7. UMbuso waNkulunkulu unemitsetfo lencono kuneyabohulumende bebantfu

Bohulumende bebantfu babeka imitsetfo lesita iphindze ivikele bantfu balelolive. NeMbuso waNkulunkulu unemitsetfo lokufanele ilandzelwe bantfu labangephansi kwawo. Fundza 1 KubaseKhorinte 6:9-11, bese nicoca ngalemibuto:

• Ucabanga kutsi umhlaba utawuba njani lapho wonkhe umuntfu sekalalela umtsetfo waNkulunkulu wekutiphatsa?a

• Ucabanga kutsi Jehova unalo yini lilungelo lekulindzela kutsi bantfu labangephansi kweMbuso wakhe bahloniphe lemitsetfo? Usho ngani?

• Yini lekhombisa kutsi bantfu labangayilaleli lemitsetfo bangashintja?—Buka vesi 11.

Bantfu labanyenti abakhululeki kukhuluma ngekuya ecansini. Nobe kunjalo, liBhayibheli aligegi nalikhuluma ngetindzaba tekuya ecansini kepha likhuluma ngendlela lehloniphekile. Loko lelikushoko kuyasisita futsi kunengcondvo ngobe liBhayibheli livela kuJehova uMdali wetfu. Uyati kutsi yini lengasizuzisa. Usitjela loko lokufanele sikwente kuze simjabulise naloko lokutasisita sijabulele kuphila kuze kube phakadze.

1. Uyini umbono waJehova ngekuya ecansini?

Kuya ecansini kusipho lesivela kuJehova. Ufuna sijatjulelwe yindvodza nemfati labashadene. Lesipho asigcini nje ngekwenta bantfu labashadene kutsi babe nebantfwana, kodvwa siphindze sibanikete litfuba lekukhombisana kutsi bayatsandzana ngendlela lengekwemvelo nalejabulisako. Kungako liBhayibheli litsi: “Shengatsi ungajabula ngemfati webusha bakho.” (Taga 5:18, 19) Jehova ulindzele kutsi emaKhristu lashadile etsembeke kulashade nabo kute angaphingi.—Fundza KumaHebheru 13:4.

2. Buyini bugwadla?

LiBhayibheli lisitjela kutsi ‘tingwadla . . . ngeke tilidle lifa leMbuso waNkulunkulu.’ (1 KubaseKhorinte 6:9, 10) Babhali beliBhayibheli lababhala ngesiGriki basebentisa ligama lelitsi por·neiʹa kute bachaze bugwadla. Leligama lifaka ekhatsi (1) kuya ecansinia nemuntfu longakashadi naye, (2) butabani, (3) kulala nesilwane. Sitisita tsine siphindze sijabulise Jehova ‘nasibalekela bugwadla.’—1 KubaseThesalonika 4:3.

CHUBEKA UFUNISISA

3. Bubalekele bugwadla

Josefa, indvodza leyetsembekile, wala kulala nalomunye umfati. Fundza Genesisi 39:1-12, bese nicoca ngalemibuto:

• Yini leyenta Josefa wabaleka?—Buka vesi 9.

• Ucabanga kutsi Josefa wenta sincumo lesikahle yini? Usho ngani?

I-VIDEO: Kubalekele Kutiphatsa Lokubi (5:06)

Jehova ufuna sikulahle kutiphatsa kabi. Fundza 1 KubaseKhorinte 6:18, bese nicoca ngalemibuto:

• Ngutiphi timo letingenta kutsi umuntfu agcine ente bugwadla?

• Ungakubalekela njani kutiphatsa kabi?

4. Ungatincoba tilingo

I-VIDEO: Ncoba Tilingo Ngekufundza LiBhayibheli (3:02)

• Yini lomzalwane lokhulunywa ngaye kule-video layenta ngesikhatsi abona kutsi tintfo lebekaticabanga nalebekatenta betitamenta angetsembeki kumfati wakhe?

Ngisho nemaKhristu letsembekile ngaletinye tikhatsi akutfola kumatima kugcina imicabango yawo ihlantekile. Ungakubalekela njani kuhlale ucabanga tintfo letingcolile? Fundza KubaseFiliphi 4:8, bese nicoca ngalemibuto:

• Ngutiphi tintfo lokufanele sicabange ngato?

• Kufundza liBhayibheli kanye nekuhlala simatasatasa emsebentini lesiwentela Jehova kungasisita njani kutsi sincobe silingo sekwenta sono?

5. Timiso taJehova tiyasisita

I-VIDEO: Kungabi Nangcondvo (9:31)

• Lelijaha latifaka njani esilingweni?—Buka Taga 7:8, 9.

• Ngekusho kweTaga 7:23, 26, bugwadla bungaba nemiphumela lebuhlungu. Ngutiphi tinkinga lesingatibalekela, nasigcina indlela lesitiphatsa ngayo ihlantekile?

• Kutiphatsa ngendlela lehlantekile kungasisita njani sijabulele kuphila kuze kube phakadze?

Labanye bantfu bacabanga kutsi loko lokushiwo liBhayibheli ngebutabani akukhombisi kucabangela. Nobe kunjalo, Jehova unguNkulunkulu lonelutsandvo, lofuna kutsi wonkhe umuntfu ajabulele kuphila kuze kube phakadze. Kuze sikutfole lokuphila lokuphakadze, kufanele siphile ngetimiso takhe. Fundza 1 KubaseKhorinte 6:9-11, bese nicoca ngalombuto:

• Ngembono waNkulunkulu, butabani kuphela yini lobungemukeleki?

Sonkhe sidzinga kwenta lushintjo kuze sijabulise Nkulunkulu. Kufanele yini sente imetamo kuze sishintje? Fundza Tihlabelelo 19:8, 11, bese nicoca ngalemibuto:

• Ucabanga kutsi timiso taJehova tekutiphatsa tiyacabangela yini? Yini lekwenta usho njalo?

LOKO LESICOCE NGAKO

Kuya ecansini kusipho lesivela kuJehova lokufanele sijatjulelwe yindvodza nemfati wayo.

Yini Loyifundzile?

• Bufaka ekhatsi ini bugwadla?

• Yini lengasisita sibalekele bugwadla?

• Kusisita ngatiphi tindlela kulandzela timiso taJehova tekutiphatsa?

LOKUNYE LONGAKUHLOLA

Hlola kutsi kungani Nkulunkulu afuna kutsi indvodza nemfati labafuna kuhlala ndzawonye bashade.

“Litsini LiBhayibheli Ngekuhlala Ndzawonye Kwebantfu Labangakashadi?” (Sihloko lesiku-internet)

Tfola kutsi kungani kungakafaneli sibatondze bantfu labatitabani ngisho nobe liBhayibheli lifundzisa kutsi butabani bubi.

“Bubi Yini Butabani?” (Sihloko lesiku-internet)

Fundza kutsi isivikela njani imitsetfo yaNkulunkulu lemayelana nalo lonkhe luhlobo lwekuya ecansini.

“Kulalana Ngemlomo Kusento Sekuya Ecansini Yini Vele?” (Sihloko lesiku-internet)

Esihlokweni lesitsi “Bangiphatha Ngenhlonipho,” fundza kutsi yini leyenta lenye indvodza lebeyisitabani yashintja kuphila kwayo kuze ijabulise Nkulunkulu.

“IBhayibheli Lishintsha Ukuphila” (Sicongosekulindza, sa-April 1, 2011 lesitfolakala ngesiZulu)

Ngisho nobe umtsandza kakhulu Jehova futsi wetama kamatima kungatenti tintfo letitamvisa buhlungu, kodvwa utawuhle uwenta emaphutsa. Nobe kunjalo, lamanye emaphutsa mabi kakhulu kunalamanye. (1 KubaseKhorinte 6:9, 10) Nangabe wente sono lesikhulu, khumbula kutsi Jehova angeke ayekele kukutsandza, ufuna kukutsetselela nekukusita.

1. Yini lokufanele siyente kuze Jehova asitsetselele?

Labo labatsandza Jehova beva buhlungu kakhulu nababona kutsi bente sono lesikhulu. Kodvwa Jehova uyabadvudvuta ngalesetsembiso lesitsi: “Nome ngabe tono tenu tibovu njengengati, titakwentiwa tibe mhlophe njengelichwa.” (Isaya 1:18) Nangabe siphendvuka mbamba, Jehova utasicolela. Siphendvuka njani? Sitisola kakhulu ngaloku lesikwentile futsi sicele Jehova asicolele. Setama kamatima kushintja indlela lembi lesicabanga ngayo nobe siyekele kwenta tintfo letimbi letisiholele kulesono, futsi setame kuphila ngekuvumelana netimiso taJehova letihlantekile.—Fundza Isaya 55:6, 7.

2. Jehova ubasebentisa njani labadzala belibandla kuze basisite nasente sono?

Nangabe sente sono lesikhulu, Jehova usitjela kutsi ‘sibite labadzala belibandla.’ (Fundza Jakobe 5:14, 15.) Lamadvodza ayamtsandza Jehova netimvu takhe. Aceceshiwe kutsi angasisita njani kuze silungise buhlobo betfu naJehova.—KubaseGalathiya 6:1.

Labadzala belibandla basisita njani nangabe sente sono lesikhulu? Labadzala lababili nobe labatsatfu batasisita basebentisa seluleko lesiseBhayibhelini. Batawuphindze basisite sibone loko lesingakwenta kuze sikubalekele kuphindze sente sono lesifanako futsi basikhutsate. Bangahle bancume kutsi singatenti letinye tintfo ebandleni sikhatsi lesitsite kuze kube ngulapho siphindze siba nebuhlobo lobuhle naJehova. Kuze kuvikelwe libandla, labadzala bayamyekelisa kuba nguFakazi umuntfu lowente sono lesikhulu futsi longaphendvuki.

CHUBEKA UFUNISISA

3. Kuvuma sono kuyasisita kutsi siphindze sibe nebuhlobo lobuhle naJehova

Nobe ngusiphi sono lesisentako simvisa buhlungu Jehova, kungako kufanele sisivume kuye. Fundza Tihlabelelo 32:1-5, bese nicoca ngalombuto:

• Kukahle ngani kuvuma tono tetfu kuJehova kunekutsi sitifihle?

I-VIDEO: “Jehova Uyamyala Loyo Lamtsandzako” (3:01)

• Kule-video, labadzala belibandla bamsite njani Canon kutsi abuyele kuJehova?

Kufanele sibatjele konkhe labadzala belibandla, singabafihleli lutfo ngobe basuke bafuna kusisita. Fundza Jakobe 5:16, futsi nicoce ngalombuto:

• Yini leyenta kube melula ngalabadzala belibandla kutsi basisite nangabe singabafihleli lutfo?

4. Kusita ngani kuyekelisa umuntfu kuba nguFakazi?

Nangabe umuntfu lowente sono lesikhulu angafuni kuphila ngetimiso taJehova, angeke achubeke ayincenye yelibandla. Uyayekeliswa kuba nguFakazi futsi asitihlanganisi naye nobe sikhulume naye. Fundza 1 KubaseKhorinte 5:6, 11 na-2 Johane 9-11, bese nicoca ngalombuto:

• Njengobe sibiliso silatisa inhlama, lingatsintseka njani libandla nangabe litihlanganisa nemuntfu longaphendvuki?

5. Jehova uyasicolela nangabe siphendvuka

Jesu wasebentisa umfanekiso losisita sibone indlela Jehova lativa ngayo nangabe siphendvuka. Fundza Lukha 15:1-7, bese nicoca ngalombuto:

• Loku kukufundzisani ngaJehova?

Fundza Hezekeli 33:11, bese nicoca ngalombuto:

• Yini lebalulekile lokufanele siyente kuze sikhombise kutsi siphendvukile?

LOKO LESICOCE NGAKO

Nangabe sente sono lesikhulu futsi sitisola mbamba siphindze siyekele kwenta lokubi, Jehova utasicolela.

Yini Loyifundzile?

• Kuhle ngani kuvuma tono tetfu kuJehova?

• Yini lokufanele siyente kuze Jehova asicolele tono tetfu?

• Nangabe sente sono lesikhulu, kungani kufanele sicele lusito kulabadzala belibandla?

LOKUNYE LONGAKUHLOLA

Buka kutsi lenye indvodza yawutfola njani umusa waJehova lochazwe ku-Isaya 1:18.

Ungalokotsi Ungabate Umusa WaJehova (5:02)

Kusita ngani kuyekelisa umuntfu kuba nguFakazi?

“Kungani Kuyekeliswa Kuba NguFakazi Kulilungiselelo Lelutsandvo?” (Sicongosekulindza, saMay 15, 2015)

Fundza kutsi ungamchazela njani umuntfu longesuye Fakazi kutsi kungani ngalesinye sikhatsi umuntfu ayekeliswa kuba nguFakazi.

“BoFakazi BaJehova Bayabecwaya Yini Labake Babangemalunga Enkholo Yabo?” (Sihloko lesiku-internet)

Kulendzaba letsi “Bengikudzinga Kubuyela KuJehova,” fundza kutsi kungani lendvodza lebeyishiye liciniso yeva shengatsi Jehova uphindze wayidvonsa.

“LiBhayibheli Liyakugucula Kuphila” (Sicongosekulindza, sa-April 1, 2012)