SABELO ngasinye lositfolako esikolweni sikunika litfuba lekutfutfuka. Timisele, futsi nawenta njalo utawuyibona intfutfuko yakho, nalabanye bantfu batawuyibona. (1 Thim. 4:15) Lesikolwa sitakusita kutsi uwatfutfukise kakhulu emakhono akho.

Uba neluvalo yini nawucabanga ngekwetfula inkhulumo embikwelibandla? Loko kuyintfo levamile ngisho nobe sewunesikhatsi lesidze ubhalisile esikolweni. Kodvwa-ke kukhona lokungakusita kutsi unciphise luvalo. Nawusekhaya, tetayete kufundza ngelivi lelivakalako. Nawusemihlanganweni yelibandla, phendvula kanyenti, futsi nangabe sewungummemeteli, hlanganyela njalo ensimini. Kwenta njalo kutawenta kutsi ube nalokuhlangenwe nako ekukhulumeni nelinyenti. Ngetulu kwaloko, tilungiselele kahle tinkhulumo takho kusenesikhatsi uphindze uphrakthize kutibeka ngelivi lelivakalako. Khumbula kutsi inkhulumo yakho utayetfula embikwebantfu labanelutsandvo. Thantaza kuJehova ngembikwekutsi wetfule nome nguyiphi inkhulumo. Yena uyakujabulela kutinika umoya longcwele tinceku takhe nangabe tiwucela.​—Luk. 11:13; Fil. 4:6, 7.

Ungalindzeli kwenta lokungetulu kwemandla akho. Kutsatsa sikhatsi kuba sikhulumi nobe umfundzisi lonelikhono. (Mik. 6:8) Nawusandza kubhalisa esikolweni, ungalindzeli kutsi utawuvele ubeke inkhulumo lesezingeni lelisetulu. Esikhundleni saloko, sebentela ephuzwini linye ngesikhatsi. Tadisha sifundvo lesimayelana nalelo phuzu kulencwadzi. Nawungakhona, yenta nesivivinyo lesikuleso sifundvo. Loko kutakusita kutsi wetayelane neliphuzu losebentela kulo ngembikwekutsi wetfule inkhulumo yakho ebandleni. Nawenta njalo utawutfutfuka.

Indlela Yekulungiselela Sabelo Sekufundza

Kulungiselela kufundzela linyenti kufaka ekhatsi lokungetulu kwekumane nje ufundze emagama alokwatiswa lowabelwe kona. Timisele kucondza kahle kutsi lokwatiswa kukhuluma ngani. Ngekushesha nje nawutfola sabelo sakho, sifundze unalowo mgomo engcondvweni. Yetama kucondza lokushiwo ngumusho ngamunye kanye nemcondvo lovetwa sigaba ngasinye kute ukwati kwendlulisela emaphuzu njengobe anjalo kanye nangemiva lefanele. Nakungenteka, hlola sichazamagama kuze utfole indlela emagama longakawetayeli labitwa ngayo nobe ubute kulabalwati kahle lololwimi kutsi abitwa njani. Kwetayele kahle loko lotawukufundza. Batali kungadzingeka kutsi basite bantfwana babo labancane kute bakhone kwenta loku.

Uke wabelwa yini kutsi ufundze incenye letsite yeliBhayibheli nobe tigaba ku-Sicongosekulindza? Nangabe loko kwatiswa kutsetjuliwe ngelulwimi lwakho, kungaba lusito kakhulu kutsi ukulalele futsi unake indlela labitwa ngayo emagama kanye nemishwana, indlela yekugcizelela kanye neyekushintjashintja livi. Yetama kukusebentisa loko nasewufundza.

Nasewutadisha sabelo sakho, sifundze ngekucophelela nesifundvo lowabelwe sona. Nawungakhona, sibukete lesifundvo ngemuva kwekuphrakthiza kufundza lokwatiswa lowabelwe kona ngelivi lelivakalako tikhatsi letinyenti. Yetama konkhe lokusemandleni akho kunamatsela kuloko lokushiwo ngulesifundvo.

Lokuceceshwa kutakusita ensimini. Nawusensimini uba nematfuba lamanyenti ekufundzela labanye. Njengobe liVi laNkulunkulu linemandla ekugucula kuphila kwebantfu, kubalulekile kutsi ulifundze kahle. (Heb. 4:12) Ungalindzeli kutsi utawuvele ukhone kufundza kahle esabelweni sakho sekucala nobe sesibili. Ngesikhatsi akhuluma nalomdzala longumKhristu lonalokuhlangenwe nako, Pawula watsi: “Chubeka utimisela ekufundzeleni linyenti.”​—1 Thim. 4:13.

Kusebentisa Sihloko Kanye Nekuhlelwa Kwenkhulumo

Kufanele wente njani nangabe esikolweni utfole sabelo lesidzinga kuhlelwa kwenkhulumo?

Kufanele ucabangele nati tintfo letintsatfu: (1) sihloko senkhulumo yakho, (2) kuhlelwa kwenkhulumo kanye nemuntfu lotawube ucoca naye, (3) nesifundvo lowabelwe kusebentela kuso.

Kufanele utfole kwatiswa kwesihloko lowabelwe sona. Usengakachubeki kakhulu naloko, cabangisisa ngekuhlelwa kwenkhulumo yakho kanye nangemuntfu lotawucoca naye, njengobe utawuncuma ngako kutsi ngukuphi kwatiswa lotakusebentisa nendlela lotakwetfula ngayo. Utawusebentisa kuphi kuhlelwa kwenkhulumo? Utawube ukhombisa indlela yekushumayela kumuntfu lomatiko yini nobe utawube ukhombisa loko lokungase kwenteke nawucoca nemuntfu kwekucala? Lomuntfu lococa naye ungakanani kuwe? Utakutsatsa njani loko lohlele kutsi nitawucoca ngako? Kungakanani lasavele akwati? Ngumuphi umgomo lofisa kuwufinyelela ngaloko lenitawucoca ngako? Timphendvulo taleyo mibuto titakuniketa ticondziso letibalulekile mayelana naloko lokufanele ukwente.

Utakutfolaphi kwatiswa kwesihloko lowabelwe sona? Emakhasini 33 kuya ku-38 alencwadzi, kunesehluko lesitsi “Indlela Yekucwaninga.” Sifundze lesehluko bese usebentisa emathulusi ekucwaninga lonawo. Etikhatsini letinyenti utawusheshe utfole kwatiswa lokunyenti kunaloko longakusebentisa. Kufundze kahle kute utfole kutsi kungakanani longakusebentisa. Kodvwa-ke njengobe wenta loko, kukhumbule kuhlelwa kwenkhulumo lotakusebentisa kanye nemuntfu lotawube ucoca naye. Bekisa emaphuzu lotawasebentisa.

Ngembikwekutsi uhlele inkhulumo yakho futsi ucedze kukhetsa emaphuzu lotawasebentisa, fundza sifundvo losebentela kuso. Kusebentisa sicondziso saso ngulenye injongo lebalulekile yesabelo sakho.

Nangabe wetfula inkhulumo yakho ngesikhatsi lowabelwe sona, utawukhona kuyiphetsa kahle, njengobe kutawukhonjiswa ngeluphawu lolutsite nangabe sikhatsi sakho sesiphelile. Nanobe kunjalo, nasisensimini sikhatsi akusiyo intfo lehamba embili ngaso sonkhe sikhatsi. Ngako-ke njengobe ulungiselela, sinake sikhatsi lonikwe sona, kodvwa ciniseka kutsi ufundzisa ngendlela lephumelelako.

Sicondziso Mayelana Nekuhlelwa Kwenkhulumo. Bukisisa kuhlelwa kwenkhulumo lokusekhasini 82 bese ukhetsa lokusebentako ensimini yakini kanye nalokutakusita uvete kutsi kusebenta njani kwatiswa lowabelwe kona. Nangabe sewunesikhatsi kulesikolwa, loko kutsatse njengelitfuba lekutfutfuka kanye nekutfutfukisa emakhono akho ensimini.

Nangabe umbonisi weSikolwa Semsebenti WemaKhristu akwabele kuhlelwa kwenkhulumo, kusebentise. Kuhlelwa kwenkhulumo lokunyenti kumayelana nekufakaza. Nangabe ungazange sewufakaze etimeni letichazwe kulokuhlelwa kwenkhulumo lowabelwe kona, cela lusito ngekukhuluma nebamemeteli labake bakwenta. Nakungenteka, coca ngesihloko lowabelwe sona usebentisa indlela lefana nekuhlelwa kwenkhulumo lotawukusebentisa esikolweni. Loko kutakusita kutsi uwufinyelele umgomo wekuceceshwa kwakho.

Nangabe Utakwetfula Inkhulumo

Nangabe umdvuna, kungenteka kutsi wabelwe kwetfula inkhulumo lemfishane ebandleni. Nawulungiselela tinkhulumo letinjalo, emaphuzu lokufanele uwacabangele ayafanana nalawo lokukhulunywe ngawo lapha ngenhla lasebenta etinkhulumeni letetfulwa njengemiboniso. Umehluko lomkhulu kuba ngulabo labakulalele kanye nendlela yekuyetfula.

Kuhle kutsi ulungiselele inkhulumo yakho ngendlela yekutsi bonkhe labakulalele bazuze kuyo. Labanyenti kubo sebavele bayawati emaciniso eliBhayibheli lasisekelo. Kungenteka nekutsi bayetayele nendzaba lowabelwe kukhuluma ngayo. Cabanga ngaloko lesebavele bakwati ngayo. Yetama kutsi indlela loyetfula ngayo ibente bazuze kulenkhulumo yakho. Tibute: ‘Ngingasisebentisa njani lesihloko kuze ngikhulise lizinga mine nalabo labangilalele lesimati ngalo Jehova? Kulenkhulumo, yini lengasisita kutsi siyicondze intsandvo yaNkulunkulu? Ingasisita njani kutsi sente tincumo letikahle kulelive lelilawulwa tifiso tenyama?’ (Ef. 2:3) Kute utfole timphendvulo letenetisako talemibuto kudzingeka ucwaninge. Nawufundza imiBhalo, ungayifundzeli nje kugcina licala. Yichaze kahle, futsi ukhombise kutsi isisekela njani siphetfo lesifinyelela kuso. (Imis. 17:2, 3) Ungetami kuhlanganisa kwatiswa lokunyenti kakhulu. Yetfula inkhulumo yakho ngendlela letawukwenta kutsi kube melula kuyikhumbula.

Nawulungiselela inkhulumo kufanele unake nendlela yekuyetfula. Ungakutsatsi kancane loku. Nawuphrakthiza kuyetfula, loko kwente ngelivi lelivakalako. Kutadisha ngekutimisela kanye nekwenta loko lokushiwo tifundvo letehlukehlukene kutakusita kakhulu ekutfutfukeni kwakho. Nobe ngabe usikhulumi lesisesisha nobe sewunesikhatsi, lungiselela kahle kute ukhulume ngekuciniseka kanye nangemiva lefanelana nenkhulumo yakho. Nawenta sabelo ngasinye kulesikolwa, wukhumbule njalo umgomo wakho wekusebentisa sipho sekukhuluma losiphiwe nguNkulunkulu kute umdvumise.​—Hla. 150:6.

LUHLELO lweSikolwa Semsebenti WemaKhristu lulungiselelwe kutsi luzuzise lonkhe libandla. Kwatiswa lokulusito kuphindze kwetfulwe kuleminye imihlangano yelibandla, nasemihlanganweni yesifundza kanye neyesigodzi. Nangabe unesabelo kulomunye walemihlangano, usuke unikwe umsebenti lomkhulu. Umphostoli Pawula wakhutsata Thimothi, umbonisi longumKhristu kutsi anake indlela lafundzisa ngayo. (1 Thim. 4:16) Labo lababa khona emihlanganweni yebuKhristu, basuke basebentise sikhatsi sabo lesibalulekile futsi labanye babo basuke bente imetamo lemikhulu kute babe khona kuyo batewujabulela kutfola imfundvo lephatselene nebuhlobo babo naNkulunkulu. Kuniketa imfundvo lenjalo kulilungelo lelikhulu. Ungasifeza njani ngendlela lefanele leso sabelo?

Emaphuzu Lagcamile Ekufundvwa KweliBhayibheli

Lencenye yesikolwa isekelwe ekufundvweni kweliBhayibheli kwamaviki onkhe. Kufanele kugcizelelwe kakhulu indlela loko kwatiswa lokusebenta ngayo kitsi lamuhla. Njengobe kulandzisa lokukuNehemiya 8:8 kusitjela, Ezra kanye nalabo labenabo bafundzela bantfu liVi laNkulunkulu, ‘balichaza’ futsi babasita kutsi balicondze kahle. Kuba nesabelo semaphuzu lagcamile ekufundvwa kweliBhayibheli kukuniketa litfuba lekutsi ukwente loko.

Kufanele usilungiselele njani lesabelo? Nakungenteka, yifundze kusasele liviki nobe ngetulu incenye yeliBhayibheli lefundvwa kulelo viki. Ngemuva kwaloko, cabanga ngelibandla kanye netidzingo talo. Thantaza ngaloko. Ngusiphi seluleko, tibonelo netimiso letikulencenye yeliVi laNkulunkulu letihlangabetana naleto tidzingo?

Kucwaninga kubalulekile. Ikhona yini i-“Watchtower Library” leku-CD-ROM nobe i-“Watch Tower Publications Index” ngelulwimi lwakho? Nangabe letintfo tikhona, tisebentise. Ngekwenta lucwaningo kuloko lesekuvele kushicilelwe mayelana nemavesi lowakhetsile, ungatfola imininingwane lewakhanyisako, tinchazelo letimayelana nekugcwaliseka kwetiphrofetho, kuhlatiywa kwemavesi latsite kutsi achazani ngaJehova nobe kuchazwa kwetimiso. Ungahlanganisi emaphuzu lamanyenti kakhulu. Namatsela emavesini lambalwa. Kuncono kuchaza emavesi lambalwa futsi loko ukwente kahle.

Sabelo sakho sifaka ekhatsi nekucela labo labakulalele kutsi basho indlela labazuze ngayo ekufundvweni kweliBhayibheli kwalelo viki. Yini labayitfolile letawubazuzisa esifundvweni labatichubela sona, ekukhonteni kwemndeni, emsebentini wekushumayela nobe ekuphileni kwabo? Ngubuphi bunguye baJehova lobuvetwa yindlela lasebentelana ngayo nebantfu kanye netive? Yini labayifundzile labo labakulalele lecinise kukholwa kwabo futsi lebenta bambonge Jehova? Ungahlali emininingwaneni leminyenti. Gcizelela loko lokushiwo ngemaphuzu lowakhetsile kanye nendlela lasebenta ngayo.

Tinkhulumo Letisekelwe Etincwadzini TebuKhristu

Letinkhulumo titsatfwa etincwadzini letishicilelwe njengetihloko te-Sicongosekulindza nobe i-“Phaphama!” nobe encenyeni letsite yencwadzi. Esikhatsini lesinyenti utfola kwatiswa lokunyenti kakhulu kunesikhatsi loniketwe sona. Kufanele usente njani lesabelo? Kufanele ufundzise, ungamane nje ukhulumele kwatiswa lokutfolile. Umbonisi kufanele ‘akwati kufundzisa.’​—1 Thim. 3:2.

Cala kulungiselela inkhulumo yakho ngekutadisha kwatiswa lokwabelwe. Fundza imibhalo lekhonjiwe bese uyazindla. Yetama kwenta loko kusenesikhatsi ngembikwelilanga lenkhulumo yakho. Khumbula kutsi bazalwane bakhutsatwa kutsi bakufundze kwatiswa kwetinkhulumo ngembikwekuya emihlanganweni. Sabelo sakho akusiko nje kumane ubukete lokwatiswa nobe ukufishanise kodvwa kutsi ukhombise indlela lokwatiswa lokusebenta ngayo. Sebentisa tincenye letifanele talokwatiswa ngendlela letawuzuzisa libandla.

Njengobe nje nemntfwana ngamunye anebuntfu bakhe lobehlukile, nelibandla ngalinye linetidzingo talo. Umtali lofundzisa ngelikhono akamane nje akhulume ngetimiso tekutiphatsa nemntfwana wakhe kodvwa uyabonisana naye. Uyacabanga ngebuntfu baloyo mntfwana kanye netinkinga letimcindzetelako. Ngendlela lefananako, bafundzisi ebandleni betama kucondza tidzingo tebantfu labakhuluma nabo. Nobe kunjalo, umfundzisi lonekucondzisisa utakubalekela kusebentisa tibonelo letingabangela emahloni kulomunye walabamlalele. Utawuveta tinzuzo lesevele tijatjulelwa libandla ngekuhamba etindleleni taJehova futsi utawugcamisa seluleko semiBhalo lesitawusita libandla kutsi lilwisane ngemphumelelo netinkinga lelibhekana nato.

Kufundzisa ngelikhono kuyatitsintsa tinhlitiyo talabalalele. Loko kudzinga kutsi ungamane nje usho emaciniso latsite, kodvwa wente labo labakulalele kutsi bakutsandze loko lokushoko. Kudzinga nekutsi ubakhatsalele labo lobafundzisako. Belusi kufanele bawati kahle umhlambi. Nangabe bahlale batikhumbula tinkinga labanye kuwo labahlangabetana nato, batawukhona kubakhutsata, bakhombise kusicondza simo labakuso baphindze bavelane nabo.

Bafundzisi labanelikhono bayati kutsi inkhulumo kufanele ibe nemgomo locacile. Kwatiswa kwayo kufanele kwetfulwe ngendlela yekutsi emaphuzu layinhloko agcame futsi akhumbuleke. Labalalele kufanele bakhone kuwakhumbula emaphuzu labatawasebentisa ekuphileni kwabo.

Umhlangano Wemsebenti

Kuba simo lesehlukile nawabelwe kwetfula inkhulumo lesekelwe ku-Msebenti Wetfu WeMbuso. Kuyo, ungase utjelwe kutsi ucoce nebantfu labakulalele ngako konkhe kwatiswa loniketwe kona, ungakhetsi lokubonakala kuncono. Sita labo labakulalele kutsi bazindle ngemibhalo lokusekelwe kuyo nome ngabe ngusiphi seluleko lesiniketiwe. (Thit. 1:9) Sikhatsi sisuke sikaliwe, ngako-ke etikhatsini letinyenti angeke ukhone kufaka lokunye kwatiswa.

Ngalesinye sikhatsi, ungacelwa kutsi wetfule kwatiswa lokungatfolakali ku-Msebenti Wetfu WeMbuso. Kungase kutsiwe kutsatse esihlokweni lesiku-Sicongosekulindza nobe uniketwe emaphuzu lambalwa. Kushiyelwa kuwe njengemfundzisi kutsi ucabange ngetidzingo telibandla letihlobana nekwatiswa lowabelwe kona. Kungase kudzingeke nekutsi usebentise umfanekiso lomfishane nobe ulandzise lokuhlangenwe nako lokuhambisana naleyo ndzaba. Khumbula kutsi sabelo sakho asisiko nje kumane ukhulume ngalendzaba, kodvwa indlela lowetfula ngayo inkhulumo yakho kufanele isite libandla liwufeze umsebenti loshiwo liVi laNkulunkulu futsi likujabulele kuwenta.​—Imis. 20:20, 21.

Nawusalungiselela sabelo sakho, cabanga ngetimo talabo labasebandleni. Bancome ngaloko lesebavele bakwenta. Kusebentisa emaphuzu lavetwe kulokwatiswa lowabelwe kona kungakukhulisa njani kuphumelela kwabo kanye nenjabulo yabo emsebentini wekushumayela?

Lesabelo sakho sinawo yini umboniso nobe incociswano? Nangabe kunjalo, kufanele wente emalungiselelo kusenesikhatsi. Kungaba melula kutikhandza sewucela lotsite kutsi akwentele lawo malungiselelo, kodvwa loko akubi nemiphumela lemihle ngaso sonkhe sikhatsi.