Kungani Kufanele Ufundze LiBhayibheli?
Uletayele yini liBhayibheli? Kute lenye incwadzi emlandvweni lesakatwe njengalo. Bantfu bato tonkhe tinhlanga balikhandza liyincwadzi leniketa indvudvuto, litsemba, kanye neteluleko letilusito ekuphileni. Nobe kunjalo, labanye banelwati loluncane kakhulu ngeliBhayibheli. Nobe ngabe uyakholwa nobe awukholwa, mhlawumbe unesifiso sekwati lokutsite ngalo. Lencwajana yentelwe kukuniketa umlandvo lomfishane ngeliBhayibheli.
NGEMBI kwekuba ucale kufundza liBhayibheli, kungaba lusito kwati indlela lelihlelwe ngayo. LiBhayibheli lihlelwe laba tincwadzi letingu-66, leticala kuGenesisi tiye kuSembulo, futsi latiwa ngekutsi yimiBhalo lengcwele.
Loko lokubhalwe eBhayibhelini, kusuka kubani? Ngumbuto lobalulekile lowo. Kuyavunywa kutsi labhalwa ngemadvodza langu-40 esikhatsini lesiminyaka lengaba ngu-1 600, kepha lawo madvodza akazange atsi loko lakubhala kwakusuka kuwo. Lomunye wawo watsi: “Yonkhe imiBhalo iphefumulelwe nguNkulunkulu.” (2 Thimothi 3:16) Lomunye wawo futsi watsi: ‘Umoya [“waJehova,” NW] wakhuluma ngami. Livi lakhe labaselulwimini lwami.’ (2 Samuweli 23:2) Lababhali batikhulumela kutsi loko lokuseBhayibhelini kuvela kuJehova Nkulunkulu, longuMbusi wendzawo yonkhe. Lababhali baveta nekutsi Nkulunkulu ufuna simati.
Kukhona lokunye lokubalulekile lokufanele sikwati kute sicondze liBhayibheli. ImiBhalo seyiyonkhe ikhuluma ngentfo yinye: kulwelwa kwelilungelo laNkulunkulu lekubusa bantfu ngeMbuso wakhe losezulwini. Emakhasini lalandzelako alencwajana, utawutfola indlela lendzaba letfolakala ngayo kuto tonkhe tincenye teliBhayibheli kusukela kuGenesisi kuye kuSembulo.
Unaloku engcondvweni, ase ucabange ngemlayeto lotfolakala kulencwadzi lesakatwe kakhulu, liBhayibheli.
a Kunetindlela letehlukehlukene tekubhala iminyaka. Kulencwajana, C.E. usho kutsi “Ngemuva Kwekufika KwaJesu” kantsi B.C.E. usho kutsi “Ngembi Kwekufika KwaJesu.” Ekugcineni kwemakhasi utakubona loku kuvetiwe.