Nkulunkulu Ukumema Kutsi Ube Ngumngani Wakhe

Nkulunkulu ufuna kutsi ube ngumngani wakhe. Wake wacabanga yini kutsi ungake ube ngumngani weMuntfu lomkhulu kunabo bonkhe endzaweni yonkhe? Abrahama lowaphila endvulo, wabitwa ngekutsi ngumngani waNkulunkulu. (Jakobe 2:23) Kunalabanye lokukhulunywa ngabo eBhayibhelini lababa nebungani naNkulunkulu futsi babusiswa kakhulu. Lamuhla, bantfu labasuka kuto tonkhe tincenye temhlaba nabo babe bangani baNkulunkulu. Nawe ungaba ngumngani waNkulunkulu.

Kuba ngumngani waNkulunkulu kuncono kunekuba ngumngani wanoma ngabe ngumuphi lomunye umuntfu. Nkulunkulu akabadvumati bangani bakhe labatsembekile. (Tihlabelelo 18:25) Kuba ngumngani waNkulunkulu kuncono kunekuba nemcebo. Lapho umuntfu lonjingile afa, imali yakhe iya kulabanye bantfu. Kepha labo lababangani baNkulunkulu banemcebo longeke utsatfwe ngumuntfu.—Matewu 6:19.

Labanye bantfu bangase betame kukuyekelisa kufundza ngaNkulunkulu. Ngisho nebangani bakho nebemndeni wakho bangakwenta loku. (Matewu 10:36, 37) Nangabe labanye bakuhleka nome bakwesabisa, tibute, ‘Ngubani lengifuna kumjabulisa—bantfu nome nguNkulunkulu?’ Cabanga ngaloku: Nangabe umuntfu lotsite atsi yekela kudla, bewungamlalela yini? Empeleni angeke! Uyakudzinga kudla kuze uphile. Nkulunkulu yena angakwenta kutsi uphile phakadze! Ngako-ke, ungavumeli muntfu akuyekelise kufundza indlela yekuba ngumngani waNkulunkulu.—Johane 17:3.