• Tsemba Jehova Kute Uchubeke Uphila!
    Sicongosekulindza (Lofundvwako)—2018 | November

    • 7. Yini Jehova layenta ngesikhatsi eva kukhala kwaHabakhuki?

      7 Fundza Habakhuki 1:5-7. Ngemuva kwekutjela Jehova ngako konkhe lobekumkhatsata, kungenteka Habakhuki wacabanga kutsi yini Jehova labetayenta. NjengaBabe loneluvelo nalosicondza kancono, Jehova akazange amtsetsise, kunaloko wamtjela ngalabetakwenta madvutane. Jehova bekati kutsi Habakhuki ucindzetelekile futsi ucela lusito. Kungenteka Habakhuki waba ngumuntfu wekucala Jehova lamtjela kutsi utawajezisa emaJuda labengaketsembeki.

      8. Kungani loko Jehova latsi utakwenta kwammangalisa Habakhuki?

      8 Jehova watjela Habakhuki kutsi ukulungele kutsatsa sinyatselo futsi masinyane utabajezisa bantfu labanebudlova. Ngesikhatsi Jehova atsi utabajezisa ‘emalangeni abo’ bekasho kutsi bekatawubajezisa nakusaphila umphrofethi Habakhuki noma ema-Israyeli labesaphila ngaleso sikhatsi. Habakhuki bekangakakulindzeli loko Jehova lakusho. Bantfu baseBhabhulona bebaneludlame futsi bebanebudlova kakhulu kunema-Israyeli labetati timiso taNkulunkulu. Kungani Jehova bekatawusebentisa labantfu labakhonta bonkulunkulu bemanga kute ajezise bantfu bakhe? Loko bekutawenta emaJuda acindzeteleke kakhulu. Wena bewungativa njani kube bewunguHabakhuki?