Madvutane Jehova utawusebentisa uMbuso wakhe kuze acedze tonkhe tinkinga tetfu. Leti, tindzaba letimnandzi kakhulu kangangekutsi kufanele sititjele nalabanye. Jesu bekafuna balandzeli bakhe batjele bonkhe bantfu ngalomlayeto! (Matewu 28:19, 20) BoFakazi BaJehova bakwenta njani loko Jesu latsi akwentiwe?

1. Emavi lakuMatewu 24:14 agcwaliseka kanjani lamuhla?

Jesu watsi: “Letindzaba letimnandzi teMbuso titawushunyayelwa emhlabeni wonkhe.” (Matewu 24:14) BoFakazi BaJehova bawenta ngenjabulo lomsebenti lobalulekile. Sishumayela tindzaba letimnandzi emhlabeni wonkhe ngetilwimi letingetulu kwa-1 000! Kudzingeka umetamo nekuhleleka kuze kwentiwe lomsebenti lomkhulu. Bewungeke uze wentiwe ngaphandle kwelusito lwaJehova.

2. Ngumiphi imetamo lesiyentako kuze sishumayele?

Sishumayela nobe ngabe ngukuphi lapho sitfola khona bantfu. NjengemaKhristu ekucala, sishumayela ‘emtini ngemuti.’ (Imisebenti 5:42) Ngekusebentisa lendlela, siyakhona kushumayela tigidzigidzi tebantfu njalo ngemnyaka. Njengobe bantfu bangatfolakali emakhaya, siphindze sishumayele etindzaweni tawonkhewonkhe. Sihlale sifuna ematfuba ekutjela labanye ngaJehova nangetinjongo takhe.

3. Bobani lokufanele bashumayele tindzaba letimnandzi?

Onkhe emaKhristu eliciniso kufanele atjele labanye tindzaba letimnandzi. Siwutsatsa njengalobalulekile lomsebenti wetfu. Lomsebenti siwenta ngekutimisela ngobe siyati kutsi ungasindzisa kuphila kwebantfu. (Fundza 1 KuThimothi 4:16.) Asibhadalwa ngekwenta lomsebenti, ngobe liBhayibheli litsi: “Niphiwe mahhala, nani phanini mahhala.” (Matewu 10:7, 8) Siyachubeka sishumayela ngisho nobe kungasibo bonkhe bantfu labasilalelako ngobe silalela Jehova futsi sifuna kumjabulisa.

CHUBEKA UFUNISISA

4. Sisebenta kamatima kuze sitfole bonkhe bantfu

I-VIDEO: Kushumayela “Kuto Tonkhe Tincenye Temhlaba” (7:33)

• Yini lekujabulisako ngemetamo leyentiwa BoFakazi BaJehova kuze bashumayele?

Fundza Matewu 22:39 naKubaseRoma 10:13-15, bese nicoca ngalemibuto:

• Umsebenti wetfu wekushumayela ukhombisa njani kutsi siyabatsandza labanye bantfu?

• Yini Jehova layishoko ngalabo labashumayela tindzaba letimnandzi?—Buka vesi 15.

5. Sitisebenti letikanye naNkulunkulu

Tintfo letinyenti letentekako tikhombisa kutsi nguJehova locondzisa lomsebenti wetfu. Sibonelo saloko kutsi eNew Zealand, umzalwane lokutsiwa nguPaul watfola lomunye wesifazane nakashumayela emtini ngemuti. Ngalelolanga ekuseni, lowesifazane bekathantaze kuNkulunkulu, asebentisa ligama lakhe lelitsi Jehova, amcela kutsi atfumele lotsite atomshumayela. Paul utsi: “Ngefika ekhaya lakhe ngemuva nje kwema-awa lamatsatfu.”

Fundza 1 KubaseKhorinte 3:9, bese nicoca ngalombuto:

• Loko lokwenteka eNew Zealand kukhombisa njani kutsi nguJehova locondzisa umsebenti wekushumayela?

Fundza Imisebenti 1:8, bese nicoca ngalombuto:

• Yini lesenta sidzinge lusito lwaJehova kuze sente lomsebenti wetfu?

Bewati yini?

Emihlanganweni yetfu yasekhatsi neliviki sitfola kuceceshwa lokusisita sikhone kushumayela. Nangabe sewuke waya kulemihlangano, ucabangani ngalokuceceshwa?

6. Silalela umyalo waNkulunkulu wekutsi sishumayele

Ngelikhulu lekucala, baphikisi betama kuyekelisa balandzeli baJesu kushumayela. EmaKhristu ekucala avikela lilungelo lawo lekushumayela ngekutsi ‘acalise tindzaba letimnandzi . . . ngalokusemtsetfweni.’ (KubaseFiliphi 1:7) BoFakazi BaJehova benta intfo lefanako nalamuhla.a

I-VIDEO: Kuvikela Tindzaba Letimnandzi Ngalokusemtsetfweni (2:28)

Fundza Imisebenti 5:27-42, bese nicoca ngalombuto:

• Kungani singeke siyekele kushumayela?—Buka emavesi 29, 38, na-39.

LOKO LESICOCE NGAKO

Jesu wayala balandzeli bakhe kutsi bashumayele tindzaba letimnandzi kuto tonkhe tive. Jehova usita bantfu bakhe kutsi bente lomsebenti.

Yini Loyifundzile?

• Tindzaba letimnandzi tishunyayelwa njani emhlabeni wonkhe?

• Umsebenti wetfu wekushumayela ukhombisa njani kutsi siyabatsandza labanye bantfu?

• Ucabanga kutsi umsebenti wekushumayela ungasenta yini sijabule? Yini lekwenta usho njalo?

LOKUNYE LONGAKUHLOLA

Buka indlela BoFakazi BaJehova labashumayela ngayo emadolobheni lamakhulu.

Kushumayela Emadolobheni Lamakhulu Lokuhlelwe Yinhlangano Lokukhetsekile EParis (5:11)

Yini BoFakazi BaJehova labayentile kuze bashumayele bakhoseli?

Kwenetisa Sidzingo Sekufundza NgaNkulunkulu Kubakhoseli (5:59)

Tivele njengobe lomunye achaza kutsi kumjabulise kanjani kuba semsebentini wekushumayela kuphila kwakhe konkhe.

Ngiyajabula Ngemsebenti Lengawukhetsa (6:29)

Fundza ngetincumo tenkantolo letibalulekile letente kwaba melula kushumayela tindzaba letimnandzi.

“Bashumayeli BeMbuso Bawayisa Enkantolo Emacala Lababekwe Wona” (UMbuso WaNkulunkulu Uyabusa!, sehluko 13)

Jesu watsi emaKhristu kufanele abhajatiswe. (Fundza Matewu 28:19, 20.) Kuyini kubhajatiswa? Yini umuntfu lokufanele ayente kuze abhajatiswe?

1. Kuyini kubhajatiswa?

Ligama lelitsi “bhabhatisa” livela egameni lesiGriki lelisho “kucwilisa” emantini. Ngesikhatsi Jesu abhajatiswa, wacwiliswa emfuleni iJordani, wase ‘uyaphuma emantini.’ (Makho 1:9, 10) Ngendlela lefanako, emaKhristu eliciniso abhajatiswa ngekutsi acwiliswe ngalokuphelele emantini.

2. Kusho kutsini kubhajatiswa?

Ngekubhajatiswa, umuntfu usuke akhombisa kutsi sewutinikele kuNkulunkulu Jehova. Umuntfu utinikela njani kuNkulunkulu? Ngaphambi kwekutsi abhajatiswe, uthantaza kuJehova ayedvwana, amtjele kutsi ufuna kumkhonta kuze kube phakadze. Wetsembisa kukhonta Jehova nekutsi ufuna kwenta intsandvo yaKhe ite kucala ekuphileni kwakhe. Ukhetsa ‘kutidzela futsi . . . alandzele’ timfundziso taJesu kanye nesibonelo sakhe. (Matewu 16:24) Kutinikela kanye nekubhajatiswa kumenta abe nebuhlobo lobuhle naJehova kanye naletinye tikhonti takhe.

3. Yini umuntfu lokufanele ayente kuze abhajatiswe?

Ungakulungela kubhajatiswa ngekutsi ufundze ngaJehova futsi ucinise kukholwa kwakho kuye. (Fundza KumaHebheru 11:6.) Njengobe lwati lwakho lukhula, nendlela lomtsandza ngayo Jehova itawukhula. Siyaciniseka kutsi utawufuna kukhuluma ngaye futsi uphile ngetimiso takhe. (2 KuThimothi 4:2; 1 Johane 5:3) Umuntfu nasekaphila ‘ngendlela lefanele embikwaJehova kuze amjabulise ngalokuphelele,’ sekangakunikela kuphila kwakhe kuNkulunkulu futsi abhajatiswe.—KubaseKolose 1:9, 10.a

CHUBEKA UFUNISISA

4. Singafundza endleleni Jesu labhajatiswa ngayo

Kuze ufundze lokunyenti ngekubhajatiswa kwaJesu, fundza Matewu 3:13-17, bese nicoca ngalemibuto:

• Jesu wabhajatiswa aluswane yini?

• Wabhajatiswa njani? Wafafatwa ngemanti yini?

Ngemuva kwekubhajatiswa, Jesu wacala umsebenti lobalulekile labewuniketwe nguNkulunkulu kutsi awente emhlabeni. Fundza Lukha 3:21-23 naJohane 6:38, bese nicoca ngalombuto:

• Ngemuva kwekubhajatiswa, ngumuphi umsebenti loweta kucala ekuphileni kwaJesu?

5. Kubhajatiswa ngumgomo longakhona kutibekela wona

Kutinikela kanye nekubhajatiswa kungabonakala kuyintfo lematima ekucaleni. Nobe kunjalo, ungatfutfuka uze ufike ezingeni lekutsi utive sewukulungele kutsatsa lesinyatselo lesibalulekile. Kuze ubone labanye labakwentile loko, dlala le-VIDEO.

I-VIDEO: Kwakha Buhlobo Lobuhle NaJehova (1:11)

Fundza Johane 17:3 naJakobe 1:5, bese nicoca ngalombuto:

• Yini lengasita umuntfu kutsi akulungele kubhajatiswa?

1. Sitinikela ngekutjela Jehova kutsi sifuna kumkhonta kuze kube phakadze

2. Nasibhajatiswa sisuke sitjengisa labanye kutsi sesitinikele kuNkulunkulu

6. Kubhajatiswa kusho kuba yincenye yemndeni waJehova

Nasibhajatiswa, siba yincenye yemndeni lonebunye, losemhlabeni wonkhe. Ngisho nobe sichamuka kuliphi live, sikholelwa etintfweni letifanako futsi siphila ngetimiso letifanako tekutiphatsa letiseBhayibhelini. Fundza Tihlabelelo 25:14 na-1 Phetro 2:17, bese nicoca ngalombuto:

• Kubhajatiswa kubutsintsa njani buhlobo umuntfu lanabo naJehova kanye nebuhlobo lanabo naletinye tikhonti taKhe?

LOKO LESICOCE NGAKO

Jesu watsi emaKhristu kufanele abhajatiswe. Kuze umuntfu agcine abhajatisiwe, kufanele acinise kukholwa kwakhe kuJehova, aphile ngetimiso taKhe, futsi atinikele kuYe.

Yini Loyifundzile?

• Kuyini kubhajatiswa, futsi kubaluleke ngani?

• Kutinikela nekubhajatiswa kuhlobene njani?

• Ngutiphi tinyatselo letenta umuntfu atinikele futsi abhajatiswe?

LOKUNYE LONGAKUHLOLA

Fundza kutsi kusho kutsini kubhajatiswa nekutsi akusho ini.

“Kusho Kutsini Kubhajatiswa?” (Sihloko lesiku-internet)

Hlola tindlela letingenta umuntfu agcine abhajatisiwe.

“Kutsandza Jehova Nekumbonga Kutakukhutsata Kutsi Ubhajatiswe” (Sicongosekulindza saMarch 2020)

Fundza kutsi sincumo salenye indvodza leyagcina ibhajatisiwe besingakasekelwa nje kuphela endleleni lebeyitiva ngayo.

“Bebafuna Kutsi Ngititfolele Mine Matfupha Loko Lokufundziswa LiBhayibheli” (Sicongosekulindza saMarch 1, 2013)

Buka kutsi kungani kubhajatiswa kungumgomo lobalulekile, kanye nendlela longatilungiselela ngayo kuze uwufeze.

“Should I Get Baptized?” (Questions Young People Ask—Answers That Work, Volume 2, chapter 37)