Tsatsa Sibonelo Sebaphrofethi—Hoseya
1. Ngumuphi umbuto lokungenteka uke watibuta wona?
1 ‘Ngukuphi kutidzela lengitimisele kukwentela Jehova?’ Kungenteka kutsi uke watibuta lombuto nawuzindla ngemusa nangesihe sakhe lesikhulu. (Hla. 103:2-4; 116:12) Hoseya ngekutitsandzela wenta loko Jehova labekamyale kutsi akwente nanobe kwakudzinga kutidzela. Singamlingisa njani Hoseya?
2. Singasilingisa njani sibonelo lesihle saHoseya sekuphikelela emsebentini wekushumayela?
2 Shumayela Ngetikhatsi Letimatima: Umlayeto waHoseya wawucondziswe ngalokuyinhloko embusweni wetive letilishumi taka-Israyeli, njengobe kwakubonakala shengatsi sekuphelile kukhonta kweliciniso. INkhosi Jerobowamu II yenta lokubi emehlweni aJehova futsi yachubeka yakhutsata kukhontwa kwelitfole lokwacala nguJerobowamu I. (2 Khos. 14:23, 24) Emakhosi lalandzela achubeka nekusekela kucedza kukhonta kweliciniso embusweni wetive letilishumi kwaze kwaba ngulapho ubhujiswa nga-740 B.C.E. Nanobe kukhonta kwemanga kwakuchubeka, ngekwetsembeka Hoseya waba ngumphrofethi cishe iminyaka lengu-59. Sitimisele yini natsi kumlingisa ngekutsi sishumayele umnyaka ngemnyaka ngisho nobe bantfu bangasinaki nobe basiphikisa?—2 Thim. 4:2.
3. Kuphila kwaHoseya kuwufanekisela njani umusa waJehova?
3 Yetsemba Umusa WaJehova: Jehova watjela Hoseya kutsi ‘atsatse umfati loyingwadla.’ (Hos. 1:2) Nanobe Gomeri, umfati wakhe amtalela indvodzana, kungenteka kutsi ngekuhamba kwesikhatsi watala bantfwana lababili kulenye indvodza. Sifiso saHoseya sekucolela umkakhe sasifanekisela umusa lomkhulu waJehova labewukhombisa ema-Israyeli langalaleli nawaphendvuka. (Hos. 3:1; Rom. 9:22-26) Sitimisele yini kubekela eceleni tintfo lesititsandzako kute sisite lonkhe luhlobo lwebantfu lwati ngemusa waJehova?—1 Khor. 9:19-23.
4. Ngukuphi kutidzela lesingahle sikwentele Jehova?
4 Letinye tinceku taJehova tidzele imisebenti leholela kahle kute tisebentise sikhatsi lesinyenti emsebentini waNkulunkulu. Labanye bakhetse kungashadi nobe kungabi nebantfwana kute bente imisebenti yeMbuso. Nasizindla ngekuphila kwaHoseya singase sicabange sitsi: ‘Bengingeke mine ngikwente loku lakwenta.’ Nome kunjalo, njengobe kukhula kubonga kwetfu Jehova ngemusa wakhe futsi setsembele nasemoyeni wakhe longcwele kute sitfole emandla, kungenteka kutsi asisebentise ngendlela lesingakaze siyicabange njengaHoseya.—Mat. 19:26; Fil. 2:13.