Wake wacabanga yini kufundza liBhayibheli kodvwa wase uyayekela ngenca yaletizatfu letilangenhla? Bantfu labanyenti bayavilapha kufundza liBhayibheli. Kodvwa ungatsini nawungatfola kutsi liBhayibheli lingakusita kutsi uphile imphilo lemnandzi naleyenetisako? Bewungenta njani nawungatfola kutsi tikhona tindlela letingakwenta ukujabulele kakhudlwana kulifundza? Ungatsandza yini kwati kutsi liBhayibheli lingakusita kuphi?

Asewucabange nganaku lokushiwo ngulabanye ngendlela labasitakala ngayo nabacala kufundza liBhayibheli.

Ezekiel, loseminyakeni yabo-20 utsi: “Esikhatsini lesendlulile bengifanana nemuntfu loshayela imoto kepha angati kutsi uyakuphi. Kodvwa kufundza liBhayibheli kwangisita kutsi ngibe nenjongo ekuphileni. Lineteluleko letilusito lengingatisebentisa onkhe malanga.”

Frieda naye loseminyakeni yabo-20 uchaza utsi: “Bengivame kusheshe ngihlutfuke, kodvwa ngenca yekufundza liBhayibheli, besengikhona kutibamba. Loku kwente kutsi kube melula ngami kuvana nebantfu futsi senginebangani labanyenti.”

Eunice longumake loseminyakeni yabo-50 utsi mayelana neliBhayibheli: “Liyangisita kutsi ngibe ngumuntfu lokahle futsi ngiyekele imikhuba yami lemibi.”

Letibonelo letingenhla kanye netigidzi tebantfu tibonile kutsi kufundza liBhayibheli kungakusita kutsi uphile imphilo lejabulisako. (Isaya 48:17, 18) LiBhayibheli lingaphindze likusite kutsi (1) wente tincumo letihlakaniphile, (2) ukhetse bangani labakahle, (3) ukhone kubhekana nekucindzeteleka, futsi (4) lokubaluleke kakhulu ufundze liciniso ngaNkulunkulu. Seluleko lesiseBhayibhelini sivela kuNkulunkulu, ngako ngeke utisole nangabe usilalela. Nkulunkulu akabaniketi bantfu seluleko lesibi.

Lokubalulekile kutsi uvele nje ucale kufundza liBhayibheli. Ngutiphi tindlela letisebentako letingenta kufundza kwakho liBhayibheli kube melula futsi kujabulise?

Nguyiphi indlela yekufundza liBhayibheli lengakusita kutsi ukujabulele kulifundza futsi uzuze kulo? Sicela unake nati tintfo letisihlanu letisite bantfu labanyenti.

Tfola indzawo lekahle. Yetama kutfola indzawo lethulile. Nciphisa tintfo letingakuphatamisa kute ukhone kunakisisa loko lokufundzako. Kuba sendzaweni lekhanya kahle nalengenisa umoya kungakusita kutsi uzuze kuloko lokufundzako.

Bani nengcondvo lefanana neyemntfwana. LiBhayibheli livela kuBabe wetfu losezulwini. Ngaleso sizatfu, ungazuza kulo nangabe unesimo lesinjengesemntfwana lotimisele kufundza kumtali wakhe lamtsandzako. Yetama kukhweshisa noma ngumuphi umbono longasiwo ngeliBhayibheli kuze Nkulunkulu akhone kukufundzisa.​—Tihlabelelo 25:4.

Thantaza ngaphambi kwekutsi ucale kufundza. Akumangalisi kutsi sidzinga lusito lwaNkulunkulu kuze sicondze liBhayibheli ngobe licuketse imicabango yakhe. Nkulunkulu wetsembisa kutsi utawubapha “umoya longcwele labo labamcelako.” (Lukha 11:13) Umoya longcwele ungakusita kutsi ucondze imicabango yaNkulunkulu. Ngekuhamba kwesikhatsi, lomoya ungakusita uvule ingcondvo yakho kute ucondze “ngisho netintfo letijulile taNkulunkulu.”​—1 Khorinte 2:10.

Yetama kukucondza loko lokufundzako. Ungafundzeli nje kucedza indzaba. Cabangisisa ngaloko lokufundzako. Tibute imibuto lefana nalena: ‘Ngutiphi tintfo letinhle lengitibona kulomuntfu lengifundza ngaye? Ngingakusebentisa njani loku ekuphileni kwami?’

Tibekele imigomo lecondzile. Kuze kufundza kwakho liBhayibheli kuzuzise, yetama kufundza lokutsite lokutawuba lusito ekuphileni kwakho. Nayi leminye imigomo longatibekela yona: ‘Ngifuna kufundza lokwengetiwe ngaNkulunkulu lucobo lwakhe.’ ‘Ngifuna kutfutfukisa buntfu bami kuze ngibe ngumuntfu lokahle, ngibe yindvodza noma umfati lokahle.’ Ngemuva kwaloko kufanele bese ukhetsa emavesi eliBhayibheli langakusita kutsi ufinyelele leyo migomo.a

Letintfo letisihlanu lesisandza kucoca ngato tingakusita kutsi ucale kufundza liBhayibheli. Kodvwa ungakwenta njani kufundza kwakho liBhayibheli kujabulise kakhudlwana? Sihloko lesilandzelako sinemaphuzu lamahle langakusita kuloku.

Kutakujabulisa yini kufundza liBhayibheli noma kutakudzina? Ngalokuvamile kuya ngendlela loyisebentisako nawulifundza. Manje asesicoce ngaloko longakwenta kute kufundza kwakho liBhayibheli kujabulise futsi kube mnandzi kakhulu.

Funa lihumusho leliBhayibheli leletsembekile futsi lwelulwimi lolwetayelekile. Nawufundza indzaba lenemagama akadzeni kakhulu nalangevakali, vele ngeke ukujabulele loko lokufundzako. Ngako khetsa liBhayibheli lelibhalwe ngelulwimi loluva kahle, lelitawutsintsa inhlitiyo yakho. Kantsi futsi kufanele kube lihumusho lelibekeke ngendlela lenembile.a

Lifundze usebentisa tintfo tebuchwepheshe. Lamuhla liBhayibheli alitfolakali nje kuphela lingumbhukudvu wencwadzi leshicilelwe, kodvwa liphindze litfolakale nasetintfweni tebuchwepheshe. Ungakhona kufundza lamanye emaBhayibheli ku-internet noma utitsatsele wona kule-internet kute uyotifundzela wona ku-computer, ku-tablet noma elucingweni lwakho. Letinye taletintfo tebuchwepheshe tinemathuluzi ekubuka lamanye emavesi eliBhayibheli lakhuluma ngalesihloko losifundzako. Aphindze abe lusito ekucatsaniseni loko lokushiwo ngemahumusho lehlukahlukene. Nangabe wena utsandza kulalela tintfo letitsetjuliwe kunekutifundza, liBhayibheli liphindze litfolakale njengencwadzi letsetjuliwe. Bantfu labanyenti bayakujabulela kulalela tintfo letitsetjuliwe nabahamba, nabenta imisebenti yasekhaya noma nabenta noma ngumuphi umsebenti lobavumela kutsi balalele lokutsite. Sikukhutsata kutsi ulifundze usebentisa indlela letakulungela.

Lifundze usebentisa emathuluzi ekudadisha liBhayibheli. Emathuluzi ekudadisha liBhayibheli angakusita kutsi uzuze kakhulu kuloko lokufundzako. Kunemabalave etindzawo lokukhulunywa ngato eBhayibhelini langakusita kutsi ukhone kubona tindzawo lofundza ngato bese utihlanganisa naloko lobekwenteka kuleto tindzawo. Tihloko letifanana naleti letikulomagazini noma letisencenyeni letsi “Bible Teachings” ku-website letsi jw.org tingakusita ukhone kucondza tintfo letinyenti lokukhulunywa ngato eBhayibhelini.

Sebentisa tindlela letehlukahlukene nawulifundza. Nangabe kumatima kufundza liBhayibheli kusukela kuGenesisi kuya kuSembulo, kungaba njani ucale kulifundza ngetincenye lotitsandza kakhulu? Nangabe kukhona lofuna kukwati ngebantfu labadvumile lokukhulunywa ngabo eBhayibhelini, ungafundza ngalabo bantfu, kube yindlela yakho yekufundza liBhayibheli. Ebhokisini lelitsi “Fundzisisa LiBhayibheli Kute Ubati Kahle Bantfu Lelikhuluma Ngabo,” kunetibonelo tebantfu longafundza ngabo eBhayibhelini. Ungaphindze ulifundze ngetihloko noma ulifundze ngendlela tintfo letenteka ngayo ngekulandzelana kwato. Sikukhutsata kutsi wetame yinye yaletindlela.

LiBhayibheli alisiyo nje incwadzi levamile. Licuketse teluleko letivela kuMdali wetfu. (2 Thimothi 3:16) Linemlayeto lonemandla lositsintsa kakhulu. Ecinisweni liBhayibheli litsi: “Livi laNkulunkulu liyaphila, linemandla.” (Hebheru 4:12) Linemandla ekutfutfukisa indlela lesiphila ngayo nganati tindlela letimbili letiyinhloko​—lisinika lusito lwendlela lekahle yekuphila, liphindze lisisite sati Nkulunkulu netetsembiso takhe.​—1 Thimothi 4:8; Jakobe 4:8.

Kutfutfukisa indlela lesiphila ngayo nyalo. LiBhayibheli lingasisita etindzabeni letitsintsa umuntfu ngalokucondzile. Liniketa seluleko lesilusito kunaku lokulandzelako.

• Endleleni lesiphila ngayo nalabanye.​—Efesu 4:31, 32; 5:22, 25, 28, 33.

• Endleleni umuntfu lativa ngayo nasemphilweni yakhe imbala.​—Tihlabelelo 37:8; Taga 17:22.

• Ekutiphatseni.​—1 Khorinte 6:9, 10.

• Nasetindzabeni tetemnotfo.​—Taga 10:4; 28:19; Efesu 4:28.a

Labasebasha labashadene base-Asia bakubona kubaluleka kweseluleko seliBhayibheli. Njengabo bonkhe bantfu labasandza kushada, nabo bebalwisana nekungafani kwebuntfu babo kanye nekungakwati kukhulumisana ngalokukhululekile. Kodvwa bacala kusebentisa loko lebebakufundza eBhayibhelini. Kwaba namuphi umphumela? Vicent utsi: “Loko lengakufundza eBhayibhelini kwangisita ngalungisa tinkinga temshado wetfu ngendlela lenelutsandvo. Kuphila ngaloko liBhayibheli lelikushoko kusisitile saphila imphilo lejabulisako emshadweni wetfu.” Annalou umfati wakhe naye utsi: “Kufundza ngetibonelo letiseBhayibhelini kusisite kakhulu. Nyalo sengiyajabula emshadweni wetfu futsi sengiyenetiseka ngemigomo lesitibekele yona.”

Kumati kahle Nkulunkulu. Ngaphandle kwaloko lakushoko ngemshado, Vicent uphindze atsi: “Ngekufundza nje liBhayibheli, nyalo sengitiva ngisondzelene kakhulu naJehova.” Loko lokubonwe ngu-Vicent kuveta liphuzu lelibaluleke kakhulu, lekutsi liBhayibheli lingakusita wetayelane naNkulunkulu. Ngekwenta njalo utawutfola kutsi ngeke nje ugcine ngekuzuza eselulekweni salo, kodvwa utawukhona nekumati kahle aze abe ngumngani wakho lomkhulu. Utawubona nekutsi wembula lokunyenti mayelana nelikusasa, sikhatsi lapho utawujabulela “kuphila lokungukonakona”​—lokukuphila lokuphakadze. (1 Thimothi 6:19) Lesi sipho lokute lenye incwadzi lengasitjela ngaso.

Nangabe utinika sikhatsi sekufundza liBhayibheli futsi utimisela, nawe utawutfola lokunyenti lokutakusita kutsi utfutfukise indlela lophila ngayo futsi umati kahle Nkulunkulu. Noko njengobe uchubeka ufundza liBhayibheli kungenteka ube nemibuto leminyenti. Nangabe kunjalo, hlale ukhumbula sibonelo seMtopiya lowaphila eminyakeni lengu-2 000 leyendlulile. Abenemibuto leminyenti mayelana neliBhayibheli. Ngalesikhatsi abutwa kutsi uyakuva yini loko lakufundzako, waphendvula watsi: “Ngingakucondza njani nangabe kute umuntfu longichazelako?”b Wabese ulwemukela ngemdlandla lusito lwaFiliphi labengumfundzisi lonelikhono futsi lobekangumfundzi waJesu. (Imisebenti 8:30, 31, 34) Ngako nangabe nawe ufuna kufundza lokunyenti ngeliBhayibheli, sicela ufake sicelo sakho ku-www.jw.org/ss noma ubhalele ekhelini lidvutane nawe kulawa lakulomagazini. Ungaphindze utsintsane naBoFakazi BaJehova labasedvutane nawe noma ubavakashele eHholweni leMbuso lelisendzaweni yakini. Sikukhutsata kutsi utsatse liBhayibheli lakho lamuhla ulifundze futsi ulivumele litfutfukise indlela lophila ngayo.