Tetsembiso Tembuso​—Kwenta Tonkhe Tintfo Tibe Tinsha

UKHA lihhabhula lelikhulu lelivutsiwe esihlahleni. Uhogela liphunga lalo lelimnandzi ngembikwekutsi ulifake esikhwameni lesesinalamanye. Sekuphele sikhatsi lesidze usebenta, kodvwa utiva solo ungakadzinwa futsi ukulungele kuchubeka usebenta sikhashana. Make wakho useceleni kwesihlahla lesisedvute usebenta ngenjabulo, ucoca nalamanye emalunga emndeni wakini nebangani nabo labanisitako kulomsebenti wekuvuna. Ubonakala asasemncane, ufanana nendlela labebukeka ngayo ngesikhatsi usengumntfwana eminyakeni leyendlulile. Awucabangi ngisho nekucabanga kutsi wambona sekagugile kulelive leselendlulile. Bewukhona ngesikhatsi kugula kumcindzetela, wambona ngesikhatsi aphefumula kwekugcina futsi wadzindza sililo emngcwabeni wakhe. Kodvwa nyalo sewuyaphila futsi sewungumcemane, kanye nalabanye bantfu labanyenti.

Emalanga lanjalo atawufika futsi siyaciniseka ngaloko. Siyaciniseka ngaloko ngobe tetsembiso taNkulunkulu tiyagcwaliseka. Kulencenye sitawucoca ngendlela letinye tetetsembiso taNkulunkulu letitawugcwaliseka ngayo esikhatsini lesitako lesisondzele, letitawuholela emphini i-Amagedoni. Sitawuphindze sibukete naletinye tetsembiso letimayelana neMbuso letijabulisako, letitawugcwaliseka ngemuva kwaloko. Asingabati kutsi sitakujabulela kakhulu kuphila ngesikhatsi uMbuso waNkulunkulu sewubusa wonkhe umhlaba, futsi wente tonkhe tintfo tibe tinsha.