Hezekeli
41 Yabese ingimikisa endzaweni lengcwele* lengephandle, futsi yakala tinsika letisemaceleni; betingemamitha langaba matsatfu* bubanti eluhlangotsini lunye futsi nakulolu lolunye luhlangotsi betingemamitha langaba matsatfu bubanti. 2 Ligede belingemamitha langaba sihlanu* bubanti, lubondza lolusemaceleni belungemamitha langaba mabili nesigamu* eluhlangotsini lunye, futsi nalolu lolunye luhlangotsi belungemamitha langaba mabili nesigamu. Yakala budze balo lobebungemamitha langaba ngu-20,* futsi bubanti balo bebungemamitha langaba ngu-10.*
3 Yabese ingena ngekhatsi* yakala insika leseceleni kwemnyango, beyingaba limitha* bukhulu, futsi lomnyango bewungemamitha langaba matsatfu* bubanti. Lubondza lolusemaceleni emnyango belungemamitha langaba matsatfu nesigamu.* 4 Ngemuva kwaloko yabese ikala likamelo lelibuke indzawo lengcwele lengephandle, belingemamitha langaba ngu-10 budze nalangaba ngu-10 bubanti.+ Yabese itsi kimi: “Lena yiNgcwelengcwele.”+
5 Yabese ikala lubondza lwelithempeli futsi belungemamitha langaba matsatfu* bukhulu. Emakamelo lasemaceleni labekatungeleta lelithempeli wona bekangemamitha langaba mabili* bubanti.+ 6 Lamakamelo lasemaceleni bekatitezi letintsatfu kuphakama, lesinye sitezi singetulu kwalesinye, futsi sitezi ngasinye besinemakamelo langu-30. Lubondza lwalelithempeli belwakhiwe ngendlela yekutsi emakamelo lasemaceleni asime kulokutsite, kuze loku lasime kuko kungangeni kulolubondza lwalelithempeli.+ 7 Etinhlangotsini totimbili talelithempeli bekunendlela* letungeletako, beyitungeleta futsi yenyukela emakamelweni lasetulu.+ Bubanti balendlela bebukhula njengobe usuka kulesinye sitezi uya kulesinye, kusukela esitezi lesingephansi kuya esitezi lesisetulu ekugcineni nawendlula lesisemkhatsini.
8 Ngabona kutsi bekunendzawo lephakeme letungeleta lonkhe lelithempeli futsi tisekelo talamakamelo lasemaceleni betingangemhlanga lophelele, lokungemamitha langaba matsatfu kuya ekoneni. 9 Bubanti belubondza lolungephandle kwemakamelo lasemaceleni belungemamitha langaba mabili nesigamu. Bekunendzawo levulekile* eceleni kwalesakhiwo semakamelo lasemaceleni lebekayincenye yalelithempeli.
10 Emkhatsini welithempeli nemakamelo ekudlela+ bekunendzawo lebeyingemamitha langaba ngu-10 bubanti, eluhlangotsini ngalunye. 11 Bekunemnyango emkhatsini walamakamelo lasemaceleni futsi bekunendzawo levulekile eluhlangotsini lolusenyakatfo, futsi bekunalomunye umnyango eluhlangotsini loluseningizimu. Bubanti bendzawo levulekile bebungemamitha langaba mabili nesigamu nawuyitungeleta.
12 Sakhiwo lesingasenshonalanga lesibuke indzawo levulekile besingemamitha langaba ngu-35* bubanti, nalangaba ngu-45* budze; lubondza lwalesakhiwo belungemamitha langaba mabili nesigamu bukhulu kuto tonkhe tinhlangotsi.
13 Wabese ukala lithempeli futsi belungemamitha langaba ngu-50* budze. Indzawo levulekile, nesakhiwo* kanye nelubondza bekungemamitha langaba ngu-50 budze. 14 Bubanti bendzawo yelithempeli lengembili lebuke emphumalanga kanye nendzawo levulekile bebungemamitha langaba ngu-50.
15 Yakala budze besakhiwo lebesibuke indzawo levulekile ngemuva, kanye nendzawo lephakeme yalesakhiwo etinhlangotsini totimbili, futsi beyingemamitha langaba ngu-50.
Yaphindze yakala lingephandle lendlu lengcwele nelingekhatsi layo,+ nabovulandi labasebaleni, 16 kanye nesiyilo, emafasitelo labekanetikhala letingumntjuntju,+ kuhlanganise netindzawo letiphakeme talesakhiwo lebetikuletindzawo letintsatfu. Eceleni kwalesiyilo bekunemaphanela lakhiwe ngesigodvo+ kusukela phansi kuyofika emafasitelweni; futsi lamafasitelo bekambonyiwe. 17 Kwakalwa indzawo lengenhla kwemnyango, nalengekhatsi ethempelini, nalengephandle kanye nalo lonkhe lubondza lolutungeletile. 18 Belunemidvwebo yemakherubhi+ neyetihlahla telusundvu,+ ngasinye sihlahla selusundvu besisemkhatsini wemakherubhi lamabili futsi likherubhi ngalinye belinebuso lobubili. 19 Buso bemuntfu bebubuke kulolunye luhlangotsi lwalesihlahla selusundvu, bese kutsi buso belibhubesi* bubuke ngakulolu lolunye luhlangotsi lwalesihlahla.+ Bekudvwetjwe ngaleyondlela kulo lonkhe lelithempeli. 20 Kusukela esiyilweni kuyofika endzaweni lengetulu kwemnyango, bekunemidvwebo yemakherubhi neyetihlahla telusundvu elubondzeni lwalelithempeli.
21 Tinsika teminyango* yelithempeli betisikwele.+ Embikwendzawo lengcwele,* bekunentfo lefana 22 neli-al’thare lesigodvo+ lebeyingaba limitha nesigamu* kuphakama futsi ingaba limitha* budze. Beyinalokutsite emakoneni, futsi sisekelo* sayo kanye netinhlangotsi tayo bekwakhiwe ngesigodvo. Lendvodza yabese itsi kimi: “Leli litafula lelisembikwaJehova.”+
23 INgcwele beyinetivalo letimbili, neNgcwelengcwele nayo beyinetivalo letimbili.+ 24 Leminyango beyinetivalo letimbili letijikitako; tivalo letimbili umnyango ngamunye. 25 Bekunemidvwebo yemakherubhi kanye neyetihlahla telusundvu kuletivalo talelithempeli, futsi lemidvwebo beyifana naleyo leselubondzeni.+ Bekuphindze kube neluphahla lwendlu lolugabancako embikwavulandi longephandle. 26 Bekuphindze kube nemafasitelo langumntjuntju+ nemidvwebo yetihlahla telusundvu kuto totimbili tinhlangotsi tavulandi, kanye nasemakamelweni laseceleni elithempeli naseluphahleni lolugabancako.