14. Singabadvudvuta njani ngemavi labo labaselusizini lekufelwa?

¹⁴ Liciniso, ngaletinye tikhatsi ungase ungati kutsi utawutsini kuloyo lofelwe kute umdvudvute. Nobe kunjalo, liBhayibheli litsi: “emavi lakhulumeke ngekuhlakanipha ayaphilisa.” (Taga 12:18) Labanye bakutfole kulula kusebentisa incwajana letsi Lapho Ufelwa Othandekayo, (letfolakala ngesiZulu.)c, kute badvudvute labanye. Intfo lebaluleke kakhulu lokufanele sihlale siyenta, kutsi ‘sikhale nalabakhalako.’ (Rom. 12:15) Gaby, lowafelwa yindvodza yakhe utsi: “Kuhushula tinyembeti kuba yindlela lelula yekuveta loko lokusenhlitiyweni. Kungako ngidvudvuteka nangibona bangani bami bakhala kanye nami. Etimeni letinjalo, angitikhandzi ngiselusizini ngedvwana.”

20. Kungani tetsembiso taJehova tingumtfombo lomkhulu wendvudvuto?

²⁰ Kudvudvuta kakhulu kwati kutsi Jehova longuNkulunkulu wayo yonkhe indvudvuto utawutisusa tonkhe tinsizi futsi asidvudvute phakadze ngalesikhatsi ‘bonkhe labasemathuneni beva livi [laKhristu] futsi baphume.’! (Joh. 5:28, 29) Nkulunkulu wetsembisa kutsi uyawumita “kufa phakadze naphakadze. Somandla longuSimakadze uyawukwesula tinyembeti kubo bonkhe buso.” (Isa. 25:8) Ngako, kunekutsi bantfu ‘bakhale nalabakhalako,’ bonkhe bantfu labatawube baphila emhlabeni ngaleso sikhatsi ‘batawujabula nalabajabulako.’​—Rom. 12:15.