Nine Labasha​—Chubekani Nitfutfuka Ngemuva Kwekubhajatiswa

1. Ngutiphi tintfo letinhle labasebasha labanyenti lesebatifezile?

NJALO ngemnyaka, kubhajatiswa tinkhulungwane talabasebasha. Sewubhajatisiwe yini nawe? Nangabe kunjalo, bazalwane bakho nabodzadze bayajabula, naJehova uyajabula! (Taga 27:11) Cabanga nje ngetintfo letinhle lesewutifezile. Kungenteka sekuphele iminyaka udadisha liBhayibheli ngekutimisela. Kulidadisha kwakho kukwente waciniseka kutsi liliVi laNkulunkulu. Ngetulu kwaloko, sewuyamati lomBhali walencwadzi lengcwele futsi sewuyamtsandza. Lutsandvo lwakho ngaJehova selukhule kakhulu kangangekutsi nyalo sewusikhonti sakhe lesitinikele futsi sabhajatiswa. Wente sincumo lesihle!

2. Yini lesitawucoca ngayo kulesihloko?

² Siyaciniseka kutsi ngaphambi kwekutsi ubhajatiswe, kukholwa kwakho kuvivinywe ngetindlela letinyenti letehlukene. Kodvwa njengobe ukhula, utawubhekana netinkinga letinyenti. Sathane utawetama kunciphisa lizinga lomtsandza ngalo Jehova, nekukuyekelisa kumkhonta. (Ef. 4:14) Ungacali ukuvumele loko kutsi kwenteke. Yini lengakusita kutsi uhlale wetsembekile kuJehova futsi ugcine setsembiso lowasenta nawutinikela? Kufanele ‘uchubeke’ wetama kamatima kuba ngumKhristu lovutsiwe. (Heb. 6:1) Ungakwenta njani loko?

YINI LONGAYENTA KUZE UBE NGUMKHRISTU LOVUTSIWE?

3. Yini onkhe emaKhristu lokufanele ayente ngemuva kwekubhajatiswa?

³ Ngemuva kwekubhajatiswa, sonkhe kufanele sisilalele seluleko semphostoli Pawula lasinika base-Efesu. Wakhutsata lamaKhristu kutsi ‘akhule ngalokwenele.’ (Ef. 4:13) Bekufana nekutsi utsi: ‘Chubekani nitfutfuka.’ Pawula wafananisa kukhula kwemKhristu nendlela umntfwana lakhula ngayo. Batali bayamtsandza umntfwana wabo, futsi bayatigcabha ngaye. Kodvwa angeke ahlale angumntfwana. Ngekuhamba kwesikhatsi kutawudzingeka ayekele “tindlela tebuntfwana.” (1 Khor. 13:11) Loku kuyafana nangemaKhristu. Ngemuva kwekubhajatiswa kufanele sichubeke sitfutfuka. Ase sicoce ngaletinye tindlela lesingakwenta ngato loku.

4. Yini lengakusita kuze utfutfuke? Chaza. (KubaseFiliphi 1:9)

⁴ Ayichubeke ikhula indlela lomtsandza ngayo Jehova. Umtsandza kakhulu Jehova. Kodvwa indlela lomtsandza ngayo ingachubeka ikhula. Kanjani? Umphostoli Pawula wakhuluma ngalenye indlela KubaseFiliphi 1:9. (Fundza.) Pawula wathantazela kutsi lutsandvo lwemaKhristu aseFiliphi “lukhule kakhulu.” Ngako ingakhula indlela lesimtsandza ngayo Jehova. Loko singakwenta ngekutsi sitfole ‘lwati lolungulonalona nekucondza lokuphelele.’ Nasichubeka simati Jehova, sitamtsandza kakhulu futsi sitawubonga ngebuntfu bakhe nangendlela lenta ngayo tintfo. Sitawuba nesifiso lesikhulu sekumjabulisa futsi sitawukwenta konkhe lesingakwenta kuze singamdvumati. Sitawusebenta kamatima kuze sati intsandvo yakhe futsi siyente.

5-6. Ingakhula njani indlela lesimtsandza ngayo Jehova? Chaza.

⁵ Ingakhula indlela lesimtsandza ngayo Jehova ngekutsi siyati kahle iNdvodzana yakhe, lebuveta kahle kakhulu buntfu baBabe wayo. (Heb. 1:3) Indlela lencono kakhulu yekutsi sati buntfu baJesu, kutsi sidadishe emaVangeli lamane. Nangabe usengakacali kufundza liBhayibheli onkhe malanga, kungaba njani ucale nyalo? Njengobe ufundza ngaJesu, naka kakhulu buntfu bakhe. Bekangeneka; bekabatsandza bantfwana aze abagone. (Makho 10:13-16) Jesu bekanemusa futsi anebungani, bafundzi bakhe bebangesabi kumtjela indlela bebativa ngayo. (Mat. 16:22) Bekalingisa Babe wakhe losezulwini. NaJehova uyangeneka. Singathantaza kuye simtjele konkhe. Siyaciniseka kutsi angeke asisole. Uyasitsandza futsi uyasikhatsalela.​—1 Phet. 5:7.

⁶ Jesu bekabavela bantfu. Umphostoli Matewu wabhala: “Watsi nakabona sicumbi sebantfu, wabahawukela, ngobe bebaphetfwe kabi futsi bahlakatekile njengetimvu letite umelusi.” (Mat. 9:36) Utiva njani Jehova? Jesu watsi: ‘Babe losezulwini akafisi kutsi kubhubhe ngisho namunye kulaba labanjengebantfwana.’ (Mat. 18:14) Lamavi asijabulisa kakhulu! Njengobe simati kancono Jesu, lutsandvo lesinalo ngaJehova luyakhula.

7. Kungakusita njani kucitsa sikhatsi nemaKhristu lavutsiwe?

⁷ Yetama kukhombisa lutsandvo kakhudlwana futsi utfutfuke ngekutsi ucitse sikhatsi nebazalwane bakho nabodzadze labavutsiwe. Naka indlela labajabule ngayo. Abatisoli ngesincumo sabo sekukhonta Jehova. Bacele bakucocele ngaloko lokwentekile ekuphileni kwabo njengobe bebasolo bakhonta Jehova. Cela seluleko sabo nawufuna kwenta sincumo lesibalulekile. Khumbula kutsi bantfu “bayaphumelela nangabe kunebeluleki labanyenti.”​—Taga 11:14.

8. Yini longayenta nangabe ukungabata loko lokushiwo liBhayibheli?

⁸ Ncoba kungabata lonako. Njengobe kuvetiwe esigabeni 2, Sathane utawetama kukwenta ungatfutfuki. Lenye indlela langakwenta ngayo loku kutsi akwente ungabate letinye timfundziso teliBhayibheli. Sibonelo nje, kungenteka uve ngemfundziso lengamhloniphi Nkulunkulu yekutigucukela kwemvelo. Kungenteka ngesikhatsi usemncane bewungacabangi ngayo, kodvwa kungenteka nyalo ufundziswa yona esikolweni. Loko bothishela bakho labakushoko ngekutigucukela kwemvelo kungabonakala kunengcondvo. Nobe kunjalo, kungenteka abakase babufune bufakazi bekutsi ukhona yini uMdali. Khumbula simiso lesitfolakala kuTaga 18:17, lesitsi: “Umuntfu lokhuluma kucala ecaleni ubonakala acinisile, kuze kube ngulapho lona lommangalele efika amphenyisise ngemibuto.” Kunekutsi umane nje ukwemukele konkhe lofundziswa kona esikolweni, kufanele utinike sikhatsi sekudadisha loko lokufundziswa liVi laNkulunkulu liBhayibheli. Cwaninga etincwadzini tetfu. Khuluma nebazalwane nabodzadze lebebakholelwa ekutigucukeleni kwemvelo esikhatsini lesendlulile. Babute kutsi yini leyabenta baciniseka kutsi ukhona uMdali lositsandzako. Loku kungakusita kutsi utfole bufakazi bekutsi ukhona uMdali.

9. Yini loyifundzako kuloko lokwenteka kuMelissa?

⁹ Lomunye dzadze lokutsiwa nguMelissa kwamsita kakhulu kucwaninga ngendzaba yendalo.b Utsi: “Esikolweni, bothishela bachaza indzaba yekutigucukela kwemvelo ngendlela leyenta bantfu bacabange kutsi iliciniso. Ekucaleni bengingafuni kucwaninga ngobe bengesaba kutsi ngitawutfola kutsi lendzaba yekutigucukela kwemvelo iliciniso. Kodvwa ngacabanga kutsi Jehova ufuna sibe netizatfu leticinile tekumkhonta. Ngako ngacwaninga. Ngafundza incwadzi letsi Is There a Creator Who Cares About You? nencwajana letsi Kwaba Khona Njani Kuphila? naletsi The Origin of Life—Five Questions Worth Asking. Ngatfola kutsi nguloko kanye lebengikudzinga. Ngifisa kutsi kube mane ngasheshe ngacwaninga.”

10-11. Yini lengakusita kutsi uhlale uhlantekile endleleni lotiphatsa ngayo? (1 KubaseThesalonika 4:3, 4)

¹⁰ Kubalekele kutiphatsa lokubi. Nawuseminyakeni yekutfomba, ungase ube nesifiso lesikhulu sekuya ecansini futsi labanye bangahle bakucindzetele kutsi utiphatse kabi. Nguloko kanye Sathane lafuna kutsi ukwente. Yini lengakusita kutsi umelane nalesilingo? (Fundza 1 KubaseThesalonika 4:3, 4.) Emithantazweni yakho, tjela Jehova indlela lotiva ngayo futsi umcele kutsi akuphe emandla. (Mat. 6:13) Khumbula kutsi Jehova ufuna kukusita, hhayi kukusola. (Hla. 103:13, 14) NeliBhayibheli lingakusita. Melissa, lesike sakhuluma ngaye bekahlushwa yimicabango lengcolile. Utsi: “Kufundza liBhayibheli onkhe malanga kwangisita kutsi ngilwe naletifiso letimbi. Kwangikhumbuta kutsi ngiwaJehova nekutsi ngifuna kumkhonta.”​—Hla. 119:9.

¹¹ Ungetami kuticatulula wedvwa tinkinga takho. Khuluma nebatali bakho ngenkinga lonayo. Kuliciniso kutsi akusimelula kukhuluma ngaletindzaba, kodvwa kubalulekile kutsi wente kanjalo. Melissa utsi: “Ngathantaza ngacela sibindzi futsi ngabese ngikhuluma nababe ngalenkinga yami. Ngemuva kwaloko ngativa sengincono. Bengati kutsi Jehova uyatigcabha ngami.”

12. Yini lengakusita kutsi wente tincumo letikahle?

¹² Condziswa timiso teliBhayibheli. Njengobe ukhula, batali bakho batakuvumela kutsi utentele tincumo letinyenti. Kodvwa tisetinyenti tintfo longatati. Yini lengakusita kutsi ungalenti liphutsa lelitawulimata buhlobo bakho naJehova? (Taga 22:3) Lomunye dzadze lokutsiwa nguKari usichazela kutsi yini leyamsita kutsi ente tincumo letikahle. Wabona kutsi emaKhristu lavutsiwe akadzingi kucondziswa yimitsetfo kuko konkhe lakwentako ekuphileni. Utsi: “Kwadzingeka kutsi ngitati kahle timiso teliBhayibheli, ngingagcini nje ngekwati imitsetfo.” Nawufundza liBhayibheli, tibute: ‘Loku lengikufundzako kungitjelani ngendlela Jehova lacabanga ngayo? Tikhona yini timiso letingangisita kuze ngente lokukahle? Nangabe tikhona, kutangisita ngani kutisebentisa?’ (Hla. 19:7; Isa. 48:17, 18) Nangabe ufundza liBhayibheli futsi uzindla ngetimiso letikulo, kutawuba melula kwenta tincumo letijabulisa Jehova. Njengobe uchubeka utfutfuka, utawubona kutsi awudzingi umtsetfo kuto tonkhe timo lobhekana nato ekuphileni ngobe utawube sewuyati indlela Jehova lacabanga ngayo.

13. Bangakusita njani bangani labakahle? (Taga 13:20)

¹³ Khetsa bangani labatsandza Jehova. Njengobe sesibonile, bangani lobakhetsako bangakusita kutsi ube ngumKhristu lovutsiwe. (Fundza Taga 13:20.) Lomunye dzadze lokutsiwa nguSara bekangasajabuli. Kodvwa kwabese kwenteka intfo letsite leyamenta waphindze wajabula. Sara utsi: “Ngatfola bangani labakahle ngesikhatsi lesikahle. Mine nalomunye dzadze losemusha besihlangana ndzawonye sidadishe Sicongosekulindza njalo ngeliviki. Lomunye umngani wami wangisita kutsi ngicale kuphendvula emihlanganweni. Ngenca yekutsi bangani bami bangisita, besekubalulekile kimi kutidadishela liBhayibheli nekuthantaza. Ngaba nebuhlobo lobuhle naJehova, futsi ngaphindze ngajabula.”

14. Yini leyasita Julien kutsi abe nebangani labakahle?

¹⁴ Ungabatfola njani bangani labatakusita? Julien, nyalo longulomdzala welibandla utsi: “Ngesikhatsi ngisemncane, ngatfola bangani labakahle emsebentini wekushumayela. Labangani bami bebakhutsele futsi bangisita ngabona kutsi umnandzi umsebenti wekushumayela. Ngatibekela umgomo wekuba semsebentini wasikhatsi sonkhe. Ngabona kutsi sizatfu lebesenta ngibe bete bangani labakahle kutsi bengifuna bangani labalingana nami. Ngekuhamba kwesikhatsi, ngaba nebangani labakahle eBethel. Sibonelo sabo sangisita kutsi ngitfutfuke endleleni lengikhetsa ngayo kwekutijabulisa, futsi loku kwangisondzeta kakhulu kuJehova.”

15. Pawula wamecwayisa njani Thimothi ngebangani? (2 KuThimothi 2:20-22)

¹⁵ Yini lokufanele uyente nangabe ubona kutsi kunalotsite ebandleni longasuye umngani lokahle? Pawula bekati kutsi lamanye emalunga elibandla bekete buntfu bebuKhristu, ngako wecwayisa Thimothi kutsi angatihlanganisi nawo. (Fundza 2 KuThimothi 2:20-22.) Buhlobo betfu naJehova buligugu. Sisebente kamatima kuze sisondzelane naye ngako akukafaneli sivumele nobe ngubani kutsi alimate buhlobo betfu naBabe wetfu wasezulwini.​—Hla. 26:4.

KUTIBEKELA IMIGOMO KUNGAKUSITA NJANI KUTSI UTFUTFUKE?

16. Ngumiphi imigomo longatibekela yona?

¹⁶ Tibekele imigomo letakusita. Tibekele imigomo letawucinisa kukholwa kwakho futsi ikusite ube ngumKhristu lovutsiwe. (Ef. 3:16) Sibonelo nje, ungancuma kunamatsela kakhudlwana eluhlelweni lwakho lwekutidadishela liBhayibheli nekulifundza. (Hla. 1:2, 3) Ungetama nekuthantaza tikhatsi letinyenti ngalokusuka enhlitiyweni. Mhlawumbe kungadzingeka ulunake kakhudlwana luhlobo lwekutijabulisa lolukhetsako nendlela losisebentisa ngayo sikhatsi sakho. (Ef. 5:15, 16) Jehova utawujabula nakakubona usebenta kamatima kuze utfutfuke.

17. Utawutiva njani nawusita labanye?

¹⁷ Utawuba ngumKhristu lovutsiwe nawusita labanye. Jesu watsi: “Kunenjabulo lenkhulu ekupheni kunasekwemukeleni.” (Imis. 20:35) Utawujabula kakhulu nawusebentisa sikhatsi sakho kanye nemandla akho kuze usite labanye. Sibonelo nje, ungatibekela umgomo wekusita labakhulile nalabagulako ebandleni. Mhlawumbe ungabentela lokutsite nobe ubasite kuze bakhone kusebentisa tintfo tabo tebuchwephesha. Nangabe ungumzalwane, ungatibekela umgomo wekuba yinceku lesebentako kuze ukhone kusita bazalwane nabodzadze. (Fil. 2:4) Usuke ukhombisa kutsi uyabatsandza nalabo labangasibo boFakazi ngekutsi ubacocele tindzaba letimnandzi teMbuso. (Mat. 9:36, 37) Nangabe kungenteka, tibekele umgomo wekuba semsebentini wasikhatsi sonkhe.

18. Kuba semsebentini wasikhatsi sonkhe kungakusita njani kutsi utfutfuke?

¹⁸ Umsebenti wasikhatsi sonkhe ungakusita kutsi utfutfuke. Kuba lihlahlandlela kungakuvulela ematfuba ekutsi uye eSikolweni Sebavangeli BeMbuso. Ungakhona nekuyosebenta eBethel nobe usite ekwakhiweni kwetakhiwo tenhlangano. Lelinye lihlahlandlela leliselisha lokutsiwa nguKaitlyn litsi: “Kucitsa sikhatsi ngenta umsebenti wekushumayela nebazalwane nabodzadze labavutsiwe kungisitile kutsi ngitfutfuke ngemuva kwekubhajatiswa. Sibonelo sabo singikhutsatile kutsi ngilidadishe kakhulu liBhayibheli futsi ngitfutfuke endleleni lengifundzisa ngayo.”

19. Ngutiphi tibusiso lotawutitfola njengobe uchubeka utfutfuka?

¹⁹ Njengobe uchubeka utfutfuka, Jehova utakubusisa ngetintfo letinyenti letinhle. Angeke ucitse emandla akho wenta tintfo letingenamsebenti. (1 Joh. 2:17) Angeke ubuve buhlungu lobubangelwa kwenta tincumo letikabi. Kunaloko, utawujabula mbamba futsi uphumelele. (Taga 16:3) Sibonelo sakho lesihle sitabakhutsata bazalwane bakho nabodzadze, kungaba ngulabasebasha nobe lasebakhulile. (1 Thim. 4:12) Lokubaluleke kakhulu kutsi utawutfola kuthula kanye nekwenetiseka lokuletfwa kujabulisa Jehova kanye nekuba nebuhlobo lobuhle naye.​—Taga 23:15, 16.