Lilanga Liyema

BUKA Joshuwa, utsi: “Wena langa mani!” Lilanga lavele lema. Lema emkhatsini kwesibhakabhaka lilanga lonkhe. NguJehova lowalenta lema. Kodvwa ase sibone kutsi kungani Joshuwa abefuna lilanga lingashoni.

Emakhosi lasihlanu aseveni laseKhenani nakacala kulwa nebaseGibeyoni, baseGibeyoni bavele batfumela indvodza letsite kutsi iyocela lusito kuJoshuwa. Yatsi: ‘Phutfuma ute kitsi masinyane. Onkhe emakhosi elive aphumile asihlasele.’

Ngaso leso sikhatsi Joshuwa nemadvodza akhe emphi baphuma. Bahamba busuku bonkhe baya eGibeyoni. Nabefika, emasotja emakhosi lasihlanu abesaba boJoshuwa futsi abaleka. Jehova wabese uhlisela ematje lamakhulu esangcotfo kulamasotja. Manyenti labulawa ngulesagcotfo, kunalawo labulawa nguJoshuwa nelibutfo lakhe.

Joshuwa wabona kutsi ngekushesha lilanga litawushona futsi kube mnyama. Bekati kutsi lamanyenti alamasotja emakhosi lasihlanu lamabi atawubaleka. Nguleso sizatfu lesamenta wathandaza kuJehova watsi: “Wena langa mani!” Njengoba lilanga lachubeka likhanyisile, ema-Israyeli akhona kulwa lemphi futsi ayiphumelela.

Kwakunalamanye emakhosi eKhenani labezonda bantfu baNkulunkulu. Kwatsatsa iminyaka lecishe ibe sitfupha kutsi Joshuwa nelibutfo lakhe behlule emakhosi langu-31 alelo live. Sebacedzile, Joshuwa wabona kukuhle kutsi live laseKhenani lehlukaniselwe letive lebetidzinga indzawo.

Ngemuva kweminyaka leminyenti, Joshuwa wafa asaneminyaka lengu-110 budzala. Ngalesikhatsi yena nebangani bakhe basaphila, bantfu bebamlalela Jehova. Kodvwa batsi nabafa, bantfu bacala kwenta tintfo letimbi futsi bangena etinkingeni. Kungaleso sikhatsi-ke lapho bebadzinga lusito lwaNkulunkulu.