Imibuto Levela Kubafundzi

Litsini liBhayibheli ngekwenta tifungo?

Sifungo sisho “kusho emavi labaluleke kakhulu nobe setsembiso sekwenta lokutsite, ngalokuvamile Nkulunkulu abe ngufakazi.” Singashiwo ngemlomo nobe sibhalwe phansi.

Labanye bangase bacabange kutsi kubi kwenta sifungo ngobe Jesu watsi: “Ningafungi sanhlobo . . . Kuphela nje, ‘Yebo’ wenu akabe nguyebo, na-‘Cha’ wenu abe ngucha, ngobe lokungetulu kwaloko kuvela kulomubi.” (Mat. 5:33-37) Kuliciniso kutsi Jesu bekati kutsi uMtsetfo waMosi bewufuna kutsi ema-Israyeli afunge kuletinye timo, nekutsi tikhonti taJehova letetsembekile betike tatenta tifungo. (Gen. 14:22, 23; Eks. 22:10, 11) Bekati nekutsi Jehova bekatentile tifungo. (Heb. 6:13-17) Ngako Jesu bekangasho kutsi akukafaneli sifunge, kunaloko bekasecwayisa ngekwenta tifungo letingakabaluleki nobe letingasho lutfo. Kufanele sikutsatse njengalokungcwele kugcina emavi etfu. Kufanele sikwente loko lesikwetsembisile.

Ngako yini lokufanele uyente nawucelwa kutsi ufunge? Kwekucala, ciniseka kutsi utawukhona kusifeza lesifungo. Nawungaciniseki, kuncono kutsi ungasenti. LiVi laNkulunkulu liyasecwayisa litsi: “Kuncono ungasenti sifungo, kunekutsi usente bese awusasifezi.” (Shu. 5:5) Ngemuva kwaloko, cabanga ngetimiso letiseBhayibhelini letikhuluma ngalesifungo bese wenta sincumo usebentisa nembeza wakho loceceshiwe. Ngutiphi letinye taletimiso letiseBhayibhelini?

Letinye tifungo tiyavumelana nentsandvo yaNkulunkulu. Sibonelo nje, BoFakazi BaJehova basho tifungo nabashada. Umkhwenyane namakoti betsembisa embikwaNkulunkulu nasembikwalabanye kutsi batawutsandzana, baphatsane kahle futsi bahloniphane “yingci nje nabasaphila ndzawonye emhlabeni.” (Labanye nabashada abawasho njengobe anjalo lamagama, kodvwa nabo benta sifungo embikwaNkulunkulu.) Babese baba yindvodza nemfati futsi bachubeka bashadile yingci nje nabasaphila. (Gen. 2:24; 1 Khor. 7:39) Lesifungo semshado sikahle futsi sivumelana nentsandvo yaNkulunkulu.

Letinye tifungo ativumelani nentsandvo yaNkulunkulu. UmKhristu weliciniso angeke atente letinye tifungo letinjengekutsi utawusebentisa tikhali kuze avikele live lakhe nobe kutsi utawuyekela kukhonta Nkulunkulu. Kwenta loko kutawushayisana nemitsetfo yaNkulunkulu. EmaKhristu ‘akasiyo incenye yalelive,’ ngako angeke atingenele tindzaba talo netimphi talo.—Joh. 15:19; Isa. 2:4; Jak. 1:27.

Letinye tifungo tishiyelwa kunembeza. Ngaletinye tikhatsi, kufanele sicabangisise ngemavi aJesu latsi “nikani Khesari lokukwakhe, kodvwa ninike Nkulunkulu lokukwakhe” ngaphambi kwekwenta sifungo.—Luk. 20:25.

Sibonelo nje, asesitsi umKhristu ufaka sicelo sebuve nobe ufaka sicelo sekutfola i-passport bese utjelwa kutsi kufanele acale afunge. Nangabe kulelo live lesifungo sisetsembiso sekwenta lokutsite lokushayisana nemtsetfo waNkulunkulu, nembeza wakhe loceceshwe ngeliBhayibheli angeke umvumele kutsi asente. Nanobe kunjalo, hulumende angamvumela kutsi ashintje emavi lakulesifungo kuze avumelane nanembeza wakhe.

Kwenta sifungo lesinjalo kungavumelana nesimiso lesitfolakala KubaseRoma 13:1, lesitsi: “Bonkhe bantfu abatfobele tiphatsimandla.” Ngako umKhristu angase ancume kutsi akusikubi kufunga atsi utakwenta intfo latsi Nkulunkulu akayente.

Kubalulekile nekusebentisa nembeza wakho loceceshwe liBhayibheli nangabe ucelwa kutsi usebentise intfo letsite nobe wente lokutsite nawenta leso sifungo. EmaRoma nemaSikithi bekafunga asebentisa inkemba lobeyiluphawu lwankulunkulu wemphi lolucinisekisa kutsi umuntfu angetsenjwa. EmaGriki bekaphakamisela sandla etulu ezulwini nakenta sifungo. Nawenta njalo, bewakhombisa kutsi ayati kutsi kunalotsite lonemandla losezulwini lokuvako loko lakushoko nalokubonako loko lakwentako, lokunguye bonkhe bantfu labalandzisa kuye.

Kuliciniso kutsi sikhonti saJehova angeke sifunge sisebentisa luphawu lwesive loluhambisana nekukhonta kwemanga. Kodvwa kutsiwani nangabe inkantolo ikucela kutsi ubeke sandla sakho etikweliBhayibheli futsi ufunge kutsi utawukhuluma liciniso? Esimeni lesinjalo, ungakwenta loko ngobe imiBhalo isitjela ngebantfu labetsembekile labenta lokutsite nabafunga. (Gen. 24:2, 3, 9; 47:29-31) Kubalulekile kukhumbula kutsi nawenta sifungo lesinjalo, usuke ufunga embikwaNkulunkulu kutsi utawukhuluma liciniso. Kufanele ukulungele kukhuluma liciniso nawubutwa imibuto.

Ngenca yekutsi sibutsatsa njengalobubalulekile buhlobo betfu naJehova, kufanele sithantaze futsi sicabangisise nganobe ngabe ngusiphi sifungo lesicelwa kutsi sisente, siciniseke kutsi angeke sishayisane nanembeza wetfu nobe netimiso teliBhayibheli. Nangabe uncuma kwenta sifungo, kufanele uciniseke kutsi uyasifeza.—1 Phet. 2:12.