Ngutiphi Tindzaba Letimnandzi Letimayelana Nenkholo?

1. Tonkhe tinkholo tiyemukeleka yini?

Kuto tonkhe tinkholo bakhona bantfu labakahle. Kutindzaba letimnandzi kutsi Nkulunkulu uyababona labo bantfu futsi uyabakhatsalela. Kodvwa kuvisa buhlungu kutsi inkholo isetjentiswe kabi. (2 Khor. 4:3, 4; 11:13-15) Lomunye umbiko wetindzaba uveta kutsi letinye tinkholo tihlanganyela ebuphekuleni, ekubulaweni kwetive, etimphini, nasekuhlukunyetweni kwebantfwana. Loko kubavisa buhlungu lobukhulu bantfu labakholwa ngebucotfo kuNkulunkulu!​—Fundza Matewu 24:3-5, 11, 12.

Njengobe inkholo yeliciniso ikhatimulisa Nkulunkulu, inkholo yemanga yenta tintfo letingamjabulisi. Ifundzisa tintfo letingekho eBhayibhelini, lokutimfundziso letifaka ekhatsi emanga lamayelana naNkulunkulu kanye nangalabafile. Kodvwa Jehova ufuna kutsi bantfu bati liciniso ngaye.​—Fundza Umshumayeli 9:5, 10; 1 Thimothi 2:3-5.

2. Ngutiphi tindzaba letimnandzi letimayelana nenkholo?

Kuyajabulisa kwati kutsi Nkulunkulu akayengwa tinkholo letitsi tiyamtsandza kodvwa tibe titsandza live laSathane. (Jakobe 4:4) Nalikhuluma ngato tonkhe tinkholo temanga, LiVi laNkulunkulu litsi ‘tiyiBhabhulona leNkhulu.’ IBhabhulona bekungumuti wasendvulo wangemuva kwaZamcolo ngesikhatsi saNowa, lokwacala kuwo inkholo yemanga. Madvutane, Nkulunkulu utaticedza ngekushesha tonkhe tinkholo letidukisa futsi leticindzetela bantfu.​—Fundza Sembulo 17:1, 2, 5, 16, 17; 18:8.

Kodvwa kunetindzaba letimnandzi letengetiwe, ngobe Jehova akakabakhohlwa bantfu labacotfo labasetinkholweni temanga letigcwele kuwo wonkhe umhlaba. Kunaloko, uyabahlanganisa ngekutsi abafundzise liciniso.​—Fundza Mikha 4:2, 5.

3. Bantfu labacotfo kufanele benteni?

Jehova uyabakhatsalela bantfu labalitsandzako liciniso kanye nebuhle. Ubayala kutsi bashiye inkholo yemanga. Bantfu labamtsandzako Nkulunkulu batimisele kwenta lushintjo lolunjalo kute bamjabulise.​—Fundza Sembulo 18:4.

Elikhulwini lekucala leminyaka, ngesikhatsi bantfu beva baphostoli bakhuluma ngetindzaba letimnandzi teMbuso, basabela ngekujabula. Bafundza indlela lensha yekuphila kuJehova, lokuyindlela lejabulisako futsi lenenjongo kanye nelitsemba. Basibonelo lesihle kitsi lamuhla ngobe batemukela letindzaba letimnandzi, futsi babeka Jehova endzaweni yekucala ekuphileni kwabo.​—Fundza 1 Thesalonika 1:8, 9; 2:13.

Jehova uyabemukela njengetikhonti takhe labo labayishiyako inkholo yemanga. Nangabe usemukela simemo saJehova semusa, utawuba ngumngani wakhe, utawutfola umndeni lomusha nalonelutsandvo wetikhonti takhe, futsi utawutfola nekuphila lokuphakadze.​—Fundza Makho 10:29, 30; 2 Khorinte 6:17, 18.

4. Nkulunkulu utayiletsa njani injabulo kuyo yonkhe indzawo?

Kutindzaba letimnandzi kwati kutsi inkholo yemanga itawehlulelwa. Loku kutawusho kukhululwa kwebantfu ekucindzetelekeni. Inkholo yemanga angeke iphindze idukise futsi yehlukanise bantfu. Wonkhe umuntfu lophilako uyawuhlanganyela ekukhonteni Nkulunkulu weliciniso.​—Fundza Sembulo 18:20, 21; 21:3, 4.