutsi lelibutfo belisondzela kuye lichamuka ngembili nangemuva, wakhetsa lamanye kumasotja aka-Israyeli langemachawe, wawahlela kuze ayokulwa nemaSiriya.+ 10 Onkhe lalamanye emasotja wawanika Abishayi+ umnakabo kutsi abe ngumcondzisi* wawo kuze awahlelele kuyokulwa nema-Amoni.+ 11 Jowabe wase utsi kumnakabo: “Nangabe libutfo lemaSiriya liba nemandla kunami ubokuta utongilekelela; kodvwa nangabe libutfo lema-Amoni liba nemandla kunawe ngitakuta ngitokulekelela. 12 Kufanele sicine futsi sibe nesibindzi+ silwele bantfu bakitsi nemadolobha aNkulunkulu wetfu, futsi Jehova utawenta lokulungile emehlweni akhe.”+
13 Ngemuva kwaloko Jowabe nelibutfo lakhe balisondzelela libutfo lemaSiriya kuze balwe nalo futsi lababalekela.+ 14 Ngesikhatsi ema-Amoni abona kutsi emaSiriya sekabalekile, nawo abalekela Abishayi angena ngekhatsi edolobheni. Ngemuva kwaloko Jowabe wawayekela wabuyela emuva eJerusalema.
15 Atsi emaSiriya nakabona kutsi ema-Israyeli asawancobile, ase atihlela kabusha.+ 16 Ngako Hadadezeri+ watfumela kutsi kuyolandvwa emaSiriya esigodzini seMfula,*+ futsi efika eHelamu aholwa nguShobaki indvuna yelibutfo lemphi yaHadadezeri.
17 Kwatsi nakufika umbiko kuDavide, ngekushesha wabita onkhe ema-Israyeli, bewela iJordane befika eHelamu. EmaSiriya atihlela kuze ahlangane naDavide aphindze alwe naye.+ 18 Kodvwa emaSiriya ambalekela Israyeli futsi Davide wabulala emasotja labekagibele tincola temahhashi langu-700 kanye nalangu-40 000 labekagibele emahhashi, wase uhlasela Shobaki indvuna yelibutfo lawo wafa khona lapho.+ 19 Ngesikhatsi onkhe emakhosi labekatinceku taHadadezeri abona kutsi ehlulwe ngema-Israyeli, ngekushesha akha kuthula naDavide futsi aba ngephansi kwakhe;+ emaSiriya awazange aphindze afune kusita sive sema-Amoni.