Hezekeli
6 Livi laJehova laphindze lefika kimi, latsi: 2 “Ndvodzana yemuntfu, buka ngasetintsabeni taka-Israyeli bese uphrofetha ngalokumelene nato. 3 Kufanele utsi: ‘Awu nine tintsaba taka-Israyeli, lalelani nali livi leNkhosi Lephakeme Jehova: Naku lokushiwo yiNkhosi Lephakeme Jehova etintsabeni, emagcumeni, emifudlaneni nasetihosheni: “Ngitaniletsela inkemba lemelene nani ngibhidlite netindzawo tenu letiphakeme. 4 Ema-al’thare enu atawubhidlitwa, tindzawo tenu tekushisela imphepho titawubhidlitwa,+ nebantfu lababulewe ngitabajikijela embikwetithico tenu letenyanyekako.*+ 5 Tidvumbu tebantfu baka-Israyeli ngitatijikijela embikwetithico tabo letenyanyekako futsi ematsambo enu ngitawasakata atungelete ema-al’thare enu.+ 6 Emadolobha etindzawo lenihlala kuto atawubhujiswa,+ tindzawo letiphakeme tibhidlitwe futsi tisale titindzala.+ Ema-al’thare enu atawubhidlitwa abe ticucu, tithico tenu letenyanyekako titawunyamalala, tindzawo tenu tekushisela imphepho titawubhidlitwa futsi imisebenti yenu itawucedvwa. 7 Bantfu lababulawako batawufela emkhatsini wenu,+ futsi nitawukwati kutsi mine nginguJehova.+
8 “‘“Kodvwa bakhona labatawusala ngobe labanye benu batawuphunyula enkembeni ngesikhatsi nisakatekele emaveni lamanyenti.+ 9 Labo labatawuphunyula batangikhumbula basetiveni labatfunjelwe kuto.+ Batawubona kutsi ngeva buhlungu ngenca yekungetsembeki* kwabo, futsi bangishiya+ bafuna tithico tabo letenyanyekako.+ Bebafuna tithico tabo letenyanyekako. Bayawuba nemahloni ngenca yabo bonkhe bubi kanye netintfo letenyanyekako labatentile.+ 10 Batawukwati kutsi mine nginguJehova nekutsi kubasongela kwami ngekubaletsela lenhlekelele akusilo lite.”’+
11 “INkhosi Lephakeme Jehova itsi: ‘Shaya tandla, ushaye ngelunyawo phansi ulile ngenca yabo bonkhe lobubi kanye netintfo letenyanyekako letentiwa bantfu baka-Israyeli, ngobe batawubulawa yindlala kanye nesifo lesibulalako.+ 12 Lokhashane utawubulawa sifo lesibulalako, lodvutane abulawe yinkemba, futsi nome ngubani lotawuphunyula kuloku utawubulawa yindlala; ngitalukhokhela kubo lonkhe lulaka lwami.+ 13 Niyawukwati kutsi mine nginguJehova+ ngalesikhatsi bantfu lababulawako bawela emkhatsini wetithico tabo letenyanyekako, emaceleni kwema-al’thare abo,+ kuwo onkhe emagcuma laphakeme, nakuto tonkhe ticongo tetintsaba, nangephansi kwato tonkhe tihlahla letinkhulu kanye nangephansi kwemagala etihlahla letinkhulu lapho bebenta khona iminikelo lenuka kamnandzi kuze behlise intfukutselo yato tonkhe letithico tabo letenyanyekako.+ 14 Sandla sami ngitaselulela kubo, ngente lelive lisale lingenalutfo futsi tonkhe tindzawo labahlala kuto tiyawusala tingenalutfo kwendlula lihlane lelingaseDibla. Bayawukwati kutsi mine nginguJehova.’”