I-Watchtower ONLINE LIBRARY
I-Watchtower ONLINE LIBRARY
WeSicongosekulindza
SiSwati
  • LIBHAYIBHELI
  • LOKUTFOLAKALAKO
  • IMIHLANGANO
  • w11 1/1 emakh. 28-32
  • Siniketwa Emandla Ekuncoba Nobe Nguluphi Luvivinyo

Kute i-video kulolokukhetsile.

Siyacolisa. Kube nenkinga nayisavuleka le-video.

  • Siniketwa Emandla Ekuncoba Nobe Nguluphi Luvivinyo
  • Sicongosekulindza Simemetela UMbuso WaJehova—2011
  • Tihlokwana
  • Tincwadzi Letinemaphuzu Lafanako
  • Sitfola Lusito Lwekuncoba Kushushiswa Ngekwenkholo
  • Sitfola Lusito Lwekumelana Nekucindzetelwa Bontsanga
  • Siniketwa Emandla Ekubeketelela Tonkhe Tinhlobo Tebumatima
  • Sitfola Lusito Lwekuncoba Luvivinyo Netilingo
  • Siniketwa Emandla Ekuncoba Tilingo Kanye Nekubeketelela Kudvumateka
    Sicongosekulindza Simemetela UMbuso WaJehova—2011
  • Jehova Uyabanaka Bantfu Bakhe
    Sicongosekulindza Simemetela UMbuso WaJehova (Lofundvwako)—2022
  • Ungahlala Wetsembekile Ngisho Nobe Bantfu Bakuphatsa Kabi
    Jabulela Kuphila Kuze Kube Phakadze!—Incwadzi Letakusita Ulati Kahle LiBhayibheli
  • Kubeketelela Timo Letibuhlungu Talamuhla Ngesibindzi
    Sicongosekulindza Simemetela UMbuso WaJehova—2012
Sicongosekulindza Simemetela UMbuso WaJehova—2011
w11 1/1 emakh. 28-32

Siniketwa Emandla Ekuncoba Nobe Nguluphi Luvivinyo

‘Nginemandla ekwenta konkhe ngaye longicinisako.’—FIL. 4:13.

1. Kungani bantfu baJehova bahlangabetana nebumatima lobehlukehlukene?

NGALOKUVAMILE, bantfu baJehova bahlangabetana nebumatima lobehlukehlukene. Lobunye bubangelwa ngemaphutsa etfu kantsi lobunye bubangelwa ngulelive lesiphila kulo. Lobunye bubangelwa butsa lobukhona emkhatsini webantfu labakhonta Nkulunkulu kanye nalabo labangamkhonti. (Gen. 3:15) Kusukela ekucaleni kwemlandvo webantfu, Nkulunkulu abetisita tinceku takhe letetsembekile kutsi tincobe kushushiswa ngekwenkholo, timelane nekucindzetelwa bontsanga lokuyingoti, futsi tibeketelele bumatima lobehlukehlukene. Umoya wakhe longcwele ungasiniketa emandla ekutsi natsi siphumelele.

Sitfola Lusito Lwekuncoba Kushushiswa Ngekwenkholo

2. Iyini injongo yekushushiswa ngekwenkholo, futsi kungavela ngatiphi tindlela?

2 Kushushiwa ngekwenkholo kukuhlushwa nobe kulinyatwa lokwentiwa kubantfu ngesizatfu setinkholelo tabo. Injongo yako kucedza leto tinkholelo, kutivimba kutsi tingasakateki, nobe kuphula bucotfo bebantfu labakholelwa kuto. Kushushiswa kungavela ngetindlela letehlukehlukene, letinye kumelula kutibona kantsi letinye atibonakali. LiBhayibheli litsi kuhlasela kwaSathane kufanana nekuhlasela kwelibhubesi kanye nekwenyoka.—Fundza Tihlabelelo 91:13.

3. Kungachazwa njani kuhlasela lokunjengekwelibhubesi kanye nekwenyoka?

3 Njengelibhubesi lelinelulaka, Sathane uye wahlasela bantfu ngetindlela letibonakalako asebentisa budlova, kuboshwa, nobe kuvinjelwa. (Hla. 94:20) Imibiko lesetincwadzini temnyaka lechaza tento taboFakazi BaJehova esikhatsini salamuhla, inetindzaba letinyenti letimayelana nalokuhlaselwa. Ticuku tebantfu letineludlame letiholwa bafundisi nobe betembusave, tiye tahlupha bantfu baNkulunkulu emaveni lamanyenti. Lokuhlasela lokufanana nekwelibhubesi kuye kwenta labatsite bayekela kukhonta Jehova. Njengenyoka, Develi uphindze ahlasele bantfu asendzaweni lebhacile kute onakalise tingcondvo tabo futsi abayengele ekwenteni intsandvo yakhe. Loluhlobo lwekuhlasela lwentelwe kulimata kukholwa kwetfu. Nanobe kunjalo, ngemoya longcwele waNkulunkulu, singakwati kutincoba totimbili letindlela.

4, 5. Nguyiphi indlela lencono kakhulu yekulungela lushushiso, futsi kungani? Niketa sibonelo.

4 Kumane sicabange ngelushushiso lokungenteka sihlangabetane nalo, akusiyo indlela lencono yekululungela. Asilwati lushushiso lesitawuhlangabetana nalo, ngako kukhatsateka ngentfo lengase ingenteki akuzuzisi. Nanobe kunjalo, kukhona lesingakwenta. Bantfu labanyenti labaye balubeketelela lushushiso basitwe kuzindla ngetibonelo tetinceku taJehova letetsembekile lokukhulunywa ngato emiBhalweni, kanye nangetimfundziso nesibonelo saJesu. Loku kuye kwabasita kutsi bakhulise lutsandvo lwabo ngaJehova. Lolutsandvo lubasitile ekutseni bamelane nanobe nguluphi luvivinyo labahlangabetana nalo.

5 Cabanga ngesibonelo sabodzadze lababili baseMalawi. Ngesizatfu sekutsi sicuku sebantfu lesinebudlova besetama kubacindzetela kutsi batsenge emakhadi elicembu letembusave, sabashaya, sabakhumula timphahla, futsi sabesabisa ngekutsi sitawubadlwengula. Lesicuku sakhuluma emanga, sabatjela kutsi ngisho nebazalwane baseBethel besebawatsengile lamakhadi. Labodzadze baphendvula njani? Batsi: “Tsine sikhonta Nkulunkulu Jehova kuphela. Ngako-ke, kutsi bazalwane labasehhovisini leligatja sebawatsengile lamakhadi, akusenti sigucuke. Angeke sikulahle kukholwa kwetfu, ngisho nobe ningasibulala imbala!” Ngemuva kwekutsi labodzadze balimelele ngesibindzi liciniso, bakhululwa.

6, 7. Jehova utiniketa njani tinceku takhe emandla ekumelana nelushushiso?

6 Umphostoli Pawula watsi emaKhristu aseThesalonika emukela umlayeto weliciniso ‘asenhluphekweni lenkhulu,’ kodvwa ‘anenjabulo layinikwe ngumoya longcwele.’ (1 Thes. 1:6) EmaKhristu lamanyenti, asendvulo newalamuhla, laye ahlangabetana nelushushiso futsi aluncoba, abika kutsi ngesikhatsi kulingwa kuba matima kakhulu, abetfola kuthula kwangekhatsi, lokungulesinye sici setitselo temoya longcwele waNkulunkulu. (Gal. 5:22) Ngekuhamba kwesikhatsi, loko kuthula kuye kwawasita ngekutsi kulondze tinhlitiyo kanye nemandla awo ekucabanga. Jehova usebentisa umoya wakhe kute anikete tinceku takhe emandla ekubeketelela kuvivinywa, kanye nekwenta ngekuhlakanipha lapho bumatima buvela.a

7 Bantfu lababukele baye bamangala ngekutimisela kwebantfu baNkulunkulu kutsi balondvolote bucotfo babo ngisho nalapho bahlangabetana nelushushiso lolumatima. Bekubonakala shengatsi boFakazi banemandla langetulu kwalavamile, futsi loko bekuliciniso. Umphostoli Phetro uyasicinisekisa: ‘Nibusisiwe nanetfukwa ngenca yelibito laKhristu, ngobe loko kukhombisa kutsi umoya webukhosi, lowaNkulunkulu, unifukamele.’ (1 Phet. 4:14) Kushushiswa kwetfu ngesizatfu sekutsi sisekela timiso tekulunga kuveta kutsi siyemukeleka kuNkulunkulu. (Mat. 5:10-12; Joh. 15:20) Lobufakazi bekutsi Jehova uyasibusisa busiletsela injabulo lenkhulu!

Sitfola Lusito Lwekumelana Nekucindzetelwa Bontsanga

8. (a) Yini leyasita boJoshuwa naKhalebi kutsi bamelane nekucindzetelwa bontsanga? (b) Yini lesingayifundza esibonelweni saJoshuwa naKhalebi?

8 Lokunye kuhlasela lokungabonakali emaKhristu lokufanele akuncobe, kucindzetelwa bontsanga lokuyingoti. Ngesizatfu sekutsi umoya waJehova unemandla kakhulu kwendlula umoya walelive, singakwati kumelana nebantfu labasedzelelako, labasakata emanga ngatsi, nobe labasicindzetela kutsi semukele indlela yabo yekuphila. Cabanga ngaloku: Yini leyasita boJoshuwa naKhalebi kutsi bangavumelani nembono wetinhloli letilishumi lebetitfunywe eveni laseKhenani? Sizatfu sikutsi balandzela sicondziso semoya waNkulunkulu, futsi kanjalo baba “nemoya” nobe simo sengcondvo lesehlukile.—Fundza Numeri 13:30; 14:6-10, 24.

9. Kungani emaKhristu kufanele ehluke elinyentini?

9 Ngalokufananako, umoya longcwele waniketa baphostoli baJesu emandla ekulalela Nkulunkulu kunekutsi balalele labo labebatsatfwa njengalabafundzisa ngenkholo yeliciniso. (Imis. 4:21, 31; 5:29, 32) Kute babalekele kuphikisana nalabanye, bantfu labanyenti bakhetsa kwenta tonkhe tintfo letentiwa ngulabanye bantfu. Ngalokuphambene naloko, emaKhristu eliciniso wona ayakumelela loko lati kutsi kulungile. Ngesizatfu semandla lavela emoyeni longcwele waNkulunkulu, awakwesabi kwehluka kulabanye. (2 Thim. 1:7) Asesicabange ngalenye incenye lokungakafaneli sincotjwe kucindzetelwa bontsanga kuyo.

10. Nguyiphi inkinga lamanye emaKhristu langahlangabetana nayo?

10 Labanye bantfu labasebasha bangase bahlangabetane nenkinga nabatfola kutsi umngani wabo uye watiphatsa ngendlela leshayisana nemibhalo. Bangase bacabange kutsi kufunela umngani wabo lusito lwakamoya kungase kucedze kwetsembana kwabo; ngako-ke bangase bangakhulumi ngalendzaba ngobe bacabanga kutsi kufanele bayigcine isifuba. Lona lowonile angase aphocelele bangani bakhe kutsi basifihle sono lasentile. Lenkinga lesikhuluma ngayo ayigcini kubantfu labasebasha kuphela. Nalabanye bantfu labadzala bangase bakutfole kumatima kuya kulabadzala belibandla bayobika sono lesentiwe ngumngani nobe lilunga lemndeni. EmaKhristu eliciniso kufanele asabele njani nakacindzetelwa ngalendlela?

11, 12. Yini lokufanele uyente nangabe lomunye losebandleni akucela kutsi ungabuveti bubi labentako, futsi kungani?

11 Asewucabange nganasi simo: Asesitsi Mandla, umzalwane losemusha, utfola kutsi Sipho, umngani wakhe labanaye ebandleni sewungene emkhubeni wekubuka titfombe letingcolile. Utjela Sipho kutsi ukhatsateke kakhulu ngaloko lakwentako. Nobe kunjalo, Sipho akamnaki. Mandla nakatjela Sipho kutsi akayokhuluma nalabadzala ngalenkinga, Sipho utsi nangabe Mandla angumngani wakhe mbamba, angeke amcebe. Kufanele yini Mandla akhatsateke ngekutsi utawulahlekelwa ngumngani wakhe? Kungenteka ukhatsatwa kutsi labadzala batawukholwa bani nangabe Sipho ayiphika lendzaba. Nanobe kunjalo, simo angeke sibe ncono nangabe Mandla abindza. Kunaloko, sitawuholela ekutseni Sipho alahlekelwe buhlobo bakhe naJehova. Kuhle kutsi Mandla akhumbule kutsi “kwesaba bantfu kulugibe; kodvwa lowo lowetsembekile kuSimakadze ulondvolotekile.” (Taga 29:25) Yini lenye Mandla langayenta? Ngelutsandvo, angabuyela kuSipho kute bacoce ngalenkinga. Loko kutawudzinga kutsi abe nesibindzi. Kungenteka kutsi ngaleso sikhatsi Sipho utawuvuma kukhuluma ngalenkinga. Mandla kufanele aphindze amkhumbute kutsi akhulume nalabadzala, nekutsi nakangayi kute kube sikhatsi lesitsite, sekutawukuya yena kuyawubabikela.—Lev. 5:1.

12 Nangabe kwenteka kudzingeka usingatse simo lesinjalo, ekucaleni umngani wakho angase angayijabuleli imetamo yakho. Ngekuhamba kwesikhatsi angase abone kutsi loko lokwentako ukwentela kutsi kuzuze yena. Nangabe loyo lowonile alutfola futsi alwemukela lusito, utawuhlala njalo akubonga ngesibindzi kanye nangekwetsembeka kwakho. Ngakulokunye, nangabe akubambela inhlitiyo, usuke angilo yini luhlobo lwemngani lolufunako? Kujabulisa Jehova, longuMngani wetfu lomkhulu, kuyawuhlale kuyintfo lelungile lokufanele siyente. Nangabe eta kucala kitsi, bantfu labamtsandzako batawusihlonipha ngesizatfu sekwetsembeka kwetfu, futsi batawuba bangani beliciniso kitsi. Akukafaneli sinikete Develi indzawo ebandleni lebuKhristu. Kube besingenta njalo, besitawudzabukisa umoya longcwele waJehova. Ngekulwela kugcina libandla lebuKhristu lihlantekile, sisuke sisebenta ngekuvumelana nawo.—Ef. 4:27, 30.

Siniketwa Emandla Ekubeketelela Tonkhe Tinhlobo Tebumatima

13. Ngutiphi tinhlobo tebumatima bantfu baJehova labahlangabetana nato, futsi kungani tivame kangaka?

13 Bumatima bungeta ngetindlela letinyenti—kungaba kushintja kwesimo semnotfo, kulahlekelwa ngumsebenti, tinhlekelele temvelo, kushonelwa ngumuntfu lomtsandzako, tinkinga temphilo, kanye nalokunye lokunyenti. Njengobe siphila ‘etikhatsini letimatima,’ kufanele silindzele kutsi sonkhe sitawuhlangabetana neluvivinyo. (2 Thim. 3:1) Nakwenteka sihlangabetana nalo, akukafaneli sesabe. Umoya longcwele utawusiniketa emandla ekubeketelela nobe ngubuphi bumatima.

14. Yini leyasita Jobe kutsi abeketelele bumatima lahlangabetana nabo?

14 Jobe wahlangabetana nebumatima lobunyenti. Walahlekelwa yimphahla yakhe, bantfwana, bangani, kanye nemphilo, futsi umfati wakhe waphelelwa litsemba kuJehova. (Jobe 1:13-19; 2:7-9) Nanobe kunjalo, Elihu waba ngumdvudvuti weliciniso kuJobe. Naku lokwakushiwo ngumlayeto wakhe kanye naloko lokwakucuketfwe ngumlayeto waJehova kuJobe: “Asewume ucabange kahle ngetimanga taNkulunkulu.” (Jobe 37:14) Yini leyasita Jobe kutsi abeketelele loluvivinyo lahlangabetana nalo? Yini-ke lengasisita kutsi sibeketelele lwetfu? Singasitwa kukhumbula kanye nekuzindla ngetindlela letehlukehlukene umoya longcwele kanye nemandla aJehova laye avetwa ngato. (Jobe 38:1-41; 42:1, 2) Mhlawumbe sikhumbula tikhatsi ekuphileni kwetfu lapho satibonela khona bufakazi bekutsi Nkulunkulu uyasikhatsalela. Usasikhatsalela nanyalo.

15. Yini leyacinisa umphostoli Pawula kute abeketelele luvivinyo?

15 Ngesizatfu sekukholwa kwakhe, umphostoli Pawula wabeketelela bumatima lobunyenti lobabufaka kuphila kwakhe engotini. (2 Khor. 11:23-28) Yini leyamsita kutsi acine futsi alondvolote simo lesihle semivelo nangetulu kwaleto timo letimatima? Wasitwa kuthandaza kuJehova. Ngesikhatsi ahlangabetana neluvivinyo lolwagcina luphumele ekubulaweni kwakhe, Pawula wabhala: “INkhosi yema nami yangicinisa kuze inshumayelo yami ipheleliswe ngami, nebetive beve. Ngako-ke ngakhululwa emlonyeni welibhubesi.” (2 Thim. 4:17) Ngesizatfu saletintfo lahlangabetana nato, wacinisa emakholwa labekanye nawo ngekutsi akudzingeki ‘akhatsateke ngalutfo.’—Fundza Filiphi 4:6, 7, 13.

16, 17. Niketa sibonelo sendlela Jehova labaniketa ngayo emandla bantfu bakhe kute bamelane nebumatima lamuhla.

16 Roxana, lolihlahlandlela, ungulomunye walabo labatibonela bona matfupha indlela Jehova labanakekela ngayo bantfu bakhe. Mhlazana acela kumcashi wakhe imvume yekutsatsa ilifi yemalangana kute aye kulomunye wemihlangano yetfu lemikhulu, ngekutfukutsela lomcashi wakhe wamtjela kutsi nakangahamba utawumcosha. Nangetulu kwaloko, Roxana waya kuloyo mhlangano, futsi ngalokusuka enhlitiyweni abethandazela kutsi angalahlekelwa ngumsebenti. Ngemuva kwaloko, waba nekuthula emoyeni. NgeMsombuluko ngemuva kwemhlangano, lomcashi wakhe wavele wamcosha njengobe abeshito. Roxana abekhatsatekile. Abewudzinga lomsebenti ngobe nanobe abetfola liholo lelincane, kodvwa abekhona kunakekela umndeni wakhe. Waphindze wathandaza, futsi wacabanga ngekutsi njengobe Nkulunkulu amondlile ngekwakamoya emhlanganweni, nanyalo abengakhona kumnakekela ngekwenyama. Njengobe aya ekhaya, Roxana wabona lisayini lelitsi: “Kudzingeka Lusito,” futsi lalichaza kutsi kudzingeka bantfu labanalokuhlangenwe nako kwekusebentisa imishini yekutfunga yasemafemini, ngako-ke wafaka sicelo. Umphatsi waleyo femu watfola kutsi Roxana abete lokuhlangenwe nako, kodvwa wamcasha. Roxana abetfola liholo lebelicishe liliphindze kabili lelo labelitfola emsebentini wakhe wekucala. Wabona kutsi imithandazo yakhe beyiphendvuliwe. Sibusiso lesikhulu kutsi abekhona kuhlanganyela tindzaba letinhle nelinyenti letisebenti labesebenta nato. Labasihlanu babo, kuhlanganise nemphatsi wakhe, balemukela liciniso futsi babhajatiswa.

17 Ngaletinye tikhatsi kungase kubonakale shengatsi imithandazo yetfu ayiphendvulwa—lokungaba kutsi ngaleso sikhatsi nobe ngendlela lebesiyilindzele. Nangabe kunjalo, akungabateki kutsi kusuke kunesizatfu. Jehova usuke asati, kodvwa tsine singahle sisibone ngekuhamba kwesikhatsi. Yinye kuphela intfo lokufanele siciniseke ngayo—kutsi Nkulunkulu akabalahli labo labetsembekile kuye.—Heb. 6:10.

Sitfola Lusito Lwekuncoba Luvivinyo Netilingo

18, 19. (a) Kungani kufanele sikulindzele kuhlangabetana neluvivinyo kanye netilingo? (b) Ungaluncoba njani luvivinyo ngemphumelelo?

18 Bantfu baJehova abamangali nabahlangabetana nekulingwa, kudvumateka, kushushiswa, kanye nekucindzetelwa bontsanga. Lelive lisitfukutselele. (Joh. 15:17-19) Nanobe kunjalo, umoya longcwele ungasisita kutsi sincobe nobe ngabe nguluphi luvivinyo lesihlangabetana nalo emsebentini lesiwentela Nkulunkulu. Jehova angeke avumele kutsi silingwe ngaloko lokungetulu kwemandla etfu. (1 Khor. 10:13) Angeke asishiye nobe asilahle. (Heb. 13:5) Kulalela liVi lakhe leliphefumulelwe kuyasivikela futsi kusicinise. Ngetulu kwaloko, umoya waNkulunkulu ungatsintsa emakholwa lesikanye nawo kute asinikete lusito lesiludzingako.

19 Shengatsi sonkhe singachubeka sifuna lusito lwemoya longcwele, ngekuthandaza kanye nangekufundza imiBhalo. Shengatsi singachubeka ‘siciniswa ngemandla ebukhosi [baNkulunkulu], kuze kutsi nobe sekuvelani kodvwa sisime, sime, sibeketele ngekujabula.’—Khol. 1:11.

[Umbhalo longentansi]

a Kute utfole tibonelo, fundza Sicongosekulindza sa-May 1, 2001, likhasi 16; kanye ne-“Phaphama!” ya-February 8, 1993, emakhasi 21 na-22, ngesiZulu.

Ungaphendvula Njani?

• Ungakulungela njani kumelana nelushushiso?

• Yini lokufanele uyente nangabe lotsite akuncenga kutsi ungabuveti bubi labentako?

• Yini lokufanele uciniseke ngayo nawuhlangabetana nanobe nguluphi luhlobo lwebumatima?

[Sitfombe ekhasini 30]

Yini lesingayifundza kuJoshuwa kanye naKhalebi?

[Sitfombe ekhasini 31]

Ungamsita njani umngani lowente bubi?

    Tincwadzi TesiSwati (2002-2025)
    Phuma
    Ngena
    • SiSwati
    • Share
    • Khetsa Lokufunako
    • Copyright © 2025 I-Watch Tower Bible and Tract Society of Pennsylvania
    • Imibandzela Yekuyisebentisa
    • Kusetjentiswa Kwemininingwane Yakho
    • Privacy Settings
    • JW.ORG
    • Ngena
    Share