CHUBEKA ‘UFUNISISA’ KUCONDZA

Mahlalela: Ndwandwe, ngisijabulele kakhulu sikhatsi lesibe naso sicoca ngeliBhayibheli.a Ngelilanga lesagcinana ngalo wabuta umbuto lomayelana neMbuso waNkulunkulu. Wabuta kutsi kungani BoFakazi BaJehova bakholelwa kutsi uMbuso waNkulunkulu wacala kubusa nga-1914.

Ndwandwe: Uyati bengifundza lenye yetincwadzi tenu, futsi yatsi uMbuso waNkulunkulu wacala kubusa nga-1914. Loko kungiphakamisele imibuto leminyenti ngobe nine nitsi konkhe lenikushoko nikutsatsa eBhayibhelini.

Mahlalela: Ucinisile.

Ndwandwe: LiBhayibheli ngilihlolile, kodvwa angikhumbuli ngitfola livesi lelikhuluma nga-1914. Ngiphindze ngaya eBhayibhelini leliku-Internet futsi ngafuna 1914, kodvwa nakhona kute lapho avela khona.

Mahlalela: Uyati Ndwandwe timbili tintfo lengikuncomela tona. Kwekucala kutsi ulifundze lonkhe liBhayibheli. Kusho kutsi vele uyalitsandza liVi laNkulunkulu.

Ndwandwe: Kona kunjalo, phela kute incwadzi lefanana nalo.

Mahlalela: Ucinisile. Lokunye futsi lengikuncomela kona kutsi uye eBhayibhelini kuze utfole imphendvulo yembuto wakho. Wente loko liBhayibheli lelisikhutsata kutsi sikwente, njengobe litsi ‘asifunisise’ kucondza.b Kuhle kutsi loko uyetama kukwenta.

Ndwandwe: Ngiyabonga. Ngiyafisa kuchubeka ngifundza. Ecinisweni ngiphindze ngacwaninga futsi ngatfola kwatiswa lokutsite ngalomnyaka wa-1914 kulencwadzi lesiyifundzako. Nangisakhumbula kahle ikhuluma ngeliphupho lalenye inkhosi, limayelana nesihlahla lesikhulu lesajutjwa saphindze sahluma.

Mahlalela: Woo ngiyabona. Leso siphrofetho lesikuDanyela sehluko 4. Sikhuluma ngeliphupho iNkhosi Nebukhadnezari yaseBhabhulona leyaba nalo.

Ndwandwe: Ya ngilo lelo. Lesiphrofetho ngisifundze emahlandla lamanyenti. Kodvwa ngikutjele liciniso wena Mahlalela, solo angiboni kutsi sihlangana njani neMbuso waNkulunkulu nobe nalomnyaka wa-1914.

Mahlalela: Ecinisweni wena Ndwandwe ngisho nemphrofethi Danyela akazange akucondze loko bekushiwo ngulesiphrofetho.

Ndwandwe: Mbamba?

Mahlalela: Yebo. KuDanyela 12:8 utsi: “Ngakuva loko labekukhuluma, kodvwa angizange ngikucondze kutsi kusho kutsini.”

Ndwandwe: Hawu kusho kutsi angisingedvwa kantsi. Cha sengiyakhululeka-ke nyalo.

Mahlalela: Kodvwa-ke Danyela yena akazange acondze ngobe bekungasiso sikhatsi saNkulunkulu sekutsi bantfu bakucondze konkhe loko lokushiwo tiphrofetho letisencwadzini yaDanyela. Kodvwa tsine lamuhla singaticondzisisa.

Ndwandwe: Hawu usho ngani?

Mahlalela: Ase unake loko lokushiwo nguDanyela 12:9. Utsi: “Lamavi asavalelwe ashicilelwa, kuyawudzimate kube sikhatsi sekugcina.” Letiphrofetho betitawucondzakala ngemuva kwesikhatsi, lokusho kutsi ‘ngesikhatsi sekugcina.’ Njengobe sisetawubona esifundvweni setfu seliBhayibheli, bonkhe bufakazi buveta kutsi sesiphila kuleso sikhatsi.c

Ndwandwe: Ngiyabona, kodvwa ungangichazela yini kutsi lesiphrofetho lesikuDanyela sisho kutsini?

Mahlalela: Kulungile ngitawetama.

LIPHUPHO LANEBUKHADNEZARI

Mahlalela: Asengicale ngekukulandzisela ngaloko iNkhosi Nebukhadnezari leyakubona ephusheni. Ngemuva kwaloko sitawucoca ngekutsi kusho kutsini.

Ndwandwe: Kulungile.

Mahlalela: Kuleliphupho, Nebukhadnezari wabona sihlahla lesikhulu lebesifika ngisho nasezulwini. Ngemuva kwaloko weva sitfunywa saNkulunkulu sitsi lesihlahla asijutjwe. Kodvwa-ke Nkulunkulu watsi timphandze taso tona tingajutjwa. Ngemuva ‘kwetikhatsi letisikhombisa’ lesihlahla besitawuphindze sihlume.d Ekucaleni, lesiphrofetho besisebenta eNkhosini Nebukhadnezari. Nanobe abeyinkhosi lenemandla, njengalesihlahla lebesisikhulu size sifika ngisho nasezulwini, wajutjwa futsi wahlala “tikhatsi letisikhombisa” ajutjiwe. Uyakhumbula kutsi kwentekani?

Ndwandwe: Cha angikhumbuli.

Mahlalela: Kute inkinga. LiBhayibheli liveta kutsi Nebukhadnezari walahlekelwa yingcondvo tikhatsi letisikhombisa nobe iminyaka lesikhombisa. Ngaleso sikhatsi abengakhoni kuba yinkhosi. Kodvwa ekupheleni kwaletikhatsi letisikhombisa, Nebukhadnezari waphindze wabusa futsi.e

Ndwandwe: Ngikuva kahle konkhe lolokushoko. Kodvwa loku kuhlangana njani neMbuso waNkulunkulu nemnyaka wa-1914?

Mahlalela: Kafishane nje, lesiphrofetho sigcwaliseka kabili. Sagcwaliseka kwekucala ngesikhatsi kubusa kwaNebukhadnezari kuphazamiseka. Kugcwaliseka kwaso kwesibili kuhlanganisa kuphazamiseka kwekubusa kwaNkulunkulu. Ngako-ke ngulokugcwaliseka kwalesiphrofetho kwesibili lokuhlobene neMbuso waNkulunkulu.

Ndwandwe: Wati ngani kutsi kugcwaliseka kwesibili kwalesiphrofetho kuhlobene neMbuso waNkulunkulu?

Mahlalela: Kwekucala nje, lesiphrofetho siyasibonisa loko. Ngekusho kwaDanyela 4:17, lesiphrofetho sakhishwa “kuze kutsi labaphilako bati kutsi Longetulu Kwako Konkhe wengamele yonkhe imibuso yebantfu, futsi uyinika nome ngubani latsandza kumupha yona.” Ulinakile yini lelivesi kulamavi latsi “imibuso yebantfu”?

Ndwandwe: Kunjalo, lisitjela kutsi Loyo Longetulu Kwako Konkhe nguye lobusa “imibuso yebantfu.”

Mahlalela: Yebo. Kodvwa ucabanga kutsi ngubani lona “Longetulu Kwako Konkhe”?

Ndwandwe: Ngicabanga kutsi nguNkulunkulu.

Mahlalela: Uphendvule kahle. Loku kusitjela kutsi lesiphrofetho asikhulumi ngaNebukhadnezari kuphela. Sihlanganisa ‘nemibuso yebantfu,’ lokusho kubusa kwaNkulunkulu ngetulu kwebantfu. Loku kunengcondvo nasihlola ingcikitsi yalesiphrofetho.

Ndwandwe: Hawu usho kutsini?

LOKO LENCWADZI LEKHULUMA NGAKO

Mahlalela: Lencwadzi yaDanyela ikhuluma ngentfo yinye tikhatsi letinyenti. Ikhuluma ngekubekwa kweMbuso waNkulunkulu loholwa nguJesu, iNdvodzana yakhe. Asesibuyele etehlukweni letingemuva. Ngicela ufundze Danyela 2:44.

Ndwandwe: Utsi: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”

Mahlalela: Ngiyabonga. Ucabanga kutsi lelivesi likhuluma ngeMbuso waNkulunkulu yini?

Ndwandwe: Eyi angiciniseki.

Mahlalela: Naka kutsi lelivesi litsi loMbuso “uyawukuma kuze kube phakadze.” UMbuso waNkulunkulu ngiwo longema kuze kube phakadze, kodvwa singasho yini kutsi nemibuso yebantfu nayo injalo?

Ndwandwe: Cha ngeke.

Mahlalela: Nasi lesinye siphrofetho encwadzini yaDanyela lesikhuluma ngeMbuso waNkulunkulu. Lesiphrofetho sikuDanyela 7:13, 14. Mayelana nembusi lotawubusa esikhatsini lesitako, lesiphrofetho sitsi: “Wanikwa emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.” Ikhona yini intfo loyetayele lokukhulunywa ngayo kulesiphrofetho?

Ndwandwe: Yebo, sikhuluma ngembuso.

Mahlalela: Ucinisile, kodvwa asikhulumi nganobe ngumuphi umbuso. Naka kutsi lelivesi litsi loMbuso utawuba neligunya ngetulu ‘kwebantfu, tive, kanye netilwimi.’ Ngalamanye emavi, loMbuso utawubusa wonkhe umhlaba.

Ndwandwe: Uyati angikakunaki-ke loko, kodvwa ucinisile. Vele lisho njalo.

Mahlalela: Ase uphindze unake kutsi yini lenye lesiphrofetho lesiyishoko: “Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.” Uyabona yini kutsi lamavi ayafana nesiphrofetho lesisifundzile kuDanyela 2:44?

Ndwandwe: Kunjalo Mahlalela.

Mahlalela: Asesibukete loko lesesicoce ngako. Lesiphrofetho lesikuDanyela sehluko 4 sakhishwa kuze bantfu batewukwati kutsi “Longetulu Kwako Konkhe wengamele yonkhe imibuso yebantfu.” Loku kuveta kahle kutsi lesiphrofetho sinalokunye kugcwaliseka ngaphandle kwaloko lokutsintsa Nebukhadnezari. Kuyo yonkhe incwadzi yaDanyela sitfola tiphrofetho letimayelana nekubekwa kweMbuso waNkulunkulu loholwa yiNdvodzana yakhe. Ucabanga kutsi kunengcondvo yini kwephetsa ngekutsi lesiphrofetho lesikuDanyela sehluko 4 naso sikhuluma ngeMbuso waNkulunkulu?

Ndwandwe: Ngicabanga kanjalo. Kodvwa solo angiboni kutsi loku kuhlangana njani na-1914.

“KUZE TIKHATSI LETISIKHOMBISA TENDLULE”

Mahlalela: Kulungile, asesibuyele emuva endzabeni yeNkhosi Nebukhadnezari. Ekugcwalisekeni kwekucala kwalesiphrofetho abemelelwa sihlahla. Kubusa kwakhe kwaphazamiseka ngesikhatsi lesihlahla sijutjwa futsi sishiywa sijutjiwe tikhatsi letisikhombisa, lokumelela sikhatsi lapho alahlekelwa khona yingcondvo sikhatsi lesitsite. Letikhatsi letisikhombisa taphela ngesikhatsi ingcondvo yaNebukhadnezari ibuya futsi naye abuyela ekubuseni kwakhe. Ekugcwalisekeni kwesibili kwalesiphrofetho, kubusa kwaNkulunkulu bekutawuphazamiseka sikhatsi lesitsite, kodvwa hhayi ngesizatfu sekutsi Nkulunkulu utawube ehlulekile.

Ndwandwe: Hawu usho kutsini?

Mahlalela: Endvulo, emakhosi aka-Israyeli labebusa eJerusalema bekutsiwa ahleti “esihlalweni sebukhosi saSimakadze.”f Abemelela Nkulunkulu ekubuseni bantfu bakhe. Ngako kubusa kwalawo makhosi bekuyindlela Nkulunkulu layisebentisako kuze abuse bantfu bakhe. Ngekuhamba kwesikhatsi, lamanyenti alawo makhosi akazange asamlalela Nkulunkulu futsi nelinyenti lebantfu lebebangaphansi kwawo nalo lenta lokufanako. Ngenca yekungalaleli kwema-Israyeli, Nkulunkulu wawayekela ancotjwa baseBhabhulona nga-607 B.C.E. Kusukela ngaleso sikhatsi, kute inkhosi leyasetjentiswa nguJehova eJerusalema. Kungaloyo mcondvo-ke kubusa kwaNkulunkulu kwaphazamiseka. Sisahambisana mosi Ndwandwe?

Ndwandwe: Hhayi ngikuva kahle Mahlalela.

Mahlalela: Ngako-ke 607 B.C.E waba kucala kwaletikhatsi letisikhombisa, nobe sikhatsi lapho kubusa kwaNkulunkulu kwaphazamiseka khona. Ekupheleni kwaletikhatsi letisikhombisa, Nkulunkulu abetawubeka umbusi lomusha labetammelela, futsi nyalo lomuntfu abetawuvela ezulwini. Kungaleso sikhatsi-ke lapho leletinye tiphrofetho lesifundze ngato kuDanyela lebetitawugcwaliseka khona. Ngako umbuto lomkhulu ngunangu: Letikhatsi letisikhombisa taphela nini? Nasingaphendvula lowombuto, sitawukhona kwati kutsi uMbuso waNkulunkulu wacala nini kubusa.

Ndwandwe: Cha ngiyabona. Kusho kutsi letikhatsi letisikhombisa taphela nga-1914?

Mahlalela: Ushaye khona!

Ndwandwe: Kodvwa sikwati ngani loko?

Mahlalela: Ngesikhatsi asesemhlabeni, Jesu waveta kutsi letikhatsi letisikhombisa betisengakapheli.g Ngako loku kusho kutsi betitawutsatsa sikhatsi lesidze. Letikhatsi letisikhombisa tacala emakhulwini eminyaka ngembikwekutsi Jesu ete emhlabeni, futsi tachubeka kwaze kwaba ngemuva kwesikhatsi lesitsite asabuyele ezulwini. Khumbula nekutsi loko lokushiwo tiphrofetho letisencwadzini yaDanyela kwakungeke kucondzakale kuze “kube sikhatsi sekugcina.”h Ngeminyaka yabo-1800, bafundzi beliBhayibheli labacotfo baba nesifiso sekusihlolisisa lesiphrofetho kanye naletinye. Bacondza kutsi letikhatsi letisikhombisa betitawuphela nga-1914. Netintfo letenteke emhlabeni kusukela ngaleso sikhatsi tiyakufakazela kutsi vele 1914 ngumnyaka uMbuso waNkulunkulu lowacala ngawo kubusa ezulwini. Lona ngumnyaka umhlaba lowangena ngawo emalangeni ekugcina nobe esikhatsini sekuphela. Ngiyati kutsi loku lesesicoce ngako kunyenti kakhulu . . .

Ndwandwe: Kunjalo vele wena Mahlalela. Kodvwa ngitawuphindze ngiyifundze lendzaba kuze ngitoyicondzisisa kahle.

Mahlalela: Hhayi ungakhatsateki Ndwandwe. Nami kwangitsatsa sikhatsi kutsi ngiticondze letiphrofetho kanye nekugcwaliseka kwato. Kodvwa ngiyetsemba kutsi kucoca kwetfu kukusite wabona kutsi BoFakazi BaJehova vele bakutsatsa eBhayibhelini loko labakukholelwako ngeMbuso.

Ndwandwe: Ucinisile. Nami ihlale ingitsintsa indlela lenikusekela ngayo eBhayibhelini loko lenikukholelwako.

Mahlalela: Futsi ngiyabona kutsi nawe ufuna kwenta lokufanako. Njengobe ngishito loku lesicoce ngako kunyenti kakhulu. Ngiyaciniseka kutsi usesenayo leminye imibuto. Kodvwa-ke njengobe sesibonile kutsi tikhatsi letisikhombisa tihlobene neMbuso waNkulunkulu futsi tacala nga-607 B.C.E., sati kanjani-ke kutsi letikhatsi letisikhombisa taphela nga-1914?i

Ndwandwe: Vele ngiyatibuta ngaloko.

Mahlalela: LiBhayibheli nalo liyasisita sibone kutsi letikhatsi letisikhombisa betiyotsatsa sikhatsi lesingakanani. Ungatsandza yini kutsi nangibuya sicoce ngaleyondzaba?j

Ndwandwe: Ngingakujabulela loko.

KUBUKETWA LOKUFISHANE KWELIPHUPHO LANEBUKHADNEZARI

Mahlalela: Ngiyajabula kuphindze ngikubone Ndwandwe. Awati kutsi ngisijabulela njani lesifundvo setfu seliBhayibheli lesiba naso njalo ngeliviki.a Usele njani vele ndvodza yakitsi?

Ndwandwe: Ngisele kahle kakhulu.

Mahlalela: Ngiyajabula kukuva loko. Ngelilanga lesigcinene ngalo, besikhuluma ngekutsi kungani BoFakazi BaJehova batsi uMbuso waNkulunkulu wacala kubusa nga-1914.b Ngesikhatsi sicoca ngalendzaba, satfola bufakazi baloku esiphrofethweni lesisesehlukweni 4 sencwadzi yaDanyela. Usakhumbula yini kutsi lesiphrofetho besikhuluma ngani?

Ndwandwe: Wo, yebo ngiyakhumbula, besikhuluma ngesihlahla lesikhulu iNkhosi Nebukhadnezari leyasibona ephusheni.

Mahlalela: Ucinisile. Kuleliphupho Nebukhadnezari wabona sihlahla lesikhulu lesasifika ezulwini. Wase uva sitfunywa saNkulunkulu simtjela kutsi lesihlahla kufanele sijutjwe, kodvwa sicu netimphandze taso tishiywe. Ngemuva ‘kwetikhatsi letisikhombisa,’ lesihlahla besitawuphindze sihlume.c Saphindze sacoca nangekutsi kungani lesiphrofetho sigcwaliseka kabili. Usakhumbula yini kutsi sagcwaliseka nini kwekucala?

Ndwandwe: Angitsi sagcwaliseka kuNebukhadnezari, ngesikhatsi alahlekelwe yingcondvo iminyaka lesikhombisa?

Mahlalela: Yebo. Nebukhadnezari walahlekelwa yingcondvo kwesikhashana, ngako kubusa kwakhe kwaphazamiseka. Ekugcwalisekeni lokukhulu kwalesiphrofetho, kubusa kwaNkulunkulu nako bekutawuphazamiseka tikhatsi letisikhombisa. Njengobe safundza, letikhatsi letisikhombisa tacala ngesikhatsi kubhujiswa iJerusalema nga-607 B.C.E. Kusukela ngaleso sikhatsi, kwababete emakhosi emhlabeni labemelele Jehova Nkulunkulu ekubuseni bantfu. Kodvwa-ke, ekupheleni kwaletikhatsi letisikhombisa Nkulunkulu abetawubeka uMbusi lomusha labetawubusa bantfu bakhe, futsi loMbusi abetawuba sezulwini. Ngalamanye emavi, kuphela kwaletikhatsi letisikhombisa bekutawusho kutsi uMbuso waNkulunkulu wasezulwini sewuyacala kubusa. Kuze kube ngunyalo sesicocile ngekutsi letikhatsi letisikhombisa tacala nini. Ngako-ke nasingakhona kubona kutsi letikhatsi betitawuba tindze kangakanani, sitawukwati nekutfola kutsi loMbuso waNkulunkulu wacala nini kubusa. Sisahambisana mosi Mnguni?

Ndwandwe: Yebo, sisahambisana kahle. Sewungisitile wangikhumbuta ngalesiphrofetho.

Mahlalela: Kuhle kakhulu-ke nakunjalo. Asisale sichubeka nendzaba yetfu, sihlole kutsi letikhatsi letisikhombisa betitawuba tindze kangakanani. Nami bengisayotikhumbuta ngayo lendzaba, futsi ngitawetama kutsi ngikuchazele kahle.

Ndwandwe: Kulungile.

KUPHELA KWETIKHATSI LETISIKHOMBISA​—KUCALA KWEMALANGA EKUGCINA

Mahlalela: Kulokugcwaliseka kwekucala kwalesiphrofetho lesifaka ekhatsi Nebukhadnezari, kuyacaca kutsi letikhatsi letisikhombisa betisho iminyaka lesikhombisa leyetayelekile. Kepha-ke, kulokugcwaliseka kwaso lokukhulu lokufaka ekhatsi uMbuso waNkulunkulu, letikhatsi letisikhombisa kufanele kutsi tindze kakhulu kuneminyaka nje lesikhombisa leyetayelekile.

Ndwandwe: Hawu, yini lekwenta usho njalo?

Mahlalela: Kwekucala nje, khumbula kutsi letikhatsi letisikhombisa tacala ngalesikhatsi kubhujiswa iJerusalema nga-607 B.C.E. Nasingacala kubala kusukela kulowo mnyaka, iminyaka lesikhombisa ingasiyisa emnyakeni wa-600 B.C.E. Kodvwa-ke kute lokumcoka lokwenteka ngalowo mnyaka lokuhambisana nekubusa kwaNkulunkulu. Ngetulu kwaloko, njengobe sike sasho ekucaleni, emakhulwini eminyaka leyalandzela, ngesikhatsi Jesu alapha emhlabeni, waveta kutsi letikhatsi letisikhombisa betisengakapheli.

Ndwandwe: Wo, uyati sengiyakhumbula-ke loku sewusho.

Mahlalela: Ngako-ke, kunekutsi tibe yiminyaka leyetayelekile, letikhatsi letisikhombisa kufanele kube tisikhatsi lesidze.

Ndwandwe: Sidze kangakanani leso sikhatsi?

Mahlalela: Incwadzi yeliBhayibheli yeSembulo, lehlobene kakhulu nencwadzi yaDanyela, iyasisita ekutseni sititfole letikhatsi letisikhombisa kutsi tindze kangakanani. Iveta kutsi tikhatsi letintsatfu nahhafu tingangemalanga langu-1 260.d Ngako-ke tikhatsi letisikhombisa, lesititfola nasiphindza kabili letikhatsi letintsatfu nahhafu, tilingana nemalanga langu-2 520. Sisahambisana mosi Ndwandwe?

Ndwandwe: Yebo, kona ngiyakuva. Kodvwa angiboni kutsi loku kuveta njani kutsi uMbuso waNkulunkulu wacala kubusa nga-1914.

Mahlalela: Kulungile asesibone kutsi loku kuyahlangana yini nalo-1914. Ngaletinye tikhatsi, etiphrofethweni teliBhayibheli, lilanga limelela umnyaka.e Nasisebentisa lomtsetfo wekutsi lilanga limelela umnyaka, letikhatsi letisikhombisa tingalingana neminyaka lengu-2 520. Nasibala sisuka ku-607 B.C.E. siye embili, leminyaka lengu-2 520 isibeka ku-1914.f Nguloku-ke lokusenta siphetse ngekutsi 1914 ngumnyaka lokwaphela ngawo letikhatsi letisikhombisa, lokungumnyaka Jesu laba ngawo yiNkhosi eMbusweni waNkulunkulu. Lokunakeka kakhulu futsi kutsi kusukela nga-1914, emhlabeni bekusolo kwenteka tintfo letinkhulu liBhayibheli lelakhuluma ngato kutsi titakwenteka ngemalanga ekugcina.

Ndwandwe: Ngutiphi leto tintfo?

Mahlalela: Cabanga ngaloko Jesu lakusho njengobe kuvetwe kuMatewu 24:7. Mayelana netikhatsi labetawucala ngato kubusa ezulwini, naku Jesu lakusho: “Sive siyawuvukela lesinye sive, nembuso uvukele lomunye umbuso, futsi kuyawuba khona indlala nekutamatama kwemhlaba etindzaweni letehlukahlukene.” Naka kutsi Jesu wakhuluma ngendlala kanye nekutamatama kwemhlaba lebekuyawuba khona ngemalanga ekugcina. Angitsi sesitibone kakhulu tinkinga letinjalo lamhlabeni kulelikhulu leminyaka lelendlulile?

Ndwandwe: Hheyi kunjalo.

Mahlalela: Kulelivesi Jesu waphindze wakhuluma ngetimphi lebetiyawuba khona nasayiNkhosi eMbusweni waNkulunkulu. Nencwadzi yeliBhayibheli yeSembulo nayo yakhuluma ngaletimphi, hhayi nje timphi telive kodvwa ngetimphi lebetitawutsintsa umhlaba wonkhe ngemalanga ekugcina.g Usakhumbula yini kutsi imphi yelive yekucala yacala nini?

Ndwandwe: Yacala nga-1914, lomnyaka lotsite Jesu wacala ngawo kubusa! Hawu! Uyati angizange sengikucabange-ke loku.

Mahlalela: Masihlanganisa konkhe loku, letiphrofetho letimayelana netikhatsi letisikhombisa kanye naletinye nje tiphrofetho letiseBhayibhelini letimayelana nemalanga ekugcina, kuvele kubonakale kutsi loku kunengcondvo. BoFakazi BaJehova bayaciniseka kutsi Jesu waba yiNkhosi eMbusweni waNkulunkulu nga-1914, nekutsi emalanga ekugcina acala ngalowo mnyaka.h

Ndwandwe: Eish, ngisazama kukuvisisa kahle konkhe loku.

Mahlalela: Kufanele ndvodza yakitsi. Njengobe ngike ngasho nje, nami kwangitsatsa sikhatsi kukuvisisa kahle konkhe loku. Kepha ngiyetsemba kutsi lencociswano yetfu seyikusitile wabona kutsi nanome lomnyaka wa-1914 ungatfolakali eBhayibhelini, kodvwa BoFakazi BaJehova batisekela emiBhalweni timfundziso tabo letimayelana nalomnyaka.

Ndwandwe: Yebo kunjalo Mahlalela, ngiko lengikutsandzako ngani, kutsi nome ngabe yini leniyikhulumako niyifakazela ngembhalo. Animane nje nisho imibono yenu. Kodvwa ngiyatibuta kutsi yini leleyenta lendzaba ibe lukhuni kangaka. Wentiwa yini nje Nkulunkulu kutsi angaveli asigagulele lomnyaka wa-1914 kutsi ngiwo Jesu labetawucala ngawo kubusa ezulwini?

Mahlalela: Muhle lowo mbuto wakho Ndwandwe. Ecinisweni imiBhalo inetintfo letinyenti letingakaveli tacaciswa. Yini vele leyenta kutsi Nkulunkulu avumele kutsi liBhayibheli libhalwe ngendlela lebeyitawudzinga kutsi bantfu batimisele nabafuna kulicondza? Mhlawumbe singacoca ngako loku nangibuya.

Ndwandwe: Ngingabonga mnaketfu.