INDZABA 58
Davide NaGoliyathi
EMAFILISTI aphindze alwa nema-Israyeli. Bomnakabo Davide labatsatfu bebasebutfweni laSawula. Ngalelinye lilanga Jese watsi kuDavide: ‘Tsatsa letinkhwa uye kubomnakenu, ubone kutsi baphila njani.’
Nakefika enkambu yemphi Davide, wagijima wafuna bomnakabo. Sidlakela semFilisti lesinguGoliyathi, saphuma sitewuhlekisa ngema-Israyeli. Kwasekuphele emalanga langu-40 Goliyathi enta loku, ekuseni nantsambama. Abememeta atsi: ‘Khetsani indvodza ibe yinye emkhatsini wenu itewulwa nami. Nayitawulwa nami ingehlule, tsine sitawuba tigcili tenu, kodvwa mine nangiyehlula nine nitawuba tigcili tetfu. Nginikeni indvodza ibe yinye khona ngitewulwa nayo.’
Davide wabuta lamanye alamasotja watsi: ‘Utawentelwani umuntfu lotawubulala lomFilisti asuse lihlazo ka-Israyeli?’
Amphendvula atsi: ‘Sawula utamnika umcebo, futsi amnike nendvodzakati yakhe kutsi ayishade.’
Kodvwa onkhe ema-Israyeli abemesaba Goliyathi, ngoba abesidlakela. Abemudze angetulu kwemamitha langaba ngu-3, futsi abehamba nalelinye lisotja, lebelimphatsele lihawu lakhe.
Lamanye emasotja ahamba ayotjela iNkhosi Sawula kutsi Davide ufuna kulwa naGoliyathi. Kodvwa Sawula watsi kuDavide: ‘Angeke ukhone kuyawulwa nalomFilisti, ngoba wena usengumfana nje, katsi yena ulisotja kusukela atalwa.’ Davide watsi: ‘Ngabulala libhele nelibhubesi lebelitsatsa timvu tababe. NalomFilisti utawufanana nato leto tilwane. Jehova utangisita.’ Sawula watsi: ‘Hamba, shengatsi Jehova angaba nawe.’
Davide wehlela emfuleni watfola ematje lasihlanu lashelelako, wawafaka esikhwameni sakhe. Watsatsa sidubulelo sakhe wahamba waya kulesidlakela lesinguGoliyathi. Satsi nasimbona, sangakholwa, ngoba savele sacabanga kutsi sitambulala melula nje Davide.
Goliyathi watsi: ‘Buya lapha kimi, sidvumbu sakho ngitasinika tinyoni telizulu netilwane kutsi tisidle.’ Kodvwa Davide watsi: ‘Wena uta kimi uphetse inkemba, nelijozi, nesikhali, kodvwa mine ngita kuwe ngeligama laJehova. Lamuhla Jehova utakunikela esandleni sami, ngitakushaya ngikulahle phasi.’
Ngalesosikhatsi Davide wagijima waya kuGoliyathi. Wakhipha litje esikhwameni, walifaka kulesidubulelo sakhe wajikijela ngawo onkhe emandla akhe. Lelitje lacondza ngco enhloko yaGolilyathi, lamshaya wawa phasi wafa. EmaFilisti nakabona kutsi Goliyathi sewufile, asuka ngematubane abaleka. Ema-Israyeli awagijimisa, futsi aphumelela kuleyomphi.