Uyemukelwa ESikolweni Semsebenti WemaKhristu

EMAVENI langetulu kwa-200 emhlabeni wonkhe, tigidzi tebantfu tiyazuza liviki ngalinye emfundvweni yeSikolwa Semsebenti WemaKhristu. Labanye basandza kucala kulesikolwa, kantsi labanye sebaneminyaka leminyenti bakuso. Lesikolwa sichutjwa etindzaweni letinyenti, ngako-ke nobe ngabe uhlala kuphi, ungalutfola loluhlelo lwalemfundvo. Bantfu babo bonkhe budzala, bato tonkhe tinhlanga, labafundzile nobe labangakafundzi, bayitfola mahhala lemfundvo.

Ngesikhatsi lesikolwa sicala kusebenta emabandleni aBoFakazi BaJehova nga-1943, injongo yaso yachazwa ngalendlela: “Kutsi kusitwe bonkhe ‘bantfu labetsembekile,’ labalivile liVi laNkulunkulu baphindze baba nekukholwa kulo, kute ‘bakwati kufundzisa labanye,’ . . . kanye nekutsi ngamunye wabo . . . aniketwe likhono lekufakaza kulabanye ngelitsemba lanalo.” (Course in Theocratic Ministry, likh. 4) Umgomo walesikolwa solo awukashintji kute kube ngulamuhla.

Yini lencono lesingayenta ngesipho lesivela kuNkulunkulu sekukwati kukhuluma? LiBhayibheli liyaphendvula: “Konkhe lokuphilako akudvumise Simakadze.” (Hla. 150:6) Nasenta kanjalo, sijabulisa inhlitiyo yaBabe wetfu losezulwini. Simniketa bufakazi bekutsi tinhlitiyo tetfu tiyabonga ngebuhle bakhe kanye nangelutsandvo lasibonisa lona. Kungako emaKhristu akhutsatwa kutsi ngaso sonkhe sikhatsi ‘anikele kuNkulunkulu umhlatjelo wekudvumisa, lokusitselo setindzebe letivuma libito lakhe embikwebantfu.’ (Heb. 13:15) Kute sikusite utfutfukise likhono lakho lekusebentisa lesipho lesivela kuNkulunkulu Jehova, khona utewumdvumisa, uyemukelwa kutsi ubhalise eSikolweni Semsebenti WemaKhristu.

Nanobe kulesikolwa kunakwa kakhulu likhono lekufundzela linyenti, kanye nemakhono ekukhuluma nekufundzisa, tinzuzo taso atigcini lapho. Nawuchubeka uba nencenye kuso, utawutfola lusito lwekutfutfukisa emakhono lamahle, njengekufundza, kulalela, kukhumbula, kutadisha, kucwaninga, kuhlatiya tintfo, kuhlela, kucocisana nalabanye, kuphendvula imibuto kanye nekubhala emaphuzu. LiBhayibheli kanye netincwadzi letisekelwe kulo, litakuniketa lusito lolusisekelo kute ukwati kutadisha, kuphendvula kanye nekwetfula tinkhulumo kulesikolwa. Njengobe ugcwalisa ingcondvo yakho ngemaciniso laligugu latfolakala eVini laNkulunkulu, utawufundza kucabanga njengaYe. Loko kutawuba lusito lolukhulu emphilweni yakho yonkhe. Mayelana nebumcoka beliVi laNkulunkulu, naku lokwabhalwa nguWilliam Lyon Phelps, lobekanguthishela wasenyuvesi ngelikhulu lesi-20 leminyaka: “Wonkhe umuntfu lonelwati loluphelele ngeliBhayibheli angabitwa kufanele ngekutsi sifundziswa. . . . Ngikholelwa kutsi kuba nelwati lweliBhayibheli kodvwa ube bete imfundvo yasekolishi kuncono kakhulu kwendlula kuba nemfundvo yasekolishi kodvwa ube bete lwati lweliBhayibheli.”

Indlela Longazuza Ngayo Ngalokugcwele

Sitfombe lesigcwele likhasi lesisekhasini 4

Kute umfundzi ngamunye azuze ngalokugcwele kulemfundvo letfolakala eSikolweni Semsebenti WemaKhristu, kufanele atimisele. Umphostoli Pawula wakhutsatsa Thimothi, umKhristu labekanye naye watsi: “Zindla ngaletintfo, utinikele kuto, kuze intfutfuko yakho itewubonakala kahle kubo bonkhe bantfu.” (1 Thim. 4:15) Ngutiphi tindlela longatisebentisa kute uphumelele kuloku?

Nangabe timo tikuvumela, kufanele ube khona kulesikolwa liviki ngalinye. Yisebentise ngalokugcwele incwadzi letsi Zuza Emfundvweni YeSikolwa Semsebenti WemaKhristu. Bhala libito lakho esikhaleni lesisekhasini lekucala. Ungayishiyi lencwadzi nawuta kulesikolwa. Ungaphindze ubhale nemaphuzu kuyo. Nawufundza kwatiswa lokubalulekile kuyo locabanga kutsi kutakusita, kudvwebele. Sebentisa tikhala letinkhulu letiseceleni kwelikhasi, kute ubhale emaphuzu longawasebentisa, lowafundze ngesikhatsi kuchubeka lesikolwa.

Kuneluhlelo lwaleSikolwa Semsebenti WemaKhristu lolulungiselelwe, futsi lokufanele lulandzelwe. Loluhlelo luphindze lube nekwatiswa lokumayelana nekutsi kufanele sichutjwe njani lesikolwa. Ungase ukutfole kulusito kulugcina kulencwadzi yesikolwa, kute ukwati kulutfola melula.

Nawulungiselela tincenye talesikolwa liviki ngalinye, khumbula kutsi liBhayibheli liyincwadzi leyinhloko lesetjentiswako. Tibekele umgomo wekufundza nobe ngabe nguyiphi indzima yeliBhayibheli lokungenteka ilungiselelwe kufundvwa ngalelo viki. Nangabe ungakhona kukufundza kusenesikhatsi kwatiswa kwetinkhulumo letehlukehlukene, naloko kungakuzuzisa kakhulu.

Nakuchubeka lesikolwa, kuba nematfuba ekutsi labo labakhona bahlanganyele ngetimphendvulo. Wasebentise ngalokugcwele lawo matfuba. Kuphendvula kubalulekile kute ukhone kukhumbula loko lokuvile, uphindze ukusebentise ekuphileni kwakho.

Bonkhe bafundzi batawuniketwa litfuba lekwetfula tinkhulumo nobe lekwenta imiboniso phambi kwelibandla. Wasebentise kahle ematfuba lanjalo. Timisele kutfutfukisa kunobe ngabe ngusiphi sifundvo losebentela kuso. Utawuniketwa seluleko kute uchubeke utfutfuka. Semukele leso seluleko. Encwadzini yakho, bhala phansi tintfo longatsandza kutitfutfukisa. Njengobe kulukhuni ngemuntfu kutibona ngendlela labanye labambona ngayo, seluleko selutsandvo lesisekelwe eBhayibhelini loniketwa sona, singakusita kakhulu kutsi utfutfuke. Loku kuliciniso ngisho nobe sewuneminyaka leminyenti ukulesikolwa.—Taga 1:5.

Ungatsandza yini kutfutfuka ngekushesha? Nawutsatsa sinyatselo kucala, loko kungenteka. Kutadishe usesekhaya kwatiswa lokutawucocwa ngako enkhulumeni ngayinye yesikolwa. Loko kutakusita kutsi ukhone kuvolontiya inkhulumo letsite nakudzingeka, futsi kwenta kanjalo kutakunika lokuhlangenwe nako. Nangabe labanye betfula tinkhulumo, lalelisisa ngekucophelela. Sizatfu saloko sikutsi sifundza kulabanye.

Ngetulu kwaloko, nangabe timo takho tikuvumela, ungenta kutsi utfutfuke ngekushesha ngekutsi utadishe lencwadzi kusenesikhatsi. Ngemuva kwekufundza ngekucophelela loko lokucuketfwe tifundvo letingu-15 letilandzelako, yendlulela encenyeni letsi “Luhlelo Lwekutfutfukisa Likhono Lekuba Sikhulumi Nekuba Ngumfundzisi,” lecala ekhasini 78. Kwekucala, tadisha sifundvo ngasinye, bese wenta tivivinyo letihambisana naso. Kusebentise ensimini loko lokufundzako. Loko kungakusita kute utfutfuke njengesikhulumi nanjengemfundzisi weliVi laNkulunkulu.

Imfundvo loyitfola eSikolweni Semsebenti WemaKhristu itakusita etindzabeni letimcoka kakhulu ekuphileni. Njengobe siphila ngenca yentsandvo yaNkulunkulu, kumdvumisa kusho kutsi siyayicaphela injongo yekuphila kwetfu. Nkulunkulu Jehova kuyamfanela kutsi simdvumise kakhulu. (Semb. 4:11) Lemfundvo lesiyitfola kulesikolwa iyindlela yekufeza loku, kute sicabange ngendlela lecacile, sente tincumo letihlakaniphile siphindze sikhulume ngemphumelelo ngemaciniso lamangalisako latfolakala eVini laNkulunkulu leliphefumulelwe.

SISEKELO LOKUFANELE WAKHELE KUSO

Kukwati kukhuluma kahle nebantfu kulikhono, futsi akusibo bonkhe bantfu labanalo. Tinyenti tincwadzi letishicilelwe kute tisite bantfu balitfutfukise lelikhono. Nobe kunjalo, uMdali, Loyo lowaniketa bantfu likhono lekukhuluma, unelwati lolunyenti lwendlela yekukhuluma neyekufundzisa, kwendlula nobe ngabe ngumuphi thishela longumuntfu. Njengobe iSisebenti Lesiyingcweti, iNdvodzana yakhe letelwe yodvwa yabambisana naye ekwenteni ingcondvo yemuntfu, ekwenteni titfo tekukhuluma kanye nayo yonkhe indalo lemangalisako.

Ngesikhatsi kudalwa tingilosi kanye nebantfu, leNdvodzana yaba nguLivi waNkulunkulu, Loyo loyinhloko labesetjentiswa nguNkulunkulu kute endlulisele ticondziso takhe. (Taga 8:30; Joh. 1:1-3) LeNdvodzana yatfunyelwa emhlabeni iyiNkhosi Jesu Khristu. Imibhalo lephefumulelwe isho naku lokulandzelako ngayo: “Lesicumbi sebantfu sabamba wangentansi ngendlela labefundzisa ngayo.” Labo labamuva ngesikhatsi akhuluma, batsi: “Kute umuntfu lowase wakhuluma njengalona.” (Mat. 7:28; Joh. 7:46) Tikhatsi letingetulu kwa-40, emaVangeli achaza kutsi Jesu unguMfundzisi, futsi loko kuyamfanela. Kunyenti lesingakufundza kuye mayelana nekukhuluma kanye nekufundzisa.

LiBhayibheli licuketse nemininingwane lemayelana nendlela Jehova Nkulunkulu lawasebentisa ngayo emadvodza kanye nebafati labavela etindzaweni letehlukehlukene kute afeze intsandvo yakhe. Labanye babo betfula imilayeto lemifisha kodvwa lebalulekile. Linyenti labo alizange likhulume embikwebantfu labanyenti, kodvwa ngekwetsembeka, laniketa bufakazi ngaNkulunkulu weliciniso nangenjongo yakhe. Kungenteka kutsi labanyenti kubo bebangasito tikhulumi letinelikhono, kodvwa Nkulunkulu wayibusisa imetamo yabo. Singafundza kuloko liBhayibheli lelisitjela kona ngekutsi bawufeza njani umsebenti labebaphatsiswe wona.—Hla. 68:11.

Kuliciniso kutsi liBhayibheli alisiyo incwadzi lemayelana nekukhuluma embikwelinyenti. Kodvwa labo labalifundza ngekucondza bangatfola kutsi licuketse kwatiswa lokubalulekile lokumayelana nekukhuluma kanye nekufundzisa ngelikhono. Ngako-ke, incwadzi letsi Zuza Emfundvweni YeSikolwa Semsebenti WemaKhristu itawukwakhela kuleso sisekelo.