SANDZISANCHAZO
Kuncobe Kushaya Indlwabu
Njengobe kungumkhuba longcolile ngekwakamoya, kushaya indlwabu kwenta umuntfu abe nesimo sengcondvo sekufuna kutenelisa yena.a Umuntfu loshaya indlwabu angase agcine asabuka labanye njengetintfo tekutenetisa ngekwelicasi. Ugcine angasatsatsi kuya ecasini njengesento selutsandvo kepha kuba sento sekutijabulisa sikhashana, kute akhululeke ekucindzetelweni yinkhanuko. Kepha lokukhululeka kumane kuyintfo yesikhashana. Kunekutsi kubulale tonkhe tinkhanuko ‘letinjengebundlundlulu, kungcola, kanye netifiso tekulalana [letingakafaneli],’ kushaya indlwabu kuyativusa.—Kholose 3:5.
Umphostoli Pawula wabhala: “Bazalwane . . . asitihlante kuko konkhe lokungcolisa umtimba nemoya, siphile imphilo yebungcwele lobuphelele ngekwesaba Nkulunkulu.” (2 Khorinte 7:1) Nangabe kulukhuni kwenta loko lokushiwo ngulamavi, ungalilahli litsemba. Jehova uhlale ‘akulungele kutsetselela’ nekusita. (Tihlabelelo 86:5; Lukha 11:9-13) Ngenca yekutsi inhlitiyo yakho iyakulahla loku, kanye nemetamo yakho yekukubalekela, ngisho nalapho ngaletinye tikhatsi wehluleka—ukhombisa kutsi unesimo sengcondvo lesihle. Khumbula nekutsi ‘Nkulunkulu mkhulu kunetinhlitiyo tetfu futsi wati konkhe.’ (1 Johane 3:20) Nkulunkulu akabuki nje kuphela tono tetfu, kepha ubuka loko umuntfu langiko. Loko kumenta kutsi akwati kusihawukela lapho sicela umusa wakhe. Ngako-ke, ungadzinwa kuthandaza kuNkulunkulu ngekutitfoba nangebucotfo. Ngekwenta kanjalo, utawube ulingisa umntfwana loya kubabe wakhe lapho asenkingeni. Jehova uyawukubusisa nganembeza lomsulwa. (Tihlabelelo 51:1-12, 17; Isaya 1:18) Kuliciniso, nawe kufanele wente ngekuvumelana nemithandazo yakho. Sibonelo saloko kutsi ungenta imetamo yekugwema tonkhe tinhlobo tetitfombe letingcolile kanye nebangani lababi.b
Nangabe lenkinga yekushaya indlwabu ichubeka, khuluma nemtali wakho longumKhristu nobe ukhulume nemngani lovutsiwe ngekwakamoya futsi lokukhatsalelako.c—Taga 1:8, 9; 1 Thesalonika 5:14; Thithusi 2:3-5.
a Kushaya indlwabu kukuphulula titfo tangasese kute kube ngulapho umuntfu enetiseka enkhanukweni yetekulalana.
b Kute batsatse tinyatselo letilusito, labanye bancume kubeka bongcondvomshini endzaweni lebonakalako. Ngetulu kwaloko, labanye emndenini batsenge tinhlelo tangcondvomshini letikhipha tintfo letingatsandzeki kubo. Nobe kunjalo, siyati kutsi alukho luhlelo lesingalwetsemba ngalokuphelele.
c Kute utfole lusito loluphatsekako lwekutsi ungayincoba njani lenkinga yekushaya indlwabu, fundza sihloko lesitsi: “Intsha Iyabuza . . . Ngingawunqoba Kanjani Lo Mkhuba?” lesiku-“Phaphama!” ya-November 2006, kanye nemakhasi 178-182 encwadzi letsi “Intsha Iyabuza—Izimpendulo Ezisebenzayo,” umculu 1, ngesiZulu.