Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
JUNE 4-10, 2013
UMCEBO LOSEVINI LANKULUNKULU | MAKHO 15-16
“Jesu Wagcwalisa Tiphrofetho”
(Makho 15:3-5) Baphristi labakhulu bebammangalela ngetintfo letinyenti. 4 Ngako Pilatu waphindze wambuta watsi: “Kute yini longakusho? Buka kutsi bakubeka emacala langakanani.” 5 Kodvwa Jesu akaphendvulanga, futsi loko kwammangalisa kakhulu Pilatu.
(Makho 15:24) Ase ayambetsela, futsi abelana ngetingubo takhe tangetulu, enta inkatho kute abone kutsi bani utawutsatsani.
(Makho 15:29, 30) Bantfu lebebendlula bebamedzelela, banikine tinhloko batsi: “Asewubuke! Watsi ungalibhidlita lithempeli futsi ulakhe ngemalanga lamatsatfu, 30 tisindzise ngekutsi wehle kulolugodvo.”
Emaphuzu lacwaningiwe aMak 15:24, 29 laku-nwtsty
abelana ngetingubo takhe tangetulu: KuJoh 19:23, 24, kunemniningwane longakabhalwa eVangelini laMatewu, Makho, kanye naLukha, lotsi emasotja emaRoma enta inkatho ngetimphahla tangetulu netangephansi. Lamasotja ehlukaniselana timphahla tangetulu taba “tincenye letine, ngulelo latsatsa incenye yinye.” Akazange ahlukaniselane imphahla yangephansi, ngako enta inkatho kute abone kutsi itawutsatfwa ngubani, futsi lokwenta inkatho lokuphatselene naMesiya kwagcwalisa siphrofetho lesikuHla 22:18. Kunebufakazi bekutsi ngekwelisiko, tiboshwa lebetibulawa betitsatselwa timphahla tato, ngako tigebengu betikhunyulwa timphahla, kutsatfwe netintfo tato ngaphambi kwekutsi tibulawe, lebekuyintfo lelihlazo.
banikine tinhloko: Ngalokuvamile, lesento besihambisana nemavi lakhombisa kwedzelela, kuhlambalata, nekubukela phansi. Bantfu labebandlula ngendlela bagcwalisa siphrofetho lesibhalwe kuHla 22:7.
(Makho 15:43) Josefa wase-Arimathiya, labelilunga lelihlonishwako leNkantolo Yenkholo, naye labelindze uMbuso waNkulunkulu, wacunga sibindzi waya kuPilatu wayawucela sidvumbu saJesu.
(Makho 15:46) Josefa wase utsenga indvwangu yelineni lecolisakele, watsatsa lesidvumbu wasigocotela ngayo, wasibeka ethuneni lebelimbiwe edvwaleni, futsi wagicita litje wavala lelithuna.
Liphuzu lelicwaningiwe laMak 15:43 leliku-nwtsty
Josefa: Kungefani kwebabhali balamaVangeli kubufakazi bekutsi kungani imininingwane ngaJosefa ingefani. Matewu, lobekangumtselisi wabhala kutsi ‘bekayindvodza lenjingile.’ Makho longumbhali lowabhalela emaRoma watsi Josefa ‘bekalilunga lelihlonishwako leNkantolo Yenkholo’ lebelilindzele uMbuso waNkulunkulu. Lukha, dokotela lobekanemusa, watsi bekayindvodza ‘lelungile’ lengazange ilisekele licebo kanye nesento saleNkantolo sekubulala Jesu. Johane nguye kuphela lowatsi Josefa ‘bekangumfundzi waJesu [lotifihlako] ngobe esaba emaJuda.’—Mat 27:57-60; Mak 15:43-46; Luk 23:50-53; Joh 19:38-42.
Kufunisisa Umcebo EVini LaNkulunkulu
(Makho 15:25) Kwasekutawushaya insimbi yemfica ekuseni nawambetsela.
Liphuzu lelicwaningiwe laMak 15:25 leliku-nwtsty
insimbi yemfica ekuseni: Leli bekuli-awa lesitsatfu. Labanye bayakunaka kungefani lokubonakala kukhona kulokulandzisa naloko lokushiwo kuJoh 19:14-16, lotsi ‘besekusondzela insimbi yelishumi nakubili emini’ ngesikhatsi Pilatu anikela Jesu kutsi abulawe. Nanobe imiBhalo ingayichazi yonkhe imininingwane yalokungefani, nawa emaciniso lokufanele sicabange ngawo: Esikhatsini lesinyenti, kubika kwemaVangeli kuyavumelana nakuchaza kutsi lokwenteka ngelilanga lekugcina laJesu aphila emhlabeni bekwenteka ngasiphi sikhatsi. Omane lamaVangeli akhombisa kutsi baphristi nemadvodza lamadzala ahlangana ekuseni kakhulu, futsi ngemuva kwaloko Jesu wamikiswa kuMbusi wemaRoma Phontiyuse Pilatu. (Mat 27:1, 2; Mak 15:1; Luk 22:66–23:1; Joh 18:28) BoMatewu, Makho, naLukha babhala kutsi ngesikhatsi Jesu sekalenga elugodvweni, kwaba mnyama eveni lonkhe kusukela “nasekusondzela insimbi yelishumi nakubili emini.” (Mat 27:45, 46; Mak 15:33, 34; Luk 23:44) Lokungenteka kwenta umehluko kulesikhatsi sekubulawa kwaJesu kungaba kutsi labanye bebatsatsa kushaywa kwesiboshwa njengencenye yako konkhe loko lobekwenteka uma siyobulawa. Ngaletinye tikhatsi lokushaywa bekuba matima kangangekutsi lesiboshwa besifa. Endzabeni yaJesu, nanobe ekucaleni bekatitfwalele lolugodvo lwekuhlushwa, kwagcine kudzingeka kutsi lomunye amtfwalele lona ngenca yekutsi Jesu bekashaywe kakhulu. (Luk 23:26; Joh 19:17) Nangabe kushaywa kwesiboshwa bekubhekwa njengencenye yekubulawa kwaso, kungenteka kwendlula sikhatsi ngaphambi kwekutsi Jesu abetselwe elugodvweni lwekuhlushwa. Ngekuvumelana naloku, Mat 27:26 naMak 15:15 uhlanganisa ndzawonye sikhatsi sekushaywa kwaJesu kanye nesekubulawa kwakhe. Ngako, bantfu bangase basho tikhatsi letehlukene tekubulawa kwaJesu kuye ngekutsi bacala nini kubala sikhatsi. Kungenteka ngiso sizatfu lesenta Pilatu wamangala nakeva kutsi Jesu washeshe wafa ngemva kwekubetselwa kwakhe elugodvweni. (Mak 15:44) Ngetulu kwaloko, babhali beliBhayibheli bebavamise kusebentisa lisiko lekuhlukanisa lilanga libe tincenye letine letakhiwa ngema-awa lamatsatfu incenye iyinye, njengoba bebenta nangebusuku. Lokwehlukaniswa kwelilanga ngalendlela kusichaza kahle sizatfu sekutsi kungani kuhle kubhekiselwa ensimbini yemfica, insimbi yelishumi nakubili emini, nensimbi yesitsatfu ntsambama, nakubalwa sikhatsi kusukela ngensimbi yesitfupha ekuseni. (Mat 20:1-5; Joh 4:6; Imi 2:15; 3:1; 10:3, 9, 30) Lokunye, bantfu ngalokuvamile bebete emawashi, ngako bebavamise kubekisa sikhatsi batsi “sekusondzela,” njengobe sifundza kuJoh 19:14. (Mat 27:46; Luk 23:44; Joh 4:6; Imi 10:3, 9) Ngako singaphetsa ngekutsi Makho kungenteka wahlanganisa kushaywa kanye nekubetselwa kwaJesu elugodvweni, kantsi Johane yena wabika ngekubetselwa kwakhe nje kuphela. Bobabili lababhali kungenteka babekisa sikhatsi sekufa kwaJesu basebentisa incenye letsite yelilanga, futsi Johane wasebentisa ligama lelitsi “sekusondzela” nakabhekisela kuleso sikhatsi. Loku kungenta kutsi kube nemehluko kuletikhatsi letibhaliwe kulamaVangeli. Kwekugcina, lokutsi Johane wabhala sikhatsi lesehlukile eVangelini lakhe lelabhalwa sekwendlule iminyaka leminyenti ngemva kweliVangeli laMakho, kubufakazi bekutsi Johane akazange akope loko lobekubhalwe nguMakho.
(Makho 16:8) Ngako baphuma kulelithuna babaleka, bebachachatela futsi betfuke kakhulu. Abazange bayitsi vu, ngobe bebesaba.
Liphuzu lelicwaningiwe laMak 16:8 leliku-nwtsty
ngobe bebesaba: Ngekusho kwemibhalo yesandla yakadzeni yencenye yekugcina yaMakho, leliVangeli liphetsa ngemavi latfolakala kuvesi 8. Labanye batsi Makho bekangeke avele nje aphetse lencwadzi ngalamavi. Nobe kunjalo, nakubukwa indlela yaMakho yekubhala, loko labakushoko akusilo liciniso. Lokunye, tati teliBhayibheli tangelikhulu lesine, boJerome na-Eusebius, titsi leliVangeli liphetsa ngemavi latsi “ngobe bebesaba.”
Kunemibhalo leminyenti yesandla yesiGriki nalamanye emahumusho lengete siphetfo lesidze nome lesifishane kuvesi 8. Siphetfo lesidze, lesinemavesi langu-12, sitfolakala ku-Codex Alexandrinus, Codex Ephraemi Syri rescriptus, ne-Codex Bezae Cantabrigiensis, onkhe lasukela ekhulwini lesihlanu C.E. Siphindze sitfolakale naku-Vulgate yesiLatin, i-Curetonian Syriac, ne-Syriac Peshitta. Nanobe kunjalo, lesiphetfo asikho emibhalweni lemibili yesandla yesiGriki yangelikhulu lesine, lokuyi-Codex Sinaiticus kanye ne-Codex Vaticanus, nome ku-Codex Sinaiticus Syriacus yangelikhulu lesihlanu, nobe embhalweni wekucala wesandla waMakho wangelikhulu lesihlanu ngelulwimi lwesiSahidic Coptic. Ngalokufanako, imibhalo yesandla lemidzala kunayo yonkhe yaMakho yelulwimi lwesi-Armenian nesi-Georgian iphetsa kuvesi 8.
Leminye imibhalo yesandla yesiGriki yakamuva nalamanye emahumusho anesiphetfo lesifishane, lesinemisho nje lembalwa. I-Codex Regius yangelikhulu lesi-8 C.E. inato totimbili letiphetfo, futsi isho siphetfo lesifishane kucala. Icalisa siphetfo ngasinye ngemavi latsi letiphetfo betemukelwa baholi bangaleso sikhatsi, nanobe bekungasho kutsi le-Codex yona beyitemukela.
SIPHETFO LESIFISHANE
Siphetfo lesifishane lesibhalwe ekugcineni kwaMak 16:8 asisiyo incenye yemiBhalo lephefumulelwe. Sifundzeka kanjena:
Batjela Phetro kanye nalabo labenabo ngato tonkhe letintfo lebebatjelwe kutsi batente. Ngetulu kwaloko, Jesu wabatfuma kutsi bashumayele kuyo yonkhe indzawo ngemlayeto longcwele nalongonakali wensindziso yaphakadze.
SIPHETFO LESIDZE
Siphetfo lesidze lesibhalwe ekugcineni kwaMak 16:8 asisiyo incenye yemiBhalo lephefumulelwe. Sifundzeka kanjena:
9 Ngemuva kwekuvuswa ekufeni, wacale wabonakala kuMariya waseMagdala, loyo lakhipha kuye emadimoni lasikhombisa. 10 Ngemuva kwaloko Mariya wahamba wayewubikela bafundzi bakhe lebebanaye, njengobe bebalila futsi bakhala. 11 Kodvwa batsi nabeva kutsi Jesu uvusiwe ekufeni kanye nekutsi Mariya umbonile, abazange bakholwe. 12 Ngetulu kwaloko, Jesu wase uvela ngendlela leyehlukile kubafundzi lababili lebebahamba baya emaphandleni, 13 futsi babuyela emuva bayobikela bonkhe baphostoli. Kodvwa abazange bakukholwe naloku lebebakusho. 14 Ngekuhamba kwesikhatsi, Jesu wavela kubaphostoli bakhe labalishumi nakunye njengobe bebahleti etafuleni, futsi wabasola ngesizatfu sekungakholwa kwabo kanye nekuba netinhlitiyo letilukhuni, ngenca yekutsi abazange babakholwe labo lebebabonile kutsi sewuvusiwe ekufeni. 15 Ngako watsi kubo: “Hambani niye eveni lonkhe niyewushumayela tindzaba letimnandzi kubo bonkhe bantfu. 16 Nobe ngubani lokholwako futsi abhajatiswe uyawusindziswa, kodvwa nobe ngubani longakholwa uyawulahlwa. 17 Ngetulu kwaloko, nati tibonakaliso letiyawubonakala kulabo labakholwako: Ngekusebentisa libito lami bayawucosha emadimoni; bakhulume letinye tilimi; 18 ngetandla tabo bayawubamba tinyoka; futsi nakwenteka banatsa lokutsite lokunebutsi, ngeke kubalimate. Bayawubeka tandla tabo kulabagulako, bese labo bantfu bayaphila.”
19 Naseyikhulume nabo, iNkhosi Jesu yenyukela ezulwini futsi yahlala ngesekudla saNkulunkulu. 20 Ngako bahamba, bashumayela kuyo yonkhe indzawo, futsi iNkhosi yabasita, yasekela lomlayeto ngetibonakaliso letinyenti.
Kufundvwa KweliBhayibheli
(Makho 15:1-15) Ngekushesha nasekusile, baphristi labakhulu, emadvodza lamadzala kanye netati temtsetfo, ngisho nawo onkhe emalunga eNkantolo YemaJuda, babutsana futsi babopha Jesu base bayamchuba bamyisa kuPilatu. 2 Pilatu wambuta watsi: “UyiNkhosi yemaJuda yini?” Jesu wamphendvula watsi: “Sewuvele ushito.” 3 Baphristi labakhulu bebammangalela ngetintfo letinyenti. 4 Ngako Pilatu waphindze wambuta watsi: “Kute yini longakusho? Buka kutsi bakubeka emacala langakanani.” 5 Kodvwa Jesu akaphendvulanga, futsi loko kwammangalisa kakhulu Pilatu.6 Ngesikhatsi seMkhosi weliPhasika, bekungumkhuba wakhe Pilatu kukhulula siboshwa labatsi akabakhululele sona. 7 Ngaleso sikhatsi, kwakukhona indvodza leyayisejele, libito layo kunguBharaba futsi yayiboshwe nalabanye lebebabekwe emacala ekuvukela umbuso nekubulala. 8 Ngako sicumbi sebantfu seta sacela Pilatu kutsi asentele loko labehlale asentela kona. 9 Wasiphendvula watsi: “Nifuna nginikhululele leNkhosi yemaJuda yini?” 10 Ngobe bekati kahle kamhlophe kutsi baphristi labakhulu bebamletse kuye ngenca yekutsi bebanemona. 11 Kodvwa labaphristi labakhulu bagcugcutela lesicumbi sebantfu kutsi sifune kukhululelwa Bharaba. 12 Pilatu wachubeka watsi: “Nifuna ngenteni-ke ngalona lenitsi uyiNkhosi yemaJuda?” 13 Bamemeta batsi: “Mbetsele!” 14 Kodvwa Pilatu watsi kubo: “Ngimbetseleleni? Ngukuphi lokubi lakwentile?” Nanobe kunjalo bamemeta kakhulu batsi: “Mbetsele!” 15 Afuna kujabulisa lesicumbi, wabakhululela Bharaba, futsi ngemuva kwekutsi Jesu ashaywe, Pilatu wabanika yena kute bambetsele.
JUNE 11-17, 2013
UMCEBO LOSEVINI LANKULUNKULU | LUKHA 1
“Lingisa Kutfobeka KwaMariya”
(Lukha 1:38) Ngako Mariya watsi: “Mine ngiyincekukati yaJehova! Shengatsi kungenteka njengobe ushito.” Ngemuva kwaloko, lengilosi yamshiya.
“Mine Ngiyincekukati YaJehova!”
12 Emavi akhe lakhombisa kutfobeka nekulalela, atiwa ngibo bonkhe bantfu labanekukholwa. Watsi kuGabhriyeli: “Mine ngiyincekukati yaJehova! Shengatsi kungenteka njengobe ushito.” (Luk. 1:38) Incekukati bekusisebenti lesiphansi kakhulu; kuphila kwayo bekusetandleni tenkhosi yayo. Nguleyo indlela Mariya labetiva ngayo ngeNkhosi yakhe, Jehova. Bekati kutsi abevikelekile etandleni takhe, nekutsi wetsembekile kulabo labetsembekile kuye, futsi utambusisa nangabe enta konkhe lokusemandleni akhe kulomsebenti lomatima.—Hla. 18:25.
(Lukha 1:46-55) Mariya watsi: “Umphefumulo wami uyamdvumisa Jehova, 47 nemoya wami ujabule kakhulu ngaNkulunkulu longuMsindzisi wami, 48 ngobe uyikhumbulile incekukati yakhe, ngisho nobe iphansi. Kusukela nyalo, tonkhe titukulwane titawutsi ngiyajabula, 49 ngobe Loyo lonemandla ungentele tintfo letinkhulu, futsi libito lakhe lingcwele, 50 umusa wakhe uwubonisa labo labamesabako, kuto tonkhe titukulwane. 51 Wente tintfo letinkhulu ngesandla sakhe; wabasakata labo labatigcabhako enhlitiyweni. 52 Bantfu labanemagunya ubehlisile etihlalweni, waphakamisa labo labaphansi; 53 labalambile ubesutsise ngetintfo letinhle, futsi labebanjingile ubente bahamba balambatsa. 54 Uyisitile inceku yakhe Israyeli, wayibonisa umusa 55 kuze kube phakadze, njengobe asho kubokhokho betfu, ku-Abrahama nasentalweni yakhe.”
“Mine Ngiyincekukati YaJehova!”
15 Ngemuva kwaloko naMariya wakhuluma. Emavi akhe agcinwe ngekucophelela eVini laNkulunkulu. (Fundza Lukha 1:46-55.) Lawa ngemavi aMariya lamadze kuwendlula onkhe lawasho latfolakala eBhayibhelini, futsi laveta lokunyenti ngaye. Aveta umoya wakhe wekubonga njengobe abedvumisa Jehova ngekumbusisa ngemsebenti wekuba ngunina waMesiya. Aphindze avete kukholwa kwakhe lokucinile njengobe atsi Jehova wehlisa labatigcabhako nalabanemagunya futsi asite labaphansi nalabeswele labafuna kumkhonta. Asikhombisa nekutsi abenelwati lolunyenti. Kulinganiselwa kutsi wacaphuna emiBhalweni yesiHebheru tikhatsi letingetulu kwaletingu-20.
16 Kuyacaca kutsi Mariya abecabangisisa ngeliVi laNkulunkulu. Nobe kunjalo, wachubeka atfobekile, wavumela imiBhalo kutsi itikhulumele kunekutsi akhulume loko lokwakucatjangwa nguye. Lendvodzana lebeyisolo ikhula esibeletfweni sakhe nayo beyitawubonisa umoya lofanako, itsi: “Loko lengikufundzisako akusiko kwami, kodvwa kwaloyo longitfumile.” (Joh. 7:16) Senta kahle ngekutibuta: ‘Mine ngiyalihlonipha yini liVi laNkulunkulu futsi ngititfobe kulo? Nobe ngitsandza kusebentisa imibono netimfundziso tami?’ Mariya yena abenesimo sengcondvo lesihle.
Kufunisisa Umcebo EVini LaNkulunkulu
(Lukha 1:62) Babese baya kuyise walomntfwana, bakhuluma naye ngetandla bambuta kutsi ufuna lomntfwana etsiwe liphi libito.
w08 3/15 30 ¶6
Emaphuzu Labalulekile Lasencwadzini YaLukha
Luk 1:62—Zakhariya waba simungulu yini futsi wangaseva etindlebeni? Cha. Akazange asakhona kukhuluma nje kuphela. Labanye bambuta “ngetandla” kutsi bekafuna kumetsa atsini lomntfwana, hhayi ngobe bekangaseva etindlebeni. Kusenekwenteka bekevile kutsi umkakhe bekatsite indvodzana yabo itawubitwa ngaliphi ligama. Kungenteka labanye bambuta loko Zakhariya basebentisa tandla. Lokwekutsi kwadzingeka kuvulwe umlomo wakhe kuphela kukhombisa kutsi tindlebe taZakhariya betingakavaleki.—Lukha 1:13, 18-20, 60-64.
(Lukha 1:76) Ngako wena Mntfwanami, utawubitwa ngekutsi ungumphrofethi waLosetikwako Konkhe, ngobe utawuhamba embikwaJehova umlungisele indlela,
Liphuzu lelicwaningiwe laLuk 1:76 leliku-nwtsty
utawuhamba embikwaJehova: Johane umBhabhatisi ‘bekatawuhamba embikwaJehova’ ngemcondvo wekwendvulela Jesu, lebekatawumelela uYise, futsi ete ngeligama leYise.—Joh 5:43; 8:29; hlola liphuzu lelicwaningiwe lelitsi Jehova kulelivesi.
Kufundvwa KweliBhayibheli
(Lukha 1:46-66) Mariya watsi: “Umphefumulo wami uyamdvumisa Jehova, 47 nemoya wami ujabule kakhulu ngaNkulunkulu longuMsindzisi wami, 48 ngobe uyikhumbulile incekukati yakhe, ngisho nobe iphansi. Kusukela nyalo, tonkhe titukulwane titawutsi ngiyajabula, 49 ngobe Loyo lonemandla ungentele tintfo letinkhulu, futsi libito lakhe lingcwele, 50 umusa wakhe uwubonisa labo labamesabako, kuto tonkhe titukulwane. 51 Wente tintfo letinkhulu ngesandla sakhe; wabasakata labo labatigcabhako enhlitiyweni. 52 Bantfu labanemagunya ubehlisile etihlalweni, waphakamisa labo labaphansi; 53 labalambile ubesutsise ngetintfo letinhle, futsi labebanjingile ubente bahamba balambatsa. 54 Uyisitile inceku yakhe Israyeli, wayibonisa umusa 55 kuze kube phakadze, njengobe asho kubokhokho betfu, ku-Abrahama nasentalweni yakhe.” 56 Ngako Mariya wahlala naye sikhatsi lesingaba tinyanga letintsatfu, wase ubuyela ekhaya. 57 Sefika sikhatsi sekutsi Elizabethe abeleke, futsi watala indvodzana. 58 Bomakhelwane netihlobo takhe beva kutsi Jehova umbonise umusa lomkhulu, ngako bajabula kanye naye. 59 Ngelilanga lesiphohlongo, beta kutewusoka lomntfwana futsi bebatawumetsa libito leyise Zakhariya. 60 Kodvwa unina walomntfwana watsi: “Cha, utawubitwa ngekutsi nguJohane.” 61 Nabeva loku, batsi kuye: “Kepha kute sihlobo senu lesibitwa ngalelibito.” 62 Babese baya kuyise walomntfwana, bakhuluma naye ngetandla bambuta kutsi ufuna lomntfwana etsiwe liphi libito. 63 Wacela kwekubhala wase uyabhala utsi: “Libito lakhe nguJohane.” Bonkhe bamangala ngaloku. 64 Ngekushesha umlomo wakhe wavuleka, nelulwimi lwakhe lwalunga, wase ucala kukhuluma wabonga Nkulunkulu. 65 Bonkhe bantfu lebebahlala kuleyo ndzawo besaba, futsi letintfo kwakhulunywa ngato kulo lonkhe laseJudiya, lokulive lelalinetintsaba. 66 Bonkhe labeva ngaloku bakufaka etinhlitiyweni tabo, batsi: “Kahle kahle lomntfwana utawuba yini?” Loku bakusho ngobe sandla saJehova sasinaye lomntfwana.
JUNE 18-24
UMCEBO LOSEVINI LANKULUNKULU | LUKHA 2-3
“Nine Labasha, Niyabucinisa Yini Buhlobo Benu NaJehova?”
(Lukha 2:41, 42) Minyaka yonkhe, batali bakhe bebahlale baya emkhosini weliPhasika eJerusalema. 42 Nasaneminyaka lelishumi nakubili, baya kulomkhosi njengobe bebahlale benta.
Liphuzu lelicwaningiwe laLuk 2:41, 42 leliku-nwtsty
batali bakhe bebahlale baya: UMtsetfo bewungabaphoceleli besifazane kutsi baye emkhosini weliPhasika. Nome kunjalo, Mariya bekahamba naJosefa minyaka yonkhe nakaya kulomkhosi eJerusalema. (Eks 23:17; 34:23) Umnyaka nemnyaka, bebahamba lamakhilomitha langaba ngu-300 nebantfwana babo.
(Lukha 2:46, 47) Ngemuva kwemalanga lamatsatfu bamtfola ethempelini ahleti nebafundzisi, abalalele futsi ababuta nemibuto. 47 Bonkhe labo lebebamlalele bamangaliswa kucondza kwakhe kanye netimphendvulo takhe.
Emaphuzu lacwaningiwe aLuk 2:46, 47 laku-nwtsty
ababuta nemibuto: Imibuto yaJesu beyingasiyo nje imibuto yebuntfwana lengasho lutfo, futsi loku kubonakala endleleni labo bebamlalele labayitsatsa ngayo. (Luk 2:47) Ligama lesiGriki lelihunyushwe ngekutsi “ababuta nemibuto” ngaletinye tikhatsi lingasho imibuto yekuphenya lesetjentiswa nakutekwa licala enkantolo. (Mat 27:11; Mak 14:60, 61; 15:2, 4; Imi 5:27) Tati temlandvo titsi labanye baholi benkholo labadvumile bebavamise kusala ethempelini ngemuva kwemikhosi leyehlukahlukene futsi bafundzise kulomunye wemihubhe lebeyikhona lapho. Bantfu bebangahlala nalawo madvodza kuze bawalalele futsi bawabute imibuto.
bamangaliswa: Kulelivesi, lesento sesiGriki lesihunyushwe ngekutsi “bamangaliswa” singasho kutsi bebasolo bamangele kusukela bacala kukhuluma naJesu baze bayocedza.
(Lukha 2:51, 52) Wahamba nabo wabuyela eNazaretha, futsi wachubeka abalalela. Unina watigcina enhlitiyweni tonkhe letintfo. 52 Jesu wachubeka ahlakanipha, akhula, futsi atsandvwa nguNkulunkulu kanye nabantfu.
Liphuzu lelicwaningiwe laLuk 2:51, 52 leliku-nwtsty
wachubeka abalalela: Noma “wachubeka abahlonipha; wachubeka abatfobela.” Kusetjentiswa kweligama lesiGriki lelisho sento lesichubekako kusitjela kutsi Jesu wabuyela ekhaya futsi watitfoba kubatali bakhe ngemuva kwekucocisana nebafundzisi ethempelini ngeliVi laNkulunkulu. Kutitfoba kwaJesu kubatali bakhe bekungetulu nje kwekubahlonipha, kepha bekugcwalisa uMtsetfo waMose ngalokuphelele.—Eks 20:12; Gal 4:4.
Kufunisisa Umcebo EVini LaNkulunkulu
(Lukha 2:14) “Akadvunyiswe Nkulunkulu losezulwini, futsi akube nekuthula emhlabeni kubantfu labemukelwa nguye.”
Emaphuzu lacwaningiwe aLuk 2:14 laku-nwtsty
akube nekuthula emhlabeni kubantfu labemukelwa nguye: Leminye imibhalo yesandla ibhaleke ngendlela levakala itsi “akube nekuthula emhlabeni, futsi bantfu bonkhe abemukelwe,” kantsi nalamanye emahumusho eliBhayibheli ayibeka kanjalo. Noma kunjalo, minyenti imibhalo yesandla levumelana nendlela lelivesi lelibekwe ngayo ku-New World Translation. Lesimemetelo setingilosi besingaveti kutsi Nkulunkulu utawemukela bonkhe bantfu noma ngabe bentani. Kunaloko, besikhuluma ngalabo labatawemukelwa nguNkulunkulu ngenca yekukholwa kwabo lokucinile kuye baphindze babe balandzeli beNdvodzana yakhe.—Hlola liphuzu lelicwaningiwe lelitsi kubantfu labemukelwa nguye kulelivesi.
kubantfu labemukelwa nguye: ‘Kwemukela’ lokukulesimemetelo setingilosi akusiko lokwentiwa bantfu, kepha ngulokwentiwa nguNkulunkulu. Ligama lesiGriki lelitsi eu·do·kiʹa lingaphindze lisho “kufisela umuntfu lokuhle; kujabula ngalotsite; kwemukela.” Sento lesihambisana nalo lesitsi eu·do·keʹo siyatfolakala kuMat 3:17; Mak 1:11; nakuLuk 3:22 (hlola emaphuzu lacwaningiwe aMat 3:17; naMak 1:11), lapho Nkulunkulu akhuluma neNdvodzana yakhe lebeyisandza kubhajatiswa. Lesento sinemcondvo “wekwemukela; wekujabula ngalotsite; wekumfisela lokuhle.” Ngaleso sizatfu, inkhulumo letsi “kubantfu labemukelwa nguye” (an·throʹpois eu·do·kiʹas) ingaphindze ihunyushwe itsi “kubantfu lajabulako ngabo; kubantfu labafisela lokuhle.” Ngako lesimemetelo setingilosi besingakhulumi ngabo bonkhe bantfu emhlabeni, kepha besisho bantfu labebatawujabulisa Nkulunkulu ngenca yekukholwa kwabo lokucinile kuye baphindze babe balandzeli beNdvodzana yakhe. Nkulunkulu abetawubemukela. Nanobe leligama lesiGriki lelitsi eu·do·kiʹa lingase lisho tifiso letinhle bantfu labangaba nato (Rom 10:1; Flp 1:15), ngalokuvamile lisho loko lokwemukelekako kuNkulunkulu, lokuyintsandvo yakhe, nome lokuhle emehlweni akhe (Mat 11:26; Luk 10:21; Efe 1:5, 9; Flp 2:13; 2Te 1:11). KuHla 51:18, i-Septuagint [50:20, LXX] isebentisa leligama nayisho “umusa” waNkulunkulu.
(Lukha 3:23) Ngesikhatsi Jesu acala umsebenti wakhe, abeneminyaka lengaba ngemashumi lamatsatfu budzala, futsi bantfu bebatsi uyindvodzana yaJosefa, labeyindvodzana yaHeli,
Bewati Yini?
Bekungubani babe waJosefa?
Babe waJesu wasemhlabeni bekunguJosefa waseNazaretha lobekangumbati. Bekungubani babe waJosefa? LiVangeli laMatewu litsi bekunguJakobe kantsi liVangeli laLukha lona litsi Josefa ‘abeyindvodzana yaHeli.’ Yini leyenta kutsi letincwadzi letimbili tikhulume tintfo letingafani?—Lukha 3:23; Matewu 1:16.
Incwadzi yaMatewu itsi: “Jakobe watala Josefa,” kulelivesi kusetjentiswe ligama lesiGriki lelikhombisa kutsi lona bekungubabe waJosefa lomtalako. Matewu watfola lusendvo lwaJosefa, kusukela enkhosini Davide kuze kufike kuJesu. Lwaveta kutsi Jesu loyindvodzana yaJosefa nguye lonelilungelo lekubusa.
Kantsi incwadzi yaLukha itsi: ‘Josefa abeyindvodzana yaHeli.’ Lamavi latsi “indvodzana ya-” angaphindze asho kutsi “umkhwenyane wa-.” Loku kuphindze kwenteke nasendzabeni lekuLukha 3:27, lekhuluma ngaSheyaltiyeli lobekatalwa nguJowanani kepha lophindze abitwe ngekutsi ‘ngumsa waNeri.’ (1 Tikhronike 3:17; Matewu 1:12) Kungenteka kutsi Sheyaltiyeli abeshade nendvodzakati yaNeri lokwamenta waba yindvodzana yakhe. Ngendlela lefanako, Josefa abeyindvodzana yaHeli ngoba watsatsa Mariya lobekayindvodzakati yaHeli. Ngako Lukha walandzela luhla lwekutalwa kwaJesu lwakhabomake wakhe ngobe vele Jesu watalwa nguMariya. (Roma 1:3) LiBhayibheli lisitjela ngelusendvo lwakuboJosefa nelwakuboMariya futsi luyasisita kutsi sati ngemlandvo waJesu.
Kufundvwa KweliBhayibheli
(Lukha 2:1-20) Kulawo malanga, Khesari Agustusi wakhipha umyalo wekutsi bonkhe bantfu labangephansi kwembuso wakhe batewubhaliswa, 2 (lokubhaliswa kwekucala kwentiwa ngesikhatsi Kwiriniyusi abusa eSiriya), 3 futsi bonkhe bantfu bahamba bayewubhaliswa, nguloyo naloyo waya edolobheni lakubo. 4 Josefa naye wesuka eNazaretha yaseGalile, waya eBhetlehema yaseJudiya, lobekulidolobha laDavide, ngobe abewemndeni waDavide. 5 Wahamba naMariya bayewubhaliswa. Ngaleso sikhatsi Mariya abesangumkakhe, futsi abesatawubeleka. 6 Nasebalapho, sefika sikhatsi sekutsi abeleke. 7 Watala indvodzana, yaba litibulo lakhe, futsi wayiphutsetela ngendvwangu wayibeka emkhombeni, ngobe bekute indzawo endlini yetivakashi. 8 Kuleso sifundza, kwakunebelusi lebebahlala ngephandle beluse imihlambi yabo ebusuku. 9 Ngekushesha ingilosi yaJehova yema embikwabo, futsi inkhatimulo yaJehova yabakhanyisela, besaba kakhulu. 10 Kodvwa lengilosi yatsi kubo: “Ningesabi! Ngobe ngiletse tindzaba letimnandzi letitawujabulisa bonkhe bantfu, 11 lamuhla, edolobheni laDavide nitalelwe uMsindzisi, iNkhosi lenguKhristu. 12 Naku lenitakubona: Nitawutfola luswane lugocotelwe ngendvwangu, lubekwe emkhombeni.” 13 Ngekushesha, lengilosi yabonakala seyikanye nelibutfo lasezulwini lelalidvumisa Nkulunkulu litsi: 14 “Akadvunyiswe Nkulunkulu losezulwini, futsi akube nekuthula emhlabeni kubantfu labemukelwa nguye.” 15 Nasetihambile letingilosi tabuyela ezulwini, labelusi bakhuluma bodvwa batsi: “Asambeni siye eBhetlehema, siyewubona loku lokwentekile, loko Jehova lasitjele kona.” 16 Bahamba ngekushesha, batfola Mariya kanye naJosefa, futsi lomntfwana abelele emkhombeni. 17 Nabambona lomntfwana, bakhuluma ngaloko lebebatjelwe kona ngaye. 18 Bonkhe labeva bamangala kakhulu ngaletintfo lebetikhulunywa ngulabelusi, 19 kodvwa Mariya watigcina engcondvweni tonkhe letintfo, futsi wazindla ngato. 20 Labelusi bancandzeka, badvumisa futsi babonga Nkulunkulu ngato tonkhe letintfo lebebativile nalebebatibonile, njengobe nje bebatjelwe tona.
JUNE 25, 2013–JULY 1, 2013
UMCEBO LOSEVINI LANKULUNKULU | LUKHA 4-5
“Melana Netilingo NjengaJesu”
(Lukha 4:1-4) Jesu wesuka eJordane agcwele umoya longcwele, futsi lomoya wamhola wamyisa ehlane, 2 wahlala khona emalanga langemashumi lamane, alingwa nguDeveli. Ngalawo malanga, abengadli lutfo, ngako atsi nakaphela walamba kakhulu. 3 Develi watsi kuye: “Nangabe uyindvodzana yaNkulunkulu, tjela lelitje lishintje libe sinkhwa.” 4 Kodvwa Jesu watsi kuye: “Kubhaliwe kutsi: ‘Umuntfu ngeke aphile ngesinkhwa sodvwa.’”
Hlobo Luni Lwemuntfu Lofuna Kuba Ngilo?
8 Sathane wasebentisa emachinga lafananako ngesikhatsi alinga Jesu ehlane. Ngemuva kwekutsi Jesu azile kudla emalanga langu-40 nebusuku lobungu-40, Sathane wetama kulinga Jesu ngekudla. Sathane watsi: “Nangabe uyiNdvodzana yaNkulunkulu, tjela nali litje ligucuke libe sinkhwa.” (Luk. 4:1-3) Jesu abenetintfo letimbili labengatenta: Bekangakhetsa kungawasebentisi lamandla akhe kute agucule lamatje abe sinkhwa, nobe awasebentise. Jesu bekati kutsi abengeke awasebentise lamandla akhe ngenca yetifiso takhe tebugovu. Nanobe abelambile, kodvwa akazange avumele indlala kutsi ite kucala kuye kunekugcina buhlobo bakhe naJehova. Jesu waphendvula watsi: “UmBhalo utsi: ‘Umuntfu angeke aphile ngesinkhwa sodvwa.’”—Luk. 4:4.
(Lukha 4:5-8) Ngako wakhuphuka naye wamkhombisa yonkhe imibuso yemhlaba ngesikhashana nje. 6 Develi wase utsi kuye: “Ngitakunika lonkhe ligunya kulemibuso kanye nebuhle bayo, ngobe inikwe mine futsi ngiyinika nobe ngubani lengifuna kumnika yona. 7 Ngako nawungaguca ungikhonte, konkhe loku kutawuba kwakho.” 8 Jesu wamphendvula watsi: “Kubhaliwe kutsi: ‘Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.’”
Hlobo Luni Lwemuntfu Lofuna Kuba Ngilo?
10 Kwentekani endzabeni yaJesu? Sathane “wamkhombisa [Jesu] ngekushesha lokukhulu yonkhe imibuso yemhlaba, watsi: ‘Ngitakunika onkhe lamandla, nabo bonkhe lobunjinga.’” (Luk. 4:5, 6) Jesu abengeke ayibone yonkhe lemibuso ngesikhashana nje, kodvwa Sathane wacabanga kutsi nakaveta ludvumo lwalemibuso, ngembono, abengakhangeka Jesu. Ngesibindzi, Sathane watsi: “Konkhe loku kungaba kwakho nawungamane ungikhotsamele kanye nje.” (Luk. 4:7) Yayingekho indlela yekutsi Jesu abe luhlobo lwemuntfu Sathane labefuna abe ngilo. Waphendvula ngekushesha, watsi: “UmBhalo utsi: ‘Khotsama iNkhosi Nkulunkulu wakho, umkhonte yena yedvwa!’”—Luk. 4:8.
(Lukha 4:9-12) Ngemuva kwaloko wamyisa eJerusalema, wammisa esicongweni selithempeli, watsi kuye: “Nangabe uyindvodzana yaNkulunkulu, tijike phansi, 10 ngobe kubhaliwe kutsi: ‘Utawutfuma tingilosi takhe kutsi tikuvikele, 11 futsi titakwetfwala ngetandla tato kute lunyawo lwakho lungake lukhutjwe litje.’” 12 Jesu watsi kuye: “Kutsiwa: ‘Ungabomlinga Jehova Nkulunkulu wakho.’”
I-video leku-nwtsty
Sicongo SeliThempeli
Kungenteka kutsi Sathane wambeka mbamba Jesu “esicongweni selithempeli” waphindze wamtjela kutsi atijike phansi, kodvwa akwatiwa kutsi wambeka ngakuliphi likona lelithempeli. Kusetjentiswa kweligama lelitsi “lithempeli” lana kungasho lithempeli lilonkhe, ngako kungenteka kutsi Jesu bekeme ekoneni leliseningizimu mphumalanga (1) yelithempeli. Nobe kungenteka bekeme kulelinye likona lelithempeli. Nangabe Jesu awa kunobe nguyiphi yaletindzawo, bekatawufa nangabe Nkulunkulu bekangeke angenele.
Hlobo Luni Lwemuntfu Lofuna Kuba Ngilo?
12 Ngalokwehlukile na-Eva, Jesu wabeka sibonelo lesihle sekutfobeka. Sathane wetama kumlinga ngalenye indlela, kodvwa Jesu wala ngisho nekwenta sento lebesitawuvivinya Nkulunkulu. Bekungasho kutigcabha loko. Kunaloko, imphendvulo yaJesu beyicacile futsi icondzile, itsi: “UmBhalo futsi utsi: ‘Ungayilingi iNkhosi, Nkulunkulu wakho.’”—Fundza Lukha 4:9-12.
Kufunisisa Umcebo EVini LaNkulunkulu
(Lukha 4:17) Ngako bamniketa umculu wemphrofethi Isaya, wase uyawuvula waya lapho kubhalwe khona kutsi:
Liphuzu lelicwaningiwe laLuk 4:17 leliku-nwtsty
umculu wemphrofethi Isaya: Umculu waseLwandle Lolufile wa-Isaya bewentiwe ngetikhumba letingu-17 lebetihlanganisiwe taba ngu-7.3 wemamitha budze, futsi taba netigaba letingu-54. Kungenteka nemculu lobewusetjentiswa esinagogeni laseNazaretha bewungako. Njengoba ekhulwini lekucala bekute tehluko kanye netinombolo temavesi, bekufanele Jesu ati kutsi sikuphi sigaba lebekafuna kusifundza. Ngesizatfu sekutsi wavele waya lapho bekubhalwe khona emavi esiphrofetho, loko kuveta kutsi bekatayelene kakhulu neliVi laNkulunkulu.
(Lukha 4:25) Nginitjela liciniso ngitsi: Emalangeni a-Elija, bebabanyenti bafelokati ka-Israyeli ngesikhatsi litulu lingani iminyaka lemitsatfu netinyanga letisitfupha, kwaze kwaba nendlala lenkhulu kulo lonkhe live.
Liphuzu lelicwaningiwe laLuk 4:25 leliku-nwtsty
iminyaka lemitsatfu netinyanga letisitfupha: Ngekusho kwa-1Kh 18:1, Elija wamemetela kuphela kwesomiso “emnyakeni wesitsatfu.” Ngako, labanye batsi Jesu abekuphikisa lokubhalwe ku-1 Emakhosi. Nome kunjalo, imiBhalo yesiHebheru ayisho kutsi lesomiso satsatsa sikhatsi lesingephansi kweminyaka lemitsatfu. Lomusho lotsi “emnyakeni wesitsatfu” ubala kusukela ngesikhatsi Elija lacala ngaso kumemetela indzaba yesomiso ku-Ahabi. (1Kh 17:1) Lesimemetelo kungenteka sakhishwa sesicalile sikhatsi semnyaka lapho litulu lingani khona, lokusikhatsi lebesivamise kutsatsa tinyanga letisitfupha, kodvwa ngalowo mnyaka lokungenteka satsatsa tinyanga letinyenti. Lesomiso asizange siphele ngekushesha ngesikhatsi Elija aphindze abuyela ku-Ahabi “emnyakeni wesitsatfu,” kodvwa saphela ngemva kwaloko lokwenteka eNtsabeni iKhameli. (1Kh 18:18-45) Ngesizatfu saloko, emavi aJesu labhalwe kulelivesi, kuhlanganise newemnakabo labhalwe kuJak 5:17, avumelana kahle nekulandzelana kwetikhatsi lokuku-1Kh 18:1.
Kufundvwa KweliBhayibheli
(Lukha 4:31-44) Wase uya eKhaphanawume, lokulidolobha laseGalile. NgeliSabatha wacala kufundzisa, 32 futsi bantfu yabamangalisa indlela labefundzisa ngayo, ngobe abekhuluma njengemuntfu loneligunya. 33 Lapho esinagogeni, kwakunendvodza leyayinelidimoni, futsi yamemeta kakhulu yatsi: 34 “Ufunani lapha Jesu waseNazaretha? Utele kutesibhubhisa yini? Ngiyati kutsi ungubani, unguLongcwele waNkulunkulu.” 35 Jesu walekhuta lelidimoni, watsi: “Bindza, futsi uphume kuye.” Ngako lelidimoni layilahla phansi lendvodza, lase liyaphuma kuyo lingakayilimati. 36 Bantfu bamangala kakhulu ngaloku, bakhuluma bodvwa batsi: “Yinkhulumo lenjani lena, ngobe ukhipha emadimoni ngeligunya nangemandla, futsi avele aphume?” 37 Ngako imibiko lemayelana naye yagcwala kuto tonkhe tindzawo. 38 Nakaphuma esinagogeni, waya endlini yaSimoni. Uninatala waSimoni abephetfwe ngumkhuhlane lomubi, futsi bacela Jesu kutsi amsite. 39 Ngako wema eceleni kwakhe wamelapha, lomkhuhlane waphela. Loninatala waPhetro wavuka ngekushesha wabalungisela kudla. 40 Nasekuhlwa, bantfu baletsa kuye labo labebagula baphetfwe tifo letehlukahlukene. Bonkhe abebabeka tandla abelaphe. 41 Emadimoni abephuma kulabanyenti, amemete atsi: “Wena uyiNdvodzana yaNkulunkulu.” Kodvwa wawekhuta futsi wangawavumeli kutsi akhulume ngobe abemati kutsi unguKhristu. 42 Ngakusasa, waphuma waya endzaweni lethulile. Kodvwa sicumbi sebantfu samfuna sate sefika lapho abekhona khona, futsi setama kumvimbela kutsi angahambi. 43 Watsi kuso: “Nakulamanye emadolobha kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” 44 Ngako wachubeka ashumayela emasinagogeni aseJudiya.