IMIBUTO LEVELA KUBAFUNDZI

Yini bososayensi labacwaninga ngemlandvo labayitfolile lekhombisa kutsi liJerikho labhujiswa ngesikhashana?

Joshuwa 6:10-15, 20 utsi emasotja ema-Israyeli abetungeleta tindvonga taseJerikho kanye ngelilanga kwaze kwaba tinsuku letisitfupha. Ngelilanga lesikhombisa, alitungeletela kasikhombisa. Ngemuva kwaloko Nkulunkulu wenta kutsi letindvonga leticinile taseJerikho tiwe futsi ema-Israyeli alihlasele lelidolobha. Kukhona yini bososayensi labacwaninga ngemlandvo labakutfolile lokuveta kutsi kubhujiswa kweliJerikho kwatsatsa sikhashana njengobe liBhayibheli lisho?

Endvulo, lidolobha bekutsiwa livintjetelwe nangabe emabutfo agigeletele tindvonga talo, alungele kulihlasela. Nangabe lokuvinjetelwa bekutsatsa sikhatsi lesidze, labantfu kulelidolobha bebadla kudla lebebakubekile. Nasekalincobile lelidolobha, lamasotja abetsatsa konkhe lakufunako, lokufaka ekhatsi kudla lobekusele. Kungako bososayensi labacwaninga ngemlandvo batfola kudla lokuncane nobe bangakutfoli sanhlobo etindzaleni temadolobha lasePalestine lebekahlaselwa ngalendlela. Kodvwa tindzala taseJerikho tehlukile. I-“Biblical Archaeology Review” itsi: “Ngaphandle kwetintfo letibunjiwe letatfolakala ngemuva kwalokubhujiswa, kwatfolakala nekudla lokunyenti.” Iyengeta itsi: “Akukavami kutsi kutfolakale linani lelingaka lekudla.”

LiBhayibheli litsi ema-Israyeli akakutsatsanga lokudla lobekuseJerikho ngobe Jehova abewatjele kutsi angakutsatsi. (Joshuwa 6:17, 18) Liphindze litsi ema-Israyeli ahlasela liJerikho entfwasahlobo, ngemuva nje kwekuvuna, ngesikhatsi kudla lokunyenti kusalondvolotiwe kulelidolobha. (Joshuwa 3:15-17; 5:10) Ngesizatfu sekutsi bekusolo kukunyenti kudla eJerikho ngemuva kwekubhujiswa kwalo, loko kufakazela kutsi lokuhlaselwa kwatsatsa sikhashana njengobe liBhayibheli lisho.