• Indlela Yekuhlala Sijabulile Nasilingwa
    Sicongosekulindza (Lofundvwako)—2021 | February

    • 2 Bantfu labanyenti abacabangi kutsi singajabula nasihlushwa. Kodvwa liVi laNkulunkulu lisitjela kutsi sente njalo. Nasi sibonelo, umfundzi Jakobe wabhala kutsi, esikhundleni sekutsi sidvumateke nasibhekene netinkinga, kufanele sijabule. (Jak. 1:2, 12) NaJesu watsi kufanele sijabule nangabe siphatfwa kabi. (Fundza Matewu 5:11.) Singachubeka njani sijabula ngisho nobe sinetinkinga? Singafundza lokunyenti ngekucabanga ngencwadzi Jakobe layibhalela emaKhristu ekucala. Asesicale sicoce ngebulukhuni lamaKhristu labhekana nabo.

      NGUTIPHI TINKINGA EMAKHRISTU EKUCALA LABHEKANA NATO?

      3. Yini leyenteka ngekushesha nje ngemuva kwekutsi Jakobe abe ngumfundzi waJesu?

      3 Ngekushesha nje ngemuva kwekutsi Jakobe abe ngumfundzi waJesu, emaKhristu aseJerusalema aphatfwa kabi. (Imis. 1:14; 5:17, 18) Ngemuva kwekubulawa kwemfundzi Stefano, emaKhristu lamanyenti alishiya lelidolobha futsi “asakateleka etifundzeni taseJudiya naseSamariya, ngemuva kwaloko abalekela naseSiphrosi nase-Antiyokhi.” (Imis. 7:58–8:1; 11:19) Labafundzi babhekana netinkinga letinyenti. Kodvwa bachubeka bashumayela tindzaba letimnandzi ngekutimisela nobe ngukuphi lapho bebahamba khona, futsi kwasungulwa emabandla etindzaweni letinyenti. (1 Phet. 1:1) Kodvwa ngemuva kwaloko, kwaba netikhatsi letinyenti letimatima kakhulu.

      4. Ngutiphi letinye tinkinga emaKhristu ekucala lokwadzingeka kutsi atibeketelele?

      4 EmaKhristu ekucala kwadzingeka kutsi abeketelele tinkinga letinyenti. Nasi sibonelo, cishe ngemnyaka wa-50 C.E., umbusi waseRoma Klawudiyuse wakhipha umyalo wekutsi onkhe emaJuda aphume eRoma. Ngako emaJuda lebekangemaKhristu aphoceleleka kutsi ashiye emakhaya awo futsi aye kuletinye tindzawo. (Imis. 18:1-3) Cishe nga-61 C.E., umphostoli Pawula wabhala kutsi bantfu betfuka bazalwane bakhe labanyenti embikwalabanye bantfu, babafaka emajele futsi beba netintfo tabo. (Heb. 10:32-34) Njengalabanye bantfu, emaKhristu bekaphuyile futsi agula.—Rom. 15:26; Fil. 2:25-27.

  • Indlela Yekuhlala Sijabulile Nasilingwa
    Sicongosekulindza (Lofundvwako)—2021 | February
    • Sitfombe: 1. Lilangabi lichubeka livutsa esibaneni nanobe kunemoya futsi lina. 2. Umzalwane losakhulile uphetse liBhayibheli lelivuliwe.

      Njengelilangabi lelichubeka livutsa esibaneni, nenjabulo Jehova lasinika yona ichubeka ivutsa enhlitiyweni yemKhristu (Buka sigaba 6)

      6. Ngekusho kwaLukha 6:22, 23, kungani umKhristu angajabula ngisho nobe anetinkinga?

      6 Bantfu bangase bacabange kutsi bangajabula kuphela nangabe baphilile emtimbeni, banemali lenyenti futsi banemndeni lojabulako. Kodvwa injabulo Jakobe labhala ngayo isitselo semoya waNkulunkulu futsi isenta sijabule ngisho nobe kwentekani ekuphileni kwetfu. (Gal. 5:22) UmKhristu angajabula mbamba nangabe ati kutsi ujabulisa Jehova futsi ulandzela sibonelo saJesu. (Fundza Lukha 6:22, 23; Khol. 1:10, 11) Njengelilangabi lelivutsa esibaneni, nenjabulo ivutsa ngekhatsi enhlitiyweni yemKhristu. Lenjabulo ayipheli ngisho nobe sigula nobe sinemali lencane. Ayipheli ngisho nobe bantfu basiphikisa, lokufaka ekhatsi netihlobo tetfu. Sijabula kakhulu nangabe bantfu betama kusicedzela injabulo. Letinkinga lesibhekana nato ngenca yekukholwa kwetfu tiyasicinisekisa kutsi sibafundzi baKhristu beliciniso. (Mat. 10:22; 24:9; Joh. 15:20) Kungako Jakobe abhala watsi: “Bazalwane bami nibojabula nanehlelwa tilingo letahlukahlukene.”—Jak. 1:2.