Jehova Uyasigcina Kute Sitewusindziswa
“Nkulunkulu uyawunigcina ngemandla akhe, njengobe nimetsemba, kube kusindziswa lokutakwembulwa ngesikhatsi sekugcina.”—1 PHET. 1:4, 5.
UNGAPHENDVULA NJANI?
․․․․․
Jehova usidvonsele njani ekukhonteni kweliciniso?
․․․․․
Singamvumela njani Jehova kutsi asihole ngeseluleko sakhe?
․․․․․
Jehova usikhutsata njani?
1, 2. (a) Kungani siciniseka kutsi Nkulunkulu angasisita silondvolote bucotfo betfu? (b) Jehova umati kangakanani umuntfu ngamunye?
“LOWO loyawubambelela kuze kube ngusekupheleni, uyawusindziswa.” (Mat. 24:13) Ngalamavi, Jesu wakwenta kwacaca kutsi kute sisindze ngesikhatsi Nkulunkulu sekakhipha sehlulelo sakhe kulelive laSathane, kufanele sigcine bucotfo betfu kute kube sekupheleni. Kodvwa loko akusho kutsi Jehova ulindzele kutsi sibeketele ngekuhlakanipha nobe ngemandla etfu. LiBhayibheli liyasicinisekisa: “Nkulunkulu wetsembekile, yena angeke avume kutsi nilingwe ngalokungetulu kwemandla enu. Ngesikhatsi sekulingwa utaninika emandla ekuma, anentele nendlela yekuphepha.” (1 Khor. 10:13) Asho kutsini lamavi?
2 Kute Jehova aciniseke ngekutsi asilingwa ngetulu kwemandla etfu, kufanele ati konkhe ngatsi, lokufaka ekhatsi bumatima lesihlangabetana nabo, kwakheka kwetfu, kanye naloko lesingakhona kukutfwala. Nkulunkulu usati kancono yini? Yebo. ImiBhalo iveta kutsi Jehova wati konkhe ngemuntfu ngamunye. Uyakwati loko lesikwenta malanga onkhe kanye nemikhuba yetfu. Ucondza ngisho nemicabango kanye netinhloso tenhlitiyo yetfu.—Fundza Tihlabelelo 139:1-6.
3, 4. (a) Lokuhlangenwe nako kwaDavide kuveta njani kutsi Jehova unaka umuntfu ngamunye? (b) Ngumuphi umsebenti lomangalisako Jehova lawentako lamuhla?
3 Kubonakala kungasilo liciniso yini kutsi Nkulunkulu angasondzelana nebantfu labaphansi ngalendlela? Umhlabeli Davide wabuta Jehova lombuto: “Nangibuka etulu esibhakabhakeni sakho ngibona umsebenti wetandla takho, inyanga netinkhanyeti lotimisile, ngitsi: ‘Pho, umuntfu abeyini-ke kutsi ungadzimate umkhumbule?’” (Hla. 8:3, 4) Kungenteka kutsi Davide wabuta lombuto ngesizatfu salokuhlangenwe nako kwakhe. KuDavide, indvodzana yaJese lencane, Jehova watfola “indvodza yenhlitiyo yakhe” futsi wamtsatsa ‘ekulandzeleni imihlambi, kutsi atewuba ngumholi’ wesive sema-Israyeli. (1 Sam. 13:14; 2 Sam. 7:8) Ase ucabange kutsi Davide wativa njani nakacaphela kutsi uMdali wemhlaba wonkhe wasilalela sicelo sakhe kanye nemivelo yakhe njengemfana longumelusi.
4 Iyamangalisa indlela Jehova lasinaka ngayo njengebantfu ngabanye lamuhla. Ubutsela ndzawonye bantfu bato “tonkhe tive” ekukhonteni kweliciniso futsi asite netinceku takhe kutsi tihlale ticotfo. (Hag. 2:7) Kute siyicondze kancono indlela Jehova lasisita ngayo ekulondvoloteni bucotfo betfu, ase sihlole indlela ladvonsela ngayo bantfu ekukhonteni kweliciniso.
SIDVONSWA NGUNKULUNKULU
5. Jehova ubadvonsela njani bantfu eNdvodzaneni yakhe? Niketa sibonelo.
5 Jesu watsi: “Kute umuntfu longeta kimi nangabe Babe, lokunguyena angitfumile, angamdvonsi.” (Joh. 6:44) Lamavi asho kutsi kute sibe bafundzi baKhristu, kufanele sitfole lusito lwaNkulunkulu. Jehova ubadvonsela njani bantfu labatimvu eNdvodzaneni yakhe? Usebentisa umsebenti wekushumayela tindzaba letinhle kanye nemoya wakhe longcwele. Nasi sibonelo: Ngesikhatsi Pawula kanye nalabo labehamba nabo emsebentini wetitfunywa telivangeli baseFiliphi, bahlangana naLidiya futsi bacala kumcocela tindzaba letinhle. Kulandzisa lokuphefumulelwe kutsi: “INkhosi [Jehova] yavula inhlitiyo yakhe kuze eve emukele loko lokwakukhulunywa nguPawula.” Nkulunkulu wamniketa umoya wakhe kute umsite atfole umcondvo walomlayeto. Umphumela waloko waba kutsi yena nebendlu yakhe babhajatiswa.—Imis. 16:13-15.
6. Nkulunkulu wasidvonsela njani sonkhe ekukhonteni kweliciniso?
6 Loku lokwenteka luLidiya kwakuyintfo lengakavami yini? Cha. Nangabe ungumKhristu lotinikele, nawe wadvonselwa nguNkulunkulu ekukhonteni kweliciniso. Njengobe Babe wetfu wasezulwini abona lokuhle enhlitiyweni yaLidiya, nakuwe wakubona lokuhle. Ngalesikhatsi ucala kulalela tindzaba letinhle, Jehova wakusita waticondza ngekutsi akunike umoya wakhe longcwele. (1 Khor. 2:11, 12) Nawuchubeka utimisela ngekusebentisa loko lokufundzile, wayibusisa imetamo yakho yekwenta intsandvo yakhe. Inhlitiyo yakhe yajabula kakhulu nangalesikhatsi utinikela kuye. Kuyacaca-ke kutsi kusukela wacala kuhamba endleleni leya ekuphileni, Jehova abesolo anawe.
7. Sati njani kutsi Nkulunkulu utasisita kute sihlale setsembekile?
7 Njengobe asisitile sakhona kuhamba naye, Jehova uyachubeka asisita kute sihlale setsembekile. Uyati kutsi asizange sitfole emaciniso ngekuhlakanipha kwetfu futsi angeke sikwati kuhlala enkholweni yeliciniso ngemandla etfu. Naku umphostoli Phetro lakubhalela emaKhristu lagcotjiwe: “Nkulunkulu uyawunigcina ngemandla akhe, njengobe nimetsemba, kube kusindziswa lokutakwembulwa ngesikhatsi sekugcina.” (1 Phet. 1:4, 5) Lamavi asebenta kuwo onkhe emaKhristu futsi kufanele sihlale siwakhumbula. Kungani? Kungobe sonkhe sidzinga lusito lwaNkulunkulu kute sihlale setsembekile kuye.
SIYAVIKELWA EKWENTENI EMAPHUTSA
8. Kungani kudzingeka sinake singangeni engotini singakanaki?
8 Tinkinga tekuphila kanye nemaphutsa lesiwentako angasenta silahlekelwe buhlobo betfu naNkulunkulu futsi asifake engotini yekwenta emaphutsa singakanaki. (Fundza Galathiya 6:1.) Loku kuboniswa nguloko lokuke kwenteka kuDavide.
9, 10. Jehova wamvimba njani Davide ekwenteni liphutsa lelikhulu, futsi usivikela njani tsine lamuhla?
9 Ngalesikhatsi atingelwa yiNkhosi Sawula, Davide waveta imfanelo yekutibamba ngekutsi angatiphindziseli kulenkhosi lenemona. (1 Sam. 24:2-7) Kodvwa ngekushesha ngemuva kwaloko Davide yamlahlekela lemfanelo. Ngesikhatsi yena kanye nemadvodza labekanye nawo badzinga kudla, bacela Nabali lobekangumIsrayeli kutsi abaphe. Kwatsi lapho Nabali abaphendvula ngekwedzelela, Davide watfukutsela kakhulu futsi walungela kuyewutiphindzisela kuNabali nakuwo onkhe emalunga endlu yakhe. Davide wehluleka kucabanga kutsi kubulala bantfu labete licala bekutamenta abe nelicala lengati kuNkulunkulu. Kodvwa umfati waNabali, Abigayili wamvimba Davide ekwenteni liphutsa lelibi kakhulu. Acaphela kutsi Jehova usebentise Abigayili, Davide watsi kuye: “Akadvunyiswe Simakadze Nkulunkulu wema-Israyeli lokutfume lamuhla kutsi utengihlangabeta. Shangatsi ungabusiswa ngalomcondvo wakho lokhaliphile, nekutsi ungivimbe ngingayicitsi ingati lamuhla, nekutsi ngingatiphindziseleli ngetandla tami.”—1 Sam. 25:9-13, 21, 22, 32, 33.
10 Ngusiphi sifundvo lesingasitfola kulokulandzisa? Jehova wasebentisa Abigayili kute avimbe Davide ekwenteni liphutsa lelikhulu. Nalamuhla wenta lokufananako kitsi. Akukafaneli silindzele kutsi Nkulunkulu utawutfumela lotsite kutsi atewusivimba nangabe sifuna kwenta liphutsa lelikhulu. Angeke sati ngalokuphelele kutsi Nkulunkulu utawenta njani esimeni lesitsite nobe yini latayivumela kute kugcwaliseke injongo yakhe. (Shu. 11:5) Kunobe ngukuphi, siyetsemba kutsi Jehova uyakubona loko lesihlangabetana nako futsi utasisita kutsi sihlale setsembekile kuye. Uyasicinisekisa: “Mine ngiyawukufundzisa ngikukhombise indlela lofanele kuhamba ngayo, ngikweluleke, liso lami lingesuki kuwe.” (Hla. 32:8) Jehova usiniketa njani seluleko? Singazuza njani kuso? Kungani kufanele siciniseke ngekutsi Jehova uhola bantfu bakhe lamuhla? Naka indlela lemibuto lephendvulwa ngayo encwadzini yeSembulo.
SELULEKO SIYASIVIKELA
11. Jehova ukwati ngelizinga lelingakanani loko lokwenteka emabandleni ebantfu bakhe?
11 Embonweni lokukhulunywa ngawo kuSembulo sehluko 2 kanye na-3, Jesu Khristu lokhatinyulisiwe uhlola emabandla lasikhombisa ase-Asia Minor. Lombono uveta kutsi Khristu ubona lokungetulu kwaloko lamabandla lahlangabetana nako. Kuletinye tindzawo, ubabita ngemabito abo bantfu aphindze abakhutsate nobe abayale. Kusho kutsini loko? Ekugcwalisekeni kwalombono, emabandla lasikhombisa amelela emaKhristu lagcotjiwe ngemuva kwa-1914, kantsi seluleko lesiniketwa lamabandla lasikhombisa sisebenta kuwo onkhe emabandla ebantfu baNkulunkulu lasemhlabeni wonkhe. Ngako-ke, senta kahle ngekuphetsa ngekutsi Jehova usebentisa iNdvodzana yakhe kute ahole bantfu bakhe. Singazuza njani kulesicondziso?
12. Singamvumela njani Jehova kutsi acondzise tinyatselo tetfu?
12 Lenye indlela lesingazuza ngayo esicondzisweni saJehova selutsandvo, kuba nesifundvo lesitichubela sona. Ngelusito lwetincwadzi letivela esisebentini lesetsembekile nalesihlakaniphile, Jehova usiniketa teluleko letinyenti letisekelwe emiBhalweni. (Mat. 24:45) Kute tisizuzise, kufanele sitinike sikhatsi sekutifundza futsi sikusebentise loko lesikufundzako. Sifundvo lesitichubela sona singulenye indlela Jehova ‘lasigcina ngayo, singete sakhubeka.’ (Juda 24) Uke wakufundza yini lokutsite etincwadzini tetfu lobekubonakala shengatsi kubhalelwe wena? Leso seluleko sitsatse njengaleso lesivela kuJehova. Njengobe nemngani wakho angakutsintsa ehlombe kute umnake, naJehova angasebentisa umoya wakhe kute akwente unake indlela lotiphatsa ngayo kanye nebuntfu bakho—futsi labanyenti njengawe bayasibona sidzingo sekutfutfuka kuloku. Ngekunaka indlela umoya losihola ngayo, sisuke sivumela Jehova kutsi acondzise tinyatselo tetfu. (Fundza Tihlabelelo 139:23, 24.) Kuloku, sisuke senta kahle nangabe sihlola indlela lesitadisha ngayo.
13. Kungani kukuhlakanipha kutsi sihlole imikhuba yetfu yekutadisha?
13 Sikhatsi lesinyenti lesisicitsa kutekutijabulisa singasenta sibebete sikhatsi sekuba nesifundvo lesitichubela sona. Lomunye umzalwane utsi: “Kulula kutsi sifundvo lesitichubela sona singasenti, ngobe tekutijabulisa setitfolakala melula futsi atisaduli njengakucala. Tiyatfolakala ku-TV, kubongcondvomshini nakumahlalekhikhini. Situngeletwe tekutijabulisa.” Nangabe singakanaki, sikhatsi lesisisebentisa sitichubela sifundvo singancipha kancane kancane futsi ekugcineni sititfole sesite leso sikhatsi. (Ef. 5:15-17) Ngamunye wetfu wenta kahle kutibuta: ‘Ngilitadisha nini futsi kangakhi liVi laNkulunkulu ngalokujulile? Ngulapho nginenkhulumo khona yini nobe nanginencenye emihlanganweni yelibandla?’ Nangabe kunjalo, mhlawumbe singalisebentisa kahle lilanga lelibekelwe kukhonta kwemndeni kwakusihlwa nobe lekutichubela sifundvo kute sitfole kuhlakanipha Jehova lasiniketa kona lokusigcinela kusindziswa.—Taga 2:1-5.
SIKHUTSATO SIYASISITA KUTSI SIBEKETELE
14. ImiBhalo iveta njani kutsi Jehova uyayati indlela lesitiva ngayo?
14 Davide wahlangabetana netimo letinyenti letimcindzetelako ekuphileni kwakhe. (1 Sam. 30:3-6) Emavi akhe laphefumulelwe aveta kutsi Jehova abeyati indlela labetiva ngayo. (Fundza Tihlabelelo 34:18; 56:8.) Nkulunkulu uyayati indlela natsi lesitiva ngayo. Nangabe ‘sinetinhlitiyo letephukile’ nobe ‘sinemoya lowephukile,’ uyasondzela kitsi. Loko kungasidvudvuta njengobe kwenteka nakuDavide, lowahlabela: “Ngiyakwetsaba ngijabule ngemusa wakho, ngobe wena ukubonile kuhlupheka kwami, watati tinsizi temphefumulo wami.” (Hla. 31:7) Jehova wenta lokungetulu kwekumane abone kucindzeteleka kwetfu. Uyasicinisa ngekusidvudvuta aphindze asikhutsate. Lenye indlela lakwenta ngayo loko, ngimihlangano yebuKhristu.
15. Ngusiphi sifundvo lesisitfola kuloko lokwenteka ku-Asafa?
15 Lenye inzuzo yekuba khona emihlanganweni ibonakala kuloko lokwenteka kumhlabeli Asafa. Kubona kungalungi lokusemhlabeni kwenta Asafa wangakuboni kubaluleka kwekukhonta Nkulunkulu. Asafa waphelelwa ngemandla. Indlela labetiva ngayo wayichaza ngalamavi: ‘Umphefumulo wami umunyu nenhlitiyo yami ihlabekile.’ Ngesizatfu saloko, wacishe wayekela kukhonta Jehova. Yini leyasita Asafa washintja indlela labecabanga ngayo? Utsi: “Ngangena endlini lengcwele yaNkulunkulu.” Kuba semkhatsini wetikhonti taJehova kwamenta washintja simo sakhe sengcondvo. Wabona kutsi kuphumelela kwebantfu lababi kwesikhashana, kanye nekutsi Jehova angeke ehluleke kulungisa tintfo. (Hla. 73:2, 13-22) Kwenteka lokufananako nakitsi. Kucindzeteleka lokubangelwa kubona kungalungi lokukulelive laSathane, kungasicedza emandla. Kuhlangana ndzawonye nebazalwane nabodzadze wetfu, kuyasicabula futsi kuyasisita kutsi sijabule njengobe sikhonta Jehova.
16. Singazuza njani esibonelweni saHana?
16 Kutsiwani nangabe kunesimo ebandleni lesenta kube matima ngawe kuya emihlanganweni yelibandla? Mhlawumbe utsatselwe emalungelo latsite ebandleni futsi unemahloni ngaloko, nobe kube khona kungevani emkhatsini wakho nemzalwane nobe dzadze. Nangabe kunjalo, sibonelo saHana singaba lusito kuwe. (Fundza 1 Samuweli 1:4-8.) Khumbula kutsi abephatseke kabi ngaloko lobekwenteka emkhatsini wakhe nazakwabo, Phenina. Lesimo besiba matima kakhulu umnyaka ngamunye nasekufike sikhatsi sekutsi lomndeni wentele Jehova umhlatjelo eShilo. Loko kwakumcidzetela kakhulu Hana kangangekutsi ‘bekakhala futsi angadli.’ Nanobe kunjalo, akazange akuvumele loko kutsi kumvimbe ekukhonteni Jehova. Jehova wakubona kwetsembeka kwakhe futsi wambusisa.—1 Sam. 1:11, 20.
17, 18. (a) Imihlangano yelibandla isidvudvuta ngatiphi tindlela? (b) Utiva njani ngelutsandvo Jehova lakubonisa lona kute akusite utfole insindziso?
17 Lamuhla emaKhristu enta kahle ngekulingisa sibonelo saHana. Kufanele sibe khona ngekwetsembeka emihlanganweni yelibandla. Njengobe sonkhe sati, imihlangano iyasikhutsata kakhulu. (Heb. 10:24, 25) Lutsandvo lwemaKhristu lesikanye nawo luyasidvudvuta. Liphuzu lelitsite lelivetwe enkhulumeni nobe emphendvulweni, lingase litsintse tinhlitiyo tetfu. Kucocisana lesiba nako ngembikwekutsi imihlangano icale nobe ngemuva kwayo, kungenta labanye basilalele baphindze basho nemavi lasidvudvutako. (Taga 15:23; 17:17) Njengobe sihlabelela Jehova, siyakhutsateka emoyeni. Ikakhulukati nangabe ‘siphitsiteliswa ngimicabango’ siyasidzinga sikhutsato lesisitfola emihlanganweni yelibandla lapho Jehova asicinisa khona ‘ngendvudvuto’ futsi asisekela emetameni yetfu yekuhlala setsembekile kuye.—Hla. 94:18, 19.
18 Sitiva sivikelekile esandleni saJehova, njengemhlabeli Asafa lowamhlabelela watsi: “Ungibambe ngesandla sami sekudla, uyawungihola ungicondzise ngeteluleko takho.” (Hla. 73:23, 24) Sijabula kakhulu ngekutsi Jehova usigcinela kutsi sisindziswe.
[Sitfombe ekhasini 28]
Nawe udvonswe nguJehova
[Sitfombe ekhasini 30]
Siyalondvolotwa ngekusebentisa seluleko saNkulunkulu
[Sitfombe ekhasini 31]
Tikhutsato lesititfolako tiyasicinisa