Imitsetfo YaNkulunkulu Isizuzisa Njani?

1. Kungani tsine bantfu sidzinga sicondziso?

UMdali wetfu uhlakaniphile kunatsi. Njengobe anguBabe lonelutsandvo, uyasikhatsalela. Futsi abengakahlosi kutsi siphile ngaphandle kwelusito lwakhe. (Jeremiya 10:23) Ngako-ke, njengobe nje nemntfwana lomncane adzinga kucondziswa ngumtali wakhe, natsi sonkhe sidzinga kucondziswa nguNkulunkulu. (Isaya 48:17, 18) Timiso teliBhayibheli tisiniketa sicondziso lesisipho lesivela kuNkulunkulu.​—Fundza 2 Thimothi 3:16.

Imitsetfo yaJehova isifundzisa indlela lencono kakhulu yekuphila nyalo, futsi isikhombisa nendlela lesingawutfola ngayo umvuzo waphakadze esikhatsini lesitako. Njengobe Nkulunkulu angumdali wetfu, kuyafaneleka kutsi sikhombise kubonga ngesicondziso sakhe.​—Fundza Tihlabelelo 19:7, 11; Sembulo 4:11.

2. LiVi laNkulunkulu lisicondzisa njani?

Lamanye emaciniso eliBhayibheli asikhombisa ngetindlela letinyenti loko Nkulunkulu lafuna sikwente. Kodvwa imitsetfo yona ingasetjentiswa ngalokucondzile etimeni letitsite. (Dutheronomi 22:8) Kufanele sisebentise likhono letfu lekucabanga kute sicondze kutsi umtsetfo lotsite usebenta njani esimeni lesitsite. (Taga 2:10-12) Sibonelo saloku kutsi liBhayibheli lifundzisa kutsi kuphila kusipho lesivela kuNkulunkulu. Nasilikhumbula njalo leliphuzu litasisita nasisemsebentini, ekhaya, nanasihamba. Lingasisita futsi nekutsi silandzele tecwayiso tetekuphepha.​—Fundza Imisebenti 17:28.

3. Nguyiphi imiyalo lemibili lebalulekile?

Jesu wakhuluma ngemiyalo lemibili lebalulekile. Wekucala wembula injongo yekuphila kwemuntfu​—kwati Nkulunkulu, kumtsandza, nekumkhonta ngekwetsembeka. Lona ngumyalo lobalulekile lokufanele sicabange ngawo nasitawenta tonkhe tincumo tetfu. (Taga 3:6) Labo labaphila ngalomyalo baba bangani baNkulunkulu, babe nenjabulo futsi batawutfola nekuphila lokuphakadze.​—Fundza Matewu 22:36-38.

Umyalo wesibili lobalulekile ungasenta kutsi sibe nekuthula nalabanye bantfu. (1 Khorinte 13:4-7) Kusebentisa lomyalo kufaka ekhatsi kulingisa indlela Nkulunkulu labaphatsa ngayo bantfu.​—Fundza Matewu 7:12; 22:39, 40.

4. Imitsetfo yaNkulunkulu isizuzisa njani?

Imitsetfo yaNkulunkulu ifundzisa imindeni kutsi ibe munye futsi itsandzane. (Kholose 3:12-14) LiVi laNkulunkulu liphindze livikele imindeni ngekuyifundzisa lomunye umtsetfo lobalulekile​—umtsetfo wekutsi umshado kufanele uhlale njalo.​—Fundza Genesisi 2:24.

Ngekulandzela timfundziso teliBhayibheli singahlale sehlise umoya futsi kusisite nasetindzabeni tetimali. Sibonelo saloku kutsi bacashi bavamise kucasha tisebenti letiphila ngemitsetfo yaNkulunkulu yekwetsembeka naletisebenta ngekutikhandla. (Taga 10:4, 26; Hebheru 13:18) LiVi laNkulunkulu liphindze lisifundzise kutsi senetiseke ngetintfo lokungutona sitidzinga kutsi siphile kanye nekutsi buhlobo betfu naNkulunkulu sibutsatse njengalobubuleke kwendlula nome ngabe ngutiphi tintfo lesinato.​—Fundza Matewu 6:24, 25, 33; 1 Thimothi 6:8-10.

Kuphila ngemitsetfo yaNkulunkulu kungayivikela nemphilo yetfu. (Taga 14:30; 22:24, 25) Sibonelo saloku kutsi kunamatsela emtsetfweni waNkulunkulu lomelene nekudzakwa kuyasivikela etifeni nasetingotini. (Taga 23:20) Jehova uyasivumela kutsi sibunatse tjwala, kodvwa sibunatse ngekulinganisela. (Tihlabelelo 104:15; 1 Khorinte 6:10) Imitsetfo yaNkulunkulu isisita kutsi sicaphele tento tetfu nemicabango yetfu. (Tihlabelelo 119:97-100) Nobe kunjalo, emaKhristu eliciniso akatihloniphi timiso taNkulunkulu ngenjongo yekutsi afuna kuzuza kuto. Kodvwa loko akwenta ngobe ahlonipha Jehova.​—Fundza Matewu 5:14-16.