Sihlengo​—Sipho SaNkulunkulu Lesikhulu Kunato Tonkhe

1, 2. (a) Kunini lapho sipho siba ngulesibaluleke kakhulu kuwe? (b) Kungani sitsi sihlengo sipho lesiligugu kunato tonkhe longahle utitfole?

NGUSIPHI sipho lesikhulu lowake wasitfola? Sipho akudzingeki kutsi sibe ngulesidulile kute sibe ngulesibalulekile. Liciniso likutsi kubaluleka kwesipho akuyi ngekutsi sibita imali lengakanani. Kodvwa, nangabe sikujabulisa nobe silusito kuwe, sibaluleke kakhulu.

² Kuto tonkhe tipho longafisa kutitfola, sinye kuphela lesibaluleke kakhulu kunato tonkhe. Sipho Nkulunkulu lasinike bantfu. Jehova usiphe tipho letinyenti, kodvwa sipho lesikhulu kunato tonkhe, ngumhlatjelo wesihlengo ngeNdvodzana yakhe, Jesu Khristu. (Matewu 20:28) Njengobe sitawubona kulesehluko, sihlengo sipho lesiligugu longahle usitfole, ngobe sitakuletsela injabulo lengenakuchazwa futsi senetise tidzingo takho letibalulekile. Sihlengo siyindlela lebaluleke kakhulu Jehova labonisa ngayo lutsandvo lanalo ngawe.

SIYINI SIHLENGO?

3. Siyini sihlengo, futsi yini lokudzingeka siyicondze kute sisemukele njengesipho lesiligugu?

³ Sihlengo siyindlela yaJehova yekukhulula nobe kusindzisa bantfu esonweni nasekufeni. (Efesu 1:7) Kute sicondze inchazelo yalemfundziso yeliBhayibheli, kudzingeka sicabange ngaloko lokwenteka ensimini yase-Edeni. Nangabe sesikucondza kutsi Adamu walahlekelwa yini ngalesikhatsi ona, sitawucondza kutsi kungani sihlengo sisipho lesiligugu kitsi.

4. Kuphila angumuntfu lote sono kwakusho kutsini nga-Adamu?

⁴ Ngalesikhatsi Jehova adala Adamu, wamnika sipho lesiligugu​—kuphila angumuntfu lote sono. Ase ucabange kutsi kwakusho kutsini loko nga-Adamu. Njengobe amdala waba nemtimba kanye nengcondvo lephelele, abengeke agule, aguge, nobe afe. Njengemuntfu lophelele, abehlobene kakhulu naJehova. LiBhayibheli litsi Adamu ‘abengumsa waNkulunkulu.’ (Lukha 3:38) Ngako wajabulela kusondzelana kwebuhlobo lobukhetsekile naNkulunkulu Jehova, njengalobo indvodzana leba nabo nababe loyitsandzako. Jehova abekhuluma nendvodzana yakhe lesemhlabeni, Adamu, ayinika umsebenti lojabulisako futsi ayitjela naloko abekulindzele kuyo.​—Genesisi 1:28-30; 2:16, 17.

5. Lisho kutsini liBhayibheli nalitsi Adamu wadalwa waba “ngumfanekiso waNkulunkulu”?

⁵ Adamu abedalwe ‘ngemfanekiso waNkulunkulu.’ (Genesisi 1:27) Loku kwakungasho kutsi Adamu abefanana naNkulunkulu ngekubukeka. Njengobe sifundzile eSehlukweni 1 salencwadzi, Jehova ungumoya longabonakali. (Johane 4:24) Jehova ute umtimba lofanana newetfu. Njengobe Adamu adalwa waba ngumfanekiso waNkulunkulu, loko kwakusho kutsi udalwe waba netimfanelo letifanana netaNkulunkulu, letifaka ekhatsi lutsandvo, kuhlakanipha, kulunga, kanye nemandla. Adamu abefanana naBabe wakhe nangalenye indlela lebalulekile, abetikhetsela loko abefuna kukwenta. Ngetulu kwaloko, Adamu abengafani nemshini lowenta loko lohlelelwe kutsi ukwente. Kunaloko, abetincumela yena, atikhetsela emkhatsini walokulungile nalokungakalungi. Kube wakhetsa kulalela Nkulunkulu, ngabe waphila phakadze emhlabeni loliPharadisi.

6. Ngesikhatsi Adamu angamlaleli Nkulunkulu, walahlekelwa yini, futsi intalelwane yakhe yatsintseka njani?

⁶ Kuyacaca kutsi ngalesikhatsi Adamu angamlaleli Nkulunkulu futsi atfola sigwebo sekufa, walahlekelwa kakhulu sibili. Sono sakhe samlahlekisela kuphila lokuncono kanye nato tonkhe tibusiso. (Genesisi 3:17-19) Kuyadzabukisa kutsi Adamu akazange atilahlekisele yena yedvwa kuphila lokuligugu, kodvwa wakulahlekisela nentalelwane yakhe. Livi laNkulunkulu litsi: “Sono sangena ngemuntfu munye [Adamu] emhlabeni, sangena nekufa, kufa kwase kwendlulela kubo bonkhe bantfu, njengobe bonkhe bonile.” (Roma 5:12) Sonkhe satfola lifa lelisono ku-Adamu. LiBhayibheli litsi ‘watitsengisa’ yena kanye nentalelwane yakhe ebugcilini besono nasekufeni. (Roma 7:14) Beselingekho litsemba nga-Adamu na-Eva ngobe bakhetsa ngemabomu kungamlaleli Nkulunkulu. Kutsiwani ngentalelwane yabo, lehlanganisa natsi?

7, 8. Ngutiphi tintfo letimbili letishiwo sihlengo?

⁷ Jehova wasindzisa bantfu ngekubalungiselela sihlengo. Siyini sihlengo? Sihlengo sisho tintfo letimbili. Kwekucala, sisho linani lelikhokhwako kute kukhululwe lotsite nobe uphindze utsenge lokutsite. Loku singase sikufananise nemali lekhokhwako kute kukhululwe siboshwa. Kwesibili, sihlengo nguloko lokumelwe kubhadalwe kute kube yinhlawulo yalokutsite. Loku kufanana nemali lekhokhwako kute kulungiswe umonakalo lowentekile. Nasi sibonelo: Nangabe umuntfu ente ingoti, kufanele akhokhe imali lelingana nemonakalo lowentekile.

⁸ Kungenteka njani kutsi kukhokhelwe inhlekelele lenkhulu Adamu lasifaka kuyo sonkhe, futsi sikhululwe ekubeni tigcila tesono kanye nekufa? Ase sifundze ngesihlengo Jehova lasilungiselela sona nekutsi singasho kutsini kuwe.

INDLELA JEHOVA LASILUNGISELELA NGAYO SIHLENGO

9. Ngulesinjani sihlengo lesasidzingeka?

⁹ Njengobe kwalahleka kuphila lokuphelele kwemuntfu, kute umuntfu longakapheleli lobengabuyisela loko kuphila. (Tihlabelelo 49:7, 8) Kwakudzingeka sihlengo lesilingana naloko lokwakulahlekile. Loku kuvumelana nesimiso sekulunga lokuphelele lesitfolakala eVini laNkulunkulu, lesitsi: “Kuphila ngekuphila.” (Dutheronomi 19:21) Yini-ke leyayingalingana nalelinani lalomuntfu lophelele, nobe kuphila lokwalahlwa ngu-Adamu? Kwakudzingeka lokunye kuphila kwemuntfu lophelele, ‘lokwakuyinhlawulo’ lehambelanako.​—1 Thimothi 2:6.

10. Jehova wasilungisela njani sihlengo?

¹⁰ Jehova wasilungisela njani sihlengo? Watfumela lenye yemadvodzana akhe laphelele langumoya kutsi italwe emhlabeni. Kodvwa Jehova akazange atfume nobe ngabe ngusiphi sidalwa semoya. Watfumela lesiligugu kakhulu kuye, iNdvodzana yakhe lekuphela kwayo. (1 Johane 4:9, 10) Ngekutitsandzela, leNdvodzana yashiya likhaya lakubo lasezulwini. (Filiphi 2:7) Njengobe sifundzile esehlukweni lesendlulile salencwadzi, Jehova wenta simangaliso nakendlulisela kuphila kweNdvodzana yakhe esibeletfweni saMariya. Ngemoya longcwele waNkulunkulu, Jesu watalwa angumuntfu lophelele, ete sono.​—Lukha 1:35.

11. Umuntfu munye angaba njani sihlengo sebantfu labanyenti?

¹¹ Umuntfu munye angaba njani sihlengo sebantfu labanyenti? Kwenteka njani kutsi bantfu labangaba tigidzi babe nesono kusukela ekucaleni? Khumbula kutsi ngesizatfu sekutsi wona, Adamu walahla intfo leligugu labenayo, kuphila lokuphelele. Abengeke akwati kukundlulisela kubantfwana bakhe. Kunaloko, abengandlulisela kubo sono nekufa. LiBhayibheli libita Jesu ngekutsi ‘ngu-Adamu wekugcina’ ngobe abenekuphila lokuphelele njengemuntfu futsi akazange one. (1 Khorinte 15:45) Kufanana nekutsi wangena esikhundleni sa-Adamu kute asisindzise. Ngekwenta kuphila kwakhe kube ngumhlatjelo, nobe ngekunikela ngekuphila kwakhe, nangekulalela Nkulunkulu ngendlela lephelele, Jesu abekhokhela sono sa-Adamu. Ngekwenta loko, Jesu abeniketa intalelwane ya-Adamu litsemba.​—Roma 5:19; 1 Khorinte 15:21, 22.

12. Yini leyayifakazelwa kuhlupheka kwaJesu?

¹² LiBhayibheli likuchaza kabanti kuhlupheka Jesu lakubeketelela angakafi. Wabhanjabulwa kabuhlungu, wabetselwa ngesibhuku, futsi wafa kabuhlungu elugodvweni lwekuhlushwa. (Johane 19:1, 16-18, 30; fundza Sandzisanchazo, emakhasini 204-6) Kungani kwakudzingeka kutsi Jesu ahlupheke kangaka? Kulesinye sehluko salencwadzi, sitawubona kutsi Sathane wakungabata kutsi bakhona bantfu labangahlala betsembekile kuJehova ngisho nobe balingwa. Ngekucinisela ngisho nobe ahlupheka kakhulu, Jesu wakuphendvula ngendlela lencono kakhulu lokungabata kwaSathane. Wabonisa kutsi umuntfu lophelele lonenkhululeko yekutikhetsela, angahlala acotfo ngendlela lephelele kuNkulunkulu ngisho nobe Develi angentani. Kufanele kutsi Jehova wajabula kakhulu ngekwetsembeka kweNdvodzana yakhe letsandzekako!​—Taga 27:11.

13. Sakhokhwa njani sihlengo?

¹³ Sakhokhwa njani sihlengo? Ngelilanga lesi-14 lenyanga yemaJuda lebitwa ngekutsi nguNisan, ngemnyaka wa-33 C.E., Jehova wavumela iNdvodzana yakhe lephelele futsi lengenasono kutsi ibulawe. Ngako-ke, Jesu wanikela ngekuphila kwakhe lokuphelele njengemuntfu “kwaba kanye kwenela.” (Hebheru 10:10) Ngelilanga lesitsatfu Jesu afile, Jehova wamvusela ekuphileni kwemoya. Ezulwini, Jesu waniketa Nkulunkulu linani lekuphila kwakhe lokuphelele njengemuntfu lokwaba ngumhlatjelo wekuhlenga intalelwane ya-Adamu. (Hebheru 9:24) Jehova walemukela lelinani lemhlatjelo waJesu njengesihlengo lesasidzingeka kute kukhululwe bantfu ekugcilatweni sono nekufa.​—Roma 3:23, 24.

LOKO LOKUNGAHLE KUSHIWO SIHLENGO KUWE

14, 15. Kute ‘sitsetselelwe tono tetfu,’ kufanele senteni?

¹⁴ Nanobe sitoni, singajabulela tibusiso letingeke tilinganiswe ngesizatfu sesihlengo. Ase sicoce ngaletinye tinzuzo tanyalo naleto tesikhatsi lesitako talesipho lesikhulu lesivela kuNkulunkulu.

¹⁵ Kutsetselelwa kwetono. Ngekutsi sazuza kungapheleli, sizabalaza kamatima kute sente lokuhle. Sonkhe siyona ngekukhuluma nobe ngekwenta. Kodvwa ngemhlatjelo waJesu wesihlengo, ‘singatsetselelwa tono tetfu.’ (Kholose 1:13, 14) Kute sitfole loko kutsetselelwa, kufanele siphendvuke ngalokuphelele. Ngekutfobeka, kufanele sicele intsetselelo kuJehova ngesisekelo selukholo lwetfu emhlatjelweni wesihlengo weNdvodzana yakhe.​—1 Johane 1:8, 9.

16. Yini lesenta sikwati kukhonta Nkulunkulu nganembeza lohlobile, futsi ubaluleke ngani nembeza lonjalo?

¹⁶ Nembeza lohlobile kuNkulunkulu. Nembeza lonelicala ungasenta melula kutsi siphelelwe litsemba futsi usente sitive singesilutfo. Nobe kunjalo, ngentsetselelo letfolakala ngesihlengo, Jehova wenta kutsi sikwati kumkhonta kahle ngisho nobe sinesono. (Hebheru 9:13, 14) Loku kwenta kutsi sibe nenkhululeko yekukhuluma naye. Ngako-ke, singakwati kukhuluma naJehova ngemthandazo sikhululekile. (Hebheru 4:14-16) Kuba nanembeza lohlobile kusinika kuthula kwengcondvo, futsi kusenta sitive sijabulile.

17. Ngutiphi tibusiso lesitatitfola ngekutsi Jesu wasifela?

¹⁷ Litsemba lekuphila phakadze epharadisi emhlabeni. Umbhalo wabaseRoma 6:23 utsi, “Inkhokhelo yesono kufa.” Lona lelo vesi lichubeka litsi, “Kodvwa sipho semusa saNkulunkulu sikuphila lokuphakadze ngaKhristu Jesu iNkhosi yetfu.” ESehlukweni 3 salencwadzi, sifundze ngetibusiso teliPharadisi lasemhlabeni lelitako. (Sembulo 21:3, 4) Tonkhe leto tibusiso, kufaka ekhatsi kuphila phakadze sinemphilo lephelele, siyotitfola ngobe Jesu wasifela. Kute sititfole letibusiso, kudzingeka sibonise kubonga ngalesipho sesihlengo.

UNGABONISA NJANI KUTSI UYASICAPHELA SIHLENGO?

18. Kungani kufanele simbonge Jehova ngekusilungisela sihlengo?

¹⁸ Kungani kufanele simbonge kusuke enhlitiyweni Jehova ngekusilungiselela sihlengo? Phela sipho siba ngulesibalulekile nangabe loyo lokuphe sona kudzingeke kutsi adzele sikhatsi sakhe, emandla, nobe aze angene nasetindlekweni kute asitfole. Sijabula kakhulu nangabe sibona kutsi lesipho sikhombisa lutsandvo lolukhulu lwaloyo lesivela kuye. Sihlengo sisipho lesitendlula tonkhe lesingaticabanga, ngobe Nkulunkulu wanikela ngalokukhulu kakhulu ngaso. Johane 3:16 utsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo.” Sihlengo siyindlela lehamba embili Jehova lakhombise ngayo kutsi uyasitsandza. Siphindze sibonise nelutsandvo lwaJesu, ngobe watinikela ngekutitsandzela atinikelela tsine. (Johane 15:13) Sipho sesihlengo kufanele sisicinisekise kutsi Jehova kanye neNdvodzana yakhe batsandza umuntfu ngamunye.​—Galathiya 2:20.

19, 20. Ungakukhombisa njani kubonga ngesipho sesihlengo lesivela kuNkulunkulu?

¹⁹ Ungabonisa njani kutsi uyabonga ngesipho sesihlengo lesivela kuNkulunkulu? Kwekucala, yati kabanti ngeMuphi Lomkhulu, longuJehova. (Johane 17:3) Kufundza liBhayibheli ngelusito lwalencwadzi kungakusita wente loko. Njengobe uchubeka wati kabanti ngaJehova, lutsandvo lwakho ngaye luyoba lukhulu. Lolo tsandvo luyokwenta ufune kumjabulisa.​—1 Johane 5:3.

²⁰ Bani nekukholwa emhlatjelweni waJesu wesihlengo. Mayelana naJesu, kutsiwa: “Lokholwa yiNdvodzana, unekuphila lokuphakadze.” (Johane 3:36) Singakubonisa njani kukholwa kuJesu? Kukholwa lokunjalo akuboniswa nguloko lesikushoko nje kuphela. Jakobe 2:26 utsi: “Kukholwa nakute imisebenti kufile.” Kukholwa lokungiko sibili kufakazelwa ‘ngimisebenti,’ lokusho kutsi, ngetento tetfu. Lenye indlela lesikhombisa ngayo kukholwa kuJesu, kwenta konkhe lokusemandleni etfu kutsi simjabulise, hhayi ngalesikushoko nje kuphela kodvwa nangaloko lesikwentako.​—Johane 13:15.

21, 22. (a) Kungani kumelwe sibekhona minyaka yonkhe eSidlweni seNkhosi Sakusihlwa? (b) Sitawufundza ngani eSehlukweni 6 kanye na-7?

²¹ Bani khona minyaka yonkhe emkhosini weSidlo seNkhosi Sakusihlwa. Ngebusuku baNisan 14, 33 C.E., Jesu wacala umkhosi lobalulekile liBhayibheli leliwubita ngekutsi ‘sidlo seNkhosi sakusihlwa.’ (1 Khorinte 11:20; Matewu 26:26-28) Lomkhosi uphindze ubitwe ngekutsi Sikhumbuto sekufa kwaKhristu. Jesu wawucala kute usite baphostoli bakhe kanye nawo onkhe emaKhristu eliciniso lalandzela ngemuva kwabo kutsi akhumbule kufa kwakhe angumuntfu lophelele, nangekunikela ngekuphila kwakhe kube sihlengo. Mayelana nalomkhosi, Jesu watsi: “Yentani loku kuze kube sikhumbuto ngami.” (Lukha 22:19) Kukhumbula, lomkhosi weSikhumbuto kusikhumbuta ngelutsandvo Jehova naJesu labasibonisa lona mayelana nesihlengo. Sibonisa kubonga ngesihlengo ngekutsi sibe khona minyaka yonkhe eSikhumbutweni sekufa kwaJesu.a

²² Lilungiselelo laJehova lesihlengo, lisipho vele lesingeke sicatsaniswe. (2 Khorinte 9:14, 15) Lesipho lesiligugu singasita ngisho nalabafile. Tehluko 6 kanye na-7 titayichaza lendzaba.