Josefa abeyindvodzana yaJakobe lencane. Banakabo Josefa labadzala babona kutsi babe wabo umtsandza kakhulu. Ucabanga kutsi bativa njani ngaloko? Baba nemona ngaJosefa futsi bamenyanya. Ngesikhatsi Josefa abe nemaphupho, watjela banakabo ngawo. Bacabanga kutsi lamaphupho abesho kutsi ngalelinye lilanga bebatawukhotsamela yena. Babese bamzonda kakhulu!

Ngalelinye lilanga banakabo Josefa bebeluse umhlambi wetimvu emadlelweni lasedvutane neShekhemu. Jakobe watfuma Josefa kutsi ayobahlola kutsi basaphila yini. Babona Josefa asekhashanyana futsi bakhuluma bodvwana batsi: ‘Nangu lomphuphi wemaphupho, wotani simbulale.’ Bambamba bamjika emgodzini. Kodvwa Juda, lomunye umnakabo, watsi: ‘Asingambulali. Asimtsengiseni njengesigcili.’ Ngako batsengisa Josefa ngetinhlavu telisiliva letingu-20 kubantfu bakaMidiyani lebebalibangise eGibhithe.

Labanakabo batsatsa ingubo yaJosefa bayenya engatini yembuti base bayimikisa kubabe wabo, bafike batsi: ‘Akusiyo yini ingubo yendvodzana yakho lena?’ Ngako Jakobe wacabanga kutsi Josefa ubulewe silwane sesiganga. Weva buhlungu kakhulu kangangekutsi kute lowakhona kumdvudvuta.

Josefa watsengiswa waba sigcili kuPhotifari, siphatsimandla saseGibhithe. Kodvwa Jehova wamvikela Josefa. Photifari wabona kutsi Josefa abewenta kahle umsebenti wakhe nekutsi abengametsemba. Ngekushesha Josefa wabekwa kutsi engamele indlu yaPhotifari nako konkhe labenako.

Umfati waPhotifari wacala kukhangwa nguJosefa ngobe abelikhwa futsi akheke kahle. Onkhe emalanga, lomfati waPhotifari abehlale ancenga Josefa kutsi alale naye. Abetawenta njani Josefa? Wala waze watsi: ‘Cha! Nemphatsi wami akakangigodleli lutfo ngaphandle kwakho ngobe wena ungumfati wakhe. Ngako ngingayenta njani intfo lembi kangaka, ngone kuNkulunkulu?’

Ngalelinye lilanga umfati waPhotifari wetama kucela Josefa kutsi alale naye. Wambamba ngetimphahla kodvwa Josefa wabaleka. Photifari watsi nakefika ekhaya, umfati wakhe wamtjela kutsi Josefa abefuna kumdlwengula. Abekhuluma emanga. Photifari watfukutsela wabila wase utsatsa Josefa umfaka ejele. Kodvwa Jehova akazange amkhohlwe Josefa.

Ngesikhatsi Josefa asejele, Faro waba nemaphupho futsi kute lowakhona kuwachaza. Lesinye setisebenti taFaro samtjela kutsi nguJosefa longakhona kuchaza lamaphupho. Ngekushesha Faro watsi akulandvwe Josefa.

Faro wambuta watsi: ‘Ngingakulandzisela yini leliphupho lami bese uyalichaza?’ Josefa watjela Faro watsi: ‘Kutawuba neminyaka lengu-7 yenala lenkhulu kulo lonkhe live laseGibhithe, kodvwa ngemuva kwaleminyaka lengu-7 kutawuba neminyaka lengu-7 yendlala. Funa indvodza lehlakaniphile, uyibeke kutsi yengamele bantfu bakho kuze bangacedvwa ngulendlala.’ Faro waphendvula watsi: ‘Ngikhetsa wena! Ngikubeka kutsi wengamele lonkhe lelive laseGibhithe.’ Josefa wayati njani inchazelo yemaphupho aFaro? NguJehova lowasita Josefa.

Eminyakeni lesikhombisa leyalandzela Josefa wacongelela kudla. Kwabese kuba nendlala emhlabeni wonkhe njengobe Josefa abeshito. Bantfu bebachamuka etindzaweni letehlukene kute batewutsenga kudla kuJosefa. Babe wakhe Jakobe weva kutsi bekunekudla lokunyenti eGibhithe, ngako watfuma emadvodzana akhe lalishumi kutsi ayotsenga kudla.

Lamadvodzana aJakobe aya kuJosefa futsi wawabona kucala. Kodvwa labomnakabo abazange babone kutsi nguJosefa. Baguca embikwakhe njengobe bekwentekile kuleliphupho. Josefa abefuna kubona kutsi bomnakabo basenayo yini inhlitiyo lembi. Ngako watsi kubo: “Nine nitinhloli! Nitewuhlola kutsi ngutiphi tindzawo leningatihlasela melula kulelive!” Batsi: ‘Chake! Tsine singemajaha langu-12, latalwa ngubabe munye lohlala eveni laseKhenani. Umnaketfu lomncane usele nababe, kantsi lomunye akasekho.’ Josefa wase utsi: ‘Landzani lomnakenu lomncane, ngitawubona kutsi nikhuluma liciniso yini.’ Ngako babuyela emuva ekhaya.

Kwatsi lapho sebete kudla, Jakobe waphindze wabatfuma eGibhithe. Bahamba naBhenjamini umnakabo lomncane. Kuze avivinye bomnakabo, Josefa wafihla indzebe yakhe yesiliva esakeni laBhenjamini wase usola bomnakabo ngekutsi bayebile. Ngesikhatsi sisebenti saJosefa sitfola lendzebe esakeni laBhenjamini, bomnakabo betfuka. Bancenga Josefa kutsi amane ajezise bona esikhundleni saBhenjamini.

Josefa wase uyabona kutsi bomnakabo sebashintjile. Ngako akazange akhone kutibamba. Wakhala tinyembeti watsi: “Mine nginguJosefa. Usaphila yini babe?” Bomnakabo bamangala kakhulu. Wase utsi kubo: ‘Ngicela ningaphatseki kabi futsi ningasolani ngekutsi nangitsengisa lapha, ngobe nguNkulunkulu lowangitfuma kutsi ngite kucala kunani lapha kuze ngisindzise kuphila kwebantfu. Phangisani nilandze babe nite naye lapha.’

Baya ekhaya bayotjela babe wabo letindzaba letimnandzi futsi babuyela naye eGibhithe. Ngemuva kweminyaka leminyenti Josefa nababe wakhe base bahlala ndzawonye.