• “Ngitawuvusa Umelusi Munye”
    Kukhonta Jehova Ngendlela Lehlantekile—Kuyabuyiselwa Ekugcineni!

    • 5. Uyini umcondvo walesiphicwaphicwano?

      5 Fundza Hezekeli 17:3-10. Nangu umcondvo walesiphicwaphicwano: “Lusweti lolukhulu” luhlutfule ligala lelisetulu esicongweni sesihlahla semsedari, lalibeka phansi “edolobheni lebatsengisi.” Lolusweti lubese lutsatsa “lenye yenhlanyelo yalelive” lwayihlanyela ensimini levundzile “eceleni kwemfula.” Lenhlanyelo yamila yaba “sihlahla semagilebisi lesimfisha lesinabako.” Kubese kufika lolunye lusweti lolukhulu. Lesihlahla sinabisele timphandze taso ngakulolusweti lwesibili, sifuna kutsatfwa ngilo lusiyise endzaweni lenemanti lanele. Jehova uyatehlulela tento talesihlahla, futsi uyaveta kutsi timphandze taso titawusishulwa futsi ‘sitawubuna’ bese siyoma.

      Lusweti luphetse ligala lesihlahla semsedari.

      Lusweti lolukhulu lwekucala lumelela iNkhosi Nebukhadnezari yaseBhabhulona (Buka sigaba 6)

      6. Chaza kutsi sisho kutsini lesiphicwaphicwano.

      6 Besisho kutsini lesiphicwaphicwano? (Fundza Hezekeli 17:11-15.) Nga-617 B.C.E, iNkhosi Nebukhadnezari yaseBhabhulona (“lusweti lolukhulu” lwekucala) yavimbetela iJerusalema. Yehlisa inkhosi yakaJuda Jehoyakimu (“ligala lelisetulu”) esihlalweni sebukhosi futsi yamyisa eBhabhulona (“edolobheni lebatsengisi”). Nebukhadnezari wabeka Sedekiya (longulomunye “wenhlanyelo yalelive” wasebukhosini) esihlalweni sebukhosi eJerusalema. Lenkhosi lensha yakaJuda yaphocelelwa kutsi yente sifungo ngeligama laNkulunkulu futsi lesifungo besiyiphocelela kutsi ibe yinceku yaNebukhadnezari. (2 Khr. 36:13) Kodvwa Sedekiya akasigcinanga lesifungo; wavukela iBhabhulona wase uyocela lusito lwemphi kuFaro waseGibhithe (“lusweti lolukhulu” lwesibili) kodvwa akazange asitakale. Jehova wamehlulela Sedekiya ngenca yetento takhe tekungetsembeki tekwephula sifungo. (Hez. 17:16-21) Ekugcineni, Sedekiya wehliswa esihlalweni sebukhosi, futsi wagcina afele ejele laseBhabhulona.—Jer. 52:6-11.