Danyela Emgodzini Wemabhubesi

HAWU! Kubonakala shengatsi Danyela usenkingeni lenkhulu, kodvwa lamabhubesi awamenti lutfo. Uyati kutsi kungani? Ngubani lolofake Danyela kulamabhubesi? Ase sibone.

Inkhosi yaseBhabhulona kwasekunguDariyusi. Abemtsandza kakhulu Danyela ngoba abenemusa futsi ahlakaniphile. Dariyusi wakhetsa Danyela kutsi abe ngumengameli embusweni wakhe. Loku kwenta kutsi lamanye emadvodza khona lapha embusweni, amdlele umona. Naku labese ayakwenta.

Ahamba aya kuDariyusi afike atsi: ‘Sivumelene nkhosi, ngekutsi kufanele ukhiphe umtsetfo lotsi, emalanga langu-30 kute lokufanele athandaze kulomunye nkulunkulu noma lomunye umuntfu, wonkhe umuntfu kufanele athandaze kuwe. Longeke awulalele lomtsetfo utawujikijelwa emgodzini wemabhubesi.’ Dariyusi abengati kutsi lamadvodza afunelani lomtsetfo ushaywe, kodvwa wabona shengatsi lombono wawumuhle. Ngako wavele wawubhala phasi lomtsetfo. Kwase kute naloyedvwa labengawushintja.

Watsi kube Danyela eve ngalomtsetfo, wahamba waya ekhaya wafike wathandaza njengenhlalayenta. Lamadvodza lamabi bekati kamhlophe kutsi Danyela ngeke ayekele kuthandaza kuJehova. Ajabula ngoba avele abona kutsi licebo lawo lekususa Danyela embusweni laliphumelela.

Yatsi iNkhosi Dariyusi nayiva kutsi lamadvodza awushayeleni lomtsetfo, yakhatsateka kakhulu. Kodvwa yaseyingeke iwushintje, ngako bekufanele ikhiphe umyalo wekutsi Danyela akajikijelwe emgodzini wemabhubesi. Kodvwa inkhosi yatsi kuDanyela: ‘Shengatsi Nkulunkulu wakho lomkhontako, angakuvikela.’

Dariyusi waphatseka kabi kakhulu, kangangekutsi akalalanga ngisho nasebusuku. Ngakusasa ekuseni wagijima waya emgodzini wemabhubesi, njengoba umbona kulesitfombe. Wamemeta watsi: ‘Danyela, nceku yaNkulunkulu lophilako! Nkulunkulu wakho lomkhontako, ukhonile yini kukusindzisa emabhubesini?’

Waphendvula Danyela watsi: ‘Nkulunkulu utfumele ingilosi yakhe lefike yavala imilomo yemabhubesi kuze angangibulali.’

Yajabula kakhulu inkhosi. Yatsi Danyela akakhishwe emgondzini. Yabese iyala kutsi kuletfwe onkhe lamadvodza labefuna kubulawe Danyela, ajikijelwa emgondzini wemabhubesi. Atsi angakefiki ngisho naphasi emgodzini, emabhubesi awadla awacedza nya abhasha ngisho nematsambo awo.

INkhosi Dariyusi yabhalela bonkhe bantfu eveni yatsi: ‘Ngikhipha umtsetfo kutsi wonkhe umuntfu amhloniphe Danyela naNkulunkulu wakhe. Wenta timangaliso letinkhulu. Ukhulule Danyela wangadliwa ngemabhubesi.’