Yini Lesingayenta Kuze Sichubeke Sitsandzana Kakhulu?

1-2. (a) Yini leyenta umphostoli Pawula watsi lutsandvo ‘lubaluleke kakhulu’? (b) Ngumiphi imibuto lesitawucoca ngayo?

NGESIKHATSI umphostoli Pawula akhuluma ngekukholwa, litsemba nelutsandvo wephetsa ngemavi latsi, “lokubaluleke kakhulu kuko konkhe lutsandvo.” (1 Khor. 13:13) Yini leyamenta washo njalo? Esikhatsini lesitako, ngeke kudzingeke sibe nekukholwa etetsembisweni taNkulunkulu telive lelisha, nobe setsembe kutsi letetsembiso titawugcwaliseka ngobe titawube setigcwalisekile. Kodvwa kutawudzingeka sichubeke sitsandza Jehova kanye nebantfu. Ecinisweni, lutsandvo lesinalo ngabo lutawuchubeka lukhula kuze kube phakadze.

² Njengobe kufanele sihlale sitsandzana, sitawucoca nganayi imibuto lemitsatfu. Wekucala, yini leyenta kudzingeke sitsandzane? Wesibili, sikhombisa njani kutsi siyatsandzana? Wesitsatfu, yini lesingayenta kuze sihlale sitsandzana kakhulu?

YINI LEYENTA KUDZINGEKE SITSANDZANE?

3. Ngutiphi tizatfu lesinato tekutsandzana?

³ Kubaluleke ngani kutsi sitsandzane? Lesinye sizatfu kutsi emaKhristu eliciniso abonakala ngelutsandvo. Jesu watjela baphostoli bakhe watsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Ngetulu kwaloko, kutsandzana kwenta kutsi sibe nebunye. Pawula watsi lutsandvo “lusibopho lesiphelele sebunye.” (Khol. 3:14) Kodvwa kunalesinye sizatfu lesenta kudzingeke kutsi sitsandzane. Umphostoli Johane wabhalela bazalwane bakhe nabodzadze watsi: “Loyo lotsandza Nkulunkulu kufanele atsandze nemzalwane wakhe.” (1 Joh. 4:21) Nangabe sikhombisa kutsi siyabatsandza labanye, sisuke sikhombisa kutsi siyamtsandza Nkulunkulu.

4-5. Fanekisa kutsi kutsandza Nkulunkulu kuhlobene njani nekutsandza labanye.

⁴ Kutsandza Nkulunkulu kuhlobene njani nekutsandza bazalwane nabodzadze? Cabanga ngekuhlobana lokukhona emkhatsini wenhlitiyo nalamanye emalunga emtimba. Dokotela nakasibamba sandla kuze eve kutsi inhlitiyo ishaya kangakanani, angahle atfole naleminye imininingwane lemayelana nekutsi inhlitiyo iphilile yini nobe cha. Singasisebentisa njani lesimiso kulendzaba lesikhuluma ngayo?

⁵ Njengobe dokotela atfola leminye imininingwane mayelana nekutsi inhlitiyo iphilile yini nobe cha ngekuva kutsi ishaya kangakanani, natsi singatfola leminye imininingwane lemayelana nekutsi simtsandza kanganani Nkulunkulu ngekubuka indlela lesibatsandza ngayo labanye. Nangabe sibona kutsi ngandlela tsite seyehlile indlela lesitsandza ngayo bazalwane betfu nabodzadze, loko kungakhombisa kutsi yehlile nendlela lesimtsandza ngayo Nkulunkulu. Kodvwa nangabe sichubeka sikhombisa kutsi siyabatsandza bazalwane betfu nabodzadze, loko kuluphawu lwekutsi solo simtsandza kakhulu Nkulunkulu.

6. Ngusiphi sizatfu lesinaso sekukhatsateka nangabe seluncipha lutsandvo lwetfu ngebazalwane nabodzadze? (1 Johane 4:7-9, 11)

⁶ Kufanele sikhatsateke nangabe yehla indlela lesitsandza ngayo bazalwane betfu nabodzadze. Leni? Ngobe loko kusho kutsi buhlobo betfu naNkulunkulu busengotini. Umphostoli Johane ukwenta kucace loko nakasikhumbuta atsi: “Loyo longamtsandzi umzalwane wakhe lambonile, ngeke amtsandze Nkulunkulu langakamboni.” (1 Joh. 4:20) Yini lesiyifundzako? Jehova utasemukela kuphela nangabe ‘sitsandzana.’—Fundza 1 Johane 4:7-9, 11.

SIKHOMBISA NJANI KUTSI SIYATSANDZANA?

7-8. Ngutiphi letinye tindlela lesingakhombisa ngato kutsi siyatsandzana?

⁷ EVini laNkulunkulu, siwutfola tikhatsi letinyenti umyalo wekutsi ‘sitsandzane.’ (Joh. 15:12, 17; Rom. 13:8; 1 Thes. 4:9; 1 Phet. 1:22; 1 Joh. 4:11) Kodvwa lutsandvo yindlela lesitiva ngayo ngekhatsi enhlitiyweni, futsi kute umuntfu longakhona kubona ngekhatsi. Ngako yini lesingayenta kuze kubonakale kutsi siyatsandzana? Singakhombisa ngemavi nangetento.

⁸ Tinyenti tindlela lesingakhombisa ngato kutsi siyabatsandza bazalwane betfu nabodzadze. Nati letinye tibonelo: “Nibokhuluma liciniso kulomunye nalomunye.” (Zak. 8:16) “Nihlalisane ngekuthula.” (Mak. 9:50) “Nihambe embili ekuhloniphaneni.” (Rom. 12:10) “Yemukelanani.” (Rom. 15:7) “Chubekani . . . nitsetselelana.” (Khol. 3:13) “Chubekani nitfwalisana imitfwalo lesindzako.” (Gal. 6:2) “Chubekani nidvudvutana.” (1 Thes. 4:18) “Chubekani . . . nakhana.” (1 Thes. 5:11) “Nithantazelane.”—Jak. 5:16.

9. Yini leyenta kudvudvuta labanye kube yindlela lebalulekile yekukhombisa kutsi siyabatsandza? (Buka nesitfombe.)

⁹ Ase sicoce ngalenye indlela lesingakhombisa ngayo kutsi siyabatsandza labanye. Sitawucoca ngaloko Pawula lakusho nakatsi: “Chubekani nidvudvutana.” Yini leyenta kudvudvuta labanye kube yindlela lebalulekile yekubakhombisa kutsi siyabatsandza? Ngekusho kwalenye incwadzi, ligama lelasetjentiswa nguPawula lelitsi “kudvudvuta” lisho “kuma eceleni kwalotsite futsi umkhutsate nakabhekene neluvivinyo lolumatima.” Ngako nasidvudvuta umzalwane nobe dzadze locindzetelekile sisuke simsita kutsi achubeke akhonta Jehova ngekwetsembeka. Ngaso sonkhe sikhatsi nasiba lihlombe lekukhalela lemzalwane wetfu nobe dzadze, sisuke sikhombisa kutsi siyamtsandza.—2 Khor. 7:6, 7, 13.

10. Ngukuphi kuhlobana lokukhona emkhatsini weluvelo nendvudvuto?

¹⁰ Kuba neluvelo kuhlobene nekudvudvuta. Njani? Nangabe lotsite amvela umuntfu locindzetelekile, ufuna kumdvudvuta futsi etame kwenta lokutsite kuze amsite. Ngako sicale simvele; bese siyamdvudvuta. Pawula wachaza kutsi luvelo lwaJehova ngebantfu lumenta abadvudvute. Wachaza Jehova ngekutsi ‘nguBabe wemusa, naNkulunkulu wayo yonkhe indvudvuto.’ (2 Khor. 1:3) Kulelivesi, Pawula usebentisa ligama lelitsi ‘umusa’ kuze achaze luvelo loba nalo ngalotsite. Ngako Nkulunkulu ubitwa ngekutsi nguBabe nobe uMtfombo wemusa ngobe uneluvelo lolukhulu ngebantfu. Ngako, loluvelo lumenta kutsi asisidvudvute “kunobe ngukuphi kuhlupheka” kwetfu. (2 Khor. 1:4) Njengobe emanti lamnandzi laphuma emtfontjeni acabula umuntfu lowomile, naJehova ucabula futsi advudvute labo labacindzetelekile. Singamlingisa njani Jehova ngekuba neluvelo nekudvudvuta labanye? Lokunye lesingakwenta kutsi setame kuba nebuntfu lobutasenta kutsi sibe neluvelo futsi sidvudvute labanye. Ngubuphi lobunye balobuntfu?

11. Ngekusho kwembhalo waKubaseKholose 3:12 na-1 Phetro 3:8, ngubuphi lobunye buntfu lokufanele sibe nabo nangabe sifuna lutsandvo lusente sidvudvute labanye?

¹¹ Yini letasisita kutsi sihlale sitsandzana kuze ‘sichubeke sidvudvutana’ onkhe malanga? Kufanele setame kuvelana, kutsandzana njengobe sibazalwane futsi sibe nemusa. (Fundza KubaseKholose 3:12; 1 Phetro 3:8.) Kutasisita ngani loko? Nangabe sibavela bazalwane betfu futsi sibakhatsalela mbamba, sitawuba nesifiso lesikhulu sekubadvudvuta nabacindzetelekile. Kunjengobe nje Jesu asho nakatsi “umlomo ukhuluma loko lokugcwele enhlitiyweni. Umuntfu lolungile ukhipha lokuhle enhlitiyweni yakhe.” (Mat. 12:34, 35) Kudvudvuta bazalwane betfu nabodzadze nabacindzetelekile kuyindlela lebalulekile yekukhombisa kutsi siyabatsandza.

YINI LESINGAYENTA KUZE SIHLALE SIBATSANDZA KAKHULU LABANYE?

12. (a) Kudzingeke ngani kutsi sihlale sigadzile kutsi lutsandvo lwetfu ngalabanye lungapheli? (b) Ngumuphi umbuto lesitawucoca ngawo?

¹² Sonkhe siyafuna ‘kuchubeka sitsandzana.’ (1 Joh. 4:7) Nobe kunjalo, kubalulekile kutsi sikhumbule secwayiso saJesu sekutsi “bantfu labanyenti batawuphelelwa lutsandvo.” (Mat. 24:12) Jesu bekangasho kutsi linyenti lebafundzi bakhe belitawuyekela kuba nelutsandvo. Nobe kunjalo, kufanele sigadze kutsi ungasingeni umoya walelive wekuba bete lutsandvo. Sinaloko engcondvweni, ase sicoce nganangu umbuto lobalulekile lotsi: Kukhona yini lokungasisita sibone kutsi lutsandvo lwetfu ngebazalwane nabodzadze lucinile?

13. Yini letasisita sibone kutsi lucinile yini lutsandvo lwetfu ngebazalwane nabodzadze?

¹³ Lenye indlela lesingabona ngayo kutsi lucine kangakanani lutsandvo lesinalo ngalabanye, kubuka indlela lesenta ngayo nakuvela timo letitsite. (2 Khor. 8:8) Umphostoli Phetro wakhuluma ngalesinye saletimo nakatsi: “Ngetulu kwako konkhe, tsandzanani kakhulu, ngobe lutsandvo lumbonya tono letinyenti.” (1 Phet. 4:8) Ngako butsakatsaka balabanye nemaphutsa abo kungasenta sibone kutsi lucine kangakanani lutsandvo lwetfu ngabo.

14. Ngekusho kwa-1 Phetro 4:8, nguluphi luhlobo lwelutsandvo lokufanele sibe nalo? Fanekisa.

¹⁴ Ase sicoce kabanti ngalamavi aPhetro. Incenye yekucala yavesi 8 ichaza luhlobo lwelutsandvo lokufanele sibe nalo, itsi “tsandzanani kakhulu.” Ligama lelitsi “kakhulu” lelasetjentiswa nguPhetro nalihunyushwe njengobe linjalo lisho “kwenwebeka.” Incenye yesibili yalelivesi ichaza loko lesitawukwenta nangabe sibatsandza kakhulu labanye. Loko kumbonya tono tebazalwane betfu. Singayicabanga ngalendlela lendzaba: Ase sitsi sibambe lutsandvo kube ngatsi sibambe indvwangu lenwebekako futsi siyenwebe ize imbonye “tono letinyenti,” hhayi sinye nobe timbili. Kumbonya ligama lelichaza kucolela. Njengobe indvwangu imbonya libala, lutsandvo lungambonya butsakatsaka kanye nemaphutsa alabanye.

15. Yini lesitawukhona kuyenta nangabe lucinile lutsandvo lwetfu ngebazalwane nabodzadze? (KubaseKholose 3:13)

¹⁵ Kufanele sibatsandze kakhulu bazalwane betfu nabodzadze size sikhone kucolela emaphutsa abo, nanobe loko kungahle kudzinge wetame kakhudlwana. (Fundza KubaseKholose 3:13.) Nangabe sibacolela labanye, sisuke sikhombisa kutsi lutsandvo lwetfu lucinile, nekutsi sifuna kujabulisa Jehova. Yini lenye lengasisita kutsi sendlulise tintfo letisicansulako letentiwa ngulabanye nemaphutsa abo?

16-17. Yini lenye letasisita kutsi sendlulise emaphutsa lamancane alabanye? Fanekisa. (Buka nesitfombe.)

¹⁶ Naka lokuhle kubazalwane bakho nakubodzadze, hhayi lokubi. Cabanga nganangu umfanekiso. Ase sitsi nihlangene ndzawonye nebazalwane nabodzadze. Nijabulela sikhatsi lesimnandzi, futsi ngaphambi kwekutsi nehlukane, nitsatsa sitfombe. Nibese nitsatsa letinye letimbili nentele kusebentisa tona nakwenteka lesekucala singaphumi kahle. Nyalo seninetitfombe letintsatfu. Kodvwa ubese uyanaka kutsi kusinye sato kunemzalwane loswacile. Usenta njani lesitfombe? Uyasisusa ecingweni lakho ngobe unetitfombe letimbili lapho khona nonkhe nimoyitela, lokufaka ekhatsi nalomzalwane.

¹⁷ Titfombe lesitigcinako singatifananisa netintfo lesitigcina engcondvweni. Sivame kutikhumbula tikhatsi letimnandzi lesiticitse nebazalwane betfu nabodzadze. Kodvwa ase sitsi kuletinye taletikhatsi umzalwane nobe dzadze usho lokutsite nobe wenta lokutsite lokungasiphatsi kahle. Kufanele sente njani ngaloko? Kufanele setame kukususa engcondvweni njengobe nje sisusa sitfombe lesingakaphumi kahle. (Taga 19:11; Ef. 4:32) Singakhona kumcolela umzalwane nobe dzadze ngeliphutsa lelincane lalentile ngobe tinyenti tintfo letinhle lesitikhumbulako ngaye nasibe ndzawonye. Nguleto-ke tintfo lokufanele sitigcine engcondvweni futsi tibe ligugu kitsi.

YINI LEYENTA LUTSANDVO LUBALULEKE KAKHULU LAMUHLA?

18. Ngumaphi emaphuzu labalulekile lamayelana nelutsandvo lesicoce ngawo kulesihloko?

¹⁸ Kubaluleke ngani kutsi sichubeke sitsandzana kakhulu? Njengobe sesibonile, nasibakhombisa lutsandvo bazalwane betfu nabodzadze, sisuke sikhombisa kutsi siyamtsandza Jehova. Silukhombisa njani lutsandvo kubazalwane nakubodzadze? Lenye indlela kutsi sibadvudvute. Sitawukhona ‘kuchubeka sidvudvutana’ nangabe sineluvelo. Yini lesingayenta kuze luhlale lucinile lutsandvo lwetfu ngalabanye? Singasitwa kwenta konkhe lokusemandleni etfu kuze sibacolele.

19. Yini leyenta kubaluleke kakhulu lamuhla kutsi sikhombisane lutsandvo?

¹⁹ Yini leyenta kubaluleke kakhulu lamuhla kutsi sitsandzane? Naka nasi sizatfu lesashiwo nguPhetro nakatsi: “Kuphela kwato tonkhe tintfo sekusondzele. Ngako-ke, . . . tsandzanani kakhulu.” (1 Phet. 4:7, 8) Yini lokufanele siyilindzele njengobe kusondzela kuphela kwalelive lelibi? Akhuluma ngebalandzeli bakhe, Jesu waphrofetha watsi: “Nitawutondvwa tive tonkhe ngenca yelibito lami.” (Mat. 24:9) Kuze sikhone kubeketelela lokutondvwa, kufanele sihlale simunye. Nasenta njalo, loko Sathane letama kukwenta kuze asehlukanise ngeke kuphumelele, ngobe lutsandvo lutawusenta sisondzelane kakhulu, njengobe “lusibopho lesiphelele sebunye.”—Khol. 3:14; Fil. 2:1, 2.