“Ngubani Losisebenti Lesetsembekile Nalesihlakaniphile?”
“Ngubani losisebenti lesetsembekile nalesihlakaniphile, inkhosi yaso lesimise etikwebendlu yayo?”—MAT. 24:45.
1, 2. Jesu usebentisa yiphi indlela kute asondle lamuhla, futsi yini leyenta kubaluleke kutsi siyati lendlela lasondla ngayo?
LOMUNYE dzadze waveta indlela lativa ngayo encwadzini layibhalela bazalwane labasebenta endlunkhulu yetfu yemhlaba wonkhe. Watsi: “Bazalwane, ngiyehluleka kubala tikhatsi leninginike ngato tihloko leticuketse loko lengikudzingako ngesikhatsi lengikudzinga ngaso kakhulu.” Uyavumelana yini naye lodzadze? Linyenti letfu liyavumelana naye. Kufanele yini loko kusimangalise? Cha akukafaneli.
2 Kudla kwakamoya lesikutfola ngesikhatsi lesifanele kusiniketa bufakazi bekutsi Jesu, Loyinhloko yelibandla uyasigcina setsembiso sakhe sekusondla. Loko ukwenta ngelusito lwabobani? Ngesikhatsi asho timphawu tekuba khona kwakhe, Jesu watsi utawusebentisa “sisebenti lesetsembekile nalesihlakaniphile” kute anikete bendlu yakhe “kudla ngesikhatsi lesifanele.” (Fundza Matewu 24:45-47.) Lesisebenti lesetsembekile siyindlela Jesu layisebentisako nakondla balandzeli bakhe beliciniso kulamalanga ekugcina. Kubalulekile kutsi sisati lesisebenti lesetsembekile. Buhlobo betfu naNkulunkulu busime kulendlela.—Mat. 4:4; Joh. 17:3.
3. Tincwadzi tetfu tatsini mayelana nemfanekiso wesisebenti lesihlakaniphile?
3 Ngako-ke, kufanele siwucondze njani umfanekiso waJesu lomayelana nesisebenti lesetsembekile? Esikhatsini lesendlulile, etincwadzini tetfu sabhala naku lokulandzelako: NgeliPhentekhoste la 33 C.E., Jesu wabeka sisebenti lesetsembekile etikwebendlu yakhe. Lesisebenti simelela onkhe emaKhristu lagcotjiwe lasemhlabeni njengelicembu kusukela ngaleso sikhatsi. Bendlu bamelela umKhristu logcotjiwe ngamunye. Nga-1919, Jesu wabeka lesisebenti lesihlakaniphile ‘ngetulu kwako konkhe’ lokukwakhe—tonkhe tintfo takhe letisemhlabeni letihlobene neMbuso. Nobe kunjalo, ngemuva kwekufundza tikhatsi letinyenti nangekuzindla ngelusito lwemthantazo, sitfole kutsi indlela lesicondza ngayo emavi aJesu lamayelana nesisebenti lesetsembekile nalesihlakaniphile, kudzingeka siyicacise. (Taga 4:18) Ase sihlole lomfanekiso siphindze sibone kutsi usitsintsa njani ngisho nobe sinelitsemba lekuphila ezulwini nome emhlabeni.
UTAWUGCWALISEKA NINI LOMFANEKISO?
4-6. Yini lengase isente siphetse ngekutsi umfanekiso waJesu wesisebenti lesetsembekile wacala kugcwaliseka kuphela ngemuva kwa-1914?
4 Leminye imibhalo ikhombisa kutsi lomfanekiso wesisebenti lesetsembekile nalesihlakaniphile awuzange ugcwaliseke ngeliPhentekhoste la-33 C.E., kodvwa ugcwaliseka kulamalanga ekugcina. Ase sibone kutsi lemiBhalo isenta njani sifike kuleso siphetfo.
5 Lomfanekiso wesisebenti lesetsembekile uyincenye yesiphrofetho saJesu lesimayelana netimphawu ‘letikhombisa kutsi sesikhatsi sekubuya kwakhe nekutsi sekuphela kwetikhatsi.’ (Mat. 24:3) Incenye yekucala yalesiphrofetho lebhalwe kuMatewu 24:4-22, igcwaliseka kabili—kwekucala, yagcwaliseka eminyakeni leyendlulile kusukela nga-33 C.E. kuya ku-70 C.E., kantsi kwesibili, igcwaliseka ngelizinga lelikhulu esikhatsini setfu. Loku kusho kutsi emavi aJesu lamayelana nesisebenti lesetsembekile nawo atawugcwaliseka ngetindlela letimbili yini? Cha.
6 Acala ngemavi labhalwe kuMatewu 24:29, Jesu wakhuluma ngalokuyinhloko ngaloko lokutawenteka esikhatsini setfu. (Fundza Matewu 24:30, 42, 44.) Nakakhuluma ngaloko lokutawenteka ngesikhatsi sekuhlupheka lokukhulu, watsi bantfu ‘batawubona iNdvodzana yeMuntfu ita ngemafu elizulu.’ Ngako-ke, emavini lawacondzise kulabo labaphila ngemalanga ekugcina, wecwayisa watsi: “Anilati lilanga iNkhosi yenu leyawubuya ngalo” futsi “iNdvodzana yeMuntfu iyawufika ngesikhatsi leningakasibheki.”a Kulamavesi—nakakhuluma ngaloko lokutawenteka ngemalanga ekugcina—Jesu washo umfanekiso wesisebenti lesetsembekile. Ngako-ke, singase siphetse ngekutsi emavi akhe lamayelana nesisebenti lesetsembekile acala kugcwaliseka kuphela ngemuva kwekucala kwemalanga ekugcina nga-1914. Kuphetsa ngalamavi kunengcondvo. Kungani kunjalo?
7. Ngumuphi umbuto lobalulekile lowavela nakucala sikhatsi sekuvuna, futsi kungani?
7 Ase ucabange ngalombuto lotsi: “Ngubani losisebenti lesetsembekile nalesihlakaniphile?” Ngelikhulu lekucala leminyaka, bekunesizatfu lesivakalako sekutsi kubutwe lombuto. Njengobe sibonile esihlokweni lesendlulile, baphostoli bebangakhona kwenta timangaliso baphindze bendlulisele tipho ngendlela lemangalisako lebekukhombisa kutsi basitwa nguNkulunkulu. (Imis. 5:12) Ngako yini leyenta umuntfu abute kutsi ngubani lobekwe nguKhristu kute acondzise? Nga-1914, simo sasehluke kakhulu. Sikhatsi sekuvuna sacala ngalowo mnyaka. Sasesifikile sikhatsi sekutsi kukhishwe lukhula emkhatsini wemabele. (Mat. 13:36-43) Njengobe sikhatsi sekuvuna besesicalile, kwavela umbuto lobalulekile: Njengobe bewamanyenti emaKhristu emanga labetibita ngekutsi abalandzeli baJesu beliciniso, emabele—lamelelwa ngemaKhristu lagcotjiwe—abetawubonakala njani? Lomfanekiso wesisebenti lesetsembekile uyawuphendvula lombuto. Kwakuyoba balandzeli baKhristu labagcotjiwe labondliwa kahle.
NGUBANI LOSISEBENTI LESETSEMBEKILE NALESIHLAKANIPHILE?
8. Yini leyenta kufaneleke kutsi sisebenti lesetsembekile sakhiwe ngemaKhristu lagcotjiwe?
8 Sisebenti lesetsembekile kufanele sakhiwe ngemaKhristu lagcotjiwe lasemhlabeni. LamaKhristu abitwa ngekutsi ‘baphristi bebukhosi’ futsi anikwe umyalo wekutsi ‘amemetele imisebenti lemihle yaNkulunkulu. Nguye lowawabita kutsi aphume ebumnyameni angene ekukhanyeni kwakhe lokumangalisako.’ (1 Phet. 2:9) Ngako kuyafaneleka kutsi emalunga ‘alabaphristi bebukhosi’ abe nencenye ekufundziseni emakholwa lakanye nawo liciniso.—Mal. 2:7; Semb. 12:17.
9. Onkhe emaKhristu lagcotjiwe lasemhlabeni akha sisebenti lesetsembekile yini? Chaza.
9 Onkhe emaKhristu lagcotjiwe lasemhlabeni akha sisebenti lesetsembekile yini? Cha, akunjalo. Liciniso likutsi akusibo bonkhe labagcotjiwe labanencenye ekwabeleni lamanye emakholwa lasemhlabeni wonkhe kudla kwakamoya. Emkhatsini wemabele kunebazalwane labagcotjiwe lokungenteka batinceku letisebentako nobe labadzala bemabandla lasendzaweni yakubo. Bafundzisa emtini ngemuti nasemabandleni abo, futsi ngekwetsembeka basekela sicondziso lesivela endlunkhulu. Kodvwa bete incenye ekwabeni emaciniso laya kubazalwane labasemhlabeni wonkhe. Emkhatsini walabagcotjiwe kuphindze kube nabodzadze labangeke betame kufundzisa libandla.—1 Khor. 11:3; 14:34.
10. Ngubani losisebenti lesetsembekile nalesihlakaniphile?
10 Singubani-ke, sisebenti lesetsembekile nalesihlakaniphile? Ngekuvumelana nendlela yaJesu yekondla labanyenti ngetandla letimbalwa, lesisebenti sakhiwa licembu lelincane lebazalwane labagcotjiwe labanencenye ekulungiseni nasekwabeni kudla kwakamoya ngesikhatsi sekuba khona kwaKhristu. Kuwo onkhe lamalanga ekugcina, labazalwane labagcotjiwe labakha sisebenti lesetsembekile bebasolo basebenta ndzawonye endlunkhulu. Emashumini eminyaka kamuva, lesisebenti sichazwe ngekutsi Sigungu Lesibusako SaboFakazi BaJehova. Nobe kunjalo, caphela kutsi leligama lelitsi ‘sisebenti’ lelisemfanekisweni waJesu lisebunyeni, lokukhombisa kutsi lesisebenti sakhiwa licembu lebantfu. Sigungu Lesibusako sitsatsa tincumo njengelicembu.
BOBANI BENDLU?
11, 12. (a) Ngumiphi imisebenti lemibili lenikwa sisebenti lesetsembekile nalesihlakaniphile? (b) Jesu wasikhetsa nini sisebenti lesetsembekile kutsi sibe etikwebendlu, futsi wakhetsa bobani?
11 Emfanekisweni waJesu sitfola kutsi sisebenti lesetsembekile nalesihlakaniphile, siniketwa imisebenti lemibili leyehlukene. Wekucala sibekwa etikwebendlu; wesibili sibekwa ngetulu kwako konkhe lokukwenkhosi. Njengobe lomfanekiso ugcwaliseka kuphela kulesikhatsi sekuphela, lokukhetfwa lokubili kutawenteka nasekucale kubusa Jesu ngemuva kwa-1914.
12 Jesu wasibeka nini lesisebenti lesetsembekile etikwebendlu yakhe? Kute siphendvule lombuto kudzingeka sibuyele emuva ku-1914—nakucala sikhatsi sekuvuna. Njengobe sifundzile ekucaleni, ngaleso sikhatsi emacembu lamanyenti abetibita ngekutsi angemaKhristu. Jesu abetawusikhetsa kuliphi licembu lesisebenti lesetsembekile kute asibeke? Lombuto waphendvulwa ngemuva kwekutsi yena neYise bete kutewuhlola lithempeli nobe emalungiselelo lahlobene nekukhonta, kusukela nga-1914 kuye encenyeni yekucala ya-1919.b (Mal. 3:1) Bajabula kakhulu ngelicembu lelincane leBafundzi beliBhayibheli labetsembekile labebakhombisa kutsi batsandza Jehova neliVi lakhe. Kuliciniso kutsi bebadzinga kuhlantwa, kodvwa ngekutfobeka bakwemukela loko ngesikhatsi bahlolwa sikhashana baphindze bahlantwa. (Mal. 3:2-4) LaBafundzi beliBhayibheli bebangemaKhristu eliciniso lafanana nemabele. Nga-1919, ngesikhatsi kuvusetelwa kabusha kukhonta kweliciniso, Jesu wakhetsa bazalwane labagcotjiwe labafanelekako emkhatsini wabo kuze babe sisebenti lesetsembekile nalesihlakaniphile wasibeka etikwebendlu.
13. Bobani labayincenye yebendlu, futsi kungani kunjalo?
13 Bobani-ke bendlu? Kalula nje ngulabo labondliwako. Ekucaleni kwemalanga ekugcina, bendlu bekungiwo onkhe emaKhristu lagcotjiwe. Ngemuva kwesikhatsi, bendlu bahlanganisa sicumbi lesikhulu saletinye timvu. Nyalo letinye timvu takha ‘umhlambi munye’ ngephansi kwekubusa kwaKhristu. (Joh. 10:16) Omabili lamacembu ayazuza kulokudla kwakamoya lokufika ngesikhatsi lokukhishwa sisebenti lesetsembekile. Kutsiwani-ke ngemalunga eSigungu Lesibusako lamuhla lakha sisebenti lesetsembekile nalesihlakaniphile? Nabo labazalwane bayakudzinga kondliwa ngakamoya. Ngako-ke, ngekutfobeka bayacondza kutsi ngamunye wabo ungulomunye webendlu njengabo bonkhe balandzeli baJesu.
Ngisho nobe sinelitsemba lekuphila ezulwini nobe emhlabeni, sonkhe sibendlu futsi sidzinga kudla kwakamoya lokufanako lokufika ngesikhatsi
14. (a) Sisebenti lesetsembekile siniketwe muphi umsebenti, futsi uhlanganisani? (b) Ngusiphi secwayiso Jesu lasinika sisebenti lesetsembekile nalesihlakaniphile? (Fundza libhokisi lelitsi “Nangabe Leso Sisebenti Lesibi . . . ”)
14 Jesu wanika sisebenti lesetsembekile nalesihlakaniphile umsebenti lomkhulu. Ngetikhatsi tekubhalwa kweliBhayibheli, sisebenti lesetsembekile besiba ngumphatsi wendlu. (Luk. 12:42) Ngako sisebenti lesetsembekile nalesihlakaniphile sinemtfwalo wekunakekela indlu yekukholwa. Loko kufaka ekhatsi kunakekela konkhe lokukwayo, umsebenti wekushumayela, luhlelo lwemihlangano lemincane nalemikhulu, kanye nekushicilelwa kwetincwadzi letisekelwe eBhayibhelini kute sitisebentise ensimini, nasitifundzela tona sisodvwa nobe sisemihlanganweni yelibandla. Bendlu betsembele kulamalungiselelo lakhishwa ngulelicembu lesisebenti.
BABEKWA NINI NGETULU KWAKO KONKHE KWENKHOSI?
15, 16. Jesu usibeka nini sisebenti lesetsembekile ngetulu kwako konkhe lanako?
15 Jesu wasibeka nini kwesibili sisebenti lesetsembekile—“ngetulu kwako konkhe lanako”? Jesu watsi: “Sibusisiwe leso sisebenti lesiyawukhandvwa yiNkhosi yaso senta njalo. Ngicinisile, ngitsi kini: Iyawusimisa ngetulu kwako konkhe lenako lenkhosi.” (Mat. 24:46, 47) Naka kutsi lokubekwa kwesibili Jesu ukwenta ngemuva kwekufika kwakhe futsi akhandze kutsi lesisebenti ‘besenta njalo,’ lokusho kutsi besikwaba ngekwetsembeka lokudla kwakamoya. Ngako-ke bekutawuba nesikhatsi lesitsite emkhatsini walokubekwa kwekucala naloku kwesibili. Kute sikucondze kahle kutsi Jesu usibeka njani futsi nini lesisebenti ngetulu kwako konkhe lanako, kufanele sati tintfo letimbili: kufika kwakhe nekutsi lokukwakhe kuhlanganisani.
16 Jesu ufika nini? Imphendvulo yalombuto iyatfolakala embhalweni. Khumbula kutsi lamavesi nakakhuluma ‘ngekuta’ kwaJesu, lelogama likhuluma ngesikhatsi latawufika ngaso kute amemetele futsi akhiphe sehlulelo ekupheleni kwalamalanga ekugcina.c (Mat. 24:30, 42, 44) Ngako-ke, ‘kubuya’ nobe ‘kuta’ kwaJesu lokukhulunywa ngako emfanekisweni wesisebenti lesetsembekile, kutawenteka ngesikhatsi sekuhlupheka lokukhulu.
17. Kuhlanganisani konkhe Jesu lanako?
17 Kuhlanganisani ‘konkhe Jesu lanako’? Jesu abengakhulumi ngaloko lokusemhlabeni kuphela nakatsi “konkhe.” Ecinisweni Jesu uneligunya leliphakeme ngisho nasezulwini. Kungako atsi: “Ngiphiwe emandla onkhe ezulwini nasemhlabeni.” (Mat. 28:18; Ef. 1:20-23) Nyalo lokukwakhe kuhlanganisa uMbuso webuMesiya lobe wakhe kusukela nga-1914 futsi latawuhlanganyela nebalandzeli bakhe labagcotjiwe.—Semb. 11:15.
18. Yini letawenta Jesu ajabule nakabeka sisebenti lesetsembekile etikwako konkhe lanako?
18 Njengobe sesihlole konkhe loku, yini lesingaphetsa nayo? Nakefika Jesu atewukhipha sehlulelo ngesikhatsi sekuhlupheka lokukhulu, utawukhandza kutsi sisebenti lesihlakaniphile besikwaba ngekwetsembeka nangesikhatsi lesifanele kudla kwakamoya. Jesu utakujabulela kusibeka kwesibili—ngetulu kwako konkhe lanako. Laba labakha sisebenti lesetsembekile batawubekwa kwesibili nabatfola umvuzo wabo wasezulwini babe babusi kanye naKhristu.
19. Sisebenti lesetsembekile sitfola umvuzo lomkhulu yini ezulwini kunaloyo lotfolwa ngibo bonkhe labagcotjiwe? Chaza.
19 Sisebenti lesetsembekile sitfola umvuzo lomkhulu yini ezulwini kunaloyo lotfolwa ngibo bonkhe labagcotjiwe? Cha, akunjalo. Umvuzo lowetsenjiswe licembu lelincane lebantfu ungahle uhlanganyelwe ngisho nangulabanye. Nasi sibonelo: Cabanga ngaloko Jesu lakusho kubaphostoli bakhe labetsembekile labangu-11 ngebusuku lobandvulela kufa kwakhe. (Fundza Lukha 22:28-30.) Jesu wetsembisa lelicembu lemadvodza kutsi litawutfola umvuzo lomuhle ngenca yekwetsembeka kwalo. Batawuba naye esihlalweni sebukhosi sembuso wakhe. Kodvwa ngemuva kweminyaka, washo kutsi bonkhe labangu-144 000 batawuhlala etihlalweni tebukhosi bahlanganyele naye ekubuseni kwakhe. (Semb. 1:1; 3:21) Ngendlela lefanako, kuMatewu 24:47 wetsembisa kutsi licembu lelincane lemadvodza—bazalwane labagcotjiwe labakha sisebenti lesetsembekile—litawubekwa ngetulu kwako konkhe lanako. Ecinisweni, bonkhe labangu-144 000 batawuhlanganyela egunyeni lakhe lekubusa lasezulwini.—Semb. 20:4, 6.
Bonkhe labangu-144 000 batawuhlanganyela naJesu ekubuseni kwakhe kwasezulwini (Fundza sigaba 19)
20. Yini leyabangela Jesu wabeka sisebenti lesetsembekile, futsi wena utimisele kwentani?
20 Ngesisebenti lesetsembekile nalesihlakaniphile, Jesu ulandzela indlela lenta ngayo ngelikhulu lekucala leminyaka—wondla bantfu labanyenti ngetandla letimbalwa. Jesu wabeka sisebenti lesetsembekile kute aciniseke kutsi balandzeli bakhe—kungaba ngulabagcotjiwe nobe baletinye timvu—batfola kudla kwakamoya ngesikhatsi lesifanele kulamalanga ekugcina. Shengatsi singatimisela kukhombisa kubonga ngekutsi sibasekele ngekwetsembeka labazalwane labagcotjiwe labakha sisebenti lesetsembekile nalesihlakaniphile.—Heb. 13:7, 17.
a Sigaba 6: ‘Kufika’ kwaKhristu (ngesiGriki, erʹkho·mai) kuhlukile kunekuba ‘khona’ kwakhe (pa·rou·siʹa). Kubakhona kwakhe lokungabonakali kucala ngaphambi kwekuta kwakhe kute akhiphe sehlulelo.
b Sigaba 12: Fundza sihloko lesitsi “Nginani Onkhe Emalanga,” lesikulomagazini, ekhasini 10-12, tigaba 5-8.
c Sigaba 16: Fundza sihloko lesitsi “Sitjele Kutsi Letintfo Tiyakwenteka Nini?” kulomagazini, emakhasini 7-8, tigaba 14-18.