SIHLOKO LESIFUNDVWAKO 30

Siphrofetho Lesibalulekile Kuwe

“Ngitawenta kutsi kube nebutsa emkhatsini wakho nemfati.”—GEN. 3:15.

INGOMA 15 Dvumisani Litibulo LaJehova!

LOKUTAWUCOCWA NGAKO KULESIHLOKOa

1. Yini Jehova layenta ngekushesha nje ngemuva kwekutsi bo-Adamu na-Eva bone? (Genesisi 3:15)

NGEKUSHESHA nje ngemuva kwekutsi bo-Adamu na-Eva bone, Jehova waniketa situkulwane sabo litsemba asebentisa siphrofetho lesibalulekile. Loko lakusho kubhalwe kuGenesisi 3:15.—Fundza.

2. Yini leyenta lesiphrofetho sibaluleke?

² Lesiphrofetho sivela encwadzini yekucala yeliBhayibheli. Kodvwa lokushiwo ngito tonkhe letinye tincwadzi teliBhayibheli kuyahlobana naso. Njenge-glue lehlanganisa onkhe emakhasi encwadzi, emavi lakuGenesisi 3:15 ahlanganisa lokushiwo ngito tonkhe tincwadzi teliBhayibheli, akwente kube ngumlayeto munye, wekutsi Nkulunkulu utawutfumela uMkhululi lotawubhubhisa Develi nabo bonkhe balandzeli bakhe lababi.b Leso kutawuba sibusiso lesikhulu kulabo labatsandza Jehova!

3. Sitawucoca ngani kulesihloko?

³ Kulesihloko, sitawuphendvula nayi imibuto lelandzelako lemayelana nalesiphrofetho lesikuGenesisi 3:15: Bobani lokukhulunywa ngabo kulesiphrofetho? Sigcwaliseka njani? Sisisita njani?

BOBANI LOKUKHULUNYWA NGABO KULESIPHROFETHO?

Sitfombe: “Labo Lokukhulunywa Ngabo KuGenesisi 3:14, 15.” 1. Inyoka: Sathane uvetwa asidalwa semoya. 2. Intalelwane yenyoka: tingilosi letimbi. 3. Umfati: tingilosi letetsembekile. 4. Intalelwane yemfati: NguJesu Khristu nalabagcotjiwe latawubusa nabo ezulwini. Loku kucocwa ngako esigabeni 4, 5, 7, na-8.

4. Ngubani “inyoka,” futsi sisho ngani?

⁴ KuGenesisi 3:14, 15 kukhulunywa ‘ngenyoka,’ ‘nentalelwane’ yayo, ‘ngemfati’ “nentalelwane” yakhe. LiBhayibheli liyasisita kutsi sibati.c Asicale ‘ngenyoka.’ Inyoka mbamba beyingeke ikuve loko Jehova lakusho ensimini yase-Edeni. Ngako kungenteka lesehlulelo Jehova wasinika sidalwa lesihlakaniphile. Besingubani? Sembulo 12:9 sikwenta kucace kutsi ngubani lenyoka. Lelivesi litsi “inyoka yekucala” nguSathane Develi. Bobani labayintalelwane yalenyoka?

Sathane uvetwa asidalwa semoya. — **INYOKA**

NguSathane Develi, loyo umbhalo weSembulo 12:9 lombita ngekutsi ‘yinyoka yekucala’ (Buka sigaba 4)

5. Bobani labayintalelwane yenyoka?

⁵ Ngaletinye tikhatsi liBhayibheli lisebentisa ligama lelitsi intalelwane kuze lisho labo labalingisa lotsite, kangangekutsi bangabitwa ngekutsi bantfwana bakhe. Ngako intalelwane yenyoka ifaka ekhatsi tidalwa temoya kanye nebantfu labangamlaleli Jehova Nkulunkulu futsi labamelene nebantfu bakhe, njengaSathane. Loku kufaka ekhatsi tingilosi letashiya imisebenti yato ezulwini ngemalanga aNowa, kanye nebantfu labenta tintfo letimbi njengababe wabo Develi.—Gen. 6:1, 2; Joh. 8:44; 1 Joh. 5:19; Juda 6.

Tingilosi letimbi. — **INTALELWANE YENYOKA**

Tingilosi letimbi kanye nebantfu labangamlaleli Jehova Nkulunkulu futsi labamelene nebantfu bakhe (Buka sigaba 5)

6. Yini lesenta sitsi ‘lomfati’ bekungasuye Eva?

⁶ Nyalo asesicoce ‘ngalomfati.’ Angeke sitsi lomfati ngu-Eva. Leni? Cabanga nganaku. Lesiphrofetho sitsi intalelwane yemfati “itawufihlita” inhloko yenyoka. Njengobe sesibonile, lenyoka nguSathane futsi intalelwane ya-Eva lenesono beyingeke ikhone kumfihlita. Bekatawufihlitwa njani-ke Sathane?

7. Sicabanga ngeSembulo 12:1, 2, 5, 10, ngubani lomfati lokukhulunywa ngaye kuGenesisi 3:15?

⁷ Incwadzi yekugcine yeliBhayibheli iyasitjela kutsi ungubani lomfati. (Fundza Sembulo 12:1, 2, 5, 10.) Lona akusuye umfati lovamile! Kunenyeti ngephansi kwetinyawo takhe futsi kunemchele wetinkhanyeti letingu-12 enhloko yakhe. Ubeleka umntfwana longakavami, lokunguMbuso waNkulunkulu. LoMbuso usezulwini, ngako kufanele kube nalomfati usezulwini. Lomfati umelela incenye lesezulwini yenhlangano yaJehova leyakhiwa tingilosi letetsembekile.—Gal. 4:26.

Tingilosi letetsembekile. — **UMFATI**

Yincenye lesezulwini yenhlangano yaJehova leyakhiwa tingilosi takhe letetsembekile (Buka sigaba 7)

8. Ngubani intalelwane leyinhloko yemfati, futsi yacala nini kuba khona? (Genesisi 22:15-18)

⁸ LiVi laNkulunkulu liphindze lisisite sibone kutsi ngubani intalelwane leyinhloko yalomfati. Bekufanele ibe yintalelwane ya-Abrahama. (Fundza Genesisi 22:15-18.) Ngekuvumelana nalesiphrofetho, Jesu ungulentalelwane yalendvodza leyetsembekile. (Luk. 3:23, 34) Kodvwa lentalelwane bekufanele ibe nemandla kunemuntfu ngobe bekufanele ifihlite Sathane Develi angaphindze abe khona. Ngako ngesikhatsi Jesu aneminyaka lengaba ngu-30, wagcotjwa ngemoya longcwele. Ngesikhatsi agcotjwa, waba yintalelwane leyinhloko yalomfati. (Gal. 3:16) Ngemuva kwekuvuswa kwaJesu, Nkulunkulu “wametfwesa ludvumo nekuhlonipheka” futsi wamnika “lonkhe ligunya ezulwini nasemhlabeni,” lokufaka ekhatsi ligunya ‘lekubhidlita imisebenti yaDeveli.’—Heb. 2:7; Mat. 28:18; 1 Joh. 3:8.

Jesu Khristu nalabagcotjiwe latawubusa nabo ezulwini. — **INTALELWANE YEMFATI**

NguJesu Khristu kanye nalabo latawubusa nabo labangu-144 000 (Buka tigaba 8-9)

9-10. (a) Bobani labanye labayincenye yentalelwane yemfati, futsi bacala nini kuba yincenye yayo? (b) Yini lesitawucoca ngayo nyalo?

⁹ Kunalabanye lebebatawuba yincenye yalentalelwane, ngaphandle kwaJesu. Umphostoli Pawula wakhuluma ngabo ngesikhatsi atjela emaKhristu lagcotjiwe lebekangemaJuda nalawo bekavela kubantfu betive, nakatsi: “Nangabe nibaKhristu, ningiyo mbamba intalelwane ya-Abrahama, futsi nitawutfola lifa njengobe nje Nkulunkulu etsembisa.” (Gal. 3:28, 29) Jehova nakagcoba umKhristu ngemoya longcwele, loyo muntfu uba yincenye yentalelwane yemfati. Ngako lentalelwane ifaka ekhatsi Jesu Khristu nalabo latawubusa nabo labangu-144 000. (Semb. 14:1) Bonkhe laba betama kucabanga nekwenta njengaBabe wabo, lokunguJehova Nkulunkulu.

¹⁰ Njengobe sesibati labo lokukhulunywa ngabo kuGenesisi 3:15, asesicoce ngekutsi yini Jehova lasayentile kuze agcwalise lesiphrofetho nekutsi sisisita njani lamuhla.

SAGCWALISEKA NJANI LESIPHROFETHO?

11. Intalelwane yemfati yalimala njani “esitsendzeni”?

¹¹ Ngekusho kwalesiphrofetho lesikuGenesisi 3:15, lenyoka beyitawulimata ‘sitsendze’ sentalelwane yalomfati. Loko kwenteka ngesikhatsi Sathane asebentisa emaJuda nemaRoma kutsi abulale iNdvodzana yaNkulunkulu. (Luk. 23:13, 20-24) Umuntfu lolimele sitsendze kungenteka angakhoni kuhamba nobe kuhamba kahle sikhatsi lesitsite, ngendlela lefanako, ngesikhatsi Jesu afile bekute lebekakhona kukwenta.—Mat. 16:21.

12. Itawufihlitwa njani inhloko yenyoka futsi nini?

¹² Kuze kugcwaliseke lesiphrofetho lesikuGenesisi 3:15, bekutawudzingeka kutsi Jesu angahlali ethuneni. Sisho ngani? Sisho ngobe lesiphrofetho sitsi lentalelwane yemfati beyitawufihlita inhloko yalenyoka. Loko kusho kutsi sitsendze saJesu besitawuphola, futsi nguloko kanye lokwenteka! Ngemuva kwemalanga lamatsatfu Jesu afile, wavuswa sekasidalwa semoya lesingeke siphindze sife. Ngesikhatsi saNkulunkulu lesifanele, Jesu utawufihlita Sathane angaphindzi abe khona. (Heb. 2:14) Khristu kanye nalabo latawubusa nabo batawubhubhisa titsa taNkulunkulu, lokuyintalelwane yenyoka.—Semb. 17:14; 20:4, 10.d

Tintfo Letibalulekile Letentekile Nakugcwaliseka Genesisi 3:15

A.NGA-1943 B.C.E.

Nkulunkulu ucala kugcwalisa setsembiso sakhe sekutsi lomunye loyintalelwane ya-Abrahama utawuba ngulentalelwane leyetsenjisiwe. (Gen. 12:1-3; 22:15-18)
B.NGA-29 C.E.

Jesu uyagcotjwa futsi uba yincenye leyinhloko yalentalelwane yalomfati. (Mat. 3:16; Gal. 3:16)
C.LIPHASIKA NGA-33 C.E.

Jesu ulinyatwa sitsendze kodvwa siyaphola ngemuva kwemalanga lamatsatfu. (Mat. 16:21; 26:1, 2)
D.LIPHENTEKHOSTE NGA-33 C.E.

Bekucala labayincenye yalentalelwane yemfati bayagcotjwa ngemoya longcwele. (Imis. 2:1-4; Gal. 3:29)
E.NGABO-1914

Sathane uyacoshwa ezulwini futsi intalelwane yalomfati iphatfwa kabi kakhulu. (Semb. 12:9, 12, 17)
F.EKUPHELENI KWEKUBUSA KWEMINYAKA LEYINKHULUNGWANE

Sathane ubhujiswa ngalokuphelele. (Semb. 20:7, 10)

SISISITA NJANI LESIPHROFETHO?

13. Kusisita njani kugcwaliseka kwalesiphrofetho?

¹³ Nangabe usikhonti saNkulunkulu, kuyakusita kugcwaliseka kwalesiphrofetho. Jesu weta emhlabeni angumuntfu, futsi wabuveta kahle buntfu baBabe wakhe. (Joh. 14:9) Ngaye, sesiyamati Jehova Nkulunkulu futsi sesiyamtsandza. Kuphindze kusisite loko lakufundzisa nendlela lacondzisa ngayo libandla lebuKhristu lamuhla. Usifundzisile kutsi singaphila njani ngendlela letawenta semukelwe nguJehova. Ngenca yekutsi Jesu walimala esitsendzeni, lokusho kufa kwakhe, sonkhe siyazuza kuko. Kanjani? Ngesikhatsi sekavusiwe, wanikela ngengati yakhe yaba ngumhlatjelo lote sono ‘lesihlanta kuto tonkhe tono.’—1 Joh. 1:7.

14. Bantfu bekufanele balindzele kutsi lesiphrofetho lesashiwo e-Edeni sigcwaliseke ngekushesha yini? Chaza.

¹⁴ Emavi lashiwo nguJehova e-Edeni aveta kutsi bekutawuphela sikhatsi lesitsite ngaphambi kwekutsi lesiphrofetho sigcwaliseke. Bekutawuphela sikhatsi ngaphambi kwekutsi lomfati atale lentalelwane, kutsi Develi ahlanganise balandzeli bakhe, nekutsi butsa (nobe inzondo) bukhule emkhatsini walamacembu lamabili. Kuyasisita kwati lesiphrofetho ngobe siyasecwayisa kutsi lelive lelibuswa nguSathane litabenyanya labo labakhonta Jehova. Jesu wanika bafundzi bakhe secwayiso lesifanako. (Mak. 13:13; Joh. 17:14) Sikubonile kugcwaliseka kwalencenye yalesiphrofetho, ikakhulukati kuleminyaka lengu-100 yakamuva. Kanjani?

15. Yini leyenta kutsi live laSathane lisenyanye kakhulu kunakucala, kodvwa yini leyenta kutsi singamesabi Sathane?

¹⁵ Ngekushesha nje ngemuva kwekutsi Jesu abe yiNkhosi lenguMesiya nga-1914, Sathane wacoshwa ezulwini. Nyalo uvaleleke lamhlabeni futsi ulindzele kubhujiswa kwakhe. (Semb. 12:9, 12) Kodvwa loko akusho kutsi uhleti nje akenti lutfo. Utfukutsele kakhulu futsi uhlasela bonkhe bantfu baNkulunkulu. (Semb. 12:13, 17) Kungako live laSathane selibazonda kakhulu bantfu baNkulunkulu kunakucala. Kodvwa kute sizatfu sekumesaba Sathane nebalandzeli bakhe. Kunaloko, natsi siyaciniseka ngaloko umphostoli Pawula bekaciniseka ngako, nakabhala atsi: “Nangabe Nkulunkulu angakitsi, ngubani longamelana natsi?” (Rom. 8:31) Simetsemba ngalokuphelele Jehova ngobe njengobe nje sesibonile, incenye lenkhulu yalesiphrofetho lesikuGenesisi 3:15 seyivele igcwalisekile.

16-18. Kumsite njani Curtis, na-Ursula kanye naJessica kucondza Genesisi 3:15?

¹⁶ Setsembiso saJehova lesikuGenesisi 3:15 singasisita kutsi sibeketelele nobe ngutiphi tinkinga lesingabhekana nato ekuphileni. Curtis, lositfunywa selivangeli eGuam, utsi: “Ngaletinye tikhatsi ngibeketelele tinkinga nekudvumateka lokuvivinye kwetsembeka kwami kuJehova. Kodvwa kuzindla ngesiphrofetho lesikuGenesisi 3:15 kungisite kutsi ngihlale ngimetsemba Babe wami wasezulwini.” Curtis ulibuke ngalabovu lilanga lapho khona Jehova atawucedza tonkhe tinkinga tetfu.

¹⁷ Lomunye dzadze waseBavaria lokutsiwa ngu-Ursula utsi kucondza Genesisi 3:15 kumsite waciniseka kutsi liBhayibheli liphefumulelwe nguNkulunkulu. Ubonile kutsi letinye tiphrofetho tihlangana njani nalesiphrofetho, futsi loko kumtsintse kakhulu. Naku lokunye lakushoko: “Kwangitsintsa inhlitiyo kubona kutsi Jehova wenta lokutsite ngekushesha kuze bantfu babe nelitsemba.”

¹⁸ Jessica waseMicronesia, utsi: “Ngiyakhumbula kutsi ngativa njani ngesikhatsi ngibona kutsi ngilitfolile liciniso! Lesiphrofetho lesikuGenesisi 3:15 besigcwaliseka. Singisite ngakhumbula kutsi lemphilo lesiyiphilako nyalo akusiyo imphilo Jehova bekafuna siyiphile. Lesiphrofetho siphindze sangisita ngaciniseka kakhulu ngekutsi kukhonta Jehova kungenta ngiphile imphilo lencono nyalo, nekutsi ngitawuphila lencono kakhulu esikhatsini lesitako.”

19. Yini lesenta siciniseke kutsi itawugcwaliseka incenye yekugcina yalesiphrofetho?

¹⁹ Njengobe sesibonile, Genesisi 3:15 uyagcwaliseka nyalo. Sesibonile kutsi ngubani intalelwane yemfati nentalelwane yenyoka. Jesu, loyincenye leyinhloko yentalelwane yemfati sewaphola esitsendzeni lapho alinyatwa khona, futsi nyalo uyiNkhosi lekhatimulako lengeke ife. Sekusele kancane kutsi Jehova acedze kukhetsa labo labayincenye yesibili yentalelwane yemfati. Ngenca yekutsi incenye yekucala yalesiphrofetho seyigcwalisekile, siyaciniseka kutsi itawugcwaliseka nencenye yekugcina yaso, lokukufihlitwa kwenhloko yenyoka. Bantfu baNkulunkulu batawujabula kakhulu nakubhujiswa Sathane! Kodvwa njengobe kusengakenteki loko, ungalilahli litsemba. Nkulunkulu wetfu wetsembekile. Asebentisa lentalelwane yemfati, utawuletsela “tonkhe tive temhlaba” tibusiso letinyenti kakhulu.—Gen. 22:18.

INGOMA 23 Jehova Sewuyabusa

a Angeke sikhone kuwucondza kahle umlayeto weliBhayibheli nangabe singasicondzi siphrofetho lesikuGenesisi 3:15. Kudadisha lesiphrofetho kutawucinisa kukholwa kwetfu kuJehova futsi kusente siciniseke kutsi utawutigcwalisa tonkhe tetsembiso takhe.

b Buka Sandzisanchazo B1, lesitsi “Umlayeto WeliBhayibheli,” eHumushweni Lemhlaba Lomusha.

c Buka libhokisi lelitsi “Labo Lokukhulunywa Ngabo KuGenesisi 3:14, 15.”

d Buka libhokisi lelitsi “Tintfo Letibalulekile Letentekile Nakugcwaliseka Genesisi 3:15.”