Kungani Kufanele Sikhumbule Kufa KwaJesu?

“CHUBEKANI NIKWENTA, NINGIKHUMBULA”

Khulile: Kunjani Nomcebo? Ngijabule kakhulu kukubona kuleliviki leliphelile eSikhumbutweni sekufa kwaJesu Khristu.a Asewusho, bekunjani vele?

Nomcebo: Kona bekumnandzi, kodvwa nje inkinga kutsi angizange ngikucondze kahle konkhe lobekukhulunywa ngako. Ngihlale ngiva kutsi ngaKhisimusi bantfu bakhumbula kutalwa kwaJesu bese kutsi ngema-Easter bakhumbule kuvuka kwakhe, kodvwa angikaze ngive kutsiwa umuntfu ukhumbula kufa kwaJesu.

Khulile: Ucinisile sisi, Khisimusi nema-Easter ngemalanga ladvumile lakhunjulwako emhlabeni wonkhe. Kodvwa BoFakazi BaJehova bona bakholelwa kutsi kubalulekile kukhumbula kufa kwaJesu. Nangabe unayo imizuzu lembalwa ngingakujabulela kukuchazela kancane ngalendzaba.

Nomcebo: Kulungile, sikhatsi nginaso.

Khulile: Sizatfu lesenta BoFakazi BaJehova bakhumbule kufa kwaJesu, kutsi yena Jesu watjela balandzeli bakhe kutsi bente loko. Cabanga nje ngaloko lokwenteka ngebusuku bangaphambi kwekufa kwakhe. Uke weva yini ngesidlo lesikhetsekile laba naso nebalandzeli bakhe labetsembekile?

Nomcebo: Usho Sidlo Sakusihlwa?

Khulile: Ngisho sona, futsi siphindze sibitwe ngekutsi Sidlo SeNkhosi Sakusihlwa. Kuleso sidlo, Jesu wabaniketa ticondziso leticacile balandzeli bakhe. Ngicela ufundze emavi lawasho labhalwe lapha kuLukha 22:19.

Nomcebo: Wo, atsi: “Wase utsatsa sinkhwa, wabonga, wasihlephula futsi wabanika sona, watsi: ‘Loku kusho umtimba wami lotawunikelwa ngenca yenu. Chubekani nikwenta, ningikhumbula.’”

Khulile: Ufundze kahle. Asewunake nasi sicondziso saJesu emshweni wekugcina walelivesi: “Chubekani nikwenta, ningikhumbula.” Ngaphambi nje kwekutsi atjele balandzeli bakhe kutsi bamkhumbule, Jesu wakwenta kwacaca kutsi yini lebekufanele bayikhumbule ngaye. Watsi kuphila kwakhe kutawunikelwa ngenca yebalandzeli bakhe. Jesu waphindze wakusho loku ngemavi lafananako labhalwe kuMatewu 20:28. Lelivesi litsi: “Ngobe neNdvodzana yemuntfu ayizange itele kutewusetjentelwa, kodvwa yetela kutewuba yinceku nekunikela ngemphefumulo wayo kutsi ube yinhlawulo yalabanyenti.” Kafishane nje wena Nomcebo, nguleso sizatfu lesenta BoFakazi bahlangane minyaka yonkhe ngelilanga Jesu lafa ngalo, kuze bakhumbule inhlawulo Jesu layikhokha. Kufa kwakhe kungabaletsela kuphila bonkhe bantfu labalalelako.

YINI LEYENTA KUTSI KUDZINGEKE INHLAWULO?

Nomcebo: Ngike ngabeva bantfu batsi Jesu wafela tsine kuze sitotfola kuphila. Kodvwa nje ngikutjele liciniso yeKhulile, solo angicondzi kutsi kungenteka kanjani loko.

Khulile: Akusiwena wedvwa longakucondzi loko. Lendzaba yenhlawulo yaJesu vele kulukhuni kuyicondza. Kodvwa ingulenye yetindzaba letitsintsa inhlitiyo letiseVini laNkulunkulu. Sikhatsi sakho sisavuma yini vele?

Nomcebo: Khululeka ngisenayo imizuzu lembalwa.

Khulile: Kuhle-ke nakunjalo. Ngisandza kufundza lesinye sihloko lesikhuluma ngenhlawulo, ngitawetama kukuchazela ngendlela lelula.

Nomcebo: OK.

Khulile: Kuze siyicondze kahle inhlawulo, kufanele sicale sisicondze simo lesaba khona ngesikhatsi bo-Adamu na-Eva bona ensimini yase-Edeni. Kuze ukhone kuyibona lendzaba, asesifundze umbhalo webaseRoma 6:23. Ngicela uwufundze.

Nomcebo: Kulungile, utsi: “Umvuzo wesono kufa, kodvwa sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”

Khulile: Ngiyabonga. Asesiwuhlatiye lombhalo. Kwekucala nje, naka emavi ekucala alelivesi latsi: “Umvuzo wesono kufa.” Lona ngumtsetfo lolula Nkulunkulu lawubeka kusukela ekucaleni, kutsi umvuzo nobe umphumela wesono ukufa. Kuliciniso kutsi ekucaleni kute umuntfu lobekasoni. Bo-Adamu na-Eva badalwa bete sono, futsi bonkhe bantfwana babo bebatawutalwa bete sono. Ngako-ke, bekute sizatfu sekutsi kube khona lofako. Bo-Adamu na-Eva kanye naso sonkhe situkulwane sabo bebatawuphila phakadze bajabulile. Kodvwa-ke njengobe sati, tintfo atizange tihambe kahle, angitsi?

Nomcebo: Yebo, angitsi bo-Adamu na-Eva basidla lesitselo lebekutsiwe bangasidli.

Khulile: Kunjalo, futsi ngekukhetsa kungamlaleli Nkulunkulu, bo-Adamu na-Eva bona. Ecinisweni kufana nekutsi bakhetsa kuba nesono. Imiphumela lemibi kakhulu yekwenta loko beyingeke itfolwe bo-Adamu na-Eva nje kuphela kodvwa beyitawutfolwa nangiso sonkhe situkulwane sabo.

Nomcebo: Usho kutsini?

Khulile: Mhlawumbe asengikubekisele. Asengibute, kodvwa uyakutsandza yini kubhaka?

Nomcebo: Yebo, yintfo lengiyitsandza kakhulu leyo.

Khulile: Asesitsi-ke unelipani lelisha lekubhaka sinkhwa. Bese utsi usengakalisebentisi ngisho nakanye liwe futsi limoncoke. Manje-ke ucabanga kutsi titawuphuma tinjani tinkhwa lotibhaka ngalelo pani? Ngeke yini nato tiphume timoncokile njengalelipani?

Nomcebo: Phela vele nato titawumoncoka.

Khulile: Lesimo siyafana-ke nakubo-Adamu na-Eva, ngesikhatsi bakhetsa kungamlaleli Nkulunkulu, kwafana nekutsi nabo “bayamoncoka,” nobe baba nesici ngenca yekutsi sebanesono. Ngesizatfu sekutsi bona ngaphambi kwekutsi babe nebantfwana, bonkhe bantfwana babo besebatawutalwa bafana nabo. Bonkhe bebatawutalwa banesono. EBhayibhelini ligama lelitsi “sono” alisho nje sento kuphela kodvwa liphindze lisho simo lesisitfole ngelufuto. Kute lutfo lolubi mine nawe lesalwenta futsi besingakatalwa ngisho nekutalwa ngesikhatsi bo-Adamu na-Eva bona. Kodvwa-ke umphumela wekona kwabo ube kutsi tsine kanye naso sonkhe situkulwane sabo sibe nesono lesisibangela kutsi sife. Njengobe sifundzile kulombhalo webaseRoma 6:23, umvuzo wesono kufa.

Nomcebo: Hawu, pho sekungaze kuhlupheke bonkhe bantfu ngenca nje yesono sa-Adamu na-Eva?

Khulile: Kona kungenteka kubonakala kuyintfo lengakalungi. Kodvwa kunaletinye tintfo letitsintsekako kulendzaba. Ngenca yekutsi kulunga kwaNkulunkulu kuphelele, wancuma kutsi bo-Adamu na-Eva kufanele bafele tono tabo, kepha tsine njengobe sisitukulwane sabo asizange sisale site litsemba. Nkulunkulu wenta indlela yekutsi siphume kulenkinga. Ingena kanjalo-ke lendzaba yenhlawulo yaJesu. Ngicela uphindze uwubuke lombhalo webaseRoma 6:23. Ngemuva kwekutsi utsi “umvuzo wesono kufa,” lombhalo uchubeka utsi: “Sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.” Ngako-ke kufa kwaJesu ngiko lokusivulela indlela yekutsi sikhululeke esonweni nasekufeni.b

INHLAWULO—SIPHO LESIKHULU LESIVELA KUNKULUNKULU

Khulile: Kunalelinye liphuzu kulelivesi lengifuna ulinake.

Nomcebo: Wo, litsini?

Khulile: Uyalibona mosi lelivesi kutsi litsi: “Sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.” Nangabe-ke Jesu kunguye lowahlupheka futsi wasifela, wanikela ngekuphila kwakhe ngenca yetfu, kungani lelivesi litsi inhlawulo “sipho Nkulunkulu lasinika sona,” lingasho kutsi “sipho Jesu lasinika sona”?c

Nomcebo: Eyi angati.

Khulile: NguNkulunkulu lowadala bo-Adamu na-Eva, futsi bona kuye ngesikhatsi beca umyalo wakhe ensimini yase-Edeni. Kufanele kutsi weva buhlungu kakhulu ngesikhatsi labantfu bekucala bahlubuka kuye. Kodvwa ngekushesha nje, Jehova waliveta likhambi.d Wahlela kutsi lesinye setidalwa takhe letingumoya site emhlabeni, sibe ngumuntfu lote sono, futsi ekugcineni sinikele ngekuphila kwaso kube yinhlawulo. Ngako-ke lenhlawulo beyisipho lesivela kuNkulunkulu. Kunalenye indlela futsi leveta kutsi inhlawulo beyisipho lesivela kuNkulunkulu. Uke wacabanga yini ngendlela lokungenteka Nkulunkulu waphatseka ngayo ngesikhatsi Jesu abulawa?

Nomcebo: Cha angikaze sengikucabange loko.

Khulile: Ngiyabona kutsi kunemathoyizi langephandle, kusho kutsi unebantfwana.

Nomcebo: Yebo nginabo, ngumfana nentfombatana.

Khulile: Njengobe ungumtali, asewucabange ngendlela Jehova Nkulunkulu longuYise waJesu losezulwini lativa ngayo ngelilanga Jesu lafa ngalo. Cabanga nje kutsi kwamphatsa njani kubuka iNdvodzana yakhe letsandzekako iboshwa, ihlanjalatwa futsi ishaywa ngetibhakela. Cabanga nekutsi kwamphatsa njani uYise kuyibona ibetselwa elugodvweni futsi ishiywa khona lapho kutsi ife kabuhlungu, kancane kancane?

Nomcebo: Kufanele kube weva buhlungu kakhulu. Uyati angizange sengikucabange-ke loko!

Khulile: Kunjalo, kona angeke sikhone tsine kusho kutsi vele ngalelo langa Nkulunkulu waphatseka njani. Kodvwa siyati kutsi naye unemiva, futsi siyasati nesizatfu lesamenta wavumela konkhe loko kutsi kwenteke. Sichazwe kahle embhalweni lowetayelekile waJohane 3:16. Ngicela uwufundze.

Nomcebo: Kulungile, utsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”

Khulile: Ngiyabonga. Ngicela uphindze ubuke emavi lasekucaleni kwalelivesi, atsi: “Nkulunkulu walitsandza kakhulu live.” Naso-ke lesizatfu, lutsandvo. Lutsandvo lolwenta Nkulunkulu kutsi atfumele iNdvodzana yakhe emhlabeni kutsi itosifela. Kuyacaca-ke kutsi inhlawulo iyindlela lehamba embili Nkulunkulu lake wasibonisa ngayo lutsandvo. Futsi ngiyo lenhlawulo BoFakazi BaJehova labayikhumbulako nabahlangene minyaka yonkhe ngelilanga lekufa kwaJesu. Kukhona yini lapho ikusite khona lendzaba lesesicoce ngayo?

Nomcebo: Yebo sisi, awati kutsi ingisite kanjani. Ngiyabonga ngekutsi utinike sikhatsi kuze ungichazele ngalendzaba.