Timiso Tembuso​—Kufuna Kulunga KwaNkulunkulu

NJENGOBE wendlula, uphakamisela makhelwane wakho sandla. Kulamalanga uyabona kutsi abesolo akunaka wena nemndeni wakho. Njengobe umphakamisela sandla naye uyasiphakamisa, bese akubita. Ngemuva kwaloko utsi: “Ngisacela kukubuta umbuto? Yini lenenta nehluke kangaka?” Nawe ubese uyambuta utsi: “Usho kutsini?” Uyaphendvula atsi: “Angitsi nine niBoFakazi BaJehova? Phela anifanani nalabanye bantfu. Nehlukile kuletinye tinkholo​—aniwagubhi emaholide, futsi anihlanganyeli etindzabeni tepolitiki nasetimphini. Kute namunye kini lobhemako. Nemndeni wakho unetimiso letiphakeme tekutiphatsa. Yini lenenta nehluke kangaka?”

Wena uyayati imphendvulo yalombuto kutsi itsi: Siphila ngephansi kwekubusa kweMbuso waNkulunkulu. Njengobe ayiNkhosi, Jesu uhlala asicenga. Usisita kutsi sihambe etinyatselweni takhe, nekutsi sehluke kulelive lelibi. Kulencenye sitawubona indlela uMbuso waNkulunkulu Lobuswa NguMesiya lobucenga ngayo buhlobo bantfu labanabo naNkulunkulu, nendlela loMbuso lokucenga ngayo kutiphatsa kwabo kanye nenhlangano yabo​—konkhe loku ukwentela kukhatimulisa Jehova.