Khetsa Bangani Bakho Ngekuhlakanipha

Bangani lesisondzelene nabo bayasijabulisa ngetikhatsi letimnandzi, baphindze basicinise ngetikhatsi letimatima. Nobe kunjalo, liBhayibheli liyasecwayisa kutsi akusiwo wonkhe umuntfu longumngani lokahle. Ngako ungabakhetsa njani bangani labakahle? Cabanga nganayi imibuto lelandzelako.

1. Bangani lobakhetsako bangakutsintsa njani?

Esikhatsini lesinyenti senta tintfo letentiwa bantfu lesicitsa sikhatsi nabo. Loku kungaba nemiphumela lemihle nobe lemibi, ngisho nobe labantfu sicoca nabo sibabona nobe etintfweni tebuchwephesha. Njengobe liBhayibheli lisho, “loyo lohamba nalabahlakaniphile naye utawuhlakanipha, kodvwa tintfo titamhambela kabi loyo lotihlanganisa netilima [labo labangamtsandzi Jehova].” (Taga 13:20) Bangani labatsandza Jehova bangakusita kutsi uhlale usondzelene naye futsi wente tincumo letikahle. Kantsi bangani labangamtsandzi Jehova bangasenta sikhweshe kuye. Kungako liBhayibheli lisikhutsata kutsi sikhetse bangani betfu ngekuhlakanipha! Nangabe bangani betfu kubantfu labatsandza Nkulunkulu, loko kutawuzuzisa tsine kanye nabo. Sitawukhona ‘kuchubeka sikhutsatana futsi sakhana.’—1 KubaseThesalonika 5:11.

2. Indlela lokhetsa ngayo bangani ingamenta ative njani Jehova?

Jehova uyacaphelisisa nakakhetsa bangani bakhe. “Ungumngani lomkhulu webantfu labalungile.” (Taga 3:32) Jehova angativa njani nasingakhetsa bangani labangamtsandzi? Angadvumateka kakhulu! (Fundza Jakobe 4:4.) Ngakulokunye, utawujabula futsi asente bangani bakhe nasilahla bangani lababi futsi sisondzela kuye nakulabo labamtsandzako.—Tihlabelelo 15:1-4.

CHUBEKA UFUNISISA

3. Caphela ungakhetsi bangani lababi

Bangani lababi bantfu labangamtsandzi Nkulunkulu kanye netimiso takhe. Dlala le-VIDEO, bese nicoca ngalombuto lolandzelako.

I-VIDEO: Tati Tindlela Tekugwema Bangani Lababi (6:17)

• Ungaba njani ngumngani webantfu lababi ungakanaki?

Fundza 1 KubaseKhorinte 15:33, bese nicoca ngalemibuto:

• Ngumuntfu lonjani longaba ngumngani lomubi kuwe? Usho ngani?

Fundza Tihlabelelo 119:63, bese nicoca ngalombuto:

• Utawubona ngani kutsi umuntfu ungumngani lokahle?

4. Bantfu labangafani natsi bangaba bangani labakahle

LiBhayibheli likhuluma ngaDavide naJonathani, lokungemadvodza lamabili aka-Israyeli wasendvulo. Jonathani bekamdzala kakhulu kunaDavide futsi ayindvodzana yenkhosi. Nobe kunjalo, bebabangani labakhulu. Fundza 1 Samuweli 18:1, bese nicoca ngalombuto:

• Kungani kungakadzingeki kutsi bangani betfu ngaso sonkhe sikhatsi balingane natsi nobe babe sezingeni lekuphila lelifana neletfu?

Fundza KubaseRoma 1:11, 12, bese nicoca ngalombuto:

• Bangani labatsandza Jehova bangakhutsatana njani?

Kule-video lelandzelako, bona kutsi lomzalwane losemusha wabatfola njani bangani etindzaweni letingakalindzeleki. Dlala le-VIDEO, bese nicoca ngalemibuto lelandzelako.

I-VIDEO: Tfola Bangani Etindzaweni Letingakalindzeleki (5:06)

• Kule-video, yini leyenta batali ba-Akil bakhatsateka ngebangani bakhe basesikolweni?

• Ekucaleni, yini leyamenta wabatsandza labangani bakhe basesikolweni?

• Wakhona njani kuncoba situnge lebekanaso?

5. Ungabakha kanjani bangani labakahle

I-VIDEO: Ngulonjani Umngani Sibili? (4:14)

Fundza Taga 18:24 na-27:17, bese nicoca ngalemibuto:

• Bangani sibili basitana njani?

• Wena unabo yini bangani labanjalo? Nangabe ute, ungabatfola njani?

Fundza KubaseFiliphi 2:4, bese nicoca ngalombuto:

• Kuze ube nebangani labakahle, nawe kudzingeka ube ngumngani lokahle. Ungakwenta kanjani loko?

LOKO LESICOCE NGAKO

Nasikhetsa bangani betfu ngekuhlakanipha, sijabulisa Jehova futsi sitizuzisa tsine.

Yini Loyifundzile?

• Indlela lesikhetsa ngayo bangani ibaluleke ngani kuJehova?

• Bantfu labanjani lokungakafaneli sibente bangani betfu?

• Singabakha njani bungani lobucinile nebantfu labakahle?

LOKUNYE LONGAKUHLOLA

Fundza kutsi bangani labakahle bangakusita njani ngetikhatsi letimatima.

“Yakha Bungani Lobucinile Kusengakefiki Kuphela” (Sicongosekulindza, saNovember 2019)

Cabanga ngetinyatselo longatitsatsa kuze wakhe bangani labakahle.

“How Can I Make Good Friends?” (Questions Young People Ask—Answers That Work, Volume 1, chapter 8 letfolakala ngesiNgisi)

Yini lokufanele uyati ngekuba nebangani etintfweni tekuchumana?

Hlalakanipha Nawusebentisa Tekuchumana (4:12)

Endzabeni letsi “Bengifisa Kuba Nababe,” tfola kutsi kungani lenye indvodza yashintja bangani.

“LiBhayibheli Liyakugucula Kuphila” (Sicongosekulindza, sa-April 1, 2012)

1. Yini lokufanele siyikhumbule nasikhetsa kwekutijabulisa?

Yini lotsandza kuyenta nawuphumulile? Labanye batsandza kutihlalela ekhaya bafundze incwadzi, balalele umculo, babukele i-movie nobe bangene ku-Internet. Labanye batsandza kuba nebangani babo, bacance tintsaba, babhukushe nobe badlale. Kunobe yini lesiyitsandzako, kufanele siciniseke kutsi ‘iyemukeleka eNkhosini.’ (Kubase-Efesu 5:10) Kubalulekile kutsi sikwati loko ngobe tintfo letinyenti bantfu labakhetsa kutibukela, kutilalela nobe kutenta tifaka ekhatsi budlova, kutiphatsa kabi ngekwelicansi nobe kusebentisa imimoya, futsi tiyenyanyeka kuJehova. (Fundza Tihlabelelo 11:5.) Yini lengasisita kutsi sikhetse kwekutijabulisa lokukahle?

Nangabe sikhetsa bangani labatsandza Jehova, bangaba nemtselela lomuhle kitsi nakuloko lesikhetsa kutijabulisa ngako. Njengobe sifundzile esifundvweni lesendlulile, “loyo lohamba nalabahlakaniphile naye utawuhlakanipha.” Ngakulokunye, ‘tintfo titasihambela kabi’ nangabe sihlale sitihlanganisa nebantfu labangatitsandzi timiso taNkulunkulu.—Taga 13:20.