Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

DECEMBER 4-10

UMCEBO LOSEVINI LANKULUNKULU | ZEFANIYA 1–HAGAYI 2

“Funani Jehova Lisengakefiki Lilanga Lelulaka Lwakhe”

(Zefaniya 2:2, 3) Sikhatsi lesibekiwe sisengakefiki nisengakapheshulwa njengemakhoba, lusengakehleli etikwenu lulaka lwaSimakadze lolwesabekako, lisengakefiki lilanga lelulaka lwaSimakadze etikwenu. ³ Funani Simakadze, nonkhe nine lenitfobekile belive, nine lenenta loko latsi kwenteni. Funani kulunga, nifune kutfobeka, mhlawumbe ningahle nivikeleke ngelilanga lentfukutselo yaSimakadze.

w01 2/15 18-19 ¶5-7

Funani Jehova Lisengakefiki Lilanga Lelulaka Lwakhe

⁵ Ungase utsi: ‘Ngiyinceku yaNkulunkulu letinikele, yabhajatiswa, futsi ngingulomunye waboFakazi BaJehova. Ngikwentile konkhe lokulindzeleke kimi.’ Ecinisweni, kunyenti lokulindzelekile kunekutinikela kuJehova kuphela. Sive sema-Israyeli besitinikele, kodvwa ngemalanga aZefaniya bantfu bakaJuda bebaphila ngendlela lengakhombisi kutsi batinikele. Ngenca yaloko, lesive sagcine silahliwe. Lamuhla ‘kufuna Jehova’ kufaka ekhatsi kuba nebuhlobo lobuhle naye, sibe sitihlanganise nenhlangano yakhe lesemhlabeni. Kusho kwati indlela Nkulunkulu latibuka ngayo tintfo futsi sinake nendlela lativa ngayo. Sisuke sifuna Jehova nasilidadisha ngekucophelela liVi lakhe, sizindle ngalo bese sisebentisa seluleko salo ekuphileni kwetfu. Njengobe sifuna sicondziso saJehova ngemthantazo lojulile futsi sivumela umoya wakhe longcwele usicondzise, buhlobo betfu naye buyakhula, futsi loko kusenta simkhonte ‘ngayo yonkhe inhlitiyo yetfu, ngawo wonkhe umphefumulo wetfu, nangawo onkhe emandla etfu.’​—Dutheronomi 6:5; Galathiya 5:22-25; Filiphi 4:6, 7; Sembulo 4:11.

⁶ Kwesibili lokulindzelekile lokukuZefaniya 2:3 ‘kufuna kulunga.’ Sonkhe sente tingucuko letibalulekile kuze sikufanele kubhajatiswa sibe ngemaKhristu, kodvwa kufanele sichubeke siphila ngetimiso taJehova letilungile. Labanye labacale kahle kuloku bavumele lelive kutsi libangcolise. Akusilula kufuna kulunga, ngobe sihlala nebantfu labatsatsa kutiphatsa kabi ngelicasi, kucala emanga naletinye tono njengetintfo letingenankinga. Kodvwa sifiso lesinaso sekujabulisa Jehova singancoba noma ngukuphi kufuna kwemukelwa ngulelive ngekwetama kutifanisa nalo. Juda walahlekelwa ngumusa waJehova ngenca yekulingisa tive letibomakhelwane wakhe lebetingamhloniphi Nkulunkulu. Kunekutsi silingise lelive, ‘asilingise Nkulunkulu,’ sigcoke “buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo.”​—Efesu 4:24; 5:1.

⁷ Kwesitsatfu lokulindzelekile lokuvetwe kuZefaniya 2:3 kutsi nangabe sifuna kuvikeleka ngelilanga lentfukutselo yaJehova, kufanele ‘sifune kutfobeka.’ Lilanga ngelilanga, sihlangana nemadvodza, bafati, nalabasha labangakatfobeki. Kubo, kutfobeka kubutsakatsaka. Kutitfoba kutsatfwa njengebutsakatsaka lobukhulu. Bafuna tintfo ngenkhani, banebugovu, banamatsela emibonweni yabo, futsi bakholelwa kutsi “emalungelo” abo nalabakutsandzako kufanele kwemukelwe. Cabanga kutsi kungaba buhlungu kanjani nangabe natsi singaba nesimo sengcondvo lesinjalo! Lesi sikhatsi ‘sekufuna kutfobeka.’ Njani? Ngekutitfoba kuNkulunkulu, semukele siyalo sakhe futsi sente nentsandvo yakhe.

Funisisa Umcebo EVini LaNkulunkulu

(Zefaniya 1:8) Ngelilanga lemhlatjelo waSimakadze ngiyawujezisa tikhulu, netiphatsimandla, nabo bonkhe labo labembetse tingubo tebetive.

w07 11/15 11 ¶3

Emaphuzu Lagcamile Encwadzi YaNahume, Habakhuki, NaZefaniya

1:8. Labanye ngemalanga aZefaniya ‘bebembatsa tingubo tebetive’ ngoba bebafuna kwemukelwa tive letibomakhelwane. Kungaba bulima ngetinceku taJehova lamuhla kwetama kufana nalelive ngalendlela!

(Hagayi 2:9) ‘Inkhatimulo yalendlu lena itawuba yinkhulu kakhulu kunenkhatimulo yendlu yakucala,’ kusho Simakadze longuSomandla. ‘Futsi kulendzawo ngiyawuletsa kuthula,’ kusho Simakadze longuSomandla.”

w07 12/1 9 ¶3

Emaphuzu Lagcamile Encwadzi YaHagayi NeyaZakhariya

2:9​—Kungayiphi indlela ‘inkhatimulo yalendlu lena itawuba yinkhulu kakhulu kunenkhatimulo yendlu yakucala’? Loku bekutowenteka ngetindlela letintsatfu: linani leminyaka lithempeli lelaba khona ngayo, bantfu bebafundzisa kulo, nekutsi bobani bebaya kulo bayokhonta Jehova. Nanobe lithempeli laSolomoni lelikhatimulako laba khona iminyaka lengu-420, kusukela nga-1027 B.C.E. kuya ku-607 B.C.E., ‘lendlu lena’ yasetjentiswa iminyaka lengetulu kwa-580, kusukela nayicedvwa nga-515 B.C.E. kuze kube ngu-70 C.E. nayibhujiswa. Ngetulu kwaloko, Jesu Khristu longuMesiya wafundzisa ‘kulendlu lena,’ futsi banyenti bantfu labeta kuyo ‘kunasendlini yekucala’ kuze bakhonte Nkulunkulu.​—Imisebenti 2:1-11.

Kufundvwa KweliBhayibheli

(Hagayi 2:1-14) Ngelilanga lema-21 lenyanga yesikhombisa ngalowo mnyaka, livi laSimakadze lefika ngemphrofethi Hagayi, latsi: ² “Khuluma kuZerubhabheli, umsa waSheyaltiyeli, umbusi wakaJuda, nakuJeshuwa, umsa waJehosadaki, umPhristi Lomkhulu, nakuyo insali yesive, utsi: ³ ‘Ngubani losesele kini lowake wayibona lendlu isenenkhatimulo yayo yakucala? Seyibukeka njani kini nyalo? Kini ayisafanani nje nelite? ⁴ Kodvwa-ke nyalo cinani, wena Zerubhabheli, nawe Jeshuwa, msa waJehosadaki, umPhristi Lomkhulu. Cinani nonkhe nine bantfu balelive,’ kusho Simakadze, ‘sebentani, ngobe mine nginani,’ kusho Simakadze longuSomandla. ⁵ ‘Nguko loku lengenta ngako sivumelwane nani, mhlazane niphuma eGibhithe. Moya wami usahlala emkhatsini wenu. Ningesabi.’ ⁶ “Naku lokushiwo nguSimakadze longuSomandla, utsi: ‘Kusetakuba sikhashana lesincane futsi ngibuye ngiwanyakatise emazulu, nemhlaba, nelwandle, nelive lelomile. ⁷ Ngitawunyakatisa tonkhe tive, nako konkhe lokulangatelelwa tive tonkhe kutawufika, ngitawugcwalisa lendlu ngenkhatimulo,’ kusho Simakadze longuSomandla. ⁸ ‘Isiliva yami, negolide ngeyami,’ kusho Simakadze longuSomandla. ⁹ ‘Inkhatimulo yalendlu lena itawuba yinkhulu kakhulu kunenkhatimulo yendlu yakucala,’ kusho Simakadze longuSomandla. ‘Futsi kulendzawo ngiyawuletsa kuthula,’ kusho Simakadze longuSomandla.” ¹⁰ Ngelilanga lema-24 lenyanga yemfica, ngemnyaka wesibili wekubusa kwaDariyusi, livi laSimakadze lefika kumphrofethi Hagayi, latsi: ¹¹ “Naku lokushiwo nguSimakadze longuSomandla, utsi: ‘Buta kubaphristi kutsi umtsetfo utsini: ¹² Nangabe umuntfu aphetse inyama leyehlukaniselwe Nkulunkulu ishumphetelwe engutjeni yakhe, bese kutsi lomphetfo wakhe utsintse sinkhwa, nome sitjulo, nome liwayini, nome emafutsa, nome lokunye nje kudla, kuyaye bese kuba ngulokwehlukaniselwe Nkulunkulu yini?’” Baphristi baphendvula, batsi: “Cha.” ¹³ Hagayi wabe sewutsi: “Nangabe umuntfu etfuke wangcoliswa kutsintsana nesidvumbu, bese utsintsa lokunye kwaletintfo, kuyaye bese kuba ngulokungcolile yini ngekwemtsetfo?” Baphristi baphendvula, batsi: “Yebo, kuyaye bese kuba ngulokungcolile.” ¹⁴ Hagayi wabe sewutsi: “‘Ngako-ke banjalo nalabantfu, sinjalo nalesive lesisembikwami. Konkhe labakwentako, nako konkhe labakunikelako lapho kungcolile,’ kusho Simakadze.”

DECEMBER 11-17

UMCEBO LOSEVINI LANKULUNKULU | ZAKHARIYA 1-8

“Nkonkoshelani UmJuda Munye Ngemphetfo Wesembatfo Sakhe”

(Zakhariya 8:20-22) Naku lokushiwo nguSimakadze longuSomandla, utsi: “Tive letinyenti nalabahlala emadolobheni lamanyenti basetawuta; ²¹ labahlala kulelinye lidolobha bayakuya kulelinye batsi: ‘Asambeni ngekushesha siyewuncenga kuSimakadze, sifunisise Simakadze longuSomandla. Mine ngekwami ngiyahamba.’ ²² Tive letinyenti netive letinemandla tiyawuta eJerusalema titewufunisisa Simakadze longuSomandla, timncenge.”

w14 11/15 27 ¶14

‘Nyalo Senibantfu BaNkulunkulu’

¹⁴ Kwandza kwebantfu labanyenti labakhonta Jehova nebantfu bakhe kulesikhatsi sekuphela, kwabiketelwa baphrofethi lababili bakadzeni. Isaya waphrofetha watsi: “Bantfu labanyenti bayawufika batsi: ‘Wotani, senyukele entsabeni yaSimakadze, endlini yaNkulunkulu waJakobe. Utasifundzisa tindlela takhe, khona sitewuhamba emikhondvweni yakhe.’ Ngobe umtsetfo uyawuphuma eSiyoni, livi laSimakadze liphume eJerusalema.” (Isa. 2:2, 3) Ngendlela lefanako, umphrofethi Zakhariya wabiketela kutsi “tive letinyenti netive letinemandla tiyawuta eJerusalema titewufunisisa Simakadze longuSomandla, timncenge.” Watifanisa ‘nemadvodza lalishumi lasuka kuto tonkhe tilwimi netive,’ latawunkonkoshela umphetfo wesembatfo sa-Israyeli waNkulunkulu ngendlela lengumfanekiso, atsi: “Asihambisane nani, ngobe sivile kutsi Nkulunkulu unani.”​—Zak. 8:20-23.

(Zakhariya 8:23) Naku lokushiwo nguSimakadze longuSomandla, utsi: “Ngalawo malanga emadvodza lalishumi lasuka kuto tonkhe tilwimi netive ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.’”

w16.01 23 ¶4

“Asihambisane Nani”

⁴ Nangabe letinye timvu tingeke tiwati emabito abo bonkhe labagcotjiwe labasesemhlabeni lamuhla, pho ‘tingahambisana’ njani nabo? LiBhayibheli litsi “emadvodza lalishumi” “ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.’” Lelivesi leliBhayibheli likhuluma ngemJuda munye, kodvwa alikhulumi ngemuntfu munye nalitsi “nani” nalapho litsi “unani.” Loko kusho kutsi umJuda akasuye umuntfu munye kodvwa umelela licembu lalabagcotjiwe. Letinye timvu tiyakwati loko, futsi tikhonta Jehova tikanye nalelicembu. Atidzingi kulandzela nekwati libito lelilunga ngalinye lalelicembu. NguJesu uMholi wetfu, futsi liBhayibheli lisitjela kutsi silandzele yena kuphela.​—Matewu 23:10.

w09 2/15 27 ¶14

“Bachubeka Balandzela LiWundlu”

¹⁴ Jesu Khristu utsatsa kusekelwa kwabomnakabo njengalokwentiwa kuye. (Fundza Matewu 25:40.) Labo labanelitsemba lekuphila emhlabeni bangabasekela ngatiphi tindlela banakaboKhristu labagcotjiwe? Ngalokuyinhloko, bangabasita emsebentini wekushumayela ngeMbuso. (Mat. 24:14; Joh. 14:12) Nanobe linani lalabagcotjiwe labasemhlabeni linciphile kulamashumi eminyaka lendlulile, linani laletinye timvu liyandza. Nangabe labo labanelitsemba lekuphila emhlabeni bahlanganyela emsebentini wekufakaza, ngekutsi babe tisebenti tasikhatsi sonkhe nabangakhona, basuke basekela labagcotjiwe ekufezeni sabelo sabo sekwenta bafundzi. (Mat. 28:19, 20) Kufanele siwasebentise ematfuba ekusekela lomsebenti ngeminikelo.

Funisisa Umcebo EVini LaNkulunkulu

(Zakhariya 5:6-11) Ngabuta, ngatsi: “Kuyini?” Yangiphendvula, yatsi: “Libhasikidi lekukala.” Yaphindze yachubeka yatsi: “Loku bubi bebantfu kuwo wonkhe umhlaba.” ⁷ Kwase kutsi simbonyo salo lesasentiwe ngemtfofu saphakanyiswa: ekhatsi kwalelo bhasikidi bekuhleti umfati! ⁸ Yakhuluma yatsi: “Lobu bubi,” yabe seyimfucela ekhatsi ebhasikidini, yacindzetela lesimbonyo salo semtfofu emlonyeni walelibhasikidi, walimbonya ngaso. ⁹ Ngase ngiphakamisa emehlo ami ngabuka, ngabona embikwami kunebafati lababili bandiza emoyeni ngetimphiko tabo. Letimphiko tabo tatifanana netadvoye, base baphakamisa lelibhasikidi, laze labasemkhatsini welizulu nemhlaba. ¹⁰ Ngabuta lengilosi leyayikhuluma nami, ngatsi: “Baliyisaphi lelibhasikidi?” ¹¹ Yangiphendvula, yatsi: “Baliyisa eveni laseBhabhulona, bayakulakhela indlu khona. Itakutsi nase ilungile lendlu, bese balibeka khona lapho endzaweni yalo.”

w17.10 25 ¶18

Imibono YaZakhariya​—Isho Kutsini Kuwe?

¹⁸ Nakuba kunjalo lombono waphindze wakhumbuta emaJuda ngemsebenti lebekumele awente kuze agcine kukhonta kweliciniso kuhlantekile. Bubi angeke buvunyelwe kutsi buhlale emkhatsini webantfu baJehova. Ngemuva kwekutsi sibe senhlanganweni yaJehova lesivikelako nalesinakekelako, natsi sinemtfwalo wekutsi siyigcine ihlantekile. Asikhutsateki yini kutsi siyigcine ihlantekile “lenhlangano”? Noma nguluphi luhlobo lwebubi alwemukeleki enhlanganweni yaJehova.

(Zakhariya 6:1) Ngatsi ngiphakamisa emehlo njalo ngiyabuka, ngabona kuchamuka tincola letine, tiphuma emkhatsini wetintsaba letimbili, tintsaba telitfusi!

w17.10 27-28 ¶7-8

Tincola Kanye Nemchele Kungasivikela Njani?

⁷ EBhayibhelini, tintsaba tingamelela imibuso noma bohulumende. Letintsaba lokukhulunywa ngato embonweni waZakhariya tiyafana netintsaba letimbili letichazwa siphrofetho saDanyela. Yinye intsaba imelela lilungelo laJehova lekubusa indzawo yonkhe. Lelenye intsaba imelela uMbuso waMesiya lobuswa nguJesu. (Dan. 2:35, 45) Kusukela nga-1914 ngesikhatsi Jesu acala kubusa, totimbili letintsaba betisolo tikhona futsi tinendzima lebalulekile ekugcwalisekeni kwenjongo yaNkulunkulu ngemhlaba.

⁸ Kungani letintsaba tentiwe ngelitfusi? Njengeligolide, litfusi nalo liligugu. Jehova watsi akusetjentiswe litfusi nakwakhiwa li-altare futsi belitawuphindze lisetjentiswe nakwakhiwa lithempeli leliseJerusalema. (Eks. 27:1-3; 1 Khos. 7:13-16) Kusetjentiswa kwelitfusi kuletintsaba letimbili kusikhumbuta ngebuhle bebukhosi baJehova bendzawo yonkhe kanye neMbuso waMesiya lotawuletsela bonkhe bantfu kuthula kanye netibusiso.

Kufundvwa KweliBhayibheli

(Zakhariya 8:14-23) Naku lokushiwo nguSimakadze longuSomandla, utsi: “Njengaloku ngatimisela kwehlisela inhlekelele etikwenu ngingasagucuki ngesikhatsi bangitfukutselisa boyihlo,” kusho Simakadze longuSomandla, ¹⁵ “kanjalo-ke nyalo sengitimisele kwenta lokuhle futsi kuyo iJerusalema naJuda. Ningesabi. ¹⁶ Nati tintfo lokufanele nitente nine: Khulumani liciniso lomunye kulomunye, emasangweni enu nikhiphe sigwebo lesiliciniso nalesiveta kuthula. ¹⁷ Ningambopheli luzungu makhelwane, futsi ningabokutsandza kufungela emanga. Ngiyakwenyanya konkhe loko,” kusho Simakadze. ¹⁸ Livi laSimakadze longuSomandla laphindze lefika kimi, latsi: ¹⁹ “Naku lokushiwo nguSimakadze longuSomandla, utsi: ‘Lokuzila kudla kwenyanga yesine, neyesihlanu, neyesikhombisa, neyelishumi sekuyawuba ngemalanga enjabulo, nekutsakasa, nemadzili ekutijabulisa akaJuda. Ngako-ke litsandzeni liciniso nekuthula.’” ²⁰ Naku lokushiwo nguSimakadze longuSomandla, utsi: “Tive letinyenti nalabahlala emadolobheni lamanyenti basetawuta; ²¹ labahlala kulelinye lidolobha bayakuya kulelinye batsi: ‘Asambeni ngekushesha siyewuncenga kuSimakadze, sifunisise Simakadze longuSomandla. Mine ngekwami ngiyahamba.’ ²² Tive letinyenti netive letinemandla tiyawuta eJerusalema titewufunisisa Simakadze longuSomandla, timncenge.” ²³ Naku lokushiwo nguSimakadze longuSomandla, utsi: “Ngalawo malanga emadvodza lalishumi lasuka kuto tonkhe tilwimi netive ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.’”

DECEMBER 18-24

UMCEBO LOSEVINI LANKULUNKULU | ZAKHARIYA 9-14

“Hlala ‘Esigodzini SeNtsaba’ YaJehova”

(Zakhariya 14:3, 4) Simakadze uyawuphuma ayekulwa naleto tive, njengobe avama kulwa ngelilanga lemphi. ⁴ Ngalelo langa tinyawo takhe tiyakuma etikweNtsaba Yemincumo, ngasemphumalanga kweJerusalema, bese kutsi leNtsaba Yemincumo ichekeke ekhatsi kusukela ngasemphumalanga kuye ngasenshonalanga, kwakheke sigodzi lesikhulu, incenye yalentsaba iyawukhweshela ngasenyakatfo, kutsi incenye lenye ikhweshele ngaseningizimu.

w13 2/15 19 ¶10

Hlala Esigodzini SaJehova Lesisivikelo

¹⁰ Nakuchekeka lentsaba lengumfanekiso, incenye yayo ibe ngasenyakatfo lenye ibe ngaseningizimu, tinyawo taJehova tichubeka time kuto totimbili letintsaba. Ngaphansi kwetinyawo taJehova, kuba ‘nesigodzi lesikhulu.’ Lesigodzi lesingumfanekiso sisho sivikelo saNkulunkulu, lesenta tinceku taJehova tivikeleke ngaphansi kwekubusa kwakhe kwendzawo yonkhe neMbuso webuMesiya weNdvodzana yakhe. Jehova utawucinisekisa kutsi kukhonta kweliciniso akupheli. Kwenteka nini lokucheketwa kwalentsaba yemincumo? Kwenteka ngesikhatsi kucala kuba khona uMbuso waMesiya, ekupheleni kweTikhatsi Tebetive nga-1914. Tikhonti teliciniso tacala nini kubalekela kuleso sigodzi lesingumfanekiso?

(Zakhariya 14:5) Niyawubalekela ngasesigodzini sentsaba yami, ngobe lesigodzi siyawufikela e-Aseli. Yebo, niyawubaleka njengamhlazane nibalekela kutamatama kwemhlaba ngesikhatsi sa-Uziya, inkhosi yakaJuda. Simakadze-ke longuNkulunkulu wami uyawube sewuyefika kanye nabo bonkhe labangcwele bakhe.

w13 2/15 20 ¶13

Hlala Esigodzini SaJehova Lesisivikelo

¹³ Nasibambelela kuJehova futsi sime sicinile ecinisweni, yena neNdvodzana yakhe lenguJesu Khristu, batawudlala indzima yabo, futsi Nkulunkulu angeke avumele lutfo kutsi ‘lusihlwitse esandleni saKhe.’ (Joh. 10:28, 29) Jehova ukulungele kusiniketa nobe nguluphi lusito lesiludzingako kute sichubeke simlalela njengeMbusi Wendzawo Yonkhe futsi sihlale sitikhonti letetsembekile teMbuso waMesiya. Kubaluleke kakhulu kutsi sihlale kulesigodzi sesivikelo, ngobe kubaluleka kwaso kutawubonakala kakhulu njengobe kuhlupheka lokukhulu kusondzela masinyane.

(Zakhariya 14:6, 7) Ngalelo langa kuyawubate kukhanya, nekucandza, nesitfwatfwa. ⁷ Kuyakuba lilanga leliyincophamlandvo, leliyawubate imini nebusuku, lilanga lelatiwa nguSimakadze. Kuyawutsi nakutakuhlwa, kuvele kukhanya.

(Zakhariya 14:12) Lesi-ke sishayo Simakadze layawushaya ngaso tonkhe tive letalwa neJerusalema: Umtimba wabo uyawubola baseme ngetinyawo tabo, emehlo abo ayawubola etingojeni tawo, netilwimi tabo tiyawubola emilonyeni yabo.

(Zakhariya 14:15) Sishayo lesifanana naso siyawushaya emahhashi neminyuzi, nemakamela, netimbongolo, kanye nato tonkhe tilwane kuleto tinkambu.

w13 2/15 20 ¶15

Hlala Esigodzini SaJehova Lesisivikelo

¹⁵ Ngelilanga laNkulunkulu lemphi, sitawuba njani simo sebantfu labangephandle ‘kwesigodzi lesikhulu’ sesivikelo? “Kuyawubate kukhanya” lokuvela kuNkulunkulu kubo. Ngalelo langa lemphi, “emahhashi neminyuzi, nemakamela, netimbongolo, kanye nato tonkhe tilwane kuleto tinkambu”​—letimelela tikhali tekulwa tetive—​titawuphatamiseka. Leto tikhali ‘titawuba nesitfwatfwa,’ lokusho kutsi angeke tisakhona kusebenta kufane nekutsi tigongobaliswe ngemakhata. Jehova utawuphindze asebentise sifo ‘nesishayo.’ Ngisho nobe kungaba sishayo mbamba nobe cha, leso sishayo sitawuticedza titsa. Ngalelo langa ‘emehlo abo . . . netilwimi tabo kuyawubola’ ngobe letitsa angeke tikhone kusihlasela futsi nemavi ato atawuthuliswa. (Zak. 14:6, 7, 12, 15) Kute incenye yemhlaba letawusindza kulokubhujiswa. Emabutfo lasekela Sathane kuleyomphi atawube amanyenti. (Semb. 19:19-21) “Labo labayawube sebabulewe nguSimakadze bayawugcwala yonkhe indzawo, kusukela ngala kwemhlaba kuye ngale kwawo.”​—Jer. 25:32, 33.

Funisisa Umcebo EVini LaNkulunkulu

(Zakhariya 12:3) Ngalelo langa, mhlazane tonkhe tive temhlaba tibutsene ndzawonye kutawumelana nayo, iJerusalema ngiyakuyenta ibe lidvwala lelisindzako kuto tonkhe tive. Bonkhe labetama kulisundvuta bayakutilimata bona.

w07 12/15 23 ¶10

Kute Sikhali Lesilolelwa Kulwa Nawe Lesiyawuphumelela

⁹ Siphrofetho saZakhariya sisicaciisela sizatfu lesenta tive timelane nemaKristu eliciniso. Naka lokushiwo kuZakhariya 12:3: “Ngalelo langa, mhlazane tonkhe tive temhlaba tibutsene ndzawonye kutawumelana nayo, iJerusalema ngiyakuyenta ibe lidvwala lelisindzako kuto tonkhe tive.” Lesiphrofetho sikhuluma ngayiphi iJerusalema? Siphrofetho saZakhariya ngeJerusalema sikhuluma ‘ngeJerusalema yasezulwini,’ uMbuso wasezulwini emaKristu lagcotjiwe labitelwe kuyo. (Hebheru 12:22) Labagotjiwe labatindlalifa teMbuso waMesiya labasesemhlabeni sebancane. Bakanye nebangane babo, ‘lokunguletinye timvu,’ bacela bantfu kutsi baphendvukele eMbusweni waNkulunkulu kusenesikhatsi. (Johane 10:16; Sembulo 11:15) Tive tisabele njani kulesimemo? Jehova utisekela ngayiphi indlela tikhonti takhe letetsembekile lamuhla? Asitfole imphendvulo njengobe sichubeka sihlola inchazelo yaZakhariya sehluko 12. Nasenta njalo, sitawutfola sicinisekiso sekutsi ‘kute sikhali lesiyawuphumelela’ kumelana nalabagcotjiwe baNkulunkulu nebangane babo labatinikele.

¹⁰ Zakhariya 12:3 uveta kutsi tive ‘tiyatilimata.’ Kwenteka njani loku? Nkulunkulu uncume kutsi tindzaba letimnandzi teMbuso kufanele tishunyayelwe. BoFakazi BaJehova bawutsatsa njengalobalulekile lomsebenti wekushumayela. Nobe kunjalo, kumenyetelwa kweMbuso njengelitsemba lebantfu kufane ‘nelidvwala lelisindzako’ etiveni. Tetama kulisusa endleleni ngekuhlupha bashumayeli beMbuso. Ngekwenta njalo, letive ‘titilimata tona.’ Ngisho nelidvumela lato liyonakala njengobe tiye tehluleka ngendlela lehlazisako. Atikwati kuthulisa tikhonti teliciniso, letikutsatsa njengelilungelo kumemetela ‘tindzaba letimnandzi’ teMbuso waNkulunkulu lobuswa nguMesiya ngaphambi kwekutsi kufike kuphela kwalelive. (Sembulo 14:6) Ngesikhatsi gadzi welijele lakulelinye live lelise-Afrika abona indlela tinceku taJehova letaphatfwa ngayo, watsi: ‘Nidlala ngesikhatsi senu ngekushushisa labantfu. Angeke bakuyeke kukholwa kwabo. Bayachubeka nje bayandza.’

(Zakhariya 12:7) “Simakadze uyawusindzisa emakhaya akaJuda kucala, kuze kutsi ludvumo lwendlu yaDavide kanye nelwetakhamiti taseJerusalema lungabi lukhulu kunelwakaJuda.

w07 12/15 25 ¶13

Kute Sikhali Lesilolelwa Kulwa Nawe Lesiyawuphumelela

¹³ Fundza Zakhariya 12:7, 8. Ka-Israyeli wasendvulo, emathende abevamile, futsi ngaletinye tikhatsi abesetjentiswa belusi netisebenti tasemasimini. Labantfu laba ngibo bebatawuba sengotini kucala futsi badzinge kuvikelwa nangabe sive lesisitsa sihlasela umuti waseJerusalema. Emavi latsi “emathende akaJuda” aveta kutsi labagcotjiwe labasemhlabeni lamuhla kufana nekutsi basesigangeni, abekho emitini lebiyelwe. Njengobe balapho, bayakhona kutivikela ngesibindzi tindzaba letimnandzi teMbuso waMesiya. Jehova wemabutfo ‘utawusindzisa emathende akaJuda kucala’ ngobe ngiwo Sathane langasheshe awahlasele.

Kufundvwa KweliBhayibheli

(Zakhariya 12:1-14) Livi lesembulo: Leli livi laSimakadze nga-Israyeli. Simakadze, lowendlale emazulu, lobeke tisekelo temhlaba, nalowabumba umoya wemuntfu ekhatsi kuye, utsi: ² “IJerusalema ngitayenta ibe yindzebe leyenta tonkhe tive letiyitungeletile tidzayitele. Emadolobha akaJuda atawuvinjetelwa kanye neJerusalema. ³ Ngalelo langa, mhlazane tonkhe tive temhlaba tibutsene ndzawonye kutawumelana nayo, iJerusalema ngiyakuyenta ibe lidvwala lelisindzako kuto tonkhe tive. Bonkhe labetama kulisundvuta bayakutilimata bona. ⁴ Ngalelo langa onkhe emahhashi ngiyakuwashaya ngeluvalo, bagibeli bawo bona ngibashaye ngekuhlanya,” kusho Simakadze. “Liso lami liyawubasetikwendlu yakaJuda liyeluse, kodvwa onkhe emahhashi ebetive ngiyakuwaphumphutsekisa. ⁵ Baholi bakaJuda bayakutsi etinhlitiyweni tabo: ‘Bantfu baseJerusalema bacinile, ngobe Simakadze longuSomandla unguNkulunkulu wabo.’ ⁶ “Ngalelo langa baholi bakaJuda ngiyawubenta bafanane nelibhodo lemlilo encunjini yetigodvo, bafanane nesidlwane lesivutsa emalangabi esitfungweni. Bayawucotfula ngesekudla nangesancele tonkhe tive letibatungeletile, kodvwa iJerusalema iyawusala seloku injalo nje endzaweni yayo. ⁷ “Simakadze uyawusindzisa emakhaya akaJuda kucala, kuze kutsi ludvumo lwendlu yaDavide kanye nelwetakhamiti taseJerusalema lungabi lukhulu kunelwakaJuda. ⁸ Ngalelo langa Simakadze uyawubavikela labo labahlala eJerusalema, kuze kutsi lababutsakatsaka kakhulu emkhatsini wabo babe njengaDavide, bese kutsi indlu yaDavide yona ifanane naNkulunkulu, ibe njengengilosi yaSimakadze lehamba embikwabo. ⁹ Ngalelo langa ngiyawuphuma ngiyewubhubhisa tonkhe tive letihlasela iJerusalema.” ¹⁰ “Ngiyawutfululela etikwendlu yakaDavide nasetikwabo bonkhe labahlala eJerusalema Moya wemusa newekuncusa. Bayakumbuka lowo lebamgwaza, bese bayamlilela njenganakulilelwa umntfwana lotelwe waba yedvwa kabo, bamdzabukele kakhulu, njengemuntfu nakadzabukela indvodzana yematubulo. ¹¹ Ngalelo langa kulila kwaseJerusalema kuyakuba kukhulu, kube njengekulila kwaHadadi Rimoni etsafeni laseMegido. ¹² Live liyawulila, lolo nalolo lusendvo ngekwalo, nebafati balo balile ngekwabo; lusendvo lwendlu yakaDavide nebafati balo, lusendvo lwendlu yakaNathani nebafati balo, ¹³ lusendvo lwendlu yakaLevi nebafati balo, ¹⁴ nabo bonkhe balolo nalolo lusendvo ngekwalo nebafati balo ngekwabo.”

DECEMBER 25-31

UMCEBO LOSEVINI LANKULUNKULU | MALAKHI 1-4

“Umshado Wakho Uyamjabulisa Yini Jehova?”

(Malakhi 2:13, 14) Lokunye lenikwentako naku: Nilitsela ngetinyembeti lilati laSimakadze. Niyalila nikhale ngobe angasayinaki iminikelo yenu, nome angasayemukeli ngekujabula etandleni tenu. ¹⁴ Niyabuta nitsi: “Leni?” Kungobe Simakadze abengufakazi emkhatsini wakho nemfati webusha bakho, ngobe awuketsembeki kuye, nome yena usengumkakho, umfati wesivumelwane semshado.

jd 125-126 ¶4-5

Sita Umndeni Ujabulise Jehova

⁴ Emalangeni aMalakhi ngelikhulu lesi-5 B.C.E., kudivosa besekuyintfo levamile kumaJuda. Malakhi wawatjela watsi: “Simakadze abengufakazi emkhatsini wakho nemfati webusha bakho, ngobe awuketsembeki kuye.” Ngenca yekutsi emadvodza bekakhohlisa, lilati laJehova beligcwele tinyembeti tebafati labakhohlisiwe, limbonywe ‘kulila nekukhala.’ Baphristi labakhohlakele bebanganendzaba naloku!​—Malakhi 2:13, 14.

⁵ Jehova bekasitsatsa njani lesimo sengcondvo lesibi ngemshado lebesikhona ngesikhatsi saMalakhi? Malakhi wabhala watsi: “Simakadze Nkulunkulu wema-Israyeli utsi: ‘Ngiyakutondza kwehlukana kwalabashadile.’” Wacinisekisa nekutsi Jehova ‘akagucuki.’ (Malakhi 2:16; 3:6) Uyasitfola yini sifundvo? Nkulunkulu bekakhombise kwasekucaleni kutsi akayifuni idivosi. (Genesise 2:18, 24) Bekangayifuni nangemalanga aMalakhi. Nalamuhla solo akayifuni. Lomunye angahle akhetse kuwushiya umshado ngenca yekutsi umlingani wakhe wemshado akamenetisi. Ngisho noma inhlitiyo yakhe ingahle imkhohlise, Jehova uyayiphenya. (Jeremiya 17:9, 10) Uyakubona kukhohlisa noma bucili lobubangela idivosi, kungakhatsaliseki kutsi umuntfu ubeka tiphi taba. “Tonkhe tintfo tembuliwe futsi tibekwe ebaleni emehlweni aloyo lesitawulandzisa kuye.”​—Hebheru 4:13.

(Malakhi 2:15, 16) Simakadze akabenti baba munye yini? Enyameni nasemoyeni bakhe. Bamunye leni? Ngobe abefuna bantfwana labesaba Nkulunkulu. Ngako tilindze wena emoyeni wakho, wetsembeke kumfati webusha bakho. ¹⁶ Simakadze Nkulunkulu wema-Israyeli utsi: “Ngiyakutondza kwehlukana kwalabashadile, kantsi futsi ngiyayenyanya indvodza levimbanisa ngebudlova njengesembatfo,” kusho Simakadze. Ngako ticaphele wena emoyeni wakho, ungabi ngulongaketsembeki.

w02 5/1 18 ¶19

Jehova Uyakuzonda Kungetsembeki

¹⁹ Lokunye Malakhi lakuvetako kutsi abesekhona emadvodza bekangabakhohlisi bafati bawo. ‘Bekesaba Nkulunkulu atilindze wona emoyeni wabo.’ (livesi 15) Kuyajabulisa kutsi inhlangano yaNkulunkulu lamuhla inemadvodza lamanyenti lanjalo, ‘lahlonipha’ bafati bawo. (1 Phetro 3:7) Awabahlukumeti ngekubashaya noma ngekusho emavi labuhlungu, awabacindzeteli ngemikhuba yebulili lehlazisako, futsi awabadlisi emahloni ngekukhanga labanye besifazane noma ngekubuka titfombe tebulili. Inhlangano yaJehova ibusisiwe nangekuba nemakhosikati langemaKhristu letsembekile kuNkulunkulu nasemitsetfweni yakhe. Onkhe emadvodza nebafati labanjalo bayakwati loko Nkulunkulu lakwenyanyako, futsi indlela labacabanga ngayo netento tabo kuyavumelana naloko labakwatiko. Chubeka unjengabo, ‘ulalele Nkulunkulu njengobe angumbusi’ futsi ubusiswe ngemoya wakhe longcwele.​—Imisebenti 5:29.

Funisisa Umcebo EVini LaNkulunkulu

(Malakhi 1:10) “Awu, shangatsi lomunye wenu angavala iminyango yelithempeli, kuze ningetikuyokhela imililo lengenamsebenti elatini lami! Angijabuli ngani, futsi ngingeke ngiwemukele umnikelo lophuma etandleni tenu,” kusho Simakadze longuSomandla.

w07 12/15 27 ¶1

Emaphuzu Lagcamile Encwadzi YaMalakhi

1:10. Jehova beyingamjabulisi imihlatjelo yebaphristi labanebugovu, labebabhadalisa kuze bavale iminyango nome bokhele imililo yemalati. Kubalulekile kutsi kukhonta kwetfu Nkulunkulu kanye nemisebenti yebuKhristu lesiyentako kukhutsatwe lutsandvo lolute bugovu ngaNkulunkulu nabomakhelwane betfu, hhayi inzuzo yemali.​—Matewu 22:37-39, 2 Khorinte 11:7.

(Malakhi 3:1) “Bukani la, ngiyawutfumela sitfunywa sami, lesiyawulungisa indlela embikwami. Masinyane loSimakadze lenimfunako uyakuta ethempelini lakhe. Yebo, sitfunywa sesivumelwane lenisifisako siyawufika,” kusho Simakadze longuSomandla.

w13 7/15 10-11 ¶5-6

“Nginani Onkhe Emalanga”

⁵ Eminyakeni leminyenti ngaphambi kwekutsi Jesu ente lomfanekiso wemabele nelukhula, Jehova waphefumulela umphrofethi wakhe Malakhi kutsi abiketele tintfo lebetitawenteka letisemfanekisweni waJesu. (Fundza Malakhi 3:1-4.) Johane uMbhabhatisi ‘abengulesitfunywa lesalungisa indlela.’ (Mat. 11:10, 11) Ngesikhatsi afika nga-29 C.E., sikhatsi sekwehlulela sive saka-Israyeli basesisondzele. Jesu abesitfunywa sesibili. Wahlanta lithempeli laseJerusalema kabili​—kwekucala ngesikhatsi acalisa umsebenti wakhe wekushumayela kwesibili ngasekupheleni kwawo. (Mat. 21:12, 13; Joh. 2:14-17) Nobe kunjalo, umsebenti waJesu wekuhlanta lithempeli watsatsa sikhatsi lesitsite.

⁶ Ngukuphi kugcwaliseka lokukhulu kwesiphrofetho saMalakhi? Ngesikhatsi seminyaka leminyenti leyachubeka kwaze kwaba ngu-1914, C. T. Russell nebangani bakhe benta umsebenti lofanana newaJohane uMbhabhatisi. Lomsebenti lobalulekile bewufaka ekhatsi kubuyisela emaciniso eliBhayibheli. Bafundzi beliBhayibheli bafundzisa inchazelo leliciniso ngemhlatjelo wenhlawulo waKhristu, bembula emanga ngemfundziso yesihogo bamemetela ngekuphela kweTikhatsi Tebetive. Nobe kunjalo, bekunemacembu etinkholo lamanyenti labetibita ngekutsi abalandzeli baKhristu. Ngako bekunembuto lobalulekile lobekudzingeka kutsi uphendvulwe: Bobani emkhatsini walamacembu labebangemabele? Kute aphendvule lombuto, Jesu wacala kuhlola lithempeli laNkulunkulu nga-1914. Lomsebenti wekuhlola newekuhlanta bewubekelwe sikhatsi lesitsite​—kusukela nga-1914 kuze kube sencenyeni yekucala ya-1919.

Kufundvwa KweliBhayibheli

(Malakhi 1:1-10) Sembulo: Livi laSimakadze lelefika kuma-Israyeli ngemphrofethi Malakhi. ² Simakadze utsi: “Nginitsandzile. Kodvwa nine niyabuta nitsi: ‘Usitsandze kanjani?’” Simakadze utsi: “Esawu bekungesiye yini umnakaboJakobe? Noko ngase ngimtsandzile Jakobe, ³ kodvwa Esawu ngamtondza. Ngagucula tintsaba takhe taba lugwadvule, lifa lakhe ngalishiyela timphungutja tasehlane.” ⁴ Edomu angasho atsi: “Nome sipitjitiwe, kodvwa sitawutakha kabusha letindzala.” Kodvwa naku lokushiwo nguSimakadze longuSomandla, utsi: “Bangakha, kodvwa ngitawuphindze ngibhidlite. Bayawubitwa ngekutsi Live Lenkhohlakalo, sive lesihlala njalo singaphansi kwelulaka lwaSimakadze. ⁵ Niyawukubona nine ngemehlo enu, bese nitsi: ‘Mukhulu Simakadze, kuze kwendlulele nangesheya kweminyele yaka-Israyeli!’” ⁶ Simakadze Somandla utsi: “Indvodzana ihlonipha uyise, kantsi nesisebenti sihlonipha inkhosi yaso. Nangabe nginguyihlo, aningihloniphi leni? Nangabe ngiyinkhosi, aningihloniphi ngani? Ngini nine baphristi, lenedzelela Libito lami. “Kodvwa niyabuta nitsi: ‘Siledzelele kanjani Libito lakho?’ ⁷ “Nibeke kudla lokungcolile ngekwemtsetfo etikwelilati lami. “Kodvwa niyabuta nitsi: ‘Sikungcolise kanjani?’ “Ngekutsi nitsi litafula laSimakadze liyenyanyeka. ⁸ Naniletsa tifuyo letitindlobho kutsi titewuba ngumhlatjelo, kulungile yini loko? Nanenta umhlatjelo ngesifuyo lesichutako nome lesigulako, kulungile yini loko? Yetamani kunikela ngato kumbusi wenu! Anganijabulela yini? Anganemukela yini?” kusho Simakadze longuSomandla. ⁹ Nitsi: “Ncusani kuNkulunkulu kutsi atewuba nemusa kitsi.” “Ngaleminikelo lenjena lephuma etandleni tenu utanemukela yini?” kusho Simakadze longuSomandla. ¹⁰ “Awu, shangatsi lomunye wenu angavala iminyango yelithempeli, kuze ningetikuyokhela imililo lengenamsebenti elatini lami! Angijabuli ngani, futsi ngingeke ngiwemukele umnikelo lophuma etandleni tenu,” kusho Simakadze longuSomandla.