Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
NOVEMBER 4-10
UMCEBO LOSEVINI LANKULUNKULU | 1 JOHANE 1–5
“Ningalithandi Izwe Noma Izinto Ezisezweni”
(1 Johane 2:15, 16) Ningalitsandzi live nobe tintfo letikulo. Nangabe umuntfu atsandza live, lutsandvo lwaBabe alukho kuye; 16 ngobe tonkhe tintfo letiseveni—sifiso senyama, sifiso semehlo kanye nekugabisa ngetintfo umuntfu lanato, akuveli kuBabe kodvwa kuvela eveni.
w05-ZU 1/1 10 ¶13
Hamba Etinyatselweni TaJesu
13 Labanye bangahle babe nemuva wekutsi akusiyo yonkhe intfo lekulelive lekabi. Nobe kunjalo, live kanye netintfo letikhangako tingasiphatamisa kalula ekukhonteni Jehova. Futsi kute ngisho nayinye intfo lekulelive lengasenta sisondzelane naNkulunkulu. Kodvwa nangabe sititsandza kakhulu tintfo letikulelive ngisho netintfo letingasiko kabi ngekwato, singatikhandza sisengotini. (1 Thimothi 6:9, 10) Ecinisweni, tintfo letinyenti letikulelive tikabi futsi tingasiphatamisa. Nangabe sibukela emafilimu nobe tinhlelo letiku-TV letikhombisa budlova, kutsandza nobe kutiphatsa kabi ngekwelicansi, singatikhandza sesite inkinga nato futsi sigcine sesitenta. Nangabe sitijwayelanisa nebantfu labanesifiso sekuphila imphilo lesezingeni lelisetulu nobe sekuba nemabhizinisi lamanyenti, natsi singatikhandza sesicabanga ngato kakhulu.—Matewu 6:24; 1 Khorinte 15:33.
(1 Johane 2:17) Ngetulu kwaloko, live liyendlula kanye nesifiso salo, kodvwa loyo lowenta intsandvo yaNkulunkulu uhlala kuze kube phakadze.
Hlobo Luni Lwemuntfu Lofuna Kuba Ngilo?
18 Lokunye lokusisita kutsi simelane “netintfo letiseveni” kugcina engcondvweni emavi laphefumulelwe lashiwo nguJohane latsi: “Live liyendlula netinkhanuko talo, kodvwa lowo lowenta intsandvo yaNkulunkulu, uyawuphila kuze kube phakadze.” (1 Johane. 2:17) Lelive lelibuswa nguSathane libonakala litawuba khona njalo futsi liyintfo sibili. Nobe kunjalo ngalelinye lilanga litawubhujiswa. Kute lesiniketwa kona ngulelive laSathane lokutawuhlala njalo. Kukhumbula leliciniso kutasisita simelane netilingo taDeveli.
Kufunisisa Umcebo EVini LaNkulunkulu
(1 Johane 2:7, 8) Bazalwane labatsandzekako, anginibhaleli umyalo lomusha kodvwa nginibhalela umyalo lomdzala lenawutfola kusukela ekucaleni. Lomyalo lomdzala ulivi lenaliva. 8 Ngetulu kwaloko nginibhalela umyalo lomusha, lokungumyalo naye lawugcina, nani leniwugcinako, ngobe bumnyama buyendlula nekukhanya kweliciniso sekuvele kuyakhanya.
Tikhumbuto TaJehova Tetsembekile
14 ImiBhalo YemaKhristu YesiGriki icuketse tikhumbuto letisisita kutsi sikhombise lutsandvo ngalabanye. Jesu watsi umyalo wesibili lomkhulu ‘kutsandza makhelwane wakho, njengobe utitsandza wena.’ (Mat. 22:39) NaJakobe umnakabo Jesu watsi lutsandvo ‘ngumtsetfo webukhosi.’ (Jak. 2:8) Umphostoli Johane wabhala watsi: “Batsandzekako, anginibhaleli wona umyalo lomusha kodvwa wona lowo lomdzala lenawuva kusukela ekucaleni.” (1 Joh. 2:7, 8) Johane bekabhekisele kukuphi nakakhuluma ‘ngemyalo lomdzala’? Bekabhekisele emyalweni welutsandvo. ‘Wawumdzala’ ngemcondvo wekutsi Jesu wawukhipha eminyakeni leminyenti leyendlulile, “kusukela ekucaleni.” Kodvwa ‘wawumusha’ ngobe bafundzi bakhe kamuva bekufanele bakhombise lutsandvo lwekutidzela kuletinye timo letinsha lebebabhekene nato. Njengobe sibafundzi baKhristu, asitijabuleli yini tecwayiso letisisita kutsi singabi nemona njengobe bantfu labanyenti emhlabeni banawo, lokungatsikameta lutsandvo lwetfu ngabomakhelwane betfu?
(1 Johane 5:16, 17) Nangabe lotsite abona umzalwane wakhe enta sono lesingakuletsi kufa, kufanele athantaze, futsi Nkulunkulu utamnika kuphila loyo muntfu, lokusho labo labente sono lesingaletsi kufa. Kodvwa sikhona sono lesiletsa kufa. Ngako angisho kutsi akuthantazwe mayelana naleso sono. 17 Konkhe kungalungi kusono, kepha kunesono lesingakuletsi kufa.
it-1-E 862 ¶5
Kutsetselelwa
Kuyintfo lekahle kuthantazela kutsi Nkulunkulu atsetselele tono talabanye, ngisho nobe kulibandla lonkhe. Mosi wakwenta loko nakathantazela sive sema-Israyeli, avuma tono taso sonkhe lesive wacela Nkulunkulu kutsi asitsetselele. Jehova wawuva umthantazo wakhe. (Num. 14:19, 20) Ngesikhatsi kunikelwa lithempeli, Solomoni naye wathantazela kutsi Jehova atsetselele bantfu bakhe nangabe baphendvuka etonweni tabo. (1 Khos. 8:30, 33-40, 46-52) Ezra naye wathantaza embikwabo bonkhe bantfu avuma tono temaJuda lebekatfunjiwe. Umthandazo wakhe losuka enhlitiyweni nekuncusa kwakhe kwenta kutsi bantfu batsatse sinyatselo lesitsite kute Jehova abacolele. (Ezra 9:13–10:4, 10-19, 44) Jakobe wakhutsata umuntfu logulako ebuuhlotjeni bakhe naNkulunkulu kutsi atjele emadvodza lamadzala elibandla kutsi amthantazele, “nangabe onile, utawutsetselelwa.” (Jak. 5:14-16) Nobe kunjalo, ‘kunesono lesiletsa kufa,’ lokusono lesimelene nemoya longcwele, lokukwenta sono ngemabomu, leso sono ngeke sitsetselelwe. UmKhristu akukafaneli ababeke emthantazweni bantfu labona ngemabomu.—1 Joh. 5:16; Mat. 12:31; Heb. 10:26, 27; buka nalesitsi SIN, I; SPIRIT.
Kufundvwa KweliBhayibheli
(1 Johane 1:1–2:6) Sinibhalela mayelana nelivi lekuphila lebelikhona kusukela ekucaleni, lesilivile, salibona ngemehlo etfu, salibuka futsi salitsintsa ngetandla tetfu, 2 (yebo lokuphila kwavetwa, sikubonile, futsi sifakaza siphindze sinibikele ngekuphila lokuphakadze lokwavela kuBabe nalokwavetwa kitsi,) 3 lelo lesilibonile nalesilivile sinibikela ngalo, kuze nani nitewuba nebudlelwane natsi. Ngetulu kwaloko, tsine sinebudlelwane naBabe kanye neNdvodzana yakhe Jesu Khristu. 4 Ngako sibhala letintfo kuze injabulo yetfu itewuba yinkhulu. 5 Ngulona umlayeto lesiwuve kuye nalesiwumemetela kini, kutsi Nkulunkulu ukukhanya nekutsi kute bumnyama kuye. 6 Nangabe sitsi: “Sinebudlelwane naye,” kodvwa sibe sichubeka sihamba ebumnyameni, sisuke sinemanga futsi singaphili ngeliciniso. 7 Kodvwa nangabe tsine sihamba ekukhanyeni njengobe naye asekukhanyeni, sisuke sinebudlelwane, futsi ingati yaJesu iNdvodzana yakhe iyasihlanta kuto tonkhe tono. 8 Nangabe sitsi: “Site sono,” sisuke sitiyenga, neliciniso alikho kitsi. 9 Nangabe sitivuma tono tetfu, yena wetsembekile futsi ulungile, ngako utasitsetselela tono tetfu, asihlante kuko konkhe kungalungi. 10 Nangabe sitsi: “Asonanga,” sisuke simenta umcambimanga, nelivi lakhe alikho kitsi.
2 Bantfwabami, nginibhalela letintfo kuze ningoni. Kepha nangabe lotsite ona, sinemsiti kuBabe, Jesu Khristu lolungile. 2 Ungumhlatjelo wekuhlawulela tono tetfu, hhayi tetfu kuphela kodvwa netalo lonkhe live. 3 Ngaloku siyabona kutsi sesiyamati, nangabe sichubeka sigcina imiyalo yakhe. 4 Umuntfu lotsi: “Sengiyamati,” kepha abe angayigcini imiyalo yakhe, ungumcambimanga, neliciniso alikho kuye. 5 Kodvwa nobe ngubani logcina livi lakhe, lutsandvo lwaNkulunkulu lwentiwe lwaphelela kuloyo muntfu. Ngaloku siyati kutsi sisebunyeni naye. 6 Loyo lotsi uhlala asebunyeni naye kufanele achubeke ahamba ngendlela naye lahamba ngayo.
NOVEMBER 11-17
UMCEBO LOSEVINI LANKULUNKULU | 2 JOHANE 1–JUDA
“Kufanele Silwele Kuhlala Ecinisweni”
(Juda 3) Bazalwane labatsandzekako, ngisho nobe bengenta konkhe lokusemandleni ami kuze nginibhalele ngensindziso lesinayo sonkhe, ngikubone kukuhle kunibhalela kute nginikhutsate kutsi nikulwele kamatima kukholwa lokwanikwa labangcwele kwaba kanye kuphela.
w04 9/15 11-12 ¶8-9
“Chubekani Nitfola Emandla ENkhosini”
8 Siyawati emacebo aSathane ngoba imibhalo iyayiveta indlela lasebenta ngayo. (2 Khorinte 2:11) Kuze amelane naJobe indvodza lebeyetsembekile, Develi wasebentisa tintfo letehlukahlukene, tintfo letifaka ekhatsi kuwa kwesimo semnotfo, kufelwa, kuphikiswa ngemalunga emndeni, kugula, kuphukutwa bangani mbumbulu. Jobe wativa acindzetelekile futsi besekacabanga kutsi Nkulunkulu umlahlile. (Jobe 10:1, 2) Ngisho nobe Sathane angatibangeli ngalokucondzile letinkinga lamuhla, kodvwa tiyawatsintsa emaKhristu futsi Develi angatisebentisa kuze afeze tinjongo takhe.
9 Tintfo letingalimata buhlobo betfu naJehova tandza ngekushesha kulesikhatsi sekugcina. Siphila eveni lapho kufuna kuba netintfo letinyenti kubekwa embili kunekufuna kuba nebuhlobo lobuhle naNkulunkulu. Live liveta kutiphatsa kabi ngekwelicansi njengentfo lengumtfombo wenjabulo kunekutsi kubangele tinkinga. Bantfu labanyenti batsandza “injabulo kunekutsandza Nkulunkulu.” (2 Thimothi 3:1-5) Kucabanga ngalendlela kungafaka buhlobo betfu naNkulunkulu engotini ngaphandle nangabe ‘sikulwela kamatima kukholwa.’—Juda 3.
Kufunisisa Umcebo EVini LaNkulunkulu
(Juda 4) Sizatfu kutsi labanye bantfu sebangene ngekunyenya emkhatsini wenu, nemiBhalo yasho kadzeni kutsi batawutfola sehlulelo, babantfu labangamhloniphi Nkulunkulu, labagucula umusa wakhe bawente saba sekutiphatsa lokubi kwekweyisa futsi abetsembeki kuloyo lokunguye kuphela uMnikati neNkhosi yetfu, Jesu Khristu.
(Juda 12) Laba bangemadvwala lafihlwe ngephansi kwemanti emicimbini yenu yekukhombisana lutsandvo, babe basemadzilini kanye nani, babelusi labatondla ngekungesabi; bangemafu lete imvula lapheshulwa ngumoya; batihlahla tasekupheleni kwentfwasabusika kodvwa letingatseli, letife imfakabili naletisishuliwe;
it-2-E 279
Imicimbi Yekukhombisana Lutsandvo
LiBhayibheli alichazi kabanti ngalemicimbi yekhombisana lutsandvo futsi aliveti nekutsi beyentiwa kangakhi. (Juda 12) Inkhosi Jesu Khristu nebaphostoli bayo akazange basho kutsi yentiwe, futsi kuyacaca kutsi loku bekungasiwo umtsetfo futsi bekungasiyo intfo lebeyitawuhlala njalo. Labanye batsi lena bekuyimicimbi lapho khona emaKhristu lanjingile bekamema emaKhristu laphuyile. Bekumenywa tintsandzane, bafelokati, labanjingile, nalabo tintfo lebetingabahambeli kahle, kutsi badle ndzawonye ngemoya webuzalwane.
it-2-E 816
Lidvwala
Lelinye ligama lesiGriki lelitsi, spi·lasʹ, lisho lidvwala lelisemantini. Juda walisebentisa kute achaze emadvodza latsite lebekangene ebandleni lebuKhristu ngetisusa letikhohlakele. Njengobe lidvwala lelifihleke emantini lingabanga ingoti emakhunjini, nalamadvodza bekayingoti lenkhulu kulabanye ebandleni. Nakakhuluma ngalamadvodza watsi: “Laba bangemadvwala lafihlwe ngephansi kwemanti emicimbini yenu yekukhombisana lutsandvo.”—Juda 12.
(Juda 14, 15) Enoki, umuntfu wesikhombisa esitukulwaneni sa-Adamu, naye waphrofetha ngabo nakatsi: “Bukani, Jehova weta nemashumi etinkhulungwane etingilosi takhe letingcwele, 15 kuze abehlulele bonkhe, alahle bonkhe labangamhloniphi ngenca yetento tabo letimbi labatentile, nangetintfo letetfusako toni letingamhloniphi letitikhulume ngalokumelene naye.”
“Abemjabulisile Nkulunkulu”
Besitsini siphrofetho sa-Enoki? Besitsi: “Bukani, Jehova weta nemashumi etinkhulungwane etingilosi takhe letingcwele, kuze abehlulele bonkhe, alahle bonkhe labangamhloniphi ngenca yetento tabo letimbi labatentile, nangetintfo letetfusako toni letingamhloniphi letitikhulume ngalokumelene naye.” (Juda 14, 15) Intfo yekucala lokungenteka uyinakile, kutsi Enoki wakhuluma shengatsi Nkulunkulu sewuvele utentile letintfo letishiwo ngulesiphrofetho. Nalabanye baphrofethi labalandzela nabo bamlingisa. Lokubalulekile kutsi: Lomphrofethi ukhuluma ngetintfo letitawenteka mbamba, kube shengatsi tintfo lesetivele tentekile!—Isaya 46:10.
“Abemjabulisile Nkulunkulu”
Kukholwa kwa-Enoki kusenta sitibute kutsi sinembono waNkulunkulu yini ngalelive lesiphila kulo. Lesehlulelo Enoki lasimemetela ngesibindzi sisasebenta nalamuhla, njengobe nje besisebenta nangesikhatsi sakhe. Ngekuvumelana nesecwayiso sa-Enoki, Jehova waletsa Zamcolo lomkhulu kulelive lebelikhohlakele langesikhatsi saNowa. Kuyoba njalo nangembhubhiso lenkhulu letako. (Matewu 24:38, 39; 2 Phetro 2:4-6) Nalamuhla, Nkulunkulu netingilosi takhe letingcwele bakulungele kuletsa sehlulelo sekulunga kulelive lelingamhloniphi Nkulunkulu. Ngamunye wetfu kufanele ahlale asikhumbula lesicwayiso futsi asitjele nalabanye. Emalunga emndeni nebangani betfu bangase basiphikise futsi ngaletinye tikhatsi singahle sitive sisodvwa. Jehova angeke aze atilahle tinceku takhe letetsembekile, njengobe nje angazange amlahle Enoki.
Kufundvwa KweliBhayibheli
(2 Johane 1-13) Mine njengendvodza leseyikhulile, ngibhalela umfati lokhetsiwe kanye nebantfwana bakhe lengibatsandza kakhulu, kungasimi kuphela kodvwa nabo bonkhe labati liciniso. 2 Sinitsandza ngenca yeliciniso lelihlala kitsi, nalelitawuchubeka likitsi phakadze. 3 Umusa, sihawu nekuthula lokuvela kuNkulunkulu longuBabe nakuJesu Khristu iNdvodzana yakhe, kanye neliciniso nelutsandvo kutawuba natsi. 4 Ngijabula kakhulu ngobe ngitfole kutsi labanye kubantfwana bakho bahamba ecinisweni, njengobe nje Babe asiyala. 5 Ngako nyalo ngiyakucela wena mfati lokhetsiwe, kutsi sibonisane lutsandvo (angikubhaleli umyalo lomusha, kodvwa ngikubhalela wona lowo lebesinawo kusukela ekucaleni). 6 Nguloku lokushiwo lutsandvo, kutsi sichubeke sihamba ngekuvumelana nemiyalo yakhe. Lona nguwo lomyalo, njengobe nje nawuva ekucaleni, kuze nichubeke nihamba kuwo. 7 Ngobe sebanyenti bakhohlisi eveni, lokubantfu labangavumi kutsi Jesu Khristu weta asenyameni. Laba-ke ngibo labangumkhohlisi nemphikikhristu. 8 Ticapheleni kuze ningalahlekelwa tintfo lesatisebentela, kodvwa kutsi nitfole umvuzo logcwele. 9 Wonkhe umuntfu lowecela ngale kwemfundziso yaKhristu futsi angahlali kuyo, akasimunye naNkulunkulu. Loyo lohlala kulemfundziso nguye lomunye naBabe kanye neNdvodzana. 10 Nangabe umuntfu efika kini kodvwa angeti nalemfundziso, ningamemukeli emakhaya enu futsi ningambingeleli. 11 Ngobe loyo lombingelelako uhlanganyela naye emisebentini yakhe lemibi. 12 Nanobe nginetintfo letinyenti lenginganibhalela tona, angifisi kwenta kanjalo ngeliphepha ne-inki, kodvwa ngifisa kuta kini ngikhulume nani buso nebuso, khona injabulo yenu itewuba yinkhulu. 13 Bantfwana badzadzewenu, longulokhetsiwe, bayakuvusela.
NOVEMBER 18-24
UMCEBO LOSEVINI LANKULUNKULU | SEMBULO 1–3
“Ngiyatati Tento Takho”
(Sembulo 1:20) Ngulena imfihlo lengcwele yetinkhanyeti letisikhombisa lotibone esandleni sami sangesekudla, neyetintsi tetibane letisikhombisa teligolide: Tinkhanyeti letisikhombisa timelela tingilosi temabandla lasikhombisa, netintsi tetibane letisikhombisa timelela emabandla lasikhombisa.
“Unjani Umoya Leniwukhombisako?”
8 Kute siwubalekele umoya lonjalo, singakhumbula kutsi eBhayibhelini Jesu uchazwa ngekutsi ‘esandleni sakhe sangesekudla uphetse tinkhanyeti letisikhombisa.’ ‘Letinkanyeti’ timelela babonisi labagcotjiwe, nabo bonkhe labababonisi emabandleni. Jesu angacondzisa ‘letinkanyeti’ letisesandleni sakhe ngendlela yena layibona ifanele. (Semb. 1:16, 20) Njengobe ayiNhloko yelibandla lebuKhristu, Jesu uyaticondzisa tigungu talabadzala. Nangabe lotsite kulesigungu adzinga seluleko, Loyo ‘lonemehlo lafanana nelilangabi lemlilo’ utawuciniseka ngekutsi loko kwentiwa ngesikhatsi nangendlela yaKhe. (Semb. 1:14) Nakusengakenteki loko, tsine kufanele sibahloniphe labo labagcotjwe ngemoya longcwele, ngobe Pawula wabhala: “Hloniphani baholi benu, nilalele imitsetfo yabo, ngobe balindza imiphefumulo yenu bangaphumuli, njengobe bayawulandzisa ngayo. Nanenta njalo, nibasita, umsebenti wabo batawenta ngekujabula, hhayi ngelusizi; ngobe nani kungeke kunisite loko.”—Heb. 13:17.
(Sembulo 2:1, 2) “Bhalela ingilosi yelibandla lase-Efesu utsi: Nati tintfo latishoko loyo lonetinkhanyeti letisikhombisa esandleni sakhe sangesekudla, lohamba emkhatsini wetintsi tetibane letisikhombisa teligolide: 2 ‘Ngiyatati tento takho, ngiyakwati kukhandleka nekucinisela kwakho, kutsi awubabeketeleli bantfu lababi, nekutsi uyabahlolisisa labo labatsi babaphostoli babe bangasibo futsi utfola kutsi babacambimanga.
Jehova Uyasigcina Kute Sitewusindziswa
11 Embonweni lokukhulunywa ngawo kuSembulo sehluko 2 kanye na-3, Jesu Khristu lokhatinyulisiwe uhlola emabandla lasikhombisa ase-Asia Minor. Lombono uveta kutsi Khristu ubona lokungetulu kwaloko lamabandla lahlangabetana nako. Kuletinye tindzawo, ubabita ngemabito abo bantfu aphindze abakhutsate nobe abayale. Kusho kutsini loko? Ekugcwalisekeni kwalombono, emabandla lasikhombisa amelela emaKhristu lagcotjiwe ngemuva kwa-1914, kantsi seluleko lesiniketwa lamabandla lasikhombisa sisebenta kuwo onkhe emabandla ebantfu baNkulunkulu lasemhlabeni wonkhe. Ngako-ke, senta kahle ngekuphetsa ngekutsi Jehova usebentisa iNdvodzana yakhe kute ahole bantfu bakhe. Singazuza njani kulesicondziso?
w01 1/15 20-21 ¶20
Hambisana Nenhlangano YaJehova
20 Kuhambisana nentfutfuko leyenteka enhlanganweni yaJehova, kudzinga kutsi sinake indzima yaloyo lokhetfwe nguNkulunkulu, Jesu Khristu, ‘loyinhloko yelibandla.’ (Efesu 5:22, 23) Kungako incwadzi ya-Isaya 55:4 itsi: “Buka la, ngimbeke waba ngufakazi etiveni, yebo, umholi nendvuna yetive.” Jesu uyakwati kuhola bantfu. Uyatati netimvu takhe kanye netento tato. Ecinisweni, ngesikhatsi ahlola emabandla lasikhombisa ase-Asiya Lencane, tikhatsi letisihlanu watsi: “Ngiyatati tento takho.” (Sembulo 2:2, 19; 3:1, 8, 15) Njengababe wakhe Jehova, naJesu uyatati tento tetfu. Ngaphambi kwekubatjela uMthantazo Losibonelo, Jesu watsi: “Nkulunkulu longuYihlo uyatati tintfo lenitidzingako ngisho nisengakaticeli.”—Matewu 6:8-13.
Kufunisisa Umcebo EVini LaNkulunkulu
(Sembulo 1:7) Bukani! Uta ngemafu, futsi onkhe emehlo atawumbona, nalabo labamgwaza batawumbona; tonkhe tive temhlaba titawulila ngenca yakhe. Yebo akube njalo, Amen.
UMbuso WaNkulunkulu Ususa Titsa Tawo
10 Simemetelo sesehlulelo. Tonkhe titsa teMbuso waNkulunkulu titawuphoceleleka kutsi tibone sentakalo lesitatenta ticindzeteleke kakhulu. Jesu watsi: “Bayawubona iNdvodzana yemuntfu ita isemafini, inemandla nenkhatimulo.” (Mak. 13:26) Lokubonakaliswa kwemandla ngendlela lengakavami kutawuba luphawu lwekutsi Jesu sewutele kutewumemetela sehlulelo. Kulenye incenye yesiphrofetho lesifananako lesimayelana nemalanga ekugcina, Jesu usiniketa imininingwane lebanti lemayelana nesehlulelo lesitawumenyetelwa ngaleso sikhatsi. Sitfola loko kwatiswa emfanekisweni wetimvu netimbuti. (Fundza Matewu 25:31-33, 46.) Bantfu labasekela uMbuso waNkulunkulu ngekwetsembeka batawehlulelwa ‘njengetimvu,’ futsi ‘batawuphakamisa tinhloko tabo’ baphawula kutsi ‘kusindziswa kwabo sekusedvute.’ (Luk. 21:28) Nanobe kunjalo, labo labaphikisana neMbuso batawehlulelwa ‘njengetimbuti’ futsi ‘bayawulila’ baphawule kutsi balindzelwe ‘kubhujiswa ngalokuphelele.’—Mat. 24:30; Semb. 1:7.
(Sembulo 2:7) Lonendlebe akeve loko umoya lokushoko emabandleni: Loncobako ngitamvumela kutsi adle esihlahleni sekuphila, lesisepharadisi laNkulunkulu.’
w09 1/15 31 ¶1
Emaphuzu Lagcamile Lasencwadzini YeSembulo—I
2:7—Liyini ‘lelipharadisi laNkulunkulu’? Njengobe lamagama lawa asentjetiswa kumaKhristu lagcotjiwe, lelipharadisi lokukhulunywa ngalo lapha lisho indzawo yasezulwini lenesimo sebupharadisi—lakuna Nkulunkulu khona. Labagcotjiwe labetsembekile batawuniketwa umvuzo wekutsi badle “esihlahleni sekuphila.” Batawutfola umtimba longafi.—1 Cor. 15:53.
Kufundvwa KweliBhayibheli
(Sembulo 1:1-11) Lesi sembulo saJesu Khristu, Nkulunkulu lamnika sona kuze abonise tinceku takhe tintfo letitawukwenteka masinyane. Watfuma ingilosi yakhe, wasiletsa ngayo ngetibonakaliso encekwini yakhe Johane, 2 lowafakaza ngelivi laNkulunkulu nangebufakazi baJesu Khristu, futsi wafakaza nangato tonkhe tintfo latibona. 3 Uyajabula loyo lofundza ngelivi lelivakalako, nalabo labeva emavi alesiphrofetho, kanye nalabo labagcina tintfo letibhalwe kuso; ngobe sikhatsi lesibekiwe sesisondzele. 4 Mine Johane ngibhalela emabandla lasikhombisa lasesifundzeni sase-Asiya: Shengatsi ningaba nemusa nekuthula lokuvela “kuLoyo lokhona, labekhona, futsi lotako,” nasemimoyeni lesikhombisa lesembikwesihlalo sakhe sebukhosi, 5 nakuJesu Khristu “longuFakazi Lowetsembekile,” “longuwekucala kuvuswa kulabafile,” “nalonguMbusi wemakhosi emhlaba.” Kuloyo lositsandzako nalowasikhulula etonweni tetfu ngengati yakhe, 6 wasenta saba ngumbuso nebaphristi kuNkulunkulu longuYise—akube yinkhatimulo nemandla kuze kube phakadze. Amen. 7 Bukani! Uta ngemafu, futsi onkhe emehlo atawumbona, nalabo labamgwaza batawumbona; tonkhe tive temhlaba titawulila ngenca yakhe. Yebo akube njalo, Amen. 8 “Mine ngingu-Alfa na-Omega,” kusho Jehova Nkulunkulu, “Loyo lokhona, labekhona, futsi lotako, longuSomandla.” 9 Mine Johane umzalwane wenu, lohlanganyela nani ekuhluphekeni, eMbusweni kanye nasekuciniseleni ebunyeni naJesu, ngaba sesihlengeni lokutsiwa yiPhatmose ngenca yekukhuluma ngaNkulunkulu nangekufakaza ngaJesu. 10 Ngekuphefumulelwa ngaba selangeni leNkhosi, futsi emvakwami ngeva livi lelikhulu lelifana nemsindvo welicilongo, 11 litsi: “Loku lokubonako kubhale emculwini bese ukutfumela emabandleni lasikhombisa: Lase-Efesu, eSmuna, ePhegamu, eThiyathira, eSadesi, eFiladelfiya, kanye nelaseLawodisiya.”
NOVEMBER 25–DECEMBER 1
UMCEBO LOSEVINI LANKULUNKULU | SEMBULO 4-6
“Kugabavula Kwemahhashi Lamane”
(Sembulo 6:2) Ngatsi nangibuka ngabona lihhashi lelimhlophe; lobekaligibele abephetse butjoki; wanikwa umchele, wahamba ancoba, ayocedzela nekuncoba kwakhe.
Kugabavula Kwemahhashi Lamane—Bobani Labagibeli Bemahhashi Labane?
Ngubani lomgibeli walelihhashi lelimhlophe? Kuyo yona lencwadzi yeSembulo, sifike sibone kutsi lomgibeli ungubani ngobe imbita ngekutsi “nguLivi waNkulunkulu.” (Sembulo 19:11-13) Lesicu lesitsi Livi, sisho kuJesu Khristu ngobe ungumkhulumeli waNkulunkulu. (Johane 1:1, 14) Ngetulu kwaloko, ubitwa ngekutsi ‘uyiNkhosi yemakhosi neMbusi webabusi’ uphindze achazwe ngekutsi ‘unguloWetsembekile naloLiciniso.’ (Sembulo 19:16) Kuyacaca kutsi uneligunya lekuba yinkhosi lelichawe, futsi akawasebentisi emandla akhe ngendlela lekhohlakele nalecindzetelako. Noma kunjalo, kunemibuto lephakamako.
wp17.3 4 ¶5
Kugabavula Kwemahhashi Lamane—Bobani Labagibeli Bemahhashi Labane?
Lamahhashi acala nini kugabadvula? Naka kutsi Jesu, umgibeli welihhashi lekucala, ucala kuligibela nakatfola umchele. (Sembulo 6:2) Jesu waniketwa nini umchele njengeNkhosi yasezulwini? Akazange anikwe ngesikhatsi nje abuyela ezulwini. LiBhayibheli lisitjela kutsi ngemuva kwekuvuswa kwakhe, walindza sikhatsi lesitsite. (Hebheru 10:12, 13) Jesu watjela balandzeli bakhe kutsi bebatawubona ngani kutsi lesikhatsi sekulindza sesiphelile nekutsi sewucale kubusa ezulwini. Watsi timo tekuphila emhlabeni betitawushintja tibe timbi kakhulu nakacala kubusa. Bekutawuba netimphi, indlala kanye netifo letingumshayabhuce. (Matewu 24:3, 7; Lukha 21:10, 11) Ngemuva nje kwemphi yelive yekucala leyaba khona nga-1914, kwavele kwacaca kutsi bantfu besebaphila esikhatsini lesimatima liBhayibheli lelisibita ngekutsi ‘ngemalanga ekugcina.’—2 Thimothi 3:1-5.
(Sembulo 6:4-6) Kwaphuma lelinye lihhashi lelinembala lobovu njengemlilo; lobekaligibele wavunyelwa kutsi asuse kuthula emhlabeni kuze bantfu babulalane bodvwa, wanikwa nenkemba lenkhulu. 5 Nalivula luphawu lwesitsatfu, ngeva sidalwa lesiphilako sesitsatfu sitsi: “Kota!” Ngatsi nangibuka ngabona lihhashi lelimnyama; lobekaligibele abephetse sikali esandleni sakhe. 6 Ngeva lokwakunjengelivi emkhatsini waletidalwa letine letiphilako kutsi: “Ilitha yakolo ngadenariyu, nemalitha lamatsatfu ebhali ngadenariyu; ungawadlabhatisi emafutsa emncuma kanye neliwayini.”
Kugabavula Kwemahhashi Lamane—Bobani Labagibeli Bemahhashi Labane?
Lomgibeli umelela timphi. Naka kutsi lomgibeli akasusi kuthula emaveni lambalwa nje kuphela, kepha ukususa emhlabeni wonkhe. Nga-1914, bekukwekucala ngca emlandvweni kutsi kube nemphi yemhlaba wonkhe. Kwalandzela imphi yemhlaba yesibili, leyenta umonakalo lomkhulu kunalena yekucala. Kulinganiselwa kutsi kusukela nga-1914 timphi tibulele bantfu labangetulu kwetigidzi letilikhulu, kantsi labanyenti balimala kabuhlungu.
wp17.3 5 ¶4-5
Kugabavula Kwemahhashi Lamane—Bobani Labagibeli Bemahhashi Labane?
“Ngatsi nangibuka ngabona lihhashi lelimnyama; lobekaligibele abephetse sikali esandleni sakhe. Ngeva lokwakunjengelivi emkhatsini waletidalwa letine letiphilako kutsi: ‘Ilitha yakolo ngadenariyu, nemalitha lamatsatfu ebhali ngadenariyu; ungawadlabhatisi emafutsa emncuma kanye neliwayini.’”—Sembulo 6:5, 6.
Lomgibeli umelela indlala. Siyabona kutsi kudla kudule kakhulu kangangekutsi ilitha yinye yakolo beyingabita denariyu munye, lobekuliholo lelilanga lonkhe ngelikhulu lekucala leminyaka! (Matewu 20:2) Lodenariyu munye bekangaphindze atsenge emalitha lamatsatfu ebhali, lebeyinesisindvo lesincane kunesakolo. Loko bekungawondla emalanga lamangakhi nje umndeni lomkhulu? Kungako bantfu babese becwayiswa kutsi bonge emafutsa emncuma kanye neliwayini, lokungenteka bekukudla lobekuvamile ngaleso sikhatsi.
(Sembulo 6:8) Ngatsi nangibuka ngabona lihhashi lelihhwabile; lobekaligibele abeneligama lelitsi Kufa. LiThuna belimlandzela edvute. Loku kwanikwa ligunya ngetulu kwencenye yesine yemhlaba, kuze kubulale ngenkemba lendze, ngendlala, ngesifo lesibulalako, nangetilwane tesiganga letisemhlabeni.
wp17.3 5 ¶8-10
Kugabavula Kwemahhashi Lamane—Bobani Labagibeli Bemahhashi Labane?
Umgibeli welihhashi lesine umelela kufa lokubangelwa tifo letingumshayabhuce kanye nalokunye. Ngemuva kwa-1914, umkhuhlane waseSpain wabulala tigidzi letinyenti tebantfu. Kulinganiselwa kutsi bantfu labatigidzi letingu-500 batfola lomkhuhlane, lokusho kutsi umuntfu munye kulabatsatfu bekanawo!
Lomkhuhlane waseSpain walandzelwa sifo se-smallpox lesabulala emakhulu etigidzi tebantfu ngelikhulu lesi-20 leminyaka. Ngisho nome lizinga lekwelapha selitfutfuke kakhulu lamuhla, tigidzi tebantfu tibulawa sifo se-AIDS, sesifuba sengati kanye namalaleveva.
Timphi, indlala, kanye netifo letingumshayabhuce—kubangela kutsi bantfu bafe. LiThuna liyachubeka nekumita bantfu.
Kufunisisa Umcebo EVini LaNkulunkulu
(Sembulo 4:4) Lesihlalo sebukhosi situngeletwe tihlalo tebukhosi letingemashumi lamabili nakune, nakuto ngabona kuhleti labadzala labangemashumi lamabili nakune bembetse tingubo tangetulu letimhlophe, nasetinhloko tabo kunemichele yeligolide.
(Sembulo 4:6) Embikwalesihlalo sebukhosi kunalokutsite lokufana nelwandle loluyingilazi, lokunjengekristalu. Emkhatsini lapho kunalesihlalo sebukhosi khona nasemaceleni aso, kunetidalwa letine letiphilako letigcwele emehlo ngembili nangemuva.
re-ZU 76-77 ¶8
Buhle Besihlalo Sebukhosi SaJehova Lesisezulwini
8 Johane bekati kutsi baphristi bebakhetfwa kutsi basebente ethendeni lekukhontela. Ngako, kungenteka kwammangalisa kubona naku lakuchaza kamuva: “Lesihlalo sebukhosi situngeletwe tihlalo tebukhosi letingemashumi lamabili nakune, nakuto ngabona kuhleti labadzala labangemashumi lamabili nakune bembetse tingubo tangetulu letimhlophe, nasetinhloko tabo kunemichele yeligolide.” (Sembulo 4:4) Esikhundleni sebaphristi, kunalabadzala labangu-24 labahleti etihlalweni tebukhosi futsi bafake imichele njengemakhosi. Bobani lalabadzala? Ngulabo labagcotjiwe belibandla lebuKhristu, lasebavusiwe futsi lesebatsetse tikhundla tabo ezulwini njengoba Jehova abatsembisa. Sikwati njani loko?
re-ZU 80 ¶19
Buhle Besihlalo Sebukhosi SaJehova Lesisezulwini
19 Tifanekisela ini letidalwa? Umbono lowabonwa ngumphrofethi Hezekeli, usisita kutsi sitfole imphendvulo. Hezekeli wabona Jehova ahleti esihlalweni sakhe sebukhosi lebesisetukwencola yakhe lesezulwini, futsi beyihamba netidalwa lebetifana naleto letachazwa nguJohane. (Hezekeli 1:5-11, 22-28) Ngekuhamba kwesikhatsi, Hezekeli waphindze wayibona lencola lesihlalo sebukhosi ihamba kanye netidalwa letiphilako. Nobe kunjalo, wabita letidalwa letiphilako ngekutsi makherubi. (Hezekeli 10:9-15) Letidalwa letine letiphilako letabonwa nguJohane kufanele kube timelele emakherubi lamanyenti aNkulunkulu, lokutidalwa letisesikhundleni lesiphakeme enhlanganweni yakhe yetidalwa temoya. Johane bekangeke acabange kutsi kuyintfo lengakavami kutsi emakherubi bekangaba sedvutane naJehova, ngoba lithende lekukhontela lasendvulo belihlelwe kanjalo, emakherubi lamabili lekentiwe ngeligolide bewabekwa etikwesimbonyo selibhokisi lesivumelwane, lebekumelela sihlalo sebukhosi saJehova. Emkhatsini walakherubi lamabili, liphimbo laJehova belikhipha imitsetfo leya esiveni.—Eksodusi 25:22; Tihlabelelo 80:1.
(Sembulo 5:5) Kodvwa lomunye walabadzala watsi kimi: “Yekela kukhala. INgwenyama levela esiveni sakaJuda, leyimphandze yaDavide, incobile kuze ivule lomculu netimphawu tawo letisikhombisa.”
cf 36 ¶5-6
“INgwenyama Levela Esiveni Sakajuda”
5 Libhubesi livame kufanekisa sibindzi. Kuke kwenteka yini wabukana nelibhubesi lelidzala lelidvuna? Nangabe kuke kwenteka, kungenteka bowuvikelekile ngoba bekunafenisi lobekalivimbile endzaweni yekugcina tilwane. Nanoba kunjalo, intfo lenjalo iyetfusa. Njengoba ubuka lobuso balesilwane lobukhulu nalobesabekako futsi naso sikubuka emehlweni, kulukhuni kusicabanga sibalekela nome ngabe yini, ngenca yekutsi siyesaba. LiBhayibheli litsi “libhubesi, linemandla kunato tonkhe tilwane, futsi alesabi lutfo.” (Taga 30:30) Lesi sibindzi Khristu lanaso.
6 Asesicoce ngetindlela letintsatfu letikhombisa kutsi Jesu waba nesibindzi lesifana neselibhubesi: kumelela liciniso, kucinisekisa kutsi bulungisa buyentiwa, kanye nekubhekana nekuphikiswa. Sitawuphindze sibone kutsi sonkhe, ngisho nobe sitelwe sinesibindzi nobe sitelwe site, singakhona kumlingisa Jesu ngekuba nesibindzi.
Kufundvwa KweliBhayibheli
(Sembulo 4:1-11) Ngemuva kwaletintfo, ngatsi ngiyabuka ngabona umnyango lovulekile ezulwini, futsi livi lekucala lengaliva belinjengelekukhala kwelicilongo, likhuluma nami litsi: “Yenyukela lapha ngitekubonisa tintfo lokufanele tenteke.” 2 Ngekushesha ngemva kwaloko umoya waNkulunkulu wehlela kimi, ngabona sihlalo sebukhosi sisendzaweni yaso ezulwini, kunalohleti kuso. 3 Loyo lohleti kuso ufanana nelitje lejasiphi, nelitje lelibovu leliligugu, futsi sihlalo sebukhosi situngeletwe ngumushi wenkosazana lonjengesimaragidu. 4 Lesihlalo sebukhosi situngeletwe tihlalo tebukhosi letingemashumi lamabili nakune, nakuto ngabona kuhleti labadzala labangemashumi lamabili nakune bembetse tingubo tangetulu letimhlophe, nasetinhloko tabo kunemichele yeligolide. 5 Kulesihlalo sebukhosi kuphuma imibane, emavi kanye nekudvuma kwelitulu; embikwaso kunetibane temlilo letisikhombisa letivutsako, futsi timelela imimoya lesikhombisa yaNkulunkulu. 6 Embikwalesihlalo sebukhosi kunalokutsite lokufana nelwandle loluyingilazi, lokunjengekristalu. Emkhatsini lapho kunalesihlalo sebukhosi khona nasemaceleni aso, kunetidalwa letine letiphilako letigcwele emehlo ngembili nangemuva. 7 Sidalwa lesiphilako sekucala sinjengelibhubesi, sesibili sinjengenkunzana, sesitsatfu sinebuso lobufana nebemuntfu, kantsi sesine sona sinjengelusoti lolundizako. 8 Ngasinye saletidalwa letine letiphilako sinetimphiko letisitfupha, futsi tigcwele emehlo yonkhe indzawo ngisho nangaphansi. Busuku nemini tihlale titsi: “Ungcwele, ungcwele, ungcwele Jehova Nkulunkulu Somandla, labekhona, lokhona, futsi lotako.” 9 Nobe kunini lapho letidalwa letiphilako tikhatimulisa, tidvumisa, futsi tibonga Loyo lohleti esihlalweni sebukhosi, lophila phakadze naphakadze, 10 labadzala labangemashumi lamabili nakune baguca embikwaLoyo lohleti kulesihlalo sebukhosi, bakhotsamele Loyo lophila phakadze naphakadze, betfule nemichele yabo bayibeke embikwalesihlalo sebukhosi, batsi: 11 “Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.”