Umbuto Lovela Kubafundzi . . .

Nkulunkulu Utsatsa Sive Sinye Njengalesibaluleke Kakhulu Yini Kunaletinye?

▪ Cha, akusinjalo. LiBhayibheli lisho ngalokucacile: “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye, nome angewasiphi sive.”—Imisebenti 10:34, 35.

Umbono waNkulunkulu ngalendzaba uphakeme kakhulu kunewebantfu labanesono. Bantfu labanyenti bakholelwa kutsi sive lesitsite (lokuvame kuba sabo) sincono kunaletinye. Lubandlululo lolunjalo luhambisana nekucabanga kwaCharles Darwin, lowabhala: “Kutawufika sikhatsi, . . . lapho kubonakala shengatsi tive letitfutfukile titawuticedza nya tive letingakatfutfuki, futsi titsatse indzawo yato.” Lokudzabukisako kutsi bantfu labanyenti baphatfwa kabuhlungu ngulabo labatitsatsa njengesive lesincono.

Kutibona njengesive lesincono kunaletinye kuyafaneleka yini? Cabanga ngaloku: Isayensi ikufakazele yini kutsi letinye tive tinetakhi telufuto letincono, kantsi letinye tisezingeni leliphansi? Ngalokwehlukile kuloko, Bryan Sykes, longuphrofesa wetakhi telufuto wase-Oxford watsi: “Takhi telufuto tiyafanana. Ngako kute bufakazi lobusekela kwehlukana ngekwebuve. . . . Bantfu bahlale bangibuta kutsi kute yini i-DNA yemaGriki nobe sakhi selufuto semaTaliyane, kodvwa-ke ecinisweni kute intfo lenjalo. . . . Sonkhe siyafanana.”

Lamaciniso latfolwe bososayensi ayavumelana naloko lesikufundza emiBhalweni. LiBhayibheli lifundzisa kutsi Nkulunkulu wadala indvodza yinye nemfati munye, futsi bonkhe bantfu bavela kubo. (Genesisi 3:20; Imisebenti 17:26) Ngako-ke, kuNkulunkulu bonkhe bantfu bayafanana.

Kutsi umuntfu unelibala lelinjani lesikhumba nobe kutsi ubukeka njani akusho lutfo kuJehova. Kunaloko yena unaka intfo lebaluleke kakhulu—lokuyinhlitiyo yetfu, nobe loko lesingiko ngekhatsi. Utsi: “Umuntfu ubuka lingaphandle lemuntfu, kodvwa Simakadze ubuka inhlitiyo.” (1 Samuweli 16:7) Kuhlale sikukhumbula loku kungasikhutsata kakhulu. Kanjani?

Ngisho nobe sibasiphi sive, linyenti letfu alitijabuleli tici letitsite tendlela lesibukeka ngayo, kodvwa siyati kutsi site emandla ekukushintja loko. Nanobe kunjalo, singakwati kushintja tintfo letibaluleke kakhulu—imicabango kanye nemiva yetfu. (Kholose 3:9-11) Nasitihlola, singabona kutsi sinawo umkhuba wekutibona sincono, nobe sibancane kunebantfu balesinye sive. Njengobe kucabanga lokunjena kungavumelani nekucabanga kwaNkulunkulu, kufanele silwe kamatima kute sikususe etinhlitiyweni tetfu.—Tihlabelelo 139:23, 24.

Njengobe setama kutibona ngendlela Jehova lasibona ngayo futsi sibe nembono wakhe ngalabanye, singaciniseka kutsi utawusisita. LiVi lakhe liyasikhumbuta: “Emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.” (2 Tikhronike 16:9) Loko kuliciniso ngisho nobe singebasiphi sive.