Jehova Usinika Sicinisekiso Sekutsi Utawukwenta Umhlaba Ube LiPharadisi

1. Bewutsini umlayeto wemphrofethi Isaya lobewuya kuma-Israyeli?

UMPHROFETHI Isaya wachaza Jehova ngekutsi ‘unguNkulunkulu weliciniso.’ Ligama lelitsi “liciniso” nalihunyushwe njengobe linjalo lisho kutsi “amen.” (Isa. 65:16, umbhalo longentasi) “Amen” usho kutsi “akube njalo,” nobe “kunjalo.” EBhayibhelini, nakusetjentiswa ligama lelitsi “amen” nangabe kukhulunywa ngaJehova nobe ngaJesu, loko kusuke kusicinisekiso sekutsi intfo letsite iliciniso. Ngako umlayeto wa-Isaya lebewuya kuma-Israyeli bewucacile: Loko Jehova latsi kutawukwenteka kuliciniso. Jehova ukukhombisile loko kutsi kuliciniso ngekutsi afeze tonkhe tetsembiso takhe.

2. Yini leyenta sisetsembe setsembiso saJehova lesimayelana nelikusasa letfu, futsi ngumiphi imibuto lesitawucoca ngayo?

² Singatetsemba yini tetsembiso taJehova letimayelana nelikusasa letfu? Ngemuva kweminyaka lengaba ngu-800 kwendlule sikhatsi sa-Isaya, umphostoli Pawula wachaza kutsi yini leyenta tetsembiso taJehova tihlale tiliciniso. Watsi: “Nkulunkulu angeke acale emanga.” (Heb. 6:18) Njengobe nje umtfombo wemanti ungeke ukhiphe emanti lamnandzi nalaneluswayi, naJehova longuMtfombo weliciniso angeke awakhulume emanga. Ngako singakwetsemba konkhe Jehova lakushoko lokufaka ekhatsi tonkhe tetsembiso takhe ngelikusasa letfu. Kulesihloko, sitawucoca nganayi imibuto: Yini Jehova lasetsembise kusinika yona esikhatsini lesitako? Ngusiphi sicinisekiso lasinike sona sekutsi setsembiso sakhe sitawugcwaliseka?

WETSEMBISENI JEHOVA?

3. (a) Ngusiphi setsembiso lesitsandvwa kakhulu bantfu baNkulunkulu? (Sembulo 21:3, 4) (b) Yini leshiwo ngulabanye nasibacocela ngalesetsembiso?

³ Tonkhe tinceku taNkulunkulu letisemhlabeni wonkhe tisitsandza kakhulu lesetsembiso lesitawucoca ngaso. (Fundza Sembulo 21:3, 4.) Jehova wetsembisa kutsi kutawuba nesikhatsi lapho kufa kungeke “kusaba khona, futsi kulila, nekukhala kanye nebuhlungu ngeke kusaba khona.” Linyenti letfu livame kuwafundza nalishumayela lamavi ladvudvutako lamayelana nekutsi kutawuba njani kuphila ePharadisi. Labanye bativa njani nabeva lesetsembiso? Batsi: “Loku kuhle kakhulu kutsi kungenteka.”

4. (a) Yini Jehova layatiko nalatsi itakwenteka? (b) Ngaphandle kwekwenta setsembiso, yini lenye Jehova layentile?

⁴ Ngesikhatsi Jehova aphefumulela umphostoli Johane kutsi abhale lesetsembiso lesimayelana neliPharadisi, bekati kutsi sitasicocela labanye nasishumayela ngemlayeto weMbuso. Jehova waphindze wabona kusengaphambili kutsi labanyenti bebatakutfola kumatima kusetsemba lesetsembiso ‘setintfo letinsha.’ (Isa. 42:9; 60:2; 2 Khor. 4:3, 4) Ngako yini lengacinisekisa tsine kanye nalabanye kutsi letibusiso lokukhulunywa ngato kuSembulo 21:3, 4 titawugcwaliseka? Jehova usinikete tizatfu letinemandla letisenta siciniseke kutsi utasifeza lesetsembiso. Ngutiphi letizatfu?

JEHOVA UYASICINISEKISA KUTSI UTASIFEZA SETSEMBISO SAKHE

5. Ngutiphi tizatfu letisenta sisetsembe setsembiso saNkulunkulu seliPharadisi, futsi titfolakala kuphi?

⁵ Lamavesi lalandzelako asiniketa tizatfu letisenta siciniseke kutsi Jehova utasifeza setsembiso sakhe seliPharadisi. Atsi: “Loyo lohleti esihlalweni sebukhosi watsi: ‘Ngenta tonkhe tintfo tibe tinsha.’ Waphindze watsi: ‘Bhala ngobe lamavi etsembekile futsi aliciniso.’ Wabuye watsi kimi: ‘Sekwentekile! Mine ngingu-Alfa na-Omega, sicalo nesiphetfo.’”​—Semb. 21:5, 6a.

6. Sicinisekiso lesibhalwe kuSembulo 21:5, 6 sisisita njani kutsi sisetsembe kakhulu setsembiso saNkulunkulu?

⁶ Lamavi asenta njani sisetsembe kakhulu setsembiso saNkulunkulu? Nayikhuluma ngalamavesi, incwadzi letsi IsAmbulo—Umvuthwandaba Waso Omkhulu Useduze! itsi: “Kulamavesi, singafananisa loko Jehova lakwentako nekutsi uyasayina. Uyasicinisekisa kutsi nakanjani utasifeza setsembiso sakhe.”b Setsembiso saNkulunkulu sibhalwe kuSembulo 21:3, 4. Kodvwa kuvesi-5 navesi-6, singatsi Jehova uyasayina, usicinisekisa ngekutsi loko lakwetsembisile utakufeza nakanjani. Ase sibone kutsi Jehova usicinisekisa njani kutsi singametsemba.

7. Ngubani lokhuluma ekucaleni kwavesi 5, futsi yini leyenta loko kubaluleke?

⁷ Vesi-5 ucala ngemavi latsi: “Loyo lohleti esihlalweni sebukhosi watsi.” (Semb. 21:5a) Lamavi abalulekile ngobe encwadzini yeSembulo, Jehova ukhuluma tikhatsi letintsatfu asebentisa imibono futsi lesi ngulesinye sato. Lesicinisekiso asisiniketwa yingilosi lenemandla nobe nguJesu, kodvwa sishiwo nguJehova matfupha! Loku kusikhombisa kutsi singakwetsemba mbamba loko labese uyakusho. Sisho ngani? Ngobe Jehova ‘angeke acale emanga.’ (Thit. 1:2) Ngako singawetsemba lamavi lesiwafundza kuSembulo 21:5, 6.

“NGENTA TONKHE TINTFO TIBE TINSHA”

8. Yini Jehova layishoko kuze agcizelele kutsi setsembiso sakhe sitawufezeka? (Isaya 46:10)

⁸ Ngemuva kwaloko Nkulunkulu watsi: “Ngenta tonkhe tintfo tibe tinsha!” (Semb. 21:5) Kuliciniso kutsi Jehova ukhuluma ngetingucuko letitakwenteka esikhatsini lesitako. Kodvwa uyaciniseka kutsi lesetsembiso sitawufezeka kangangekutsi ukhuluma kube ngatsi letingucuko setivele tiyenteka.​—Fundza Isaya 46:10.

9. (a) Emavi latsi “ngenta tonkhe tintfo tibe tinsha” asho tiphi tintfo letimbili letentiwa nguJehova? (b) Yini letakwenteka ‘kulamazulu nemhlaba’ lokukhona nyalo?

⁹ Ase sicoce ngemavi lalandzelako lakuSembulo 21:5 latsi: “Ngenta tonkhe tintfo tibe tinsha!” Kulesehluko, lamavi asho tintfo letimbili letitakwentiwa nguJehova, utawubeka lokunye esikhundleni salokunye futsi abuyisele tintfo njengobe betinjalo. Kwekucala, yini Jehova latayibeka esikhundleni salokunye? Sembulo 21:1 sitsi: “Lizulu lelidzala nemhlaba lomdzala sekwendlulile.” “Lizulu lelidzala” lisho bohulumende labalawulwa nguSathane nemadimoni akhe. (Mat. 4:8, 9; 1 Joh. 5:19) EBhayibhelini, ligama lelitsi “umhlaba” lingasho bantfu labahlala emhlabeni. (Gen. 11:1; Hla. 96:1) Ngako ‘umhlaba lomdzala’ usho bantfu lababi labakhona lamuhla. Jehova angeke alungise “lizulu nemhlaba” lokukhona nyalo, kunaloko utakususa ngalokuphelele bese ubeka lokunye esikhundleni sako. Esikhundleni selizulu lelikhona nyalo nemhlaba lokhona, utawubeka “lizulu lelisha nemhlaba lomusha,” lokusho hulumende lomusha kanye nebantfu labalungile.

10. Yini Jehova latawuyenta ibe yinsha?

¹⁰ KuSembulo 21:5, sifundza ngaloko Jehova latsi utawukwenta kube kusha. Naka kutsi akasho kutsi: “Ngenta tonkhe tintfo letinsha.” Kunaloko utsi: “Ngenta tonkhe tintfo tibe tinsha.” Jehova utakwenta umhlaba nebantfu kube ngatsi kusha ngekutsi ente bantfu babe bete sono futsi ente umhlaba ube muhle kakhulu. Njengobe Isaya aphrofetha, umhlaba wonkhe utawuba yindzawo lenhle, ufanane nensimu yase-Edeni. Ngetulu kwaloko, Jehova utawusenta sonkhe sibe basha ngekutsi aselaphe ngalokuphelele. Labachutako, labangaboni emehlweni nalabangeva etindlebeni batawelashwa, ngisho nalabafile batawuvuswa ekufeni.​—Isa. 25:8; 35:1-7.

“LAMAVI ETSEMBEKILE FUTSI ALICINISO. . . . SEKWENTEKILE!”

11. Ngumuphi umyalo Jehova lawunika Johane futsi ngasiphi sizatfu?

¹¹ Yini lenye leyincenye yesicinisekiso saNkulunkulu? Jehova watjela Johane watsi: “Bhala ngobe lamavi etsembekile futsi aliciniso.” (Semb. 21:5) Jehova akagcinanga nje ngekunika Johane umyalo wekutsi ‘abhale,’ waphindze wamnika sizatfu sekwenta njalo. Watsi: “Ngobe lamavi etsembekile futsi aliciniso,” lokusho kutsi emavi aNkulunkulu singawetsemba futsi awashayi phasi. Sibonga kakhulu ngekutsi Johane wawulalela lomyalo wekutsi ‘abhale.’ Ngenca yaloko, nyalo singakhona kufundza ngesetsembiso saNkulunkulu seliPharadisi futsi sicabangisise ngetibusiso letimangalisako letisilindzile.

12. Yini leyenta Jehova kumfanele kutsi atsi: “Sekwentekile!”

¹² Yini Nkulunkulu layishoko ngemuva kwaloko? Utsi: “Sekwentekile!” (Semb. 21:6) Nyalo Jehova ukhuluma kube ngatsi tonkhe tintfo latishito mayelana neliPharadisi leletsenjisiwe setivele tentekile. Akusimangalisi loko ngobe kute lokungamvimba kutsi afeze injongo yakhe. Jehova usiniketa lesinye sizatfu lesinemandla sekwetsemba setsembiso sakhe kulencenye lelandzelako yalesicinisekiso. Nguyiphi?

“MINE NGINGU-ALFA NA-OMEGA”

13. Yini leyenta Jehova watsi: “Mine ngingu-Alfa na-Omega”?

¹³ Njengobe kuke kwavetwa, Jehova ukhuluma tikhatsi letintsatfu kulemibono yaJohane. (Semb. 1:8; 21:5, 6; 22:13) Sikhatsi ngasinye usho emagama lafanako latsi: “Mine ngingu-Alfa na-Omega.” Alfa luhlavu lwekucala elulwimini lwesiGriki, bese kutsi omega luhlavu lwekugcina. Ngekutsi Jehova atsi ‘ungu-Alfa na-Omega,’ loko kukhombisa kutsi nakacala kwenta lokutsite ukwenta kuze kuphumelele, kuze kufike ekugcineni.

14. (a) Shano sibonelo sekutsi kukunini lapho kwafana nekutsi Jehova utsi “Alpha,” nekutsi kukunini lapho kutawufana nekutsi utsi “Omega.” (b) Ngusiphi sicinisekiso lesikuGenesisi 2:1-3?

¹⁴ Ngemuva kwekutsi Jehova sekadale bo-Adamu na-Eva, washo injongo yakhe ngebantfu nangemhlaba. LiBhayibheli litsi: “Nkulunkulu wabese uyababusisa, watsi kubo: ‘Talanani nandze nigcwale emhlabeni futsi niwuncobe.’” (Gen. 1:28) Ngaleso sikhatsi, bekungatsi Jehova utsi “Alfa.” Wayisho ngalokucacile injongo yakhe: Sikhatsi besitawufika lapho khona situkulwane sa-Adamu na-Eva lesite sono futsi lesilalelako besitawugcwalisa umhlaba siwushintje ube liPharadisi. Ngaleso sikhatsi, kutawuba ngatsi Jehova utsi: “Omega.” Ngemuva kwekutsi sekuphelile kudalwa “kwemazulu nemhlaba nako konkhe lokukuwo,” Jehova waniketa sicinisekiso. Sitfolakala kuGenesisi 2:1-3. (Fundza.) Jehova wenta kutsi lilanga lesi-7 libe ngcwele kuye. Kusho kutsini loko? Bekacinisekisa kutsi nakanjani utayifeza injongo yakhe ngebantfu nangemhlaba. Itawugcwaliseka ngalokuphelele ekupheleni kwelilanga lesi-7.

15. Yini lebeyingenta kubonakale ngatsi Sathane ukhonile kuvimbela injongo yaNkulunkulu ngebantfu kutsi ifezeke?

¹⁵ Ngemuva kwekutsi bo-Adamu na-Eva bavukele Nkulunkulu, baba nesono futsi bendlulisela sono nekufa entalelwaneni yabo. (Rom. 5:12) Ngenca yaloko, bekungabonakala ngatsi Sathane uyivimbile kutsi iphumelele injongo yaNkulunkulu yekugcwalisa umhlaba ngebantfu labete sono futsi labalalelako. Bekungabonakala ngatsi Sathane umvimbele Jehova kutsi atsi “Omega.” Kungenteka Sathane bekacabanga kutsi kute lokunganani Jehova lebekangakwenta. Mhlawumbe bekacabanga kuJehova utawubulala Adamu na-Eva futsi adale lenye indvodza nemfati kuze bafeze injongo yakhe ngebantfu. Kodvwa kube Nkulunkulu wakwenta loko, Develi bekatamsola ngekutsi ungumcambimanga. Sisho ngani? Ngobe njengobe kubhalwe kuGenesisi 1:28, Jehova watjela bo-Adamu na-Eva kutsi intalelwane yabo beyitawugcwala umhlaba.

16. Kungenteka Sathane bekacabanga kutsi angasho ngasiphi sizatfu kutsi Jehova usehluleki?

¹⁶ Yini lenye lokungenteka Sathane bekacabanga kutsi Nkulunkulu angayenta? Mhlawumbe bekacabanga kutsi Jehova utawuvumela bo-Adamu na-Eva kutsi batale bantfwana labanesono futsi lebebatawuhlale banjalo. (Shu. 7:20; Rom. 3:23) Kube wenta loko, siyaciniseka kutsi Develi bekatawumangalela Jehova ngekutsi usehluleki. Sisho ngani? Ngobe loku bekungeke kuyifeze injongo yaNkulunkulu yekugcwalisa umhlaba loliPharadisi ngesitukulwane sa-Adamu na-Eva lesite sono futsi lesilalelako.

17. Jehova wayilungisa njani indzaba yekuvukela kwaSathane nebantfu bekucala, futsi waba yini umphumela? (Buka nesitfombe.)

¹⁷ Kungenteka Sathane yammangalisa kakhulu indlela Jehova lalungisa ngayo kuvukela kwakhe nekwebantfu bekucala. (Hla. 92:5) Kunekutsi Jehova abonakale angumcambimanga, wativeta etsembekile ngekuvumela bo-Adamu na-Eva kutsi babe nebantfwana. Ngetulu kwaloko, kunekutsi abonakale asehluleki, Jehova waphumelela. Wachubeka nenjongo yakhe ngekutsi ente kube “nentalelwane” lebeyitawusindzisa situkulwane sa-Adamu na-Eva lesilalelako. (Gen. 3:15; 22:18) Kungenteka lilungiselelo laJehova lekutsi kube nenhlawulo lammangalisa kakhulu Sathane. Sisho ngani? Ngobe lisekelwe elutsandvweni lolute bugovu. (Mat. 20:28; Joh. 3:16) Lobu buntfu lete bona Sathane. Ngako inhlawulo ivule liphi litfuba? Ekupheleni kweminyaka lengu-1 000, situkulwane sa-Adamu na-Eva lesite sono futsi lesilalelako sitawuhlala emhlabeni loliPharadisi njengobe bekuyinjongo yaJehova yasekucaleni. Ngaleso sikhatsi, kutawuba ngatsi Jehova utsi: “Omega.”

LOKO LESINGAKWENTA KUZE SISETSEMBE KAKHULU SETSEMBISO SAJEHOVA SELIPHARADISI

18. Ngutiphi tintfo letintsatfu letisicinisekiso Nkulunkulu lasitjela tona? (Buka nelibhokisi lelitsi “Tizatfu Letintsatfu Tekwetsemba Setsembiso SaJehova.”)

¹⁸ Kuloko lesesicoce ngako, ngutiphi tintfo letisicinisekiso lesingaticocela labo labangabatako kutsi setsembiso saNkulunkulu seliPharadisi sitawufezeka? Kwekucala, nguJehova matfupha losho lesetsembiso. Incwadzi yeSembulo itsi: “Loyo lohleti esihlalweni sebukhosi watsi: ‘Ngenta tonkhe tintfo tibe tinsha.’” Jehova uhlakaniphile, unemandla futsi unaso sifiso sekufeza setsembiso sakhe. Kwesibili, setsembiso sakhe sitawugcwaliseka nakanjani ngobe ngekwembono wakhe kufana nekutsi sesivele sigcwalisekile. Kungako atsi: “Bhala ngobe lamavi etsembekile futsi aliciniso. . . . Sekwentekile!” Kwesitsatfu, Jehova nakacala kwenta lokutsite ukwenta kuze kuphumelele, kuze kufike ekugcineni ngekuvumelana nemavi latsi: “Mine ngingu-Alfa na-Omega.” Jehova utawukhombisa kutsi Sathane ungumcambimanga nesehluleki.

19. Yini longayenta nangabe bantfu bangabata kutsi setsembiso saNkulunkulu seliPharadisi sitawufezeka?

¹⁹ Khumbula, sonkhe sikhatsi nawucocela lotsite emsebentini wekushumayela ngalesicinisekiso saNkulunkulu, usuke wenta kutsi utetsembe kakhulu tetsembiso takhe. Nawufundzela lotsite setsembiso lesihle lesimayelana neliPharadisi lelitako lesichazwe kuSembulo 21:4, futsi atsi “loku kuhle kakhulu kutsi kungenteka,” yini longayenta? Ungamfundzela vesi 5 navesi 6 futsi umchazele wona. Mkhombise kutsi Jehova usinikete njani sicinisekiso ngalesetsembiso kwaba ngatsi usayina phasi.​—Isa. 65:16.