Uyatikhumbula yini uwa nawusemncane? Mhlawumbe walimala esandleni noma wahuzuka lidvolo. Usakhumbula yini kutsi wakudvudvuta njani make wakho? Kungenteka wasigeza lesilondza wase uyakubhandisha. Kona wakhala, kodvwa kukuncesitela kwakhe nekukubhambhadza aphindze akuphuphutse kwakwenta washeshe waba ncono. Watfola indvudvuto ngesikhatsi lowawuyidzinga ngaso.

Njengobe sikhula, tiya ngekuba tinengi kakhulu tinkinga ekuphileni. Tinengi kangangekutsi kutfola indvudvuto sekuyimvela kancane. Kuyadzabukisa kusho kutsi akusito tonkhe tinkinga lesiba nato ebudzaleni letingacatululwa ngekubhandishwa noma kubhambhadvwa nekuphuphutfwa ngumake. Asewucabange nganati tibonelo letimbalwa.

• Wake wasanganiswa yini kuphelelwa ngumsebenti? Julian utsi wetfuka kakhulu nakacoshwa emsebentini, lokwamshiya angati kutsi kufanele atsatse ini ayihlanganise nani. Watibuta: ‘Ngitawondla ngani umndeni wami? Ngisebente ngekutimisela iminyaka leminyenti kulenkampani, kwentiwe yini kutsi babone ngatsi ngiyintfo lengenamsebenti?’

• Mhlawumbe uva buhlungu kakhulu ngenca yekuphela kwemshado wakho. Nakachaza Raquel utsi: “Yatsi indvodza yami nayingishiya ngingakalindzeli etinyangeni letingu-18 letengcile, ngeva buhlungu kakhulu. Kwangephula umoya lolokwenteka. Bengibonakala ngihamba nje kutsi ngisebuhlungwini futsi umoya wami bewuphansi. Bekungikhatsata kakhulu.”

• Mhlawumbe unesifo lesimatima lesingelapheki. Kungenteka kube netikhatsi lapho utiva njengaJobe lowatsi: “Sengiyayeya [sengiyayizonda, NW] imphilo yami. Ngingamane ngingete ngaphila iminyaka leminyenti.” (Jobe 7:16) Mhlawumbe simo sakho siyafana nesamkhulu Luis loseminyakeni yabo-80 lowatsi: “Ngaletinye tikhatsi nginconota kufa kunekuphila kulesimo.”

• Kungenteka nekutsi kufelwa ngumuntfu lomtsandzako kukwenta uyidzinge kakhulu indvudvuto. Robert utsi: “Ngacale ngangakholwa nangiva kutsi indvodzana yami ishonile engotini yendiza. Buhlungu lengabuva ngulobo liBhayibheli lelibufananisa nebekugwazwa ngesikhali.”​—Lukha 2:35.

BoRobert, Luis, Raquel, naJulian bayitfola indvudvuto ngisho nome bebabhekene netimo letibuhlungu. Bamtfola Nkulunkulu longuSomandla njengemuntfu longabadvudvuta. Nkulunkulu ubadvudvuta njani bantfu? Angakuniketa yini nawe indvudvuto loyidzingako?

Umphostoli Pawula wachaza Jehovaa ngekutsi ‘nguNkulunkulu wayo yonkhe indvudvuto losidvudvuta kuko konkhe kuhlupheka kwetfu.’ (2 Khorinte 1:3, 4) Kungako liBhayibheli lisicinisekisa kutsi Nkulunkulu angakhona kusita wonkhe umuntfu, nekutsi kute simo lesibuhlungu Babe wetfu losezulwini langeke akhone kusidvudvuta kuso.

Kukhona lokufanele sikwente kute sitfole indvudvuto levela kuNkulunkulu. Dokotela abengakusita yini nawungakayi kuye? LiBhayibheli lisincusa litsi: “Sondzelani kuNkulunkulu, naye utawusondzela kini.”​—Jakobe 4:8.

Yini lesenta siciniseke kutsi Nkulunkulu utawusondzela kitsi? Kwekucala, usitjela kanyenti kutsi uyafuna kusisita. (Fundza libhokisi lelihambisana nalesihloko.) Kwesibili, sinebufakazi lobuphatsekako lobuvela kubantfu labatfole indvudvuto kuNkulunkulu​—bantfu labaphila esikhatsini setfu kanye nalabebaphila esikhatsini lesendlulile.

Bekuvamile kutsi iNkhosi Davide yehlelwe tintfo letibuhlungu njengobe tehlela nalabanye bantfu labafuna lusito kuNkulunkulu lamuhla. Yake yancenga Jehova yatsi: “Lalela livi lekuncusa kwami, nangikhalela kusitwa nguwe.” Jehova wamphendvula yini? Yebo, wamphendvula. Davide wengeta watsi: “Wangisita, ngako inhlitiyo yami igcunyagcunyiswa yinjabulo.”​—Tihlabelelo 28:2, 7.

LOKWENTIWA NGUJESU KUTE ADVUDVUTE BONKHE LABALILAKO

Nkulunkulu wahlela kutsi Jesu abe nendzima lebalulekile ekudvudvuteni labanye. ‘Kubopha labo labatinhlitiyo tabo tidzabukile kanye nekudvudvuta bonkhe labalilako,’ bekungulomunye wemisebenti Nkulunkulu latjela Jesu kutsi ayente. (Isaya 61:1, 2) Njengobe liBhayibheli belivele lishito, Jesu abebanaka kakhulu bantfu ‘labakhatsele nalabasindvwako.’​—Matewu 11:28-30.

Jesu wadvudvuta bantfu ngekutsi abanikete teluleko letihlakaniphile, abaphatse ngemusa futsi ngaletinye tikhatsi wabelapha ekuguleni kwabo. Ngalelinye lilanga umuntfu lonebulephelo wancenga Jesu watsi: “Nawutsandza ungangenta ngihlanteke.” Ngako Jesu wayihawukela lendvodza futsi wayitsintsa ngesandla, watsi kuyo: “Ngiyatsandza, hlanteka.” (Makho 1:40, 41) Lomuntfu lonebulephelo welapheka.

Namuhla, iNdvodzana yaNkulunkulu ayikho emhlabeni kute isidvudvute yona matfupha. Kodvwa Babe wayo, Jehova ‘longuNkulunkulu wayo yonkhe indvudvuto,’ usabasita bantfu labadzinga indvudvuto. (2 Khorinte 1:3) Cabanga ngetindlela letine letiyinhloko Nkulunkulu latisebentisako kute advudvute bantfu.

• LiBhayibheli. “Tonkhe tintfo letabhalwa kadzeni tabhalelwa kufundzisa tsine, kuze kutsi ngekucinisela kwetfu nangendvudvuto lesiyitfola emiBhalweni sitewuba nelitsemba.”​—Roma 15:4.

• Umoya Longcwele. Kungakapheli nesikhatsi lesidze Jesu abuyele ezulwini, libandla lebuKhristu laba nesikhatsi sekuthula. Kwentiwa yini loko? Kutsi “belihamba ngekwesaba Jehova futsi lisekelwa ngumoya longcwele.” (Imisebenti 9:31) Umoya longcwele, lokungemandla Nkulunkulu lawasebentisako, ulusito kakhulu. Nkulunkulu angawusebentisa kute advudvute wonkhe umuntfu kunoma ngusiphi simo labhekene naso.

• Umthandazo. LiBhayibheli litsi: “Ningakhatsateki ngalutfo.” Lichubeka litsi: “Tonkhe ticelo tenu atatiwe nguNkulunkulu ngekuthantaza, ngekuncusa nangekubonga; kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu.”​—Filiphi 4:6, 7.

• Bazalwane Betfu bangaba bangani sibili lesingetsembela kubo kutsi basidvudvute ngetikhatsi letimatima. Umphostoli Pawula wachaza bazalwane bakhe ngekutsi ‘babe yindvudvuto lenkhulu kuye’ ngesikhatsi ‘sekucindzeteleka nekuhlupheka’ kwakhe.​—Kholose 4:11; 1 Thesalonika 3:7.

Mhlawumbe uyatibuta kutsi letindlela tisebenta mbamba yini. Asesihlolisise lokwentekile kubantfu labebanetinkinga lokukhulunywe ngabo esihlokweni sekucala. Njengabo, nawe ungabona kutsi Nkulunkulu usasigcina setsembiso sakhe lesikhutsatako lesitsi: “Njengemfati nakadvudvuta umntfwanakhe, nami ngiyawunidvudvuta kanjalo.”​—Isaya 66:13.

NAWUPHELELWA NGUMSEBENTI

Setha utsi: “Mine nemkami saphelelwa ngumsebenti kanyekanye. Kwaphela iminyaka lemibili siphila ngalabasipha kona emndenini futsi besibamba nematoho labevela. Loku kwabangela kutsi Priscilla umkami acindzeteleke kakhulu, futsi nami ngativa ngisehluleki.”

“Sakhona njani kubhekana nalesimo? Priscilla abehlala atikhumbuta emavi aJesu lakuMatewu 6:34. Jesu watsi akukafaneli sikhatsateke ngelilanga lelilandzelako ngobe nalo linetinkinga talo. Imithandazo yakhe lesuka enhlitinyweni beyimsita kakhulu. Mine bengidvudvutwa Tihlabelelo 55:22. Ngalingisa umbhali waleTihlabelelo, ngalahlela umtfwalo wami kuJehova futsi yena wangicinisa. Naloku sengitfole lomunye umsebenti, senetiswa nguloko lesinako njengobe Jesu asikhutsata kutsi sente njalo kuMatewu 6:20-22. Ngetulu kwako konkhe loku, sesisondzele kakhulu kuNkulunkulu futsi natsi sesingematse nelulwimi.”

Jonathan utsi: “Bengikhatsateke kakhulu ngelikusasa ngesikhatsi libhizinisi letfu lelincane liwa. Kusebenta kwetfu kamatima iminyaka lengu-20 kwagucuka kwaba lite ngenca yekuwa kwemnotfo. Sacala kuhhwilitisana ngemali nemkami. Besingakhoni nekutsenga ngelikhadi letfu lesikweledi (credit card) ngoba sesaba kutsi inkampane lesalitsatsa kuyo ngeke isasibhadalela.”

“Kodvwa liVi laNkulunkulu kanye nemoya longcwele kwasisita kutsi sitsatse tincumo letikahle. Ngafundza kwemukela noma nguluphi luhlobo lwemsebenti futsi sanciphisa tindleko ngekungatsengi tintfo lesingatidzingi. Njengobe siBoFakazi BaJehova, besitfola lusito nakubazalwane betfu. Bebasenta sitive site emahloni ngesimo lebesikuso futsi bebasisita nasekubhedza mbamba.”

NAWUBHIDLIKELWA NGUMSHADO

Raquel utsi: “Ngesikhatsi indvodza yami ingishiya ngingakalindzeli, ngeva buhlungu kakhulu, futsi ngatfukutsela. Kwangephula umoya lolokwenteka kodvwa ngasondzela kuNkulunkulu, yena wangidvudvuta. Nangithandaza kuye onkhe malanga, bengiba nekuthula kwangekhatsi. Kufana nekutsi Nkulunkulu wayitfoba inhlitiyo yami lebeyidzabukile.

“Ngimbonga kakhulu ngekusiniketa liVi lakhe liBhayibheli, lelangisita ngakhona kulwisana nentfukutselo futsi ngakhona nekubeketelela buhlungu lebengibuva. Angisita kakhulu emavi emphostoli Pawula lakuRoma 12:21 latsi: ‘Ungavumi kuncotjwa ngulokubi, kodvwa chubeka uncoba lokubi ngalokuhle.’

Umngani wami lohlakaniphile wangisita ngabona sidzingo sekuchubeka nemphilo. Wangikhombisa Umshumayeli 3:6 futsi ngemusa wangitjela kutsi ‘kunesikhatsi sekuyekela.’ Kona besibuhlungu leseluleko kodvwa bengisidzinga. Nyalo sengitibekele imigomo lemisha ekuphileni.”

Elizabeth utsi: “Nawubhidlikelwa ngumshado, uyamdzinga umuntfu longakusita. Benginaye umngani sibili lobekangisita onkhe malanga. Abekhala nami, angidvudvuta futsi abengenta ngitive ngitsandvwa kunekutiva ngilahliwe. Ngiyaciniseka kutsi wasetjentiswa nguJehova kutsi angelaphe kulolusizi lebengikulo.”

NAWUGULA NOMA NASEWUKHULE KAKHULU

Mkhulu Luis lokukhulunywe ngaye esihlokweni sekucala, unesifo senhlitiyo futsi wacishe wafa emahlandla lamabili. Kufanele ahlale afake emaphayiphi e-oxygen ema-awa langu-16 ngelilanga. Utsi: “Ngithandaza njalo kuJehova. Nasengithandazile, ngiyaye ngiwuve umoya wakhe ungicinisa. Umthandazo uyangisita kutsi ngichubeke ngiphila ngoba ngiyametsemba Nkulunkulu futsi ngiyati kutsi uyangikhatsalela.”

Petra loseminyakeni yabo-80 utsi: “Kunyenti kakhulu lengifisa kukwenta kodvwa emandla awasavumi. Kungivisa buhlungu kakhulu kuphelelwa ngemandla. Umtimba wami uhlale ucobekile futsi sengiphila ngemitsi yabodokotela. Ngivame kucabanga ngaJesu nakacela Babe wakhe kutsi nakungenteka, abendlulise lobumatima labetawubhekana nabo. Jehova wamcinisa Jesu, nami uyangicinisa. Kuthandaza onkhe malanga kuyangiphilisa. Ngitiva ngincono kakhulu nasengithandazile.”​—Matewu 26:39.

Kunjalo nangaJulian losekuphele iminyaka lecishe ibe ngu-30 aphetfwe sifo lesihlasela imitsambo yebucopho nemgomgodla, lokutsiwa yi-multiple sclerosis. Utsi: “Sekute lesinye situlo lengingahlala kuso ngephandle kwe-wheel chair. Kodvwa ngiyakujabulela kuphila ngoba sikhatsi sami lesinyenti ngisisebentisela kusita labanye bantfu. Kubasita kwenta ngikhohlwe ngesimo lengikuso futsi naJehova uyasigcina setsembiso sakhe sekutsi utasicinisa nasidzinga kuciniswa. Nami ngingawasho emavi lafana newaPawula latsi: ‘Nginemandla kuto tonkhe tintfo ngenca yaloyo longipha emandla.’”​—Filiphi 4:13.

NAWUFELWE NGULOMTSANDZAKO

Antonio utsi: “Angizange ngikholwe nangiva kutsi babe ushayiswe yimoto. Kwaba buhlungu kakhulu ngoba bekamane nje atihambela ngetinyawo. Kodvwa kute lebengingakwenta. Kwaphela emalanga lasihlanu angaphaphami, futsi wagcine afile. Bengitibamba nanginamake kodvwa ngitsi nangingedvwa ngisidzindze sililo. Bengitibuta kutsi, leni nje kodvwa?

“Kuleso sikhatsi sebumatima bengisolo ngithandaza kuJehova ngimcela kutsi angiphe kuthula nekutsi angisite ngikhone kubhekana nalesimo. Ngekuhamba kwesikhatsi ngaba ncono. Ngakhumbula lokushiwo liBhayibheli kutsi timo letingakalindzeleki tingehlela noma ngabe ngubani. Ngiyaciniseka kutsi ngiyophindze ngimbone babe asavusiwe ekufeni ngobe Nkulunkulu akawacambi emanga.”​—Umshumayeli 9:11; Johane 11:25; Thithusi 1:2.

Robert lesike sakhuluma ngaye esihlokweni sekucala, naye liyamdvudvuta lelitsemba. Utsi: “Mine nemkami satfola kuthula kwengcondvo lokukhulunywa ngako kuFiliphi 4:6, 7, nasithandaza kuJehova. Lokuthula kwangekhatsi kwasenta sakhona kukhuluma netintsatseli ngelitsemba lesinalo lekuvuswa kwalabafile. Nanobe indvodzana yetfu yashona engotini yendiza, sisatikhumbula tikhatsi letimnandzi lebesiba nato njengemndeni. Setama kunaka tona kakhulu.

“Ngesikhatsi bazalwane betfu basitjela kutsi basibonile ku-TV sikhuluma ngelitsemba lesinalo, sabatjela kutsi yimithandazo yabo lesente sakhona kukwenta loko. Ngiyakholelwa kutsi kusitfumelela kwabo imilayeto leminyenti yekusidvudvuta bekuyindlela Jehova lasisita ngayo.”

Njengobe sesibonile kuletibonelo lesikhulume ngato, Nkulunkulu angabadvudvuta bantfu lababhekene netinkinga nebumatima lobehlukahlukene. Angakudvudvuta yini wena? Kunome ngutiphi tinkinga longahlangabetana nato ekuphileni, ungayitfola indvudvuto kute ubhekane naleso simo.b Nawe ungathandaza kuJehova ucele lusito. ‘UnguNkulunkulu wayo yonkhe indvudvuto.’​—2 Khorinte 1:3.