Madvodza, Niyatitfoba Yini Kulobunhloko BaKhristu?

“Inhloko yawo onkhe emadvodza nguKhristu.”—1 KHOR. 11:3.

1. Yini lekhombisa kutsi Jehova unguNkulunkulu lohlelekile?

INCWADZI yeSembulo 4:11, itsi “Ufanele wena, Nkulunkulu [Jehova] loyiNkhosi yetfu, kutsi wemukele bukhosi, neludvumo, nemandla, ngobe konkhe kwadalwa nguwe. Konkhe kwenteka ngentsandvo yakho kwadalwa ngayo.” Ngesizatfu sekutsi ungumdali wato tonkhe tintfo, Nkulunkulu Jehova unguMbusi weNdzawo Yonkhe futsi uneligunya kuyo yonkhe indalo. Bufakazi bekutsi Jehova ‘unguNkulunkulu longasiye wetiphitsiphitsi kodvwa longuNkulunkulu wekuthula,’ bubonakala endleleni lahlelembise ngayo umndeni wakhe lotingilosi.—1 Khor. 14:33; Isa. 6:1-3; Heb. 12:22, 23.

2, 3. (a) Ngubani loyindalo yekucala yaNkulunkulu? (b) Ngusiphi sikhundla leNdvodzana lelitubulo lenaso nasicatsaniswa nesaBabe wayo?

² Ngembikwekuba kudalwe tonkhe tintfo, Nkulunkulu besavele aphile iminyaka leminyenti. Indalo yakhe yekucala kwaba sidalwa semoya lesatiwa ngekutsi ‘nguLivi’ ngobe abenguMkhulumeli waJehova. Tonkhe letinye tintfo tabakhona ngaloLivi. Ngemuva kwesikhatsi weta emhlabeni waba ngumuntfu lote sono futsi watiwa ngekutsi nguJesu Khristu.—Fundza Johane 1:1-3, 14.

³ ImiBhalo itsini ngesikhundla saNkulunkulu neseNdvodzana yakhe lelitubulo? Umphostoli Pawula waphefumulelwa kutsi abhale, atsi: “Kepha-ke ngitsandza kutsi nati kutsi, inhloko yawo onkhe emadvodza nguKhristu, nenhloko yemfati yindvodza, nenhloko yaKhristu nguNkulunkulu.” (1 Khor. 11:3) Inhloko yaKhristu nguBabe wakhe. Kuba yinhloko kanye nekutitfoba kutintfo letibalulekile kute kube nekuthula kanye nekuhleleka etidalweni taNkulunkulu. Ngisho naloyo tonkhe letinye tintfo letadalwa ngaye kufanele naye atitfobe kulobunhloko baNkulunkulu.—Khol. 1:16.

4, 5. Jesu wativa njani ngesikhundla sakhe nasicatsaniswa nesaJehova?

⁴ Jesu wativa njani ngekutitfoba kwakhe kulobunhloko baJehova nangekuta kwakhe emhlabeni? ImiBhalo itsi: “Awube kini lomcondvo lowawukuJesu Khristu, lowatsi anesimo saNkulunkulu, wangete washo kutsi kulingana naNkulunkulu kuyintfo yekunkonkoshelwa. Kepha watidzela, watsatsa simo senceku waba ngumuntfu njengatsi. Watsi atfolakale anjengemuntfu ngesimo, watitfoba walalela kwadzimate kwaba ngusekufeni, yebo ekufeni [elugodvweni lwekuhlushwa.]”—Fil. 2:5-8.

⁵ Ngato tonkhe tikhatsi Jesu abetitfoba entsandvweni yaBabe wakhe. Watsi: “Mine ngingeke ngitentele lutfo ngekwami; . . . kwehlulela kwami kulungile, ngobe angifuni yona intsandvo yami, kepha intsandvo yalowo longitfumile.” (Joh. 5:30) Waphindze watsi: “Sonkhe sikhatsi ngenta lokutsandzekako kuye.” (Joh. 8:29) Ngasekupheleni kwekuphila kwakhe emhlabeni, Jesu wathandaza kuBabe wakhe watsi: “Ngikudvumisile eveni ngekucedza umsebenti lowanginika wona kutsi ngiwente.” (Joh. 17:4) Kuyakhanya-ke kutsi Jesu abete inkinga ngekwemukela kutsi Nkulunkulu uyinhloko yakhe.

Kutitfoba KuBabe Kuyayizuzisa INdvodzana

6. Ngutiphi timfanelo letinhle Jesu abenato?

⁶ Ngalesikhatsi alapha emhlabeni, Jesu waveta timfanelo letinhle futsi letinyenti. Lenye yato bekulutsandvo lolukhulu ngaBabe wakhe. Watsi: “Babe ngiyamtsandza.” (Joh. 14:31) Waphindze wakhombisa kubatsandza nebantfu. (Fundza Matewu 22:35-40.) Jesu abenemusa futsi acabangela, abengentisi bantfu tintfo ngenkhani. Watsi: “Wotani kimi, nine nonkhe lenikhatsele nalenisindvwa yimitfwalo ngitaniphumuta. Bekani lijoko lami etikwenu, nifundze kimi, ngobe mine ngimnene, ngitfobekile ngenhlitiyo, khona niyawutfola kuphumula kwemiphefumulo yenu ngobe lijoko lami lilula, nemtfwalo wami awusindzi.” (Mat. 11:28-30) Bantfu labanjengetimvu, labancane nalabadzala, ikakhulukati labo labacindzetelekile, batfola indvudvuto lenkhulu ebuntfwini baJesu kanye nasemlayetweni wakhe locabulako.

7, 8. NgeMtsetfo waMosi, labasikati labophako bekumelwe bangentini, kodvwa Jesu wamphatsa njani lomsikati lobekopha?

⁷ Ase ucabange ngendlela Jesu abephatsa ngayo bantfu labasikati. Kuwo wonkhe umlandvo, emadvodza lamanyenti abesolo abaphatsa kabi bantfu labasikati. Bekunjalo nangebafundisi basendvulo ka-Israyeli, kodvwa Jesu abebahlonipha bantfu labasikati. Loku kubonaka endleleni laphatsa ngayo umfati lobekagule iminyaka lengu-12 anesifo sekopha. “Abesagule kakhulu” futsi imali yakhe seyicedvwe ngulabelaphako. Ngetulu kwayo yonkhe lemetamo yakhe “kugula kwaya embili.” NgekweMtsetfo waMosi, umuntfu lonjalo bekutsiwa ungcolile. Nobe ngabe ngubani lomtsintsako naye abengcola.—Lev. 15:19, 25.

⁸ Ngalesikhatsi lona lomsikati eva kutsi Jesu welapha tigulane kuleyondzawo, wavele washona khona. Nakefika watfola kunebantfu labanyenti, wase utsi: “Nangingamane nje ngitsintse ingubo yakhe, ngitawuphila.” Watsi nakatsintsa ingubo yaJesu, waphila bhoncu! ngaleso sikhatsi. Jesu wavele watibonela kutsi kukhona losatsintse ingubo yakhe. Nobe kunjalo, akamkhahlametanga. Lakwenta, kwaba kumbonisa umusa. Bekayati kahle indlela lomfati bekativa ngayo yonkhe leminyaka agula futsi alambele lusito. Ngeluvelo, Jesu washo naku kulona lomsikati: “Dvodzakati yami, kukholwa kwakho kukuphilisile. Hamba ngekuthula, uphile esifeni sakho.”—Mak. 5:25-34.

9. Wenta njani Jesu ngalesikhatsi bafundzi bakhe betama kuvimbela bantfwana kutsi bete kuye?

⁹ Ngisho nebantfwana bebativa basekhaya nabanaJesu. Ngalangalimbe, bantfu baletsa bantfwana kuJesu kodvwa bafundzi bakhe babakhuta kamatima banemcabango wekutsi Jesu akanendzaba nalabantfwana. Leyo kwakungesiyo indlela Jesu labetsatsa ngayo bantfwana. Kulandzisa kweliBhayibheli kusho naku: “Kodvwa watsi kube akubone loko Jesu, watfukutsela watsi kubo [bafundzi]: ‘Vumelani bantfwana bete kimi ningabavimbeli, ngobe umbuso waNkulunkulu walabanjalo.’” Waphindze “wabatsatsa labantfwana, wabagona, wabeka tandla etikwabo, wababusisa.” Jesu bebangamcansuli bantfwana kodvwa wabemukela ngaletimhlophe.—Mak. 10:13-16.

10. Jesu watitsatsa kuphi timfanelo latikhombisa nakasemhlabeni?

¹⁰ Watitsatsa kuphi Jesu timfanelo letinhle latikhombisa ngesikhatsi asemhlabeni? Ngesikhatsi asengakabi ngumuntfu waba neliso lelikhaliphile kuBabe wakhe losezulwini iminyakanyaka, afundza ngetindlela takhe. (Fundza Taga 8:22, 23, 30.) Ngesikhatsi asasezulwini, wabuka indlela Jehova latibonisa ngayo lutsandvo tidalwa takhe nakutiwa endzabeni yebunhloko futsi loko wakufaka emgodlagodleni wakhe. Abengakhona yini Jesu kwenta loko kube abengatitfobi? Jesu wakutsakasela kutitfoba kuBabe wakhe, futsi kwamletsela injabulo Jehova kuba neNdvodzana lenjalo. Nakasemhlabeni, Jesu wakhombisa ngalokuphelele timfanelo letimangalisako taBabe wakhe wasezulwini. Kulitfuba leliyingcayizivele kutitfoba kuKhristu loyiNkhosi lebekiwe yeMbuso wasezulwini.

Lingisa Timfanelo Letakhombiswa NguKhristu

11. (a) Kufanele sisebente matima silingisa bani? (b) Emadvodza kumelwe azabalaze alingisa Khristu ngasiphi sizatfu?

¹¹ Bonkhe bantfu labasebandleni lebuKhristu, ikakhulukati emadvodza kufanele basebente matima kute balingise timfanelo taKhristu. Naku lokushiwo liBhayibheli ngalendzaba: “Inhloko yawo onkhe emadvodza nguKhristu.” Njengobe Khristu alingisa inhloko yakhe, lokunguNkulunkulu weliciniso, emadvodza langemaKhristu kumelwe asebente kamatima kute alingise inhloko yawo—Khristu. Nguloko lokwentiwa nguPawula nakagucukela enkholweni yebuKhristu. Wancenga lamanye emaKhristu watsi: “Hambani etinyatselweni tami, njengobe nami ngihamba etinyatselweni taKhristu.” (1 Khor. 11:1) Ngendlela lefananako, nemphostoli Phetro watsi: “Nabitelwa kona loko; ngobe Khristu naye wanihluphekela, wanishiyela sibonelo sekutsi nimlandzele etinyatselweni takhe.” (1 Phet. 2:21) Lesikhutsato sekutsi silingise Khristu sibalulekile emadvodzeni, nangalesinye sizatfu. Ngibo kuphela lababekwa njengalabadzala belibandla netinceku letisebentako. Akubutwa kutsi Jesu watfola injabulo ngekulingisa Jehova, nemadvodza langemaKhristu angayitfola nangabe alingisa Khristu netimfanelo takhe.

12, 13. Labadzala kumelwe batiphatse njani timvu labaphatsiswe tona?

¹² Labadzala labasebandleni lebuKhristu bangephansi kwesibopho sekufundza kulingisa Khristu. Phetro wancenga emadvodza lamadzala nobe labadzala belibandla watsi: “Yelusani umhlambi waNkulunkulu leniwuphetse, hhayi ngekucindzetelwa, kodvwa ngenhlitiyo levumako njengobe Nkulunkulu atsandza kutsi nente, hhayi ngekunaka inkhokhelo nje, kodvwa ngenshisekelo yekukhonta. Ningatenti emakhosi etikwalabo lenibaphetse, kodvwa nibe tibonelo letinhle emhlambini leniwelusile.” (1 Phet. 5:1-3) Labadzala belibandla akukafanele babe bondlovukayiphikiswa, labangenandzaba nebantfu, labatentela matsandza, nobe bakhahlametane. Ekulingiseni kwabo Khristu, benta konkhe lokusemandleni kute bakhombise lutsandvo, kucabangela, kutfobeka, kanye nekuba nemusa ekuphatseni timvu labatibukile.

¹³ Labo labahola libandla ngemadvodza lanesono futsi kumelwe bahlale bakukhumbula loko. (Rom. 3:23) Kumelwe bahlale banelilukuluku lekufundza ngaJesu futsi balingise lutsandvo lwakhe. Kudzingeka bazindle ngendlela Nkulunkulu naKhristu labaphatsa ngayo bantfu, bawe bavuka babalingisa. Phetro usikhutsata atsi: “Nonkhe yembatsani kutfobeka, nitfobelane, ngobe: ‘Nkulunkulu umelana nalabatigcabhako, kodvwa labatfobekile ubapha umusa.’”—1 Phet. 5:5.

14. Kukhombisa ludvumo kwalabadzala belibandla kufanele kuhambe lukhalo lolungakanani?

¹⁴ Kusidzingo kutsi emadvodza labekiwe avete timfanelo letinhle nakasebentelana nemhlambi waNkulunkulu. Naku lokushiwo ngumbhalo waRoma 12:10: “Tsandzanani ngelutsandvo lwebuzalwane, nijakiselane ngekuhloniphana.” Labadzala belibandla netinceku letisebentako babakhombisa inhlonipho labanye. Njengobe kulindzelekile, lamadvodza kufanele ‘angenti lutfo ngembango nangeludvumo lwelive, kepha ngekutfobeka ashaye kungatsi labanye bakhulu kuwo.’ (Fil. 2:3) Labo labaholako kumelwe baphatse labanye shengatsi bakhulu kunabo. Ngekwenta kanjalo, emadvodza labekiwe atawube alalela seluleko saPawula lesitsi: “Tsine lesicinile ekukholweni kufanele sitfwalisane nalababutsakatsaka ekwehlulekeni kwabo, singatijabulisi tsine. Ngako-ke, akube ngulowo ajabulise makhelwane wakhe, khona atekwakheka. Ngobe naKhristu akatijabulisanga yena.”—Rom. 15:1-3.

‘Kubonisa Bafati Ludvumo’

15. Emadvodza kufanele abaphatse njani bafati bawo?

¹⁵ Nyalo ase ucabange ngeseluleko saPhetro lesiya emadvodzeni lashadile. Wabhala: “Nani madvodza, hlalisanani kahle nebafati benu, nati kutsi umuntfu lomsikati unjengesitja lesibutsakatsaka; [nibabonise ludvumo.]” (1 Phet. 3:7) Kubonisa umuntfu lotsite ludvumo kusho kumbeka esigabeni lesisetulu. Nangabe wenta njalo kumfati wakho, utawukwati kucabangela imibono yakhe, tidzingo nchanti kanye netintfo letingakabaluleki kangako latifunako, futsi ungativuma ngaphandle nangabe unetizatfu leticinile letikwenta ungahambisani naloko lakushoko. Nguleyo kanye indlela indvodza lokufanele imphatse ngayo umfati wayo

16. Ngusiphi secwayiso liVi laNkulunkulu lelisinika emadvodza mayelana nekubonisa ludvumo bafati bawo?

¹⁶ Nakatjela emadvodza kutsi abonise bafati bawo ludvumo, Phetro wengeta nasi secwayiso: “Khona ingetiwuvimbeleka imithandazo yenu.” (1 Phet. 3:7) Loku kukhombisa ngalokusebaleni kutsi Jehova uyitsatsa ngalokubalulekile indlela indvodza lemphatsa ngayo umfati wayo. Kwehluleka kwendvodza kubonisa umfati wayo ludvumo, kungaphumela ekutseni imithandazo yayo ivimbeleke. Ngetulu kwaloko, bafati abajabuli yini ngalesikhatsi baboniswa ludvumo ngemadvodza abo?

17. Indvodza kufanele imtsandze ngelizinga lelingakanani umfati wayo?

¹⁷ Endzabeni yekutsandza umfati wakho, liVi laNkulunkulu liyeluleka: “Emadvodza kufanele atsandze bafati bawo, njengobe atsandza imitimba yawo. . . . Phela kute umuntfu lowake watondza umtimba wakhe, kepha uyawondla, awunakekele, njengobe naKhristu enta ebandleni . . . Akube ngulowo nalowo atsandze umkakhe, njengobe atitsandza yena.” (Ef. 5:28, 29, 33) Emadvodza kufanele abatsandze ngelizinga lelingakanani bafati bawo? Pawula wabhala: ‘Madvodza, [chubekani] nitsandza bafati benu, njengobe naKhristu alitsandza libandla. Wanikela ngekuphila kwakhe ngenca yalo.’ (Ef. 5:25) Yebo, indvodza kufanele ibe nesifiso sekunikela ngisho nangekuphila kwayo ngenca nje yemfati wayo, njengobe naKhristu enta kubafundzi bakhe. Nangabe indvodza lengumKhristu iphatsa umfati wayo ngelutsandvo, ngekumcabangela, ngekumnaka kanye nekungatigodli, kuba melula ngemfati wayo kutsi atitfobe kulobunhloko bayo.

18. Nguluphi lusito emadvodza laniketwa lona ekwenteni umsebenti losemahlombe awo emshadweni?

¹⁸ Kubonisa ludvumo ngalendlela kuyintfo lelukhuni yini ngemadvodza kutsi ayente? Cha, Jehova angeke awatjele kutsi ente lokungetulu kwemandla awo. Ngetulu kwaloko, tikhonti taJehova titfola umoya wakhe longcwele. Jesu watsi: ‘Nome ningakalungi kodvwa niyakwati kupha bantfwabenu tintfo letinhle, kakhulu kangakanani-ke, Babe losezulwini uyawubanika umoya longcwele labo labamcelako.’ (Luk. 11:13) Emithandazweni yawo, emadvodza angacela kutsi ngemoya wakhe longcwele Jehova awasite ekusebentelaneni nalabanye, lokufaka ekhatsi ngisho nebafati bawo.—Fundza Imisebenti 5:32.

19. Sitawucoca ngani esihlokweni lesilandzelako?

¹⁹ Ecinisweni, emadvodza anemsebenti lomkhulu losemahlombe awo wekufundza kutitfoba kuKhristu futsi alingise bunhloko bakhe. Kodvwa kutsiwani ngebantfu labasikati, ikakhulukati bafati? Sihloko lesilandzelako sitawucoca ngekutsi bafati kufanele bayitsatse njani indzima yabo eluhlelweni lwaJehova.

Bafati, Kungani Kufanele Nititfobe Kulabo Labatinhloko Tenu?

“Nenhloko yemfati yindvodza.”—1 KHOR. 11:3.

1, 2. (a) Umphostoli Pawula wabhala kutsini ngeluhlelo lwaNkulunkulu lwebunhloko nekutitfoba? (b) Shano imibuto lesitayidzingidza kulesihloko.

JEHOVA wente luhlelo loluhle lakhuluma ngalo umphostoli Pawula, watsi: “Inhloko yawo onkhe emadvodza nguKhristu, nenhloko yaKhristu nguNkulunkulu.” (1 Khor. 11:3) Sihloko lesingembi kwalesi sichaze kutsi Jesu wakutsatsa njengentfo lebalulekile naleletsa injabulo kutitfoba kuloyo loyinhloko yakhe, lokunguNkulunkulu Jehova. Nemadvodza anaKhristu loyiNhloko yawo. Khristu bekanemusa, abacabangela labanye, aneluvelo futsi angatigodli kubantfu. Emadvodza kumelwe ente njengaKhristu kubantfu, ikakhulu kubafati bawo.

² Kutsiwani ke, ngebafati? Ngubani loyinhloko yabo? Umphostoli Pawula wabhala: “Nenhloko yemfati yindvodza.” Bafati kumelwe bayitsatse njani lenkhulumo lephefumulelwe? Lenkulumo yekutitfoba kuloyinhloko kuwe iyasebenta yini nalapho umfati anendvodza lengasiyo umKhristu? Kutitfoba emadvodzeni kwebafati kusho kutitsela kwabo ngalabandzako yini ngalesikhatsi kufanele kutsatfwe tincumo ekhaya? Umfati utitfolela njani ludvumo?

“Ngitamentela Umsiti Lonjengaye”

3, 4. Kungani luhlelo lwebunhloko lunenzuzo emshadweni?

³ Luhlelo lebunhloko, luhlelo lolwasungulwa nguNkulunkulu. Ngemuva kwekudala Adamu, Nkulunkulu Jehova wase utsi: “Akukuhle kutsi umuntfu ahlale yedvwana. Ngitamentela umsiti lolungele yena.” Ngemuva kwekudalwa kwa-Eva, tihlatsi tavakashela tindlebe ku-Adamu ngekutfola umngani nemsiti latsi ngaye: “Lona-ke sewulitsambo lematsambo ami nenyama yenyama yami.” (Gen. 2:18-24) Bo-Adamu na-Eva bebaneliphupho lelinhle lekuba batali bebantfu bonkhe labete sono, labebatawuphila phakadze ngenjabulo emhlabeni wonkhe lolipharadisi.

⁴ Ngesizatfu sekuhlubuka kuNkulunkulu kwebatali betfu bekucala, bo-Adamu na-Eva, indzawo lenganasici lebekuyinsimi yase-Edeni yalahleka. (Fundza Roma 5:12.) Luhlelo lwekutsi kube nebunhloko alutsikametekanga. Nangabe lusetjentiswa kahle, luletsa inzuzo lenkhulu emshadweni. Umphumela lomuhle wekutitfoba kuloyo loyinhloko wabonakala endleleni Jesu lativa ngayo ekutitfobeni kuloyo loyiNhloko yakhe, Jehova. Ngesikhatsi asengaketi emhlabeni, Jesu ‘abenentfokoto lenkhulu onkhe emalanga [embikwaJehova.]’ (Taga 8:30) Ngesizatfu sekutsi sekanesono, emadvodza akakhoni kuba tinhloko letingenamaphutsa, njengobe nebafati behluleka kukhombisa kutitfoba ngalokuphelele. Nangabe emadvodza nebafati bazabalaza ngaso sonkhe sikhatsi ekuhlonipheni bunhloko, umphumela uba ngumshado loletsa injabulo kulesikhatsi lesiphila kuso.

5. Kungasiphi sizatfu bantfu labashadile basifaka enhlitiyweni seluleko lesitfolakala encwadzini yabaseRoma 12:10?

⁵ Intfo lemcoka lengaletsa imphumelelo emshadweni kusebentisa nasi seluleko lesabhalelwa onkhe emaKhristu: “Tsandzanani ngelutsandvo lwebuzalwane, nijakiselane ngekuhloniphana.” (Rom. 12:10) Emadvodza nebafati kufanele nakanjani basebente kamatima kuze ‘baphatsane ngebumnene, bahawukelane, futsi batsetselelane.’—Ef. 4:32.

Kutsiwani Nangabe Munye Kulabashadile Angasiye UmKhristu

6, 7. Yini lengase yenteke nangabe umfati lonendvodza lengakholwa atitfoba kuyo?

⁶ Kumelwe kwentiwe njani nangabe munye kulabashadile angasiso sikhonti saJehova? Etikhatsini letinyenti kuvamile kutsi kube yindvodza lengasiye umKhristu. Esimeni lesinjalo, umfati kufanele ayiphatse njani indvodza yakhe? Naku liBhayibheli lelitsi kumelwe akwente: “Nani bafati tfobelani emadvodza enu kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe yintfobeko yebafati bawo, nakabona similo senu lesimsulwa lesinekwesaba Nkulunkulu.”—1 Phet. 3:1, 2.

⁷ Livi laNkulunkulu liyala umfati kutsi alondvolote simo sengcondvo sekutfobeka nakanedvodza lengakholwa. Kutiphatsa kahle kwakhe kungenta indvodza itibute kutsi lomfati wentiwa yini kutsi atiphatse kahle. Akhona ematfuba ekutsi lendvodza izindle ngetinkholelo temfati wayo bese nayo iba ngumKhristu.

8, 9. Yini umfati longumKhristu langayenta nangabe indvodza yakhe lengakholwa ingakutsandzi kuba kwakhe ngumKhristu?

⁸ Kutsiwani nangabe indvodza lengakholwa ingakutsandzi kuba kwakho ngumKhristu? ImiBhalo ikhutsata bafati labakholwako kutsi bachubeke babonisa timfanelo tebuKhristu ngaso sonkhe sikhatsi, nanobe kumatima kwenta njalo. Nasi sibonelo: Embhalweni wa-1 Khorinte 13:4 siyafundza: “Lutsandvo luyabeketela.” Bafati labangemaKhristu benta kahle ngekuchubeka batiphatsa “ngekutfobeka konkhe, nangebumnene, nangekucinisela,” futsi bacatulula tinkinga ngelutsandvo. (Ef. 4:2) Ngelusito lwemandla aNkulunkulu lawasebentisela kwenta tintfo—umoya wakhe longcwele—singakwati kukhombisa timfanelo tebuKhristu ngisho nangephansi kwetimo letimatima.

⁹ Pawula wabhala: “Nginemandla ekwenta konkhe ngaye [Jehova] longicinisako.” (Fil. 4:13) Umoya waNkulunkulu usita umngani wemshado longumKhristu kutsi ente tintfo lebekungeke kube melula kutenta ngemandla akhe. Nasi sibonelo: Kuphatfwa kabi ngumuntfu loshade naye kungakwenta ufune kutiphindziselela. Naku liBhayibheli lelikutjela emaKhristu: “Ningabuyiseli kunobe ngubani lokubi ngalokubi.  . . Ngobe kubhaliwe kutsi: ‘Kuphindzisela ngekwami, mine ngiyawubuyisela, kusho iNkhosi [Jehova.]’” (Rom. 12:17-19) Nangendlela lefananako, incwadzi ya-1 Thesalonika 5:15 iyasiyala: “Bonani kutsi kubete lophindzisela kulomunye lokubi ngalokubi, kodvwa ngato tonkhe tikhatsi yetamani kwenta lokuhle kubo bonkhe bantfu.” Ngekusekelwa ngumoya longcwele waJehova, singakwati kwenta loko lokubonakala kungeke kwenteke. Kuyajabulisa kwati kutsi singathandaza sicele umoya longcwele waNkulunkulu kutsi usisite lapho sidzinga kulungisa khona.

10. Jesu abenta njani ngalesikhatsi bantfu bamphatsa kabi?

¹⁰ Jesu wasibekela sibonelo lesihle endleleni laphatsa ngayo labo bebangamphatsi kahle. Umbhalo wa-1 Phetro 2:23 utsi: “Kwatsi etfukwa, wangete waphindzisela ngenhlamba; kwatsi ahlushwa, wangete wasongela. Kodvwa watinikela kuNkulunkulu lowehlulela ngekulunga.” Sonkhe siyacelwa kutsi sisilandzele lesibonelo sakhe. Ingakuphatsi kabi indlela labanye bantfu labatiphatsa ngayo. Onkhe emaKhristu ayatjelwa, “nibe nebubele nekutfobeka ningaphindziseli lokubi ngalokubi, nobe inhlamba ngenhlamba.”—1 Phet. 3:8, 9.

Kufanele Batitsele Ngalabandzako Yini?

11. Ngumuphi umsebenti loligugu Jehova lawunike labanye labasikati labangemaKhristu?

¹¹ Kutitfoba kwebafati kulabo labatinhloko tabo, kusho kutsi akukafanele yini bavete imibono yabo etindzabeni tabo temshado? Cha akusinjalo. Jehova unike bafati kanye nemadvodza imisebenti lebalulekile. Ase ucabange ngemsebenti loligugu labo labangu-144 000 labanawo wekuba ngemakhosi nebaphristi ezulwini, ngephansi kwekubusa kwaKhristu umhlaba wonkhe. Lelo nani lebantfu labangu-144 000 lifaka ekhatsi nebantfu labasikati. (Gal. 3:26-29) Sekuyacaca kutsi Jehova unike bantfu labasikati umsebenti lomcoka.

12, 13. Niketa sibonelo lesibonisa kutsi bantfu labasikati bebaphrofetha.

¹² Ngalesikhatsi kusabhalwa liBhayibheli, bantfu labasikati bebaphrofetha. Incwadzi yaJoweli 2:28, 29 yabiketela: ‘Ngiyawutfulula umoya wami etikwabo bonkhe bantfu. Emadvodzana nemadvodzakati enu ayawuphrofetha. . . . Yebo, kulawo malanga ngiyawutfululela umoya wami etincekwini nasetincekukatini tami.’

¹³ Bafundzi baJesu labangu-120 labebabutsene endlini eJerusalema ngelilanga lePhentekhoste ngemnyaka wanga-33 C.E., bebafaka ekhatsi labasikati nalabadvuna. Umoya waNkulunkulu watfululelwa kubo bonkhe. Kungaleso sizatfu Phetro asho loko lokwabiketelwa ngumphrofethi Joweli akucondzise kubantfu labasikati nalabadvuna. Watsi: ‘Ngiyawutfululela umoya wami etikwabo bonkhe bantfu. Emadvodzana nemadvodzakati enu ayawuphrofetha. . . . Yebo, kulawo malanga ngiyawutfululela umoya wami etincekwini nasetincekukatini tami, tiyawuphrofetha.’—Imis. 2:16-18.

14. Ngumuphi umsebenti lowentiwa bantfu labasikati ekushumayeleni ngeMbuso ngelikhulu lekucala leminyaka?

¹⁴ Ekhulwini lekucala leminyaka, bantfu labasikati bebenta umsebenti lobalulekile wekushumayela. Bebashumayela kulabanye ngeMbuso waNkulunkulu futsi benta tintfo letihlobene nemsebenti wekushumayela. Nasi sibonelo: Umphostoli Pawula wabita Foyibe ngekutsi ‘ngumdikhonikati welibandla laseKhenkhariya.’ Nakabingelela lamanye emaKhristu, Pawula wabala emabito ebantfu labasikati labanyenti labetsembekile labafaka ekhatsi “Trayifina naTrayifosa tisebenti, teNkhosi.” Waphindze wabingelela “naPhesisi lowasebenta kakhulu eNkhosini.”—Rom. 16:1, 12.

15. Bafati badlala yiphi indzima ekushumayeleni esikhatsini setfu?

¹⁵ Esikhatsini salamuhla, sicumbi lesikhulu saboFakazi lasingetulu kwetigidzi letisikhombisa sishumayela tindzaba letinhle teMbuso waNkulunkulu emhlabeni wonkhe. Linyenti laso lesicumbi lesikhulu ngulabasikati labaneminyaka lehlukene. (Mat. 24:14) Labanyenti babo benta inkonzo yaNkulunkulu sikhatsi sonkhe, labanye batitfunywa telivangeli futsi labanye bangemalunga emndeni waseBethel. Umhlabeli Davide wahlabela: ‘Jehova wakhipha umyalo wakhe. Sicumbi lesikhulu salabasikati siyashumayela.’ (Hla. 68:11 NW.) Lamavi abonakala aliciniso. Jehova uyawujabulela umsebenti lowentiwa ngulabasikati wekushumayela tindzaba letinhle nekuphumelelisa tinjongo takhe. Umtsetfo wakhe wekutsi labasikati labangemaKhristu batitfobe, awusho kutsi kufanele batitsele ngalabandzako ngaso sonkhe sikhatsi.

Bafati Lababili Labangabindzanga

16, 17. Sibonelo saSara sikuveta njani kutsi bafati akukafanele babindze emshadweni?

¹⁶ Nangabe Jehova aniketa bafati litfuba lelibaluleke kangaka, loko kusho kutsi emadvodza nawo kufanele achumane nebafati bawo asengakatenti tincumo letibalulekile. Kukuhlakanipha ngawo kwenta njalo. ImiBhalo ikhuluma ngetiwombe letehlukahlukene lapho bafati baveta imibono yabo ngaphandle kwekucelwa ngemadvodza abo. Ase sicabangele tibonelo letimbili.

¹⁷ Sara, lobekangumfati wakhokho webantfu Abrahama, abebelesela Abrahama atsi akacoshe zakwabo kanye nendvodzana yakhe ngobe bebangahloniphi. “Loku kwamkhatsata kakhulu Abrahama,” kodvwa akumkhatsatanga Nkulunkulu. Jehova watjela Abrahama: “Ungakhatsateki ngenca yalomfana nangenca yalesigcilakati sakho. Loko lokushiwo nguSara kuwe kwente njengobe akutjelile.” (Gen. 21:8-12) Abrahama wamhlonipha Jehova, wamlalela ngisho nemfati wakhe Sara futsi wenta kona loko abekucelile.

18. Yini leyentiwa ngu-Abigayili?

¹⁸ Ase ucabange nanga-Abigayili, umfati waNabali. Ngalesikhatsi Davide abalekela iNkhosi lenemhobholo Sawula, wacitsa sikhatsi ahleti eceleni kwalapho umhlambi waNabali wawukhona khona. Esikhundleni sekutsi angene ngendlovu-iyangena atitsaphutele tintfo taNabali, Davide nelibutfo lakhe bativikela letintfo taNabali. Nobe kunjalo, Nabali ‘abesibheva lesibi’ futsi ‘walitsela ngenhlamba’ lelibutfo laDavide. Nabali ‘abekhohlakele,’ futsi ‘asilima.’ Kwatsi ngalesikhatsi libutfo laDavide licela lusito kuNabali, wala waphetsa. Yini leyentiwa ngu-Abigayili ngalesikhatsi eva ngaloko kwakwentekile? Angakayitsi-vu! kuNabali, “Abigayili akacitsanga sikhatsi. Watsatsa tinkhwa letatingema-200 netikhumbasikhwama letimbili tigcwele liwayini, netimvu letisihlanu lesetihlinziwe nembasha yemmbila lengemakhilogremu labengaba li-17, nemacebelengwane lalikhulu emagelebisi lomisiwe, nemacebelengwane langema-200 emakhiwa lahlutiwe” wakunika Davide kanye nelibutfo lakhe. Wenta kahle yini Abigayili ngekwenta njalo? LiBhayibheli litsi: “Simakadze [Jehova] washaya Nabali wafa.” Ngemuva kwesikhatsi, Davide washada na-Abigayili.—1 Sam. 25:3, 14-19, 23-25, 38-42.

‘Umfati Lozabalazako, Atfole Ludvumo’

19, 20. Yini leyenta umfati aniketwe ludvumo?

¹⁹ ImiBhalo iyamncoma umfati lowenta tintfo ngendlela Jehova lafuna ngayo. Incwadzi yeBhayibheli yeTaga, iyamdvumisa “umfati sibili,” itsi: “Uligugu lelengca onkhe ematje laligugu. Indvodza yakhe yetsembele kuye ngenhlitiyo yayo yonkhe, futsi ingeke yeswele lutfo. Uyentela lokuhle ngaso sonkhe sikhatsi sekuphila kwakhe, akayenteli lokubi.” Ngetulu kwaloko, “ukhuluma kuhlakanipha, lulwimi lwakhe lugcwele teluleko temusa. Ucaphelisisa konkhe lokwenteka ekhaya lakhe, akavilaphi. Bantfwabakhe bayamhlonipha, nendvodza yakhe futsi iyamdvumisa.”—Taga 31:10-12, 26-28.

²⁰ Yini leyenta kutsi umfati anikwe ludvumo? Incwadzi yeTaga 31:30, itsi: “Buhle buyayengana, nekubukeka kulite; kodvwa umfati lowesaba Simakadze [Jehova] ufanele kudvunyiswa.” Kwesaba Jehova kufaka ekhatsi kutitfoba ngekutitsandzela eluhlelweni lasezulwini lebunhloko. “Inhloko yawo onkhe emadvodza nguKhristu, nenhloko yemfati yindvodza, nenhloko yaKhristu nguNkulunkulu.”—1 Khor. 11:3.

Jabula Ngesipho Lesivela KuNkulunkulu

21, 22. (a) EmaKhristu lashadile anatiphi tizatfu tekujabula mayelana nesipho saNkulunkulu semshado? (b) Kungani kufanele sibonise inhlonipho ngeluhlelo lwaJehova leligunya kanye nelebunhloko? (Fundza libhokisi lelingenhla.)

²¹ EmaKhristu lashadile anetizatfu letinyenti tekumbonga Nkulunkulu. Angahlala ajabulile emishadweni yawo. Anesizatfu sekubonga Nkulunkulu ngesipho lesikhetsekile ngobe siwanika litfuba lekuhlanganisa kuphila kwawo futsi ahambe naJehova. (Rut. 1:9; Mik. 6:8) Loyo longuMphembi wemshado, ukwati kamhlophe loko lokufunekako kute umshado ujabulise. Ngaso sonkhe sikhatsi, yentani ngendlela Jehova lafuna ngayo futsi “injabulo yenu levela kuSimakadze ingemandla enu” ngisho nakulelive lelinetinkinga lesiphila kulo.—Neh. 8:10.

²² Indvodza lengumKhristu letsandza umfati wayo njengobe ititsandza itawusebentisa bunhloko bayo kahle nangekucabangela. Umfati wayo lotfobela umtsetfo waNkulunkulu itamtsandza, ngobe utayisekela futsi ayihloniphe ngalokujulile. Lokubaluleke kakhulu kutsi sibonelo semshado wenu sitawudvumisa Nkulunkulu lofanele kudvunyiswa, longuJehova.