lelikhulu leyendlulile, lomagazini bewusolo uniketa bantfu labawufundzako lwati lolumayelana netintfo letenteka emhlabeni kuze ubasite batibonele bona kutsi kuphela sekuyasondzela. Kuliciniso kutsi labanye bantfu abavumelani naloko, batsi emaciniso latsite lavetwako kanye netinombolo talokwentekile tiya ngembono wemuntfu futsi tingashintjwa ngunobe ngubani. Baphindze batsi timo talelive tibonakala ngatsi tiba timbi kakhulu ngobe tekuchumana tichubeka titfutfuka emhlabeni wonkhe. Nanobe kunjalo, kuchubeka kutfolakala bufakazi bekutsi sisekupheleni kwesikhatsi lesingakavami emlandvweni wekuphila kwebantfu.

Letinye tati ticabanga kutsi kunetingucuko letinkhulu letitakwenteka emhlabeni. Nasi sibonelo: Nga-2014, labanye bososayensi becwayisa i-United Nations Security Council mayelana netingoti letinkhulu letisongela kuphila kwebantfu. Labososayensi batsi: “Lucwaningo lolwentiwe ngekucophelela lolumayelana naletingoti lusenta siphetse ngekutsi kunelizinga lelisetulu lenhlekelele lengabangelwa kutfutfuka lokukhona kutebuchwephesha.” Bantfu labanyenti sebayaciniseka kutsi sesisesikhatsini lesibucayi emlandvweni wekuphila. Bashicileli balomagazini kanye nebantfu labanyenti labawufundzako abangabati kutsi lesikhatsi lesingakavami vele singemalanga ekugcina futsi kuphela sekusedvute. Kunekutsi ukhatsateke ngelikusasa, ungajabula ngaloko lokutakwenteka. Yini lengakwenta ujabule? Kutsi ungasindza nakufika kuphela!

LiBhayibheli lisitjela kutsi kuphela kufaka ekhatsi kubhujiswa, nalitsi: “Kutawuba nekuhlupheka lokukhulu lokungazange sekwenteke kusukela kwaba khona umhlaba . . . Ngako-ke, ngaphandle kwekutsi lawo malanga afinyetwe, kute umuntfu labengasindza.” (Matewu 24:21, 22) Kodvwa Nkulunkulu usetsembisa kutsi bantfu labanyenti batawusindza, nakatsi: “Live liyendlula . . . , kodvwa loyo lowenta intsandvo yaNkulunkulu uhlala kuze kube phakadze.”​—1 Johane 2:17.

Nangabe ufuna kusindza kulelive lelendlulako futsi ‘uhlale kuze kube phakadze,’ yini lokufanele uyente? Kufanele ucale ucongelele tintfo lotidzingako kute uphile yini nobe wente lamanye nje emalungiselelo? Cha. LiBhayibheli lisikhutsata kakhulu kutsi sente lokwehlukile kuloko. Naku lesikufundzako: “Njengobe tonkhe letintfo titawuncibilika ngalendlela, cabangani kutsi kufanele nibe luhlobo luni lwebantfu ngekutiphatsa lokungcwele nangetento tekutinikela kuNkulunkulu, nibe nilindzile futsi nihlale nikhumbula kuba khona kwelilanga laJehova.” (2 Phetro 3:10-12) Ingcikitsi yalelivesi ikhombisa kutsi “tonkhe letintfo” letitawuncibilika tifaka ekhatsi kubusa kwalelive lelikhohlakele kanye nalabo labasekela loko kubusa kunekutsi basekele kubusa kwaNkulunkulu. Kusebaleni kutsi kucongelela tintfo lesitidzingako ngeke kusisindzise nasekubhujiswa lelive.

Ngako kusindza kwetfu kutawuya ngekutsi sitinikele yini kuJehova Nkulunkulu futsi sifundze ngendlela lafuna sitiphatse kanye naloko lokumjabulisako. (Zefaniya 2:3) Kunekutsi silandzele linyenti bese siyakhohlwa ngetibonakaliso leticacile letisikhombisa kutsi siphila esikhatsini lesibalulekile, kufanele ‘sihlale sikhumbula kuba khona kwelilanga laJehova.’ BoFakazi BaJehova bangakukhombisa eBhayibhelini kutsi yini longayenta kute usindze kulelilanga lelitako.