1, 2. Yini babonisi betigodzi labayinakile emabandleni lamanyenti?

UMBONISI wesigodzi besekatawephetsa umhlangano labenawo nemadvodza lamadzala. Njengobe abuka labazalwane labasebenta ngekutimisela, wativa abatsandza kakhulu, futsi labanye babo besebakhule kangangekutsi bangaba boyise. Nobe kunjalo bekunalokutsite lokubalulekile lobekumkhatsata. Wababuta watsi: “Bazalwane, yini leniyentile kuze niceceshe labanye kute banakekele imitfwalo yelibandla?” Labazalwane bebati kutsi ekuhambeleni kwakhe lokwendlulile, lombonisi wesigodzi bekabakhutsate kutsi bacitse sikhatsi lesinyenti bacecesha labanye. Ekugcineni lomunye lomdzala wavuma watsi: “Kuncane kakhulu lesikwentile.” Bonkhe bavumelana naye.

² Nangabe ungulomdzala welibandla, kungenteka nawe utiva ngendlela lefanako. Babonisi betigodzi banakile kutsi labadzala labanyenti badzinga kucitsa sikhatsi bacecesha bazalwane labasebasha nalasebakhulile kute basite ekunakekeleni libandla. Kodvwa loku kungaba matima kakhulu. Kungani kunjalo?

3. (a) LiBhayibheli likhombisa njani kutsi kubalulekile kucecesha labanye, futsi kungani kufanele sonkhe sikunake loko? (Fundza umbhalo longentansi.) (b) Kungani kungase kube matima ngalabanye labadzala kucecesha labanye?

³ Njengobe ungulomdzala, uyati kutsi kubalulekile kucitsa sikhatsi ucecesha bazalwane.a (Fundza umbhalo longentansi.) Uyati kutsi kudzingeka bazalwane labanyenti kute bacinise emabandla nyalo futsi basite emabandla lamasha esikhatsini lesitako. (Fundza Isaya 60:22.) LiBhayibheli litsi kufanele ‘nifundzise labanye.’ (Fundza 2 Thimothi 2:2.) Kodvwa kungaba matima kutinika sikhatsi sekwenta njalo. Kufanele unakekele umndeni wakho futsi wente nemsebenti wekutiphilisa. Kufanele uphindze unakekele tidzingo telibandla kanye naletinye tindzaba letibalulekile. Njengobe kukunyenti lokufanele kwentiwe, asesicoce ngekutsi kungani kubaluleke kakhulu kutinika sikhatsi sekucecesha labanye.

SIDZINGO SEKUCECESHA SIYAPHUTFUMA

4. Ngalesinye sikhatsi, kungani labadzala bephuta kucecesha bazalwane?

⁴ Kungani kungaba matima kucitsa sikhatsi ucecesha bazalwane ebandleni? Labanye bangatsi: ‘Letinye tindzaba telibandla tiphutfuma kakhulu futsi kufanele tinakwe ngekushesha. Nangabe ngingabaceceshi nyalo labanye, libandla ngeke lilimale.’ Kodvwa kuliciniso yini loko? Letinye tindzaba tidzinga kunakwa ngekushesha. Nanobe kunjalo, nangabe nephuta kucecesha bazalwane, ningalilimata libandla.

5, 6. Yini lesingayifundza esibonelweni semshayeli nasendleleni lanakekela ngayo imoto yakhe? Loku singakucatsanisa njani nekuceceshwa lokwentiwa ebandleni?

⁵ Cabanga nganasi sibonelo. Kuze imoto ihlale iphilile, umshayeli uyati kutsi kudzingeka ahle ashintja oyili. Nanobe kunjalo, kungenteka acabange kutsi kubaluleke kakhulu kwetsa phethiloli ngobe ngaphandle kwawo lemoto ngeke ihambe. Angacabanga kutsi nangabe amatasatasa, angabuye awushintje oyili ngobe lemoto isengakhona kuchubeka ihamba. Kodvwa loko kungaba yingoti. Nangabe umshayeli angawushintji oyili nakunesidzingo sekwenta njalo, ngekuhamba kwesikhatsi lemoto ingagcine seyifile. Ekugcineni, kutawudzingeka acitse sikhatsi kanye nemali lenyenti ayilungisa. Sifundzani kuloku?

⁶ Labadzala kufanele batinakekele ngekushesha tindzaba letibalulekile. Nabangenti njalo, libandla litawulimala. Njengalomshayeli lokufanele ahlale etsa phethiloli emotweni yakhe, labadzala kufanele ‘baciniseke ngetintfo letibaluleke kakhulu.’ (Filiphi 1:10) Kodvwa labanye labadzala bangaba matasa ngetintfo letibalulekile bagcine sebete sikhatsi sekucecesha labanye. Loku kungaba njengekungametsi oyili emotweni. Nangabe labadzala bephuta kucecesha bazalwane, ngekuhamba kwesikhatsi libandla lingagcine selite bazalwane labaceceshekile labangakhona kwenta imisebenti yelibandla.

7. Kufanele sibatsatse njani labadzala labatinika sikhatsi sekucecesha labanye?

⁷ Ngako ungacali ucabange kutsi kucecesha labanye akukabaluleki. Labadzala labanendzaba nelikusasa lelibandla futsi labatinika sikhatsi sekucecesha labanye, batinceku letihlakaniphile naletilusito kubazalwane nabodzadzewabo. (Fundza 1 Phetro 4:10.) Libandla lisitakala njani?

KUSISEBENTISA KAHLE SIKHATSI

8. (a) Labadzala banatiphi tizatfu tekucecesha labanye? (b) Labadzala labakhonta lapho kunesidzingo lesikhulu khona banamuphi umtfwalo lophutfumako? (Fundza libhokisi lelitsi “Umsebenti Lophutfumako.”)

⁸ Ngisho nalabadzala labanalokuhlangenwe nako kufanele batfobeke futsi bacondze kutsi njengobe bakhula, ngeke basakhona kwenta loko bebakhona kukwenta. (Mikha 6:8) Labadzala kufanele bati nekutsi “sikhatsi nematfuba” labangakawalindzeli angenta kube matima ngabo kunakekela imitfwalo letsite. (Umshumayeli 9:11, 12; Jakobe 4:13, 14) Ngesizatfu sekutsi bayabatsandza bantfu baJehova futsi bayabanakekela, labadzala basebenta ngekutimisela ekufundziseni bazalwane labasebasha loko labakufundze eminyakeni leyendlulile.​—Fundza Tihlabelelo 71:17, 18.

9. Yini letawenteka esikhatsini lesitako leyenta kutsi kubaluleke kucecesha labanye?

⁹ Labadzala labacecesha labanye baphindze babe lusito ngobe umsebenti labawentako ucinisa libandla. Lokucecesha kwenta bazalwane labanyenti bakulungele kusita libandla kutsi lihlale linebunye futsi letsembeke kuNkulunkulu. Loku kubalulekile kulamalanga ekugcina futsi kutawubaluleka kakhulu ekuhluphekeni lokukhulu lokuseta. (Hezekeli 38:10-12; Mikha 5:5, 6) Ngako-ke, nine labadzala labatsandzekako, kusukela lamuhla tinikeni sikhatsi sekucecesha labanye.

10. Kute lomdzala abe nesikhatsi sekucecesha labanye, yini lokungadzingeka ayente?

¹⁰ Siyacondza kutsi tinyenti tintfo lenimatasa ngato ngobe ninakekela tindzaba letibalulekile telibandla. Ngako-ke kungadzingeka kutsi lesinye sikhatsi lenisicitsa ninakekela lemisebenti yelibandla nisisebentisele kucecesha labanye. (Umshumayeli 3:1) Kwenta njalo kuyindlela lekahle yekusebentisa sikhatsi futsi kungalisita libandla esikhatsini lesitako.

LUNGISA SIMO SENHLITIYO YEMFUNDZI

11. (a) Yini lephawulekako ngeteluleko letimayelana nekucecesha letashiwo ngulabadzala labasuka etindzaweni letehlukene? (b) Njengobe kusho Taga 15:22, kungani kubalulekile kucoca ngeteluleko letashiwo ngulabanye labadzala?

¹¹ Labanye labadzala labaphumelele ekucecesheni bazalwane kutsi banakekele imitfwalo leminyenti yelibandla, basandza nje kubutwa kutsi basitwe yini.b (Fundza umbhalo longentansi.) Nanobe timo talamadvodza tingafani, kodvwa seluleko lasisho siyafana. Kukhombisani loku? Kukhombisa kutsi kucecesha lokusekelwe eBhayibhelini kulusito kubafundzi “kuwo onkhe emabandla lakuto tonkhe tindzawo.” (1 Khorinte 4:17) Ngako-ke kulesihloko nakuleso lesilandzelako, sitawucoca ngaletinye teluleko letashiwo ngulamadvodza lamadzala. (Taga 15:22) Labo labaceceshako sitababita ngekutsi bafundzisi futsi labo labaceceshwako sitababita ngekutsi bafundzi.

12. Yini umfundzisi lokufanele acale ayente futsi leni?

¹² Umfundzisi kufanele acale ngekulungisa inhlitiyo yemfundzi. Kungani loko kubalulekile? Njengobe nemlimi kudzingeka alungise umhlaba ngaphambi kwekutsi ahlanyele, nemfundzisi kudzingeka alungise inhlitiyo yemfundzi ngaphambi kwekutsi amfundzise emakhono lamasha. Ngako umfundzisi angayilungisa njani inhlitiyo yemfundzi kuze akhone kumcecesha? Angalingisa sibonelo semphrofethi Samuweli, lobekangumfundzisi wasendvulo lonelikhono.

13-15. (a) Yini Jehova latsi Samuweli akayente? (b) Samuweli wamsita njani Sawula kutsi alungele sabelo sakhe lesisha? (Buka sitfombe lesisekucaleni kwalesihloko.) (c) Kungani lendzaba leseBhayibhelini lemayelana naSamuweli ilusito kulabadzala lamuhla?

¹³ Ngalelinye lilanga eminyakeni lengetulu kwa-3 000 leyendlulile, Jehova watjela umphrofethi Samuweli watsi: “Kusasa ngaso lesikhatsi ngitakutfumelela indvodza lephuma eveni lakaBhenjamini. Uboyigcoba ibe ngumholi etikwesive sami sema-Israyeli.” (1 Samuweli 9:15, 16) Samuweli wacondza kutsi abengeke asasihola sive sema-Israyeli nekutsi Jehova abefuna agcobe umholi lomusha. Ngako kuze ente lomholi asilungele sabelo sakhe lesisha, Samuweli wenta lisu lelitsite.

¹⁴ Ngelilanga lelilandzelako Samuweli wahlangana naSawula, futsi Jehova watjela lomphrofethi watsi: “Nangu-ke lomuntfu.” Ngaso leso sikhatsi, Samuweli wenta loko lebekahlele kukwenta. Wakha litfuba lelihle kute akhone kukhuluma naSawula. Samuweli wamemela Sawula nenceku yakhe edzilini, wabahlalisa etitulweni letisembili futsi wabanika emacatsa lanonile. Samuweli watsi: “Kudle [lokudla], ngobe bekubekelwe wena macondzana nalomsebenti.” Nabacedza kudla, Samuweli wamemela Sawula endlini yakhe. Njengobe bahamba, bebacoca kamnandzi. Nabefika endlini yaSamuweli, bakhuphukela eluphahleni lwendlu futsi Samuweli “wakhuluma naSawula asendlini yakhe lesetulu” kwaze kwefika sikhatsi sekulala. Ngelilanga lelilandzelako, Samuweli wagcoba Sawula, wamanga futsi wamnika naleminye imiyalo. Ngemuva kwaloko, Sawula wahamba sekakulungele loko lebekutawenteka.​—1 Samuweli 9:17-27; 10:1.

¹⁵ Samuweli wagcoba Sawula kutsi abe ngumholi wesive. Kuliciniso kutsi loku kwehluke kakhulu ekucecesheni umzalwane kutsi abe ngulomdzala nobe abe yinceku lesebentako ebandleni. Nobe kunjalo, labadzala bangafundza tifundvo letinyenti letibalulekile endleleni Samuweli lalungisa ngayo inhlitiyo yaSawula. Asesicoce ngaletimbili tato.

BAFUNDZISI LABANESIFISO SEKUSITA FUTSI LABABANGANI SIBILI

16. (a) Samuweli wativa njani ngesikhatsi ema-Israyeli acela inkhosi? (b) Yini Samuweli layenta ngesikhatsi Jehova atsi akagcobe Sawula?

¹⁶ Bani nesifiso sekusita futsi ungangabati. Ngesikhatsi Samuweli eva kwekucala kutsi ema-Israyeli afuna kubuswa ngumuntfu, weva buhlungu futsi wativa alahliwe. (1 Samuweli 8:4-8) Ngenca yekutsi Samuweli bekangafuni kuwabekela inkhosi, kwadzingeka kutsi Jehova amtjele emahlandla lamatsatfu kutsi akalalele labantfu. (1 Samuweli 8:7, 9, 22) Nanobe Samuweli abetiva ngalendlela, akazange abe nemona nome ayitfukutselele lendvodza lebeyitawutsatsa sikhundla sakhe sekuba ngumholi. Ngesikhatsi Jehova atsi akagcobe Sawula, Samuweli akazange angabate. Walalela ngekutitsandzela, hhayi ngobe bekufanele ente njalo, kodvwa ngesizatfu sekutsi bekatsandza Jehova.

17. Labadzala basilingisa njani sibonelo saSamuweli lamuhla, futsi loko kubaletsela yiphi injabulo?

¹⁷ Lamuhla, banyenti labadzala labanalokuhlangenwe nako labalingise sibonelo saSamuweli futsi bacecesha labanye ngelutsandvo. (1 Phetro 5:2) Labazalwane labadzala labanemusa banesifiso sekufundzisa labanye futsi bete inkinga nekunika bafundzi lamanye emalungelo abo ebandleni. Kunaloko, batsatsa labazalwane njengalabaligugu ‘nalabatisebenti letikanye nabo’ labangabasita kutsi banakekele tidzingo telibandla. (2 Khorinte 1:24; Hebheru 13:16) Lamadvodza lamadzala lete bugovu ayajabula nawabona bafundzi basebentisa emakhono abo ekusiteni bantfu baJehova.​—Imisebenti 20:35.

18, 19. Lomdzala angayilungisa njani inhlitiyo yemfundzi kute amceceshe, futsi kubaluleke ngani loko?

¹⁸ Bani ngumngani, ungabi ngumfundzisi nje kuphela. Ngesikhatsi Samuweli ahlangana naSawula, abengamgcoba ngekushesha kutsi abe yinkhosi ngekutsi atsele emafutsa enhloko yakhe. Lenkhosi lensha beyitawube seyigcotjiwe kodvwa beyitawube ingakakulungeli kuhola bantfu baNkulunkulu. Ngako Samuweli watinika sikhatsi sekulungisa inhlitiyo yaSawula kute alungele sabelo sakhe lesisha. Ngaphambi kwekutsi amgcobe, badla ndzawonye, belula tinyawo, bacoca sikhatsi lesidze futsi baphumula. Samuweli walindza kwaze kwaba sikhatsi lesikahle sekugcoba lenkhosi lensha.

¹⁹ Ngendlela lefanako, ngaphambi kwekutsi lomdzala aceceshe umzalwane, kufanele ente konkhe lokusemandleni kute abe ngumngani wakhe. Loko lomdzala lakwentako kute ente umfundzi ative akhululekile kutawehluka kuye ngetimo nemasiko endzawo. Ngisho nobe uhlala kuphi, nangabe utsatsa sikhatsi lesitsite eluhlelweni lwakho lolumatasatasa kute ube nemfundzi, lomfundzi utawubona kutsi ubalulekile kuwe. (Fundza Roma 12:10.) Kuyacaca kutsi bafundzi batawujabula kakhulu njengobe ubanakekela ngelutsandvo futsi ubanika sikhatsi sakho.

20, 21. (a) Ungamchaza njani umfundzisi lophumelelako? (b) Sitawucoca ngani esihlokweni lesilandzelako?

²⁰ Kuliciniso kutsi umfundzisi lophumelelako uyakutsandza kucecesha labanye. Kodvwa kufanele amtsandze lomuntfu lamceceshako. (Catsanisa naJohane 5:20.) Kungani kubalulekile kwenta njalo? Kungobe umfundzi nakabona kutsi umkhatsalela mbamba, utawuba nesifiso sekufundza kuwe. Ngako-ke, nine labadzala kufanele nitimisele kungabi bafundzisi nje kuphela kodvwa futsi nibe bangani labakahle.​—Taga 17:17; Johane 15:15.

²¹ Ngemuva kwekulungisa inhlitiyo yemfundzi, lomdzala angacala kumcecesha. Angamcecesha njani? Loko sitawucoca ngako esihlokweni lesilandzelako.

1. (a) Yini tinceku taNkulunkulu lebetisolo tiyati ngekuceceshwa, futsi loku kusebenta njani lamuhla? (b) Sitawucoca ngani kulesihloko?

BANTFU baNkulunkulu bebasolo bati kutsi kuceceshwa kuletsa imphumelelo. Nasi sibonelo: Abrama wahlela ‘emadvodza akhe labececeshiwe’ kutsi ayewukhulula Loti, futsi aphumelela. (Genesisi 14:14-16) Ngesikhatsi seNkhosi Davide, bahlabeli ‘bebaceceshelwe’ kuhlabela tingoma letidvumisa Jehova. (1 Tikhronike 25:7) Lamuhla, kufanele silwe naSathane nelive lakhe. (Efesu 6:11-13) Siphindze sisebente ngekutimisela kute sidvumise Jehova ngekukhuluma nebantfu ngelibito lakhe. (Hebheru 13:15, 16) Njengetinceku taNkulunkulu tasendvulo, kuze siphumelele kufanele siceceshwe. Jehova unike emadvodza lamadzala umsebenti wekucecesha labanye ebandleni. (2 Thimothi 2:2) Ngutiphi tindlela lamanye emadvodza lamadzala latisebentisile kute aceceshe bazalwane kutsi banakekele bantfu baJehova?

CINISA LUTSANDVO UMFUNDZI LANALO NGAJEHOVA

2. Ngaphambi kwekufundzisa umfundzi emakhono lamasha, yini lomdzala langafisa kuyenta, futsi ngani?

² Lomdzala welibandla angafaniswa nemlimi. Ngaphambi kwekutsi ahlanyele, umlimi uyawuvundzisa umhlabatsi kuze loko lakulimile kukhule kahle. Ngendlela lefanako, ngaphambi kwekutsi lomdzala afundzise umfundzi emakhono lamasha, angafisa kucoca naye ngetimiso letitsite letiseBhayibhelini letingamsita kutsi akulungele kusebentisa loko lakufundzako.​—1 Thimothi 4:6.

3. (a) Emavi aJesu latfolakala kuMakho 12:29, 30 angasetjentiswa njani nakucocwa nemfundzi? (b) Umthantazo walomdzala welibandla ungamtsintsa njani umfundzi?

³ Kubalulekile kucondza kutsi liciniso liyitsintsa njani imicabango nemiva yemfundzi. Kute ukucondze loko, ungambuta kutsi kutinikela kwakhe kuJehova kutitsintse njani tincumo latentako ekuphileni kwakhe. Lombuto ungavula litfuba lekucoca ngekutsi singamkhonta njani Jehova ngenhlitiyo yonkhe. (Fundza Makho 12:29, 30.) Ungase uthantaze nalomzalwane futsi ucele Jehova amuphe umoya longcwele lawudzingako njengobe aceceshwa. Lomzalwane angakhutsateka nakakuva umthantazela.

4. (a) Niketa tibonelo tetindzaba letiseBhayibhelini letingasita umfundzi atfutfuke. (b) Labadzala kufanele babe namuphi umgomo nabacecesha labanye?

⁴ Nawucala kucecesha umfundzi, kungaba kuhle kucoca ngetindzaba letiseBhayibhelini letingamsita abone kutsi kubalulekile kuba lusito, kwetsenjwa nekutfobeka. (1 Emakhosi 19:19-21; Nehemiya 7:2; 13:13; Imisebenti 18:24-26) Lobuntfu bubalulekile kumfundzi njengobe nje nekuvundzisa umhlabatsi kubalulekile. Bungasita umfundzi kutsi atfutfuke ngekushesha. Jean-Claude, longulomdzala waseFrance, utsi umgomo wakhe nakacecesha umfundzi kumsita kutsi ente tincumo letihlakaniphile naletisekelwe etimisweni letiseBhayibhelini. Utsi: “Ngivame kufuna ematfuba ekutsi sifundze umbhalo ndzawonye lotawukhona ‘kuvula emehlo’ akhe kute abone ‘timangaliso’ letitfolakala eVini laNkulunkulu.” (Tihlabelelo 119:18) Ngutiphi letinye tindlela umfundzi langaciniswa ngato?

SHANO IMIGOMO LANGATIBEKELA YONA FUTSI UMTJELE NETIZATFU

5. (a) Kubaluleke kangakanani kukhuluma nemfundzi mayelana nemigomo yakhe emsebentini waJehova? (b) Kungani labadzala kufanele baceceshe labasebasha? (Fundza umbhalo longentansi.)

⁵ Buta umfundzi kutsi iyini imigomo yakhe emsebentini waJehova. Nangabe ete, msite atibekele umgomo langakhona kuwufinyelela. Bani nemdlandla nawumtjela ngemgomo lobewunawo nangendlela lowativa ngayo nawuwufinyelela. Lendlela imelula futsi iyaphumelela. Victor longulomdzala futsi lolihlahlandlela e-Afrika utsi: “Ngesikhatsi ngisemncane, lomunye lomdzala welibandla wangibuta imibuto lembalwa mayelana nemigomo yami. Lemibuto yangisita kutsi ngicale kucabangisisa ngemsebenti lengiwentela Jehova.” Labadzala labanalokuhlangenwe nako batsi kubalulekile kucecesha bazalwane nabasebasha, mhlawumbe nabaseminyakeni yekutfomba. Ungabaniketa umsebenti lotsite ebandleni kuye ngebudzala babo. Nangabe bazalwane baceceshwa basebasha, loko kungabasita kutsi banake imigomo yabo ngisho nobe sebakhulile nalapho sekunetintfo letingabaphatamisa.​—Fundza Tihlabelelo 71:5, 17.a (Fundza umbhalo longentansi.)

6. Nguyiphi indlela lebalulekile Jesu layisebentisa kute aceceshe labanye?

⁶ Kute ukhutsate umfundzi kutsi asebente ebandleni, kufanele ungagcini nje ngekumtjela loko lokufanele akwente. Kufanele umchazele kutsi kungani kubalulekile kukwenta loko. Jesu, uMfundzisi Lomkhulu, watjela baphostoli bakhe kutsi bashumayele. Kodvwa wacale wabatjela kutsi kungani kufanele balalele. Watsi: “Nginikwe lonkhe ligunya ezulwini nasemhlabeni. Ngako-ke hambani nente bantfu bato tonkhe tive babe bafundzi bami.” (Matewu 28:18, 19) Ungayilingisa njani indlela yaJesu yekucecesha?

7, 8. (a) Lamuhla, labadzala bangayilingisa njani indlela yaJesu yekucecesha? (b) Kubaluleke kangakanani kuncoma umfundzi? (c) Ngutiphi tintfo letingasita lomdzala kutsi akwati kucecesha labanye? (Fundza libhokisi lelitsi “Indlela Yekucecesha Labanye.”)

⁷ Nawucela umzalwane kutsi ente umsebenti lotsite, mchazele ngaloko lokushiwo liBhayibheli kutsi kungani lomsebenti ubalulekile. Nawenta njalo, usuke umfundzisa kutsi ente tintfo ngendlela leshiwo timiso teliBhayibheli hhayi ngobe nje kunemtsetfo lobekiwe. Sibonelo saloku kutsi nangabe ucela umzalwane kutsi agcine indzawo lesekungeneni eHholweni leMbuso ihlantekile futsi iphephile, ungase umkhombise Thithusi 2:10. Mchazele indlela kwenta lowo msebenti lokutawenta ngayo kutsi umlayeto weMbuso ukhange labanyenti. Phindze ucele lomfundzi kutsi acabange ngalabo lasebakhulile ebandleni nekutsi kwenta lomsebenti kutabasita njani. Incociswano lenjalo imceceshela kutsi akwati kucabanga ngebantfu esikhundleni semitsetfo lebekiwe. Nakabona indlela bazalwane nabodzadze labazuza ngayo emsebentini lawentako, utawujabula ngekutsi usita labanye.

⁸ Ciniseka kutsi uyamncoma umfundzi ngekutsi ukusebentisile loko lomtjele kona. Kubaluleke ngani kwenta njalo? Njengobe emanti asita tilimo kutsi tikhule futsi tibe nemphilo, kuncoma umfundzi kumsita kutsi atfutfuke emsebentini lawentela Jehova.​—Catsanisa naMatewu 3:17.

LENYE INSAYEYA

9. (a) Kungani kungase kube matima ngalabadzala emaveni lanjingile kutsi baceceshe labanye? (b) Kungani kukhonta Nkulunkulu kungeti kucala ekuphileni kwalabanye bazalwane labasebasha?

⁹ Labadzala emaveni lanjingile bangase bakutfole kumatima kukhutsata bazalwane lababhajatisiwe labaseminyakeni lengu-20 budzala nobe lengu-30 kutsi bente lokunyenti ebandleni. Labadzala labanalokuhlangenwe nako emaveni lacishe abe ngu-20 basitjele sizatfu lesenta labanye bazalwane labasebasha babe bete sifiso sekwenta imisebenti leminyenti ebandleni. Linyenti labo litsi ngesikhatsi labanye bazalwane basebancane, batali babo abazange babakhutsate kutsi batibekele imigomo emsebentini waJehova. Nangabe labanye bazalwane labasebasha bafuna kwenta lokunyenti emsebentini waJehova, batali babo babakhutsata kutsi bafune imfundvo lephakeme nobe umsebenti kulelive. Ngako kwenta umsebenti waNkulunkulu akukaze kute kucala ekuphileni kwabo.​—Matewu 10:24.

10, 11. (a) Lomdzala angamsita njani kancane kancane umzalwane kutsi ashintje indlela lacabanga ngayo? (b) Ngumiphi imibhalo lomdzala langayisebentisa kute akhutsate umzalwane, futsi kungani? (Fundza umbhalo longentansi.)

¹⁰ Nangabe umzalwane abonakala ete sifiso sekwenta lokunyenti ebandleni, kumsita kutsi ashintje indlela lacabanga ngayo kungadzinga imetamo lemikhulu kanye nekubeketela, kodvwa angagcine asitakele. Umlimi angasita sihlahla kutsi sikhule kahle ngekutsi acondzise sicu saso. Ngendlela lefanako, kancane kancane ungasita umzalwane kutsi abone sidzingo sekushintja simo sakhe sengcondvo mayelana nekwenta imisebenti leminyenti ebandleni. Kodvwa ungamsita ngayiphi indlela?

¹¹ Tinike sikhatsi sekwakha bungani nalomzalwane. Mtjele kutsi libandla liyamdzinga. Njengobe sikhatsi sichubeka, bonisana naye ngemibhalo lengamsita kutsi acabange ngekutinikela kwakhe kuJehova. (Umshumayeli 5:4; Isaya 6:8; Matewu 6:24, 33; Lukha 9:57-62; 1 Khorinte 15:58; 2 Khorinte 5:15; 13:5) Yetama kumfinyelela inhlitiyo ngekutsi umbute imibuto lenjengalena: ‘Yini lowayetsembisa Jehova ngesikhatsi unikela kuphila kwakho kuye? Ucabanga kutsi Jehova wativa njani ngesikhatsi ubhajatiswa?’ (Taga 27:11) ‘Sathane yena wativa njani?’ (1 Phetro 5:8) Lemibhalo ingaba lusito kakhulu futsi ingayitsintsa ngalokujulile inhlitiyo yalomzalwane.​—Fundza Hebheru 4:12.b (Fundza umbhalo longentansi.)

BAFUNDZI, HLALANI NETSEMBEKILE

12, 13. (a) Ngusiphi simo sengcondvo Elisha lasikhombisa njengobe bekangumfundzi? (b) Jehova wambusisa njani Elisha ngekwetsembeka kwakhe?

¹² Bazalwane labasebasha, libandla lidzinga lusito lwenu! Ngusiphi simo sengcondvo lesitanisita kutsi niphumelele emsebentini leniwentela Jehova? Kute nitfole imphendvulo, asesicoce ngaloko lokwenteka ekuphileni kwa-Elisha, umfundzi wasendvulo.

¹³ Eminyakeni lecishe ibe ngu-3 000 leyendlulile, umphrofethi Elija wacela Elisha losemusha kutsi amsite. Elisha wavuma ngekushesha futsi ngekwetsembeka wentela lomphrofethi umsebenti lophansi. (2 Emakhosi 3:11) Elija wacecesha Elisha iminyaka lecishe ibe sitfupha. Kwatsi ngesikhatsi umsebenti wa-Elija sewutawuphela ka-Israyeli, lomphrofethi wacela kutsi Elisha ayekele kumsebentela. Kodvwa Elisha washo tikhatsi letintsatfu watsi: “Ngingeke ngikushiye.” Abetimisele kuhlala nemfundzisi wakhe, yingci nje nakasakhona. Jehova wambusisa Elisha ngekwetsembeka kwakhe ngekumvumela kutsi abone Elija nakatsatfwa sivunguvungu.​—2 Emakhosi 2:1-12.

14. (a) Bafundzi bangamlingisa njani Elisha lamuhla? (b) Kungani kubaluleke kakhulu kutsi umfundzi etsembeke?

¹⁴ Njengobe ungumfundzi, ungamlingisa njani Elisha? Temukele ngekushesha tabelo, ngisho naleto letibonakala tiphansi. Khumbula kutsi umfundzisi wakho ungumngani wakho. Mbonge ngetintfo lakwentela tona futsi umkhombise kutsi uyafuna kuchubeka ufundza kuye. Lokubaluleke kakhulu kutsi wetsembeke nawenta tabelo takho. Ngani? Ngobe nawukhombisa kutsi wetsembekile futsi ungetsenjwa, labadzala bangaciniseka kutsi Jehova uyafuna wente imisebenti leminyenti ebandleni.​—Tihlabelelo 101:6; fundza 2 Thimothi 2:2.

BAHLONIPHE LABADZALA LABANALOKUHLANGENWE NAKO

15, 16. (a) Elisha wakhombisa njani kutsi uyamhlonipha umfundzisi wakhe? (Buka sitfombe lesisekucaleni kwalesihloko.) (b) Kungani labanye baphrofethi bametsemba Elisha?

¹⁵ Indzaba ya-Elisha iphindze ikhombise kutsi lamuhla kubalulekile ngebazalwane kuhlonipha labadzala labanalokuhlangenwe nako. Ngemuva kwekutsi Elija na-Elisha bavakashele licembu lebaphrofethi eJerikho, babese baya eMfuleni iJordane. “Elija watsatsa sembatfo sakhe wasigocota, wabe sewushaya ngaso lamanti. Emanti ehlukana ekhatsi.” Lamadvodza ewela lomfula emhlabatsini lowomile futsi ngesikhatsi ‘asahamba abekhulumisana omabili.’ Elisha walalelisisa konkhe lobekushiwo ngumfundzisi wakhe futsi wachubeka afundza kuye. Akazange atitjele kutsi wati konkhe. Elija wase utsatfwa sivunguvungu futsi Elisha wabuyela eMfuleni iJordane. Wafike washaya lamanti ngesembatfo sa-Elija wase utsi: ‘Uphi Jehova, Nkulunkulu wa-Elija?’ Lamanti aphindze ehlukana ekhatsi.​—2 Emakhosi 2:8-14.

¹⁶ Unakile yini kutsi simangaliso sekucala sa-Elisha besifana ncamashi nesimangaliso sekugcina sa-Elija? Kusifundzisani loku? Elisha akazange atitjele kutsi ngobe sewuneligunya, besekufanele ente tintfo ngendlela leyehlukile kuna-Elija. Esikhundleni saloko, ngekulingisa indlela Elija lebekenta ngayo, wakhombisa kutsi uyamhlonipha umfundzisi wakhe, futsi loko kwenta kutsi labanye baphrofethi bametsembe. (2 Emakhosi 2:15) Elisha waba ngumphrofethi iminyaka lengu-60 futsi Jehova wamnika emandla ekwenta timangaliso letinyenti kunaleto letentiwa ngu-Elija. Ngusiphi sifundvo bafundzi labangasifundza lamuhla?

17. (a) Bafundzi lamuhla bangasilingisa njani simo sengcondvo sa-Elisha? (b) Ngekuhamba kwesikhatsi, Jehova angabasebentisa njani bafundzi labetsembekile?

¹⁷ Nawunikwa leminye imitfwalo ebandleni, ungatitjeli kutsi sekufanele wente tintfo ngendlela leyehluke ngalokuphelele kuleyo betentiwa ngayo. Khumbula kutsi lushintjo lwentiwa nangabe kunesidzingo ebandleni nobe nangabe kusho sicondziso lesivela enhlanganweni yaJehova. Akukafaneli wente lushintjo ngobe nje uva shengatsi ufuna kulwenta. Ngekuchubeka alingisa indlela ya-Elija yekwenta tintfo, Elisha wenta kutsi labanye baphrofethi bametsembe futsi wakhombisa kutsi uyamhlonipha umfundzisi wakhe. Ngendlela lefanako, nawuchubeka usebentisa tindlela tebafundzisi bakho letisekelwe eBhayibhelini, ukhombisa inhlonipho ngalabadzala labanalokuhlangenwe nako futsi bazalwane nabodzadzewenu batakwetsemba. (Fundza 1 Khorinte 4:17.) Njengobe uchubeka utfutfuka, utawuhambisana nelushintjo lolutawusita libandla kutsi lilandzele inhlangano yaJehova lechubekela embili. Ngekuhamba kwesikhatsi, Jehova angakusita kutsi wente imisebenti leminyenti kunaleyo leyentiwa bafundzisi bakho, njengobe asita Elisha.​—Johane 14:12.

18. Kungani kuphutfuma kucecesha bazalwane emabandleni?

¹⁸ Siyetsemba kutsi leteluleko lokukhulunywe ngato kulesihloko nakuleso lesendlulile, titawukhutsata labadzala labanyenti kutsi batinike sikhatsi sekucecesha bazalwane. Sithantazela nekutsi bazalwane labanyenti babe nesifiso sekuceceshwa futsi bakusebentise labakufundzile kuze banakekele bantfu baJehova. Loku kutawucinisa emabandla emhlabeni wonkhe futsi kusite ngamunye wetfu kutsi ahlale etsembekile etikhatsini letijabulisako letiseta.