Nguloku Yini Nkulunkulu Labekuhlosile?

FUNDZA nobe ngabe nguliphi liphepha. Bukela ithelevishini nobe ulalele umsakato. Kunetindzaba letinyenti tebugebengu, timphi kanye nebuphekula! Ase ucabange ngetakho tinhlupheko. Mhlawumbe kugula nobe kufa kwalotsite lomtsandzako kuye kwakubangela buhlungu lobukhulu. Ungahle utive njengendvodza lelungile lenguJobe leyatsi “kuhlupheka kwami kuyangicwilisa.”​—Jobe 10:15.

Ase utibute:

• Nguloku yini Nkulunkulu abekuhlosile ngami nangabo bonkhe bantfu?

• Ngingalutfolaphi lusito lwekucatulula tinkinga tami?

• Likhona yini litsemba lekutsi siyoke sibe nako kuthula emhlabeni?

LiBhayibheli lisinika timphendvulo letenetisako temibuto yetfu.

LIBHAYIBHELI LIFUNDZISA KUTSI NKULUNKULU UTAWULETSA NATI TINGUCUKO EMHLABENI.

• “Uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu.”​—Sembulo 21:4

• “Labachutako bayawusuka emagonso njengenyamatane.”​—Isaya 35:6

• “Emehlo etimphumphutse ayawuvuleka.”​—Isaya 35:5

• ‘Bonkhe bantfu labasemathuneni . . . bayawuvuka.’​—Johane 5:28, 29

• “Kute lohlala [khona] loyakutsi: ‘Ngiyagula.’”​—Isaya 33:24

• “Shangatsi kungaba nenala emasimini.”​—Tihlabelelo 72:16

ZUZA KULOKO LOKUFUNDZISWA LIBHAYIBHELI

Ungasheshi utsi loko lokushiwo emakhasini lendlulile angeke kwenteke. Nkulunkulu wetsembise kutsi utawutenta tonkhe letintfo futsi liBhayibheli liyachaza kutsi utawutenta njani.

Kepha liBhayibheli lenta lokungetulu kwaloko. Liniketa sicondziso ngendlela lesingaphila ngayo imphilo lejabulisako ngisho kwanyalo. Cabanga ngetinkhatsato takho. Tingase tihlanganise tindzaba tetimali, tinkinga temndeni, kugula, nobe kushonelwa ngulomtsandzako. LiBhayibheli lingakusita kute ukwati kusingatsa tinkinga takho, futsi lingakusita kute ukwati kuphendvula imibuto lenjengalena:

• Kungani sihlupheka?

• Singamelana njani ngemphumelelo netinkhatsato tekuphila?

• Singakwenta njani kuphila kwemindeni yetfu kujabulise?

• Kwentekani kitsi nasifa?

• Sitawuphindze sibabone yini lesibatsandzako labafile?

• Singaciniseka njani kutsi Nkulunkulu utatifeza tetsembiso takhe telikusasa?

Kufundza kwakho lencwadzi kubonisa kutsi ungatsandza kwati kutsi liBhayibheli lifundzisani. Lencwadzi itakusita. Naka kutsi ekugcineni kwelikhasi kunemibuto lehambisana netigaba. Tinkhulungwane tebantfu tiyakujabulela kusebentisa imibuto netimphendvulo naticoca ngeliBhayibheli naboFakazi BaJehova. Setsemba kutsi nawe utakujabulela. Shengatsi Nkulunkulu angakubusisa njengobe ujabulela sikhatsi lesimnandzi sekufundza ngaloko mbamba lokufundziswa liBhayibheli!