Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
FEBRUARY 3-9
UMCEBO LOSEVINI LANKULUNKULU | GENESISI 12-14
“Sivumelwane Lesitsintsa Kuphila Kwakho”
(Genesisi 12:1, 2) Simakadze watsi ku-Abrama: “Phuma eveni lakini, nasetihlotjeni takho, nasemndenini weyihlo, uye eveni lengitakukhombisa lona. 2 Ngitakwenta ube sive lesikhulu, ngikubusise, ngente libito lakho libe likhulu, wena ube sibusiso.
it-1-E 522 ¶4
Sivumelwane
Sivumelwane Lasenta Na-Abrahama. Sivumelwane lesentiwa na-Abrahama kungenteka sacala kusebenta ngesikhatsi Abrama (Abrahama) ewela iYufrathe aya eKhenani. UMtsetfo wesivumelwane wentiwa ngemuva kweminyaka lengu-430. (Gal. 3:17) Jehova wakhuluma na-Abrahama ngesikhatsi esuka eMesophothamiya, lese-Uri yemaKhaledi, wamtjela kutsi akahambe aye eveni latamkhombisa lona. (Imis. 7:2, 3; Gen. 11:31; 12:1-3) Umbhalo wa-Eksodusi 12:40, 41 (LXX) usitjela kutsi ngemuva kweminyaka lengu-430, ema-Israyeli lebekahlala eGibhithe kanye naseveni laseKhenani, ‘ngalelolanga’ aphuma eveni lekugcilateka. Lilanga labakhululwa ngalo eGibhithe bekunguNisani 14, 1513 B.C.E., ngelilanga leliPhasika. (Eks. 12:2, 6, 7) Kubonakala shengatsi Abrahama wewela uMfula iYufrathe ngesikhatsi aya eKhenani ngaNisani 14, 1943 B.C.E., futsi kuyacaca kutsi lesivumelwane sa-Abrahama sabese sicala kusebenta. Nkulunkulu waphindze wabonakala ku-Abrahama ngemuva kwekutsi Abrahama ayidzabula ekhatsi iKhenani wate wefika eShekhemu futsi Nkulunkulu wamcinisekisa ngaloko lebekametsembise kona ngekutsi atsi: “Lelive ngiyawulinika titukulwane takho,” wamvetela nekutsi lesivumelwane sihlangana njani nesetsembiso lesentiwa e-Edeni, futsi waveta nekutsi ‘lentalo’ yayitawuba ngumuntfu nekutsi beyitawuvela esitukulwaneni sa-Abrahama. (Gen. 12:4-7) Lamanye emaciniso lashiwo nguJehova ngaletetsembiso abhalwe kuGenesisi 13:14-17; 15:18; 17:2-8, 19; 22:15-18.
(Genesisi 12:3) Ngitababusisa labakubusisako, ngibacalekise labakucalekisako. Tive tonkhe temhlaba tiyawubusiswa ngawe.”
w89-ZU 7/1 3 ¶4
Kungani Kufanele Ulati Liciniso Nga-Abrahama?
Lesi setsembiso lesijabulisako Abrahama lasiva emahlandla lamabili. (Genesisi 18:18; 22:18) Kuze kufezeke lesetsembiso, Nkulunkulu utawuvusa imindeni leseluhlwini lwa-Abrahama. Kuvuswa kwalemindeni kutawuba sibusiso njengobe linyenti layo litawube liphila emhlabeni loliPharadisi lelalahlwa ngu-Adamu. Ngemuva kwaloko lemindeni itawufundziswa tindlela tekutfola kuphila lokuphakadze.—Genesisi 2:8, 9, 15-17; 3:17-23.
(Genesisi 13:14-17) Kwatsi Loti nasehlukene na-Abrama, Simakadze watsi ku-Abrama: “Phakamisa emehlo akho, ubuke ngasenyakatfo, nangaseningizimu, nangasemphumalanga, nangasenshonalanga. 15 Lonkhe lelive lolibonako ngitawulinika wena netitukulwane takho kuze kube phakadze. 16 Titukulwane takho ngiyawutenta tibe ngangelutfuli lwemhlaba, kangangekutsi nakukhona longabala lutfuli lwemhlaba, netitukulwane takho angatibala. 17 Sukuma, uhambe ulidzabule ekhatsi ngebudze nangebubanti balo lelive, ngobe ngitakunika lona.”
it-2-E 213 ¶3
Umtsetfo
Ngekusho kwemlandvo, letinye tati tikholelwa kutsi nawutsengisela umuntfu indzawo, lolotsengako bekayiswa lapho atayibona khona kahle lendzawo layitsengako. Nangabe lotsengako atsi ‘ngiyayibona,’ loko bekusho kutsi ngekwemtsetfo uyayitsatsa. Ngesikhatsi Jehova atjela Abrahama setsembiso sekutsi utamniketa live laseKhenani, wacale watsi akabuke tinhlangotsi totine temhlaba. Abrahama akazange atsi, ‘ngiyayibona,’ kungenteka loko kwabangelwa kutsi Nkulunkulu bekangaketsembisi kulinika yena lelive, kodvwa beketsembise kulinika situkulwane sa-Abrahama ngekuhamba kwesikhatsi. (Gen. 13:14, 15) Mosi, lobekangummeleli wema-Israyeli losemtsetfweni, watjelwa kutsi ‘abuke’ lelive futsi nangabe loko lokushiwo langenhla kuliciniso, kusho kutsi ema-Israyeli bekatawuniketwa lendzawo ngalokusemtsetfweni aholwa nguJoshuwa. (Dut. 3:27, 28; 34:4; cabanga nangaloko lokwentiwa nguSathane kuJesu encwadzini yaMat. 4:8.) Lesinye sento lesisemtsetfweni lesicishe sifanane nalesi bekukutsi umuntfu lotsenga indzawo ahambe adzabule ekhatsi kuyo ngenjongo yekutsi uyayitsenga. (Gen. 13:17; 28:13) Kuletinye timphepha tasendvulo, tihlahla lebetikhona kulendzawo letsengiswako nato betibalwa ekhatsi etitfweni letitsengiswako.—Catsanisa naGen. 23:17, 18.
Kufunisisa Umcebo EVini LaNkulunkulu
(Genesisi 13:8, 9) Ngako Abrama watsi ku-Loti: “Tsine nawe sitihlobo. Ngako-ke akukafaneli kutsi sicabane ngenca yekucabana kwebelusi betfu. 9 Angitsi uyalibona lonkhe lelive? Asehlukane. Nawukhetsa kuya ngesancele, mine ngitakuya ngesekudla; nawukhetsa kuya ngesekudla, mine ngitakuya ngesancele.”
Kulungisa Kungevani Ngemoya Welutsandvo
12 LiBhayibheli lisikhombisa indlela tinceku taNkulunkulu letingagcina ngayo kuthula nangabe kunekungevani. Sibonelo saloku kutsi Abrahama nemshana wakhe Loti bobabili bebanemhlambi wemfuyo, futsi belusi balemihlambi baphikisana ngobe besekute lidlelo lelenele layo. Abrahama wavumela Loti kutsi kube nguye lokhetsa lidlelo lelihle ngobe abefuna kube nekuthula. (Gen. 13:1, 2, 5-9) Lesi sibonelo lesihle kakhulu lesingasilingisa. Kukhona yini Abrahama lokwamlahlekela ngenca yemusa wakhe? Akukho lokwamlahlekela. Ngekushesha ngemuva kwaloko, Jehova wetsembisa kubusisa Abrahama ngalokunyenti kunaloko bekumlahlekele. (Gen. 13:14-17) Yini lesiyifundzako? Ngisho nobe silahlekelwa ngulokutsite, Jehova utasibusisa nangabe sicatulula kungevani ngelutsandvo.—Fundza kwatiswa lokusekugcineni.
(Genesisi 14:18-20) NaMelkhisedeki, inkhosi yaseSalema, leyayingumphristi waNkulunkulu Losetikwako Konkhe, yaletsa kuye sinkhwa neliwayini. 19 Melkhisedeki wabusisa Abrama watsi: “Abrama akabusiswe nguNkulunkulu Losetikwako Konkhe, uMdali welizulu nemhlaba. 20 Akabongwe Nkulunkulu Losetikwako Konkhe lonikete letitsa takho entsendzeni yesandla sakho.” Abrama wanika Melkhisedeki kwelishumi kwako konkhe.
(Hebheru 7:4-10) Ase nibuke nje kutsi abemkhulu kanganani! Abrahama, khokho wetfu, wamnika kwelishumi kwako konkhe labekutfumbile. 5 Titukulwane taLevi letemukela buphristi tinemiyalo emtsetfweni kutsi titsatse kwelishumi kubo bonkhe bantfu. Phela bakutsatsa kubantfu besive sakubo lesaphuma ku-Abrahama. 6 Kodvwa lomuntfu abengesiye wesitukulwane saLevi, watsatsa kwelishumi ku-Abrahama, wase ubusisa lowo abenetetsembiso. 7 Akuphikeki kutsi lomncane ubusiswa ngulomkhulu. 8 Kwelishumi kwemukelwa baphristi lababuye bafe; kodvwa ngaMelkhisedeki kwelishumi kwemukelwa ngulophilako, njengobe umBhalo usho. 9 Kungashiwo nekutsi naLevi matfupha, lowemukela kwelishumi, abekukhipha nga-Abrahama, 10 ngobe phela Levi abeselukhalweni lwakhokho wakhe Abrahama ngesikhatsi ahlangana naMelkhisedeki.
it-2-E 683 ¶1
Umphristi
Melkhisedeki inkhosi yaseSalema beyingumphristi (ko·henʹ) longakavami. Kute lasifundza khona eBhayibhelini kutsi bebabobani bokhokho bakhe, nekutsi watalwa nini nobe wafa nini. Kuba ngumphristi akakutfolanga njengelifa futsi akangenanga esikhundleni salomunye, kute nalamshiya esikhundleni sakhe. Melkhisedeki bekayinkhosi aphindze angumpristi. Buphristi bakhe bebungetulu kwebuphristi bemaLevi, ecinisweni emaLevi bekakhokha kwelishumi kuMelkhisedeki ngoba bekasolo avela eluhlwini lwa-Abrahama futsi ngesikhatsi Abrahama akhokha umtselo kuMelkhisedeki, bekatfola tibusiso ngaloko. (Gen. 14:18-20; Heb. 7:4-10) Kuloku Melkhisedeki bekamelela Jesu Khristu, ‘longumphristi kuze kube phakadze njengaMelkhisedeki.’—Heb. 7:17.
Kufundvwa KweliBhayibheli
(Genesisi 12:1-20) Simakadze watsi ku-Abrama: “Phuma eveni lakini, nasetihlotjeni takho, nasemndenini weyihlo, uye eveni lengitakukhombisa lona. 2 Ngitakwenta ube sive lesikhulu, ngikubusise, ngente libito lakho libe likhulu, wena ube sibusiso. 3 Ngitababusisa labakubusisako, ngibacalekise labakucalekisako. Tive tonkhe temhlaba tiyawubusiswa ngawe.” 4 Ngako-ke Abrama wahamba, njengobe Simakadze abesamtjelile, Loti wahamba naye. Abrama abesaneminyaka lengema-75 budzala, nakasuka eHarani. 5 Abrama watsatsa Sarayi, umkakhe, naLoti, indvodzana yemnakabo, netimphahla tabo labesebatigcogcile, netisebenti labesebatitfole eHarani; bahamba nato baya eveni laseKhenani. Batsi kube befike eveni laseKhenani, 6 Abarma wahamba wadzabula live, waze wefika eShekhemu, ngasema-okhini aseMore. EmaKhenani abehlala kulelo live ngaleso sikhatsi. 7 Simakadze wabonakala ku-Abrama, watsi: “Lelive ngiyawulinika titukulwane takho.” Abrama wakhela Simakadze lilati, ngobe abebonakele lapho kuye. 8 Wesuka waya etintsabeni tangasemphumalanga neBetheli, wafike wemisa lithende lakhe khona; iBetheli beyingasenshonalanga, i-Ayi beyingasemphumalanga. Nakhona lapho wafike wakhela Simakadze lilati; wakhuleka kuSimakadze. 9 Emvakwaloko Abrama wahamba wacondza ngaseningizimu neKhenani. 10 Kwase kuba nendlala lenkhulu eKhenani. Ngako-ke Abrama wehlela eGibhithe; wahlala khona sikhashana, ngobe indlala yayiyinkhulu kakhulu eKhenani. 11 Watsi nasatawufika eGibhithe, wakhuluma kumkakhe Sarayi watsi: “Ase ulalele la: Ngiyakwati kutsi ungumfati lomuhle, nalobukekako. 12 EmaGibhithe atawutsi angakubona atsi: ‘Ngumkakhe lo,’ bese ayangibulala, wena angakubulali. 13 Ngako-ke ubotsi ungudzadzewetfu, khona kutangihambela kahle ngisindze ngenca yakho.” 14 Watsi Abrama nakewela umnyele angena eGibhithe, emaGibhithe akhangwa buhle balomfati. 15 Tindvuna taFaro tatsi kube timbone, tambabata kuFaro; wase uyatsatfwa-ke uyiswa esigodlweni saFaro. 16 Ngenca yalomfati, Abrama waphatseka kahle: Wanikwa timvu netimbuti, netinkhomo, netimbongolo letindvuna naletinsikati, nemakamela, netisebenti letidvuna naletisikati. 17 Kepha Simakadze washaya Faro nemndeni wakhe ngetinhlupho letinkhulu ngenca yaSarayi, umka-Abrama. 18 Ngako-ke Faro wabita Abrama, watsi kuye: “Yini lena loyente kimi? Awukangitjeli ngani kutsi lona ngumkakho? 19 Ushitoleni kutsi ngudzadzewenu, ngaze ngamtsatsa waba ngumkami? Nangu-ke umkakho, mtsatse, uhambe naye.” 20 Faro watfumela emancusa ku-Abrama, amhambisa kanye nemkakhe, nako konkhe labesanako.
FEBRUARY 10-16
UMCEBO LOSEVINI LANKULUNKULU | GENESISI 15–17
“Kungani Jehova Ashintja Ligama La-Abrama NaSarayi?”
(Genesisi 17:1) Kwatsi Abrama nasaneminyaka lengema-99 budzala, Simakadze wabonakala kuye watsi: “NginguNkulunkulu Somandla; hamba entsandvweni yami, ube msulwa.
it-1-E 817
Emaphutsa Nekona
Ngakulolunye luhlangotsi, tento tebantfu tihle tiba nemaphutsa. Sono nemaphutsa kutintfo bantfu labatitfola njengelifa ku-Adamu. (Rom. 5:12; Hla. 51:5) Kodvwa Jehova njengobe amsulwa, “uyakwati kubunjwa kwetfu, uyakhumbula kutsi silutfuli,” futsi unemusa. (Hla. 103:13, 14) Watsatsa Nowa lobeketsembekile, nalobekalalela ngekutsi ungumuntfu ‘lobekamsulwa esitukulwaneni sakhe.’ (Gen. 6:9) Jehova wayala Abrahama watsi: “Hamba entsandvweni yami, ube msulwa.”(Gen. 17:1) Ngisho noma lamadvodza lawa bekanesono futsi agcine afile, kodvwa abemsulwa emehlweni aJehova, loyo ‘lobuka inhlitiyo.’ (1 Sam. 16:7; catsanisa 2 Khos. 20:3; 2 Khr. 16:9) Wayala ema-Israyeli watsi: “Kufanele nibe msulwa embikwaSimakadze Nkulunkulu wenu.” (Dut. 18:13; 2 Sam. 22:24) Wanikela ngeNdvodzana yakhe lebeyite sono (Heb. 7:26) kutsi ibe yinhlawulo, futsi ngaleNdvodzana bonkhe labanekukholwa futsi labalalelako ‘balungile’ nobe bamsulwa, futsi ngesikhatsi lesifanako wagcina sikhundla sakhe njengeMehluleli lolungile nalomsulwa.—Rom. 3:25, 26; buka sihloko lesitsi INTEGRITY; PERFECTION.
(Genesisi 17:3-5) Abrama wakhotsamisa buso bakhe, batsintsa phansi, Nkulunkulu watsi kuye: 4 “Nasi-ke sivumelwane sami nawe: Uyawuba nguyise wetive letinyenti. 5 Libito lakho lingeke lisaba ngu-Abrama, kodvwa selitawuba ngu-Abrahama, ngobe sengikwente uyise wetive letinyenti.
it-1-E 31 ¶1
Abrahama
Yahamba iminyaka. Bese base Khenani iminyaka lelishumi, kepha Sara bekasolo angabatfoli bantfwana. Ngako Sara wabese ucela Hagari lobekasigcilikati lesingumGibhithe kutsi simtalele umtfwana. Abrahama wavuma. Ngako Ishmayeli watalwa nga-1932 B.C.E., ngesikhatsi Abrahama aneminyaka lengu-86 budzala. (Gen. 16:3, 15, 16) Iminyaka yachubeka ihamba. Nga-1919 B.C.E., ngesikhatsi Abrahama aneminyaka lengu-99 budzala, Jehova wayala onkhe emadvodza labesendlini ya-Abrahama kutsi asokwe, kuze kubeluphawu lobelucinisekisa sivumelwane lesikhetsekile lebesikhona emkhatsini wakhe na-Abrahama. Ngesikhatsi lesifanako, Jehova washintja ligama la-Abrama wambita ngekutsi ngu-Abrahama, ‘ngoba besekamente uyise wetive letinyenti.’ (Gen. 17:5, 9-27; Rom. 4:11) Ngemuva kwaloko, kwefika tingilosi letintsatfu lebetibonakala, futsi Abrahama watemukela kahle ekhaya lakhe abona kutsi tivela kuJehova, tefike tametsembisa kutsi Sara abetawukhulelwa futsi atale indvondzana emnyakeni lolandzelako.—Gen. 18:1-15.
(Gen. 17:15, 16) Nkulunkulu watsi ku-Abrahama: “Ungabe usambita umkakho ngekutsi nguSarayi, kodvwa ubosale utsi nguSara. 16 Ngiyawumbusisa, ngikunike indvodzana ngaye. Ngiyawumbusisa, abe ngunina wetive. Kuyawuvela kuye emakhosi etive.”
w09-ZU 2/1 13
Limelelani Ligama?
Nkulunkulu yena matfupha wawashintja emabito alabanye bantfu lebesebabadzala ngenjongo yetiphrofetho. Sibonelo nje, walishintja ligama la-Abrama, lebelisho kutsi “Uyise Uyaphakanyiswa,” laseliba ngu-Abrahama lebelisho “Uyise wetive letinyenti.” Ligama lakhe belifaneleka, ngobe Abrahama waba nguyise wetive letinyenti. (Gen. 17:5, 6) Kanjalo nangemfati wa-Abrahama, Sarayi, lokungenteka libito lakhe belisho kutsi “Lotsandza Kubanga.” Kufanele kube wajabula kakhulu ngesikhatsi Nkulunkulu amtjela kutsi sewutawuba nguSara lokusho kutsi “Nkhosatana,” lobekusho kutsi abetawuba ngukhokho wemakhosi.—Gen. 17:15, 16.
Kufunisisa Umcebo EVini LaNkulunkulu
(Genesisi 15:13, 14) Simakadze watsi ku-Abrama: “Yati ngempela kutsi situkulwane sakho siyawuba sihambi eveni lekungesilo laso; siyawuba sigcili sakulelo live, sigcilateke iminyaka lengema-400. 14 Kodvwa ngiyawusehlulela leso sive lesiyawube sigcilata lesitukulwane sakho; emvakwaloko lesitukulwane sakho siyawuphuma sesinetimphahla letinyenti.
it-1-E 460-461
Umlandvo Wekutalana
Jehova watjela Abrama (Abrahama) watsi: “Yati ngempela kutsi situkulwane sakho siyawuba sihambi eveni lekungesilo laso; siyawuba sigcili sakulelo live, sigcilateke iminyaka lengema-400.” (Gen. 15:13; phindze ubuke ne-Imis. 7:6, 7) Loko kwakhulunywa ngako ngaphambi kwekutsi kutalwe indlalifa leyetsenjisiwe nobe “intalo” lengu-Isaka. Nga-1932 B.C.E. Hagari lebekasisebenti lebesingumGibhithe watalela Abrama indvodzana lengu-Ishmayeli, futsi nga-1918 B.C.E. kwatalwa Isaka. (Gen. 16:16; 21:5) Nasibala iminyaka lengu-400 kusukela ema-Israyeli aphuma eGibhithe, lebekusho kuphela kwekugcilateka (Gen. 15:14), loko kusiletsa emnyakeni wa-1913 B.C.E., futsi ngaleso sikhatsi Isaka bekaneminyaka lengu-5 atelwe. Kubonakala shengatsi Isaka besekalunyuliwe ngaleso sikhatsi, futsi besekavele ‘asihambi’ eveni lebelingasilo lakubo. Ishmayeli lobesekaneminyaka lengu-19 besekacale kugcilata Isaka “ngekumeyisa” njengobe bekuphrofethiwe. (Gen. 21:8, 9) Ngisho nobe esikhatsini setfu kungabonakala kungasho lutfo loko lobekwentiwa ngu-Ishmayeli kulendlalifa ya-Abrahama, kodvwa bekungasiko njalo ngaleto tikhatsi. Loku kwabonakala endleleni Sara lenta ngayo futsi Nkulunkulu wamvumela kutsi aphocelele Hagari kanye nendvodzana yakhe Ishmayeli kutsi bacoshwe. (Gen. 21:10-13) Ngenca yekutsi imininingwane yalomlandvo lona yabhalwa eBhayibhelini futsi loko kuveta kutsi yacala nini iminyaka lengu-400 lokwaphrofethwa ngayo yekugcilateka nayo lebeyingeke iphele kuze kube ngulapho ema-Israyeli aphume eGibhithe.—Gal. 4:29.
(Genesisi 15:16) Lesitukulwane siyawuphindze sibuye lapha sesingesesine, ngobe bubi ba-Amori abukapheli.”
it-1-E 778 ¶4
Kuphuma Kwema-Israyeli EGibhithe
‘Situkulwane sesine.’ Kufanele sikhumbule kutsi Jehova watjela Abrahama kutsi situkulwane sesine, lebekuyintalelwane ya-Abrahama beyitawubuyela eKhenani. (Gen. 15:16) Kuyo yonkhe leminyaka lengu-430 kusukela ngesikhatsi sivumelwane sa-Abrahama sicala kusebenta ngesikhatsi ema-Israyeli aphuma eGibhithe besekunetitukulwane letingetulu kwaletingu-4, ngekusho kwemlandvo, loku kufaka ekhatsi nemphilo lendze lesitukulwane lesayijabulela kuleyo minyaka. Kodvwa ema-Israyeli ahlala iminyaka lengu-215 eGibhithe. ‘Letitukulwane Letine’ letangena eveni laseGibhithe singatibala kusetjentiswa imindeni yema-Israyeli, lokungumndeni waLevi: (1) emadvodzana aLevi, (2) aKhohathi, (3) a-Amramu kanye (4) nemadvodzana aMosi.—Eks. 6:16, 18, 20.
Kufundvwa KweliBhayibheli
(Genesisi 15:1-21) Emvakwaloko livi laSimakadze lefika ku-Abrama ngembono, latsi: “Abrama, ungesabi. Ngisihlangu sakho, umvuzo wakho utawuba mkhulu.” 2 Kodvwa Abrama watsi: “Awu, Simakadze Nkulunkulu, utangiphani, ngobe seloku anginamntfwana? Indlalifa yami kutawuba ngu-Eliyezeri waseDamaseko.” 3 Abrama wachubeka watsi: “Ase ubuke nje, awungiphanga ntalo, lesisebenti lesesitalelwe la endlini yami ngiso lesitawuba yindlalifa yami.” 4 Livi laSimakadze latsi kuye: “Lowo muntfu angeke abe yindlalifa yakho, kodvwa yindvodzana yakho, lephuma elukhalweni lwakho, letawuba yindlalifa yakho.” 5 Simakadze wamkhiphela ngaphandle watsi: “Buka etulu esibhakabhakeni ubale tinkhanyeti, nawungatibala.” Wachubeka watsi kuye: “Nentalo yakho-ke iyawuba ngako.” 6 Abrama wakholwa nguSimakadze; ngenca yaloko Simakadze wamemukela ngekutsi ulungile. 7 Watsi kuye: “NginguSimakadze lowakukhipa e-Uri yemaKhaledi, kutsi ngitekupha lelive libe lakho.” 8 Kepha Abrama watsi: “Nkhosi, Simakadze, ngitakwati ngani kutsi lelive litawuba ngelami?” 9 Wamphendvula watsi: “Ngiletsele sitfokati lesineminyaka lemitsatfu budzala, nembutikati leneminyaka lemitsatfu budzala, nesihhanca lesineminyaka lemitsatfu budzala, nelituba kanye nelizini lelivukutfu.” 10 Konkhe loku wakuletsa, wakujuba ekhatsi. Lolo nalolo lucetu walubeka macondzana nalolunye, kodvwa tinyoni akatijubanga. 11 Emangce ehlela etidvunjini, kepha Abrama wawacosha. 12 Latsi nalishonako lilanga, Abrama wehlelwa butfongo lobukhulu, walala; asalele wefikelwa luvalo nekwesaba lokukhulu. 13 Simakadze watsi ku-Abrama: “Yati ngempela kutsi situkulwane sakho siyawuba sihambi eveni lekungesilo laso; siyawuba sigcili sakulelo live, sigcilateke iminyaka lengema-400. 14 Kodvwa ngiyawusehlulela leso sive lesiyawube sigcilata lesitukulwane sakho; emvakwaloko lesitukulwane sakho siyawuphuma sesinetimphahla letinyenti. 15 Wena-ke utawukhula, ufe ngekuthula sewumdzala kakhulu, ungcwatjwe. 16 Lesitukulwane siyawuphindze sibuye lapha sesingesesine, ngobe bubi ba-Amori abukapheli.” 17 Kwatsi ngekushona kwelilanga sekumnyama, kwabonakala litiko lemlilo, nelilangabi lemlilo lendlula emkhatsini waletincetu. 18 Ngalo lelo langa Simakadze wenta sivumelwane na-Abrama, watsi: “Lelive ngilinika situkulwane sakho, kusukela emfuleni waseGibhithe kuze kufike emfuleni lomkhulu iYufrathe, 19 lekulive lemaKheni, nemaKhenizi, nemaKhadimoni, 20 nemaHethi, nemaPheresi, nemaRefa, 21 nema-Amori, nemaKhenani, nemaGirigashi, nemaJebhusi.”
FEBRUARY 17-23
UMCEBO LOSEVINI LANKULUNKULU | GENESISI 18-19
“‘Umehluleli Wemhlaba Wonkhe’ Ubhubhisa ISodoma NeGomora”
(Genesisi 18:23-25) Abrahama wasondzela kuSimakadze watsi: “Uyakubabhubhisa ngempela yini labalungile kanye nalababi? 24 Nangabe-ke kulelidolobha kukhona labalungile labangema-50, utawulibhubhisa yini? Ungete walisindzisa yini ngenca yalaba labalungile labangema-50? 25 Akube khashane nawe kwenta intfo lenje! Ungababhubhisi labalungile kanye nalababi, bese labalungile baba njengalabangakalungi! Akube khashane nawe loko. Angeke yini umehluleli wemhlaba wonkhe ente kulunga?”
“Umehluleli Wemhlaba Wonkhe” Uhlale Enta Lokulungile
“ANGEKE yini umehluleli wemhlaba wonkhe ente kulunga?” (Gen. 18:25) Abrahama wabuta lombuto kute akhombise kutsi uyametsemba Jehova kutsi bekatayehlulela ngekulunga iSodoma neGomora. Bekaciniseka kutsi Jehova angeke ente intfo lengakalungi ngekutsi abhubhise “labalungile kanye nalababi.” Umbono lonjena bewungekho engcondvweni ya-Abrahama. Ngemuva kweminyaka lengu-400, Jehova nakatichaza yena watsi: “Yena uLidvwala, imisebenti yakhe iphelele; yebo, netindlela takhe tonkhe tilungile. Nkulunkulu lowetsembekile longakwenti lokubi, ucotfo akakhetsi muntfu.”—Dut. 31:19; 32:4.
(Genesisi 18:32) Abrahama watsi: “Ngicela kutsi iNkhosi ingatfukutseli ngobe sengitawukhuluma kwekugcina-ke manje. Ase ngitsi-ke ukhandza labalungile balishumi?” Wamphendvula watsi: “Ngenca yalabalungile labalishumi ngingeke ngilibhubhise.”
Kubeketela—Kucinisela Unemgomo
Liciniso likutsi, Jehova usibonelo lesihle sekubeketela. (2 Phet. 3:15) Tinyenti tibonelo letiseBhayibhelini letikhuluma ngetimo lapho Jehova abeketela khona kakhulu. (Neh. 9:30; Isa. 30:18) Nasi sibonelo, wenta njani Jehova ngesikhatsi Abrahama ambuta ngesincumo sakhe sekubhubhisa iSodoma? Kwekucala, Jehova akazange amhlabe lulwimi Abrahama ngesikhatsi asakhuluma, kunaloko wamlalelisisa. Jehova wakhombisa kutsi bekamlalele Abrahama ngoba watsi bekangeke ayibhubhise iSodoma nakungatsiwa kutfolakala bantfu labalishumi labalungile kuyo. (Gen. 18:22-33) Lesi sibonelo lesihle sekubeketela Jehova lasikhombisa!
(Genesisi 19:24, 25) Simakadze wanisa imvula yesibabule nemlilo, iphuma ezulwini, kwana etikweSodoma neGomora. 25 Wawabhubhisa lawo madolobha kanye nalo lonkhe lelo tsafa, nebantfu bawo bonkhe, nako konkhe lokwakumile emhlabatsini.
w10 11/15 26 ¶12
Jehova UyiNkhosi Yetfu LenguMbusi!
12 Singaciniseka kutsi Jehova utawuphakamisa bukhosi bakhe. Ngeke avumele kutsi bubi buchubeke phakadze, futsi siyati kutsi siphila emalangeni ekugcina. Jehova watsatsa sinyatselo ngebantfu lababi ngekutsi ababhubhise ngazamcolo. Wabhubhisa iGomora neSodoma kanye naFaro nelibutfo lakhe. BoSisera nelibutfo lakhe, Senaheribi kanye nema-Asiriya bebangacatsaniswa naJehova. (Gen. 7:1, 23; 19:24, 25; Eks. 14:30, 31; Khu. 4:15, 16; 2 Khos. 19:35, 36) Sinagciniseka kutsi Jehova Nkulunkulu ngeke akubeketelele kungahlonishwa kweligama lakhe kanye nekuhlushwa kwaboFakazi bakhe. Ngetulu kwaloko, siyaubona bufakazi bekutsi Jesu uyabusa kanye nebufakazi bekutsi lelive lelibi lelibi selitawuphela.—Mat. 24:3.
Kufunisisa Umcebo EVini LaNkulunkulu
(Genesisi 18:1) Simakadze wabonakala ku-Abrahama ngasema-okhini aMamre, ahleti ngasemnyango welithende lakhe ngesikhatsi sekushisa kwelilanga.
(Genesisi 18:22) Ngako-ke lamadvodza esuka lapho acondza ngaseSodoma; kepha Abrahama wasala embikwaSimakadze.
w88-ZU 5/15 23 ¶4-5
Ukhona Yini Umuntfu Lowake Wabona Nkulunkulu?
Nyalo sesiyabona kutsi kungani Abrahama akhuluma nalengilosi lebeyitfunywe nguNkulunkulu kwaba shengatsi ukhuluma naJehova Nkulunkulu lucobo lwakhe. Njengoba lengilosi yakhuluma konkhe loko Jehova bekafuna kukusho ku-Abrahama futsi beyimelele Nkulunkulu, kungako liBhayibheli litsi “Simakadze wabonakala ku-Abrahama.”—Gen. 18:1.
Khumbula kutsi ingilosi lebeyitfunywe nguNkulunkulu bekufanele iwendlulisele njengobe unjalo umlayeto lovela kuye, njengobe lucingo nobe umsakato wendlulisela umlayeto njengobe unjalo kulomunye umuntfu. Kungako-ke, bo-Abarahama, Mosi na-Manowa kanye nalabanye, ngesikhatsi bakhuluma netingilosi kwaba shengatsi bakhuluma naNkulunkulu. Nanobe labantfu laba bebakhona kutibona tingilosi nenkhatimulo yaJehova lebeyibonakala kuto kodvwa abazange sebambone Nkulunkulu. Ngako-ke, loku kuyahlangana naloko lokwashiwo ngumphostoli Johane lowatsi: “Kute umuntfu loke wabona Nkulunkulu.” (Joh. 1:18) Lamadvodza abona tingilosi lebetitfunyiwe hhayi Nkulunkulu lucobo lwakhe.
(Genesisi 19:26) Kepha umkaLoti wabuka emuva, wagucuka masinyane waba yinsika yeluswayi.
Indlela Yekusita Bantfu Labacindzetelekile
3 Loti wenta sincumo lesibi ngesikhatsi akhetsa kuhlala nebantfu baseSodoma lebebatiphatsa kabi kakhulu. (Fundza 2 Phetro 2:7, 8) Lendzawo beyiyinhle kakhulu, kodvwa Loti wabhekana netinkinga letinyenti njengobe besekahlala khona. (Gen. 13:8-13; 14:12) Kungenteka umkaLoti wabese ulitsandza kakhulu lelidolobha nome labanye bantfu lebebahlala khona lokwamenta wagcina sekangasamlaleli Jehova. Wafa ngesikhatsi Nkulunkulu aletsa umlilo nesibabule eSodoma. Cabanga ngemadvodzakati akhe lamabili. Lamadvodzakati akhe beketsembisene umshado nemadvodza lafa nakubhujiswa iSodoma. Likhaya laLoti labhujiswa kanye netimphahla takhe futsi lokubuhlungu kakhulu kutsi nemkakhe wafa. (Gen. 19:12-14, 17, 26) Jehova wambeketelela yini Loti kulesikhatsi lesimatima? Yebo.
Kufundvwa KweliBhayibheli
(Genesisi 18:1-19) Simakadze wabonakala ku-Abrahama ngasema-okhini aMamre, ahleti ngasemnyango welithende lakhe ngesikhatsi sekushisa kwelilanga. 2 Abrahama watsi nakaphakamisa emehlo, wabona emadvodza lamatsatfu eme embikwakhe. Watsi kube awabone, wesuka emnyango welithende lakhe wagijima wawahlangabeta, wafike wakhotsama, 3 watsi: “Banumzane, nangitfole umusa emehlweni enu, ningayendluli inceku yenu. 4 Ase nginiletsele liyakana lemanti nitewugeza tinyawo tenu, bese niphumula la emtfuntini walesihlahla. 5 Ngitawulandza lucetwana lwesinkhwa, khona nitewudla kucala ningakahambi, njengobe naku senifike ekhaya lenceku yenu.” Ngako-ke batsi kuye: “Kulungile, yenta njengobe sewushito.” 6 Abrahama waphutfuma ethendeni kuSara, watsi: “Sheshisa utsatse emabinta lamatsatfu afulaha uyibhuce, wente emacebelengwane.” 7 Abrahama wagijima waya etinkhomeni, wafike wakhetsa litfole lelihle lelikhuluphele, walinika sisebenti, naso saphutfuma salilungisa. 8 Watsatsa emasi, nelubisi, nalenyama yelitfole leyase ilungisiwe, wakubeka embikwawo; yena wema eceleni kwawo phansi kwesihlahla ngesikhatsi asadla. 9 Ambuta atsi: “Uphi Sara, umkakho?” Wawaphendvula watsi: “Usethendeni.” 10 Simakadze watsi kuye: “Impela ngitawubuya kuwe ngemnyaka lotako ngasona lesikhatsi, Sara umkakho utawuba nendvodzana.” Sara wakuva loko, ngobe abesemnyango welithende emvakwa-Abrahama, alalele. 11 Kepha bo-Abrahama naSara bese babadzala kakhulu, naSara abengasayi esikhatsini. 12 Sara watihlekela nje, wadzimate watsi: “Manje sengimdzala kangaka, nenkhosi yami seyigugile, utsi ngingabe ngisaba nayo lenjabulo?” 13 Simakadze watsi ku-Abrahama: “Uhlekeleni Sara, atsi: ‘Ngitawutala umntfwana sengimdzala kangaka?’ 14 Kukhona yini lokungamehlula Simakadze? Njengobe sengishito, ngitawubuya la kuwe ngemnyaka lotako. Sara utawuba nendvodzana.” 15 Kodvwa Sara waphika ngenca yekwesaba watsi: “Angikahleki.” Kepha waphendvula watsi: “Cha, vele uhlekile.” 16 Lamadvodza esuka lapho ahamba asalibhekise eSodoma, Abrahama wawaphekeletela, entela kuwakhombisa indlela. 17 Simakadze wase utsi: “Kodvwa ngingamfihlela yini Abrahama loku lengitakwenta? 18 Phela, Abrahama utawuba sive lesikhulu lesinemandla, tonkhe tive temhlaba tiyawubusiswa ngaye. 19 Cha, ngeke, ngobe Abrahama ngimkhetsile kutsi ayale emadvodzana akhe netitukulwane takhe emvakwakhe, kutsi bagcine intsandvo yaSimakadze ngekwenta lokuhle nalokulungile. Khona-ke Simakadze uyawunika Abrahama loko lametsembisa kona.”
FEBRUARY 24–MARCH 1
UMCEBO LOSEVINI LANKULUNKULU | GENESISI 20–21
“Jehova Uhlale Akwenta Loko Lakwetsembisile”
(Genesisi 21:1-3) Simakadze wabusisa Sara njengobe abeshito. Simakadze wentela Sara loko abemetsembise kona. 2 Sara wakhulelwa, watalela Abrahama indvodzana ngesikhatsi lesasikhonjwe nguNkulunkulu. Abrahama abesamdzala kakhulu. 3 Abrahama wayetsa libito watsi ngu-Isaka lendvodzana yakhe labeyitalelwe nguSara.
Nkulunkulu Wambita Ngekutsi “Inkhosatana”
Ngabe kuhleka kwaSara bekusho kutsi ute yini kukholwa? Cha. LiBhayibheli litsi: “Ngekukholwa, Sara wemukela emandla kuze atetfwale abe nentalo, ngisho nobe abesamdzala kakhulu kutsi angatala, ngobe abemetsemba loyo lowetsembisa.” (Hebheru 11:11) Sara bekamati kahle Jehova, futsi bekati nekutsi angagcwalisa nobe ngabe ngusiphi setsembiso lasentile. Ngubani nje kitsi longeta akudzinga kukholwa lokufana naloku? Sitawube senta kahle nangabe simati kancono Nkulunkulu, umnikati weliBhayibheli. Njengobe sifundza ngaye, sitawubona kutsi Sara bekenta intfo lekahle ngekuba nekukholwa. Jehova wetsembekile futsi utigcwalisa tonkhe tetsembiso takhe—ngalesinye sikhatsi, angahle ente tintfo lesikatilindzeli nobe tisente sihleke nje!
“KWENTE NJENGOBE AKUTJELILE”
Nakaneminyaka lengu-90 budzala, Sara wagcine akutfolile loko bekasolo akulangatelela kuphila kwakhe konkhe. Watalela indvodza yakhe, lebeyineminyaka lelikhulu budzala, indvodzana! Abrahama wetsa lomntfwana libito lelitsi Isaka nobe “Luhleko,” njengobe Nkulunkulu abemtjelile. Singake simbone ngeliso lengcondvo Sara amamatseka nakasho nankha emavi latsi: “Nkulunkulu ungiphe luhleko, bonkhe labayivako lendzaba bayawuhleka njengami.” (Genesisi 21:6) Lesipho lesimangalisako lebesivela kuJehova samjabulisa Sara kwaze kwaba sekufeni kwakhe. Nobe kunjalo, saphindze samngetela leminye imitfwalo.
Ngesikhatsi Isaka aneminyaka lengu-5 budzala, umndeni wakhe wenta umcimbi wekulunyulwa kwakhe. Kodvwa betingahambi kahle tonkhe tintfo. LiBhayibheli lisitjela kutsi Sara bekahlala ‘abona’ intfo lebeyimvisa buhlungu. Ishmayeli, indvodzana yaHagari lebeyineminyaka lengu-19 budzala, beyimhlupha onkhe malanga Isaka. Bekungasiko nje kutsi uyamdlalisa. Kamuva umphostoli Pawula waphemfulela kutsi abite lesento sa-Ishmayeli ngekutsi lushishiso. Sara wabona kutsi lokuhlukubetwa kwa-Isaka bekungafaka kuphila kwendvodzana yakhe engotini. Sara bekati kutsi Isaka bekangetulu nje kwekuba yindvodzana yakhe, kodvwa bekanendzima lebalulekile ekugcwaliseni injongo yaJehova. Ngako wacunga sibindzi, futsi wakhuluma na-Abrahama. Wamcela kutsi ahambise Hagari kanye na-Ishmayeli.—Genesisi 21:8-10; Galathiya 4:22, 23, 29.
Wativa njani Abrahama ngaloko? LiBhayibheli litsi: “Loku kwamkhatsata kakhulu Abrahama, ngobe bekuphatselene nalendvodzana yakhe.” Bekamtsandza kakhulu Ishmayeli, futsi bekutawuba lukhuni kwehlukana naye. Nobe kunjalo, Jehova abesicondza kancono lesimo, ngako wangenela kulendzaba. LiBhayibheli litsi: “Kodvwa Nkulunkulu watsi ku-Abrahama: “Ungakhatsateki ngenca yalomfana nangenca yalesigcilikati sakho. Loko lokushiwo nguSara kuwe kwente njengobe akutjelile, ngobe titukulwane takho tiyawubitwa nga-Isaka.”” Jehova wacinisekisa Abrahama kutsi abetawubanakekela boHagari kanye nendvodzana yakhe. Abrahama lobekanekukholwa wavumelana naleso sincumo.—Genesisi 21:11-14.
(Genesisi 21:5-7) Abrahama abesaneminyaka lelikhulu budzala, ngesikhatsi kutalwa indvodzana yakhe Isaka. 6 Sara watsi: “Nkulunkulu ungiphe luhleko, bonkhe labayivako lendzaba bayawuhleka njengami.” 7 Wachubeka watsi: “Ngubani nje labengahle asho ku-Abrahama kutsi Sara uyawuse amunyise bantfwana? Noko sengimtalele indvodzana ebudzaleni bakhe.”
(Genesisi 21:10-12) Ngako-ke wase utsi ku-Abrahama: “Sicoshe lesigcilikati nalendvodzana yaso, ngobe indvodzana yalesigcilikati akufanele ibe yindlalifa kanye nendvodzana yami Isaka.” 11 Loku kwamkhatsata kakhulu Abrahama, ngobe bekuphatselene nalendvodzana yakhe. 12 Kodvwa Nkulunkulu watsi ku-Abrahama: “Ungakhatsateki ngenca yalomfana nangenca yalesigcilikati sakho. Loko lokushiwo nguSara kuwe kwente njengobe akutjelile, ngobe titukulwane takho tiyawubitwa nga-Isaka.
(Genesisi 21:14) Ngakusasa ekuseni Abrahama wavuka kuseluvivi, watsatsa sinkhwa nesigubhu semanti wakwetjatsisa Hagari, wamnika nemntfwana wabahambisa. Wahamba-ke Hagari azulazula ehlane laseBherisheba.
Kufunisisa Umcebo EVini LaNkulunkulu
(Genesisi 20:12) Ngaphandle kwaloko nje, vele ungudzadzewetfu, ngobe uyindvodzakati yababe, kodvwa hhayi yamake; kodvwa noko ungumkami.
wp17.3 12, umbhalo longentasi.
‘Ungumfati Lomuhle Sibili’
Sara bekangusisi wa-Abrahama. Thera bekangubabe wabo bobabili kepha banabomake labehlukene. (Genesisi 20:12) Lamuhla kushada kwetihlobo akusemukeleki, kodvwa kubalulekile kukhumbula kutsi tintfo atisafani nakadzeni. Bantfu bebasondzele kakhulu emphilweni lephelele leyalahlwa bo-Adamu na-Eva. Kubantfu labacine njengalabo kushada netihlobo bekungeke kuphatamise takhi telufuto. Noma kunjalo ngemuva kweminyaka lengu-400 bese baphila iminyaka lelingana neyetfu. Ngaleso sikhatsi, umtsetfo Nkulunkulu lawunika Mose bewungavutimeli tihlobo kutsi tiye ecasini—Levithikhusi 18:6.
(Genesisi 21:33) Abrahama wahlanyela sihlahla selitamariske eBherisheba. Wadvumisa Simakadze, Nkulunkulu waphakadze.
w89-ZU 7/1 20 ¶9
Abrahama—Usibonelo Sabo Bonkhe Labafuna Kuba Bangani BaNkulunkulu
9 Abrama wakhombisa nangalenye indlela kutsi abenekukholwa. Njengobe lombhalo usho: “Wakhela Simakadze lilati.” (Genesisi 12:7) Kuyacaca kutsi loku bekufaka ekhatsi nekwenta umhlatjelo wetilwane, ngobe ligama lesiHebheru lelitsi “lilati” lisho “indzawo yemhlatjelo.” Ngekuhamba kwesikhatsi, Abrama waphindze wasenta lesento lebesikhombisa kutsi abenekukholwa ngisho nalapho akuletinye tindzawo talelive. Ngetulu kwaloko, ‘wakhuleka kuSimakadze.’ (Genesisi 12:8; 13:18; 21:33) Sisho sesiHebheru lesitsi “wakhuleka” siphidze sisho kutsi “wamemetela.” Kungenteka umndeni wa-Abrama kanye nemaKhenani yamuva nakamemetela libito laNkulunkulu wakhe Jehova. (Genesisi 14:22-24) Ngendlela lefanako, bonkhe labafuna kuba bangani baNkulunkulu kufanele babite ligama laJehova ngekukholwa. Loku kufaka ekhatsi kushumayela etindzaweni tawonkhe wonkhe. Ngako-ke, “asimbonge njalo Nkulunkulu, simdvumise, lokumdvumisa akube ngumnikelo wayo yonkhe imilomo levuma libito lakhe.”—Hebheru 13:15; Roma 10:10.
Kufundvwa KweliBhayibheli
(Genesisi 20:1-18) Abrahama wesuka kulelo live waya eveni laseNegevu, eningizimu naseKhenani. Wafike wahlala emkhatsini weKhadeshi neShuri; wahlalahlala eGerari. 2 Wafike lapho watsi: “Sara ngudzadzewetfu.” Ngako-ke Abimeleki, inkhosi yaseGerari, yatfumela kutsi kulandvwe Sara. 3 Kodvwa Nkulunkulu weta ku-Abimeleki ngeliphupho ebusuku watsi kuye: “Wena utakufa ngenca yalomfati lomtsetse, ngobe ungumfati walendvodza.” 4 Abimeleki abesengakaze wangena kuye, ngako-ke wase utsi: “Nkhosi, utasibhubhisa yini nalesive lesite licala? 5 Kantsi akasho yini Abrahama kutsi ngudzadzewabo? Naye lomfati utsite ngumnakabo. Loku ngikwente ngenhlitiyo lemhlophe, tandla tami atinacala.” 6 Nkulunkulu wamphendvula ephusheni watsi: “Yebo, ngiyati kutsi loku ukwente ngenhlitiyo lemhlophe, futsi ngimi lokuvimbile kutsi ungoni kimi, ngako angikakuvumeli kutsi umtsintse. 7 Manje-ke, mncandzekise lomfati walendvodza, ngobe ingumphrofethi; itakuthandazela bese uyaphila. Kodvwa nawungamncandzekisi, ubovele wati kutsi utakufa, wena nebantfu bakho.” 8 Ngako-ke ekuseni ngeluvivi Abimeleki wavuka, wabita tonkhe tindvuna takhe, waticocela ngako konkhe loko; nato tesaba kakhulu. 9 Abimeleki wabita Abrahama wambuta watsi: “Yini lena lose uyente la kitsi? Ngikone ngani, kutsi ungaze uletsele mine kanye nembuso wami lesono lesikhulu kangaka? Utenteleni letintfo bewungakafaneli kutenta?” 10 Abimeleki wachubeka watsi: “Bewucabangani, nawenta lentfo?” 11 Abrahama wamphendvula watsi: “Ngikwente ngobe ngicabange ngatsi: ‘Akukho kwesaba Nkulunkulu kulendzawo, ngako batangibulala ngenca yalomfati wami.’ 12 Ngaphandle kwaloko nje, vele ungudzadzewetfu, ngobe uyindvodzakati yababe, kodvwa hhayi yamake; kodvwa noko ungumkami. 13 Nkulunkulu nangikhipha endlini yababe kutsi ngizulazule, ngatsi kuSara: ‘Naku-ke lengicela ungentele kona: Yonkhe indzawo lapho sifika khona, ubobatjela ngami utsi: “Ungumnaketfu.”’” 14 Abimeleki watsatsa timvu, netinkhabi, netisebenti letidvuna naletisikati, watipha Abrahama, wabuyisela Sara endvodzeni yakhe. 15 Abimeleki watsi: “Buka la, nali live lami, yakha lapho utsandza khona.” 16 Wagucukela kuSara watsi: “Umnakenu sengimnike emasiliva layinkhulungwane; loku kufakaza kubo bonkhe laba kutsi awunacala, kute lokubi lokwentile.” 17 Abrahama wathandaza kuNkulunkulu. Nkulunkulu waphilisa Abimeleki, nemkakhe, netisebenti letisikati kuze bonkhe batale bantfwana. 18 Phela Simakadze abesavale tonkhe titalo tebemndeni waka-Abimeleki ngenca yaSara, umka-Abraham