Yini Leyenta Kube Nekuhlupheka Lokungaka?

1, 2. Yini bantfu labanyenti labatibuta yona?

IMITI ibhidlitwa yi-tsunami. Indvodza idubula bantfu esontfweni, labanye bayalimala kantsi labanye bayafa. Sifo semdlavuza sibulala make webantfwana labasihlanu, basala batintsandzane.

² Nakwenteka tintfo letinjalo bantfu labanyenti bavame kutibuta kutsi kwentekelani. Bantfu labanyenti bayatibuta kutsi kubangelwa yini kutsi bantfu banyanyane kangaka baphindze bahlupheke. Wena uke watibuta yini ngaloko?

3, 4. (a) Habakhuki wabuta miphi imibuto? (b) Jehova wamphendvula watsini?

³ LiBhayibheli liveta kutsi bantfu lebebakholwa kuNkulunkulu bebatibuta imibuto lenjalo. Sibonelo saloko kutsi umphrofethi Habakhuki wabuta Jehova watsi: “Wentelani kutsi ngibone bubi lobungaka? Ukubeketelelani kuhlushwa kwalabacindzetelekile? Imbhubhiso nebudlwangudlwangu busembikwami njalo; kukhona kulwa nekubanga lokunyenti.”​—Habakhuki 1:3.

⁴ KuHabakhuki 2:2, 3 sifundza ngendlela Jehova lawuphendvula ngayo umbuto waHabakhuki kanye nangesetsembiso sakhe sekutsi utasilungisa lesimo. Jehova ubatsandza kakhulu bantfu. LiBhayibheli litsi: “Uyanikhatsalela.” (1 Phetro 5:7) Ecinisweni, Nkulunkulu ukwenyanya kakhulu kuhlupheka kwendlula indlela tsine lesikwenyanya ngayo. (Isaya 55:8, 9) Ase sicoce ngembuto lotsi: Yini leyenta kube nekuhlupheka lokungaka?

YINI LEBANGELA LOKUHLUPHEKA LOKUNGAKA?

5. Bafundisi labanyenti benkholo batsi kubangelwa yini kuhlupheka? Lifundzisani liBhayibheli?

⁵ Bafundisi, baphristi kanye nebantfu labafundzisa ngenkholo bavame kutsi kuyitsandvo yaNkulunkulu kutsi bantfu bahlupheke. Labanye babo batsi konkhe lokwehlela umuntfu, lokufaka ekhatsi tinhlekelele sekuvele kuncunywe nguNkulunkulu futsi ngeke sicondze kutsi kubangelwa yini. Labanye bangase batsi bantfu lokufaka ekhatsi netinswane tiyafa kute tibe naNkulunkulu ezulwini. Kodvwa loko kungemanga. Nkulunkulu akatibangeli tintfo letimbi. LiBhayibheli litsi: “Akube khashane naNkulunkulu kuba ngumenti walokubi, kwenta bubi akube khashane naSomandla.”​—Jobe 34:10.

6. Yini lebangela bantfu labanyenti basole Nkulunkulu ngekuhlupheka lokusemhlabeni?

⁶ Bantfu labanyenti basola Nkulunkulu ngekuhlupheka lokukhona ngoba bacabanga kutsi nguye lobusa umhlaba. Kodvwa njengoba sifundzile eSehlukweni 3, nguSathane Develi lobusa lomhlaba.

7, 8. Yini lebangela kuhlupheka lokungaka emhlabeni?

⁷ LiBhayibheli lisitjela kutsi “lonkhe live lisemandleni alomubi.” (1 Johane 5:19) Sathane umbusi walelive uyingoti futsi unelunya. Nguye “lodukisa umhlaba wonkhe.” (Sembulo 12:9) Bantfu labanyenti bayamlingisa. Loko ngulokunye lokubangela kutsi lomhlaba ugcwale emanga, inzondo nelunya.

⁸ Kunaletinye tizatfu letibangela kutsi kube nekuhlupheka lokungaka emhlabeni. Ngemuva kwekuhlubuka, bo-Adamu na-Eva batselela bantfwababo sono. Sono sibangela kutsi bantfu bangaphatsani kahle. Bavamise kufuna kuba ncono kunalabanye. Bayalwa, baya etimphini baphindze bacindzetele labanye. (Umshumayeli 4:1; 8:9) Ngalesinye sikhatsi bantfu bayahlupheka ngenca ‘yesikhatsi nematfuba.’ (Umshumayeli 9:11) Bantfu behlelwa tingoti nobe tintfo letimbi nangabe bona bebakuleyo ndzawo ngalesikhatsi tenteka.

9. Yini lesenta singangabati kutsi Nkulunkulu unesizatfu lesihle sekuvumela kuhlupheka?

⁹ Jehova akwenteki abangele bubi. Akukafaneli simsole ngetimphi letikhona, budlova kanye nekuphatfwa kabi kwebantfu. Akusuye Nkulunkulu lobangela kutamatama kwemhlaba, tikhukhula kanye netiphepho. Kodvwa kungenteka uyatibuta kutsi, ‘Nangabe Nkulunkulu anemandla kunako konkhe lokukhona emhlabeni, akativimbeli ngani tonkhe letintfo letimbi letentekako?’ Siyati kutsi Nkulunkulu unendzaba kakhulu natsi, ngako asingabati kutsi unesizatfu lesihle sekuvumela kuhlupheka kwanyalo.​—1 Johane 4:8.

SIZATFU LESENTA NKULUNKULU AVUMELE KUHLUPHEKA

10. Yini Sathane labefuna bo-Adamu na-Eva bayicabange ngaJehova?

¹⁰ Sathane wadukisa bo-Adamu na-Eva ensimini yase-Edeni. Watsi Nkulunkulu unguMbusi lomubi, futsi kukhona lokuhle labafihlela kona bo-Adamu na-Eva. Sathane abefuna bacabange kutsi yena angababusa kancono kunaJehova nekutsi bebangamdzingi Nkulunkulu.​—Genesisi 3:2-5; fundza liphuzu 27 ngephasi kwesihloko lesitsi Imininingwane Lesekugcineni.

11. Ngumuphi umbuto lekufanele siwuphendvule?

¹¹ Bo-Adamu na-Eva abazange bamlalele Jehova. Bebacabanga kutsi bangakhona kutikhetsela bona kutsi ngukuphi lokuhle nalokubi. Jehova abetawukhombisa njani kutsi letihlubuki betinemanga futsi ukwati kancono lokusilungelako?

12, 13. (a) Yini leyenta Jehova wangababhubhisi ngaleso sikhatsi bo-Adamu na-Eva? (b) Jehova umvumeleleni Sathane kutsi abuse lomhlaba nekutsi bantfu batibuse?

¹² Jehova akazange ababhubhise ngaleso sikhatsi bo-Adamu na-Eva, kodvwa wabayekela baba nebantfwana. Bantfwana babo bebangakhona kutikhetsela kutsi bafuna kubuswa ngubani emkhatsini waJehova naSathane. Jehova bekahlose kutsi lomhlaba ugcwale bantfu labete sono. Loko bekutawenteka ngisho nome Sathane abengetama kangakanani kukuvimba.​—Genesisi 1:28; Isaya 55:10, 11.

¹³ Bekubukele tigidzi tetingilosi ngesikhatsi Sathane akhuluma emanga ngaJehova. (Jobe 38:7; Danyela 7:10) Jehova wase uniketa Sathane litfuba lekukhombisa kutsi kwakuliciniso yini loko labemsola ngako. Waphindze waniketa bantfu litfuba lekutsi batibuse bacondziswa nguSathane kute batibonele kutsi bangaphumelela yini ngaphandle kwakhe.

14. Yini lesiyibonile njengobe sikhatsi sichubeka?

¹⁴ Bantfu sebetame iminyaka leminyenti kutibusa kodvwa behlulekile. Kuyabonakala kutsi Sathane bekanemanga. Bantfu bayakudzinga kucondziswa nguNkulunkulu. Abecinisile umphrofethi Jeremiya nakatsi: “Awu, Simakadze, ngiyati kutsi kute umuntfu lotiphatsele yena imphilo yakhe. Akusiko kwemuntfu kutsi aticondzisele yena tinyatselo takhe.”​—Jeremiya 10:23.

YINI LEYENTE JEHOVA WABEKETELA SIKHATSI LESIDZE KANGAKA?

15, 16. (a) Yini leyente Jehova wabeketelela bubi sikhatsi lesidze kangaka? (b) Jehova akatilungisi ngani tinkinga letibangelwa nguSathane?

¹⁵ Yini leyente Jehova wabeketelela bubi sikhatsi lesidze kangaka? Akaticedzi ngani tintfo letimbi? Kutsetse sikhatsi lesidze kutsi kubonakale kutsi Sathane uyehluleka kubusa. Bantfu sebetame tonkhe tinhlobo tabohulumende, kodvwa tonkhe tehlulekile. Sekwandze kakhulu kweswela, lubandlululo, bugebengu kanye netimphi ngisho noma isayensi kanye netebucwephesha sekutfutfukile. Asikhoni kutibusa ngaphandle kwekusitwa nguNkulunkulu.

¹⁶ Noma kunjalo, Jehova akatilungisi tinkinga letibangelwa nguSathane ngobe loko bekungasho kutsi Jehova ubambisene naye, intfo langayuze ayente. Loko bekungenta nebantfu bacabange kutsi bangakhona kutibusa ngaphandle kwekusitwa nguNkulunkulu. Kodvwa loko kungemanga laluhlata futsi Jehova akahambisani nako. Akawacambi emanga.​—Hebheru 6:18.

17, 18. Yini Jehova latayenta kute alungise lomonakalo lobangelwe nguSathane?

¹⁷ Jehova angawulungisa wonkhe yini umonakalo lobangelwe kutibusa kwebantfu bacondziswa nguSathane? Yebo, ngobe kuNkulunkulu tonkhe tintfo tingenteka. Jehova wati kahle kutsi kunini lapho emanga aSathane atawubekwa khona onkhe ebaleni. Jehova utawubese wenta umhlaba ube lipharadisi njengobe bekuyinjongo yakhe kusukela ekucaleni. Bonkhe “labasemathuneni” batawuvuswa. (Johane 5:28, 29) Bantfu angeke baphindze bagule noma bafe. Jesu utawulungisa wonkhe umonakalo lobangelwe nguSathane. Jehova utawusebentisa Jesu kute ‘abhidlite imisebenti yaDeveli.’ (1 Johane 3:8) Siyajabula ngekutsi kwanyalo Jehova usibeketelele kute sitomati kahle futsi sikhone kukhetsa kubuswa nguye. (Fundza 2 Phetro 3:9, 10.) Ngisho noma sisetinkingeni, Jehova uyasisita kutsi sibeketele.​—Johane 4:23; fundza 1 Khorinte 10:13.

¹⁸ Jehova akasiphoceleli kutsi simkhonte. Wasipha inkhululeko yekutikhetsela. Ase sihlolisise kutsi singasisebentisa njani lesipho lesiligugu kangaka sekutikhetsela.

UTAYISEBENTISA NJANI INKHULULEKO YEKUTIKHETSELA?

19. Ngusiphi sipho lesihle Jehova lasiphe sona? Kungani kufanele sibonge ngalesipho?

¹⁹ Likhono lekutikhetsela lesiliniketwe nguJehova lisenta sihluke kakhulu etilwaneni. Tilwane tenta tintfo ngobe tadalwa kutsi titente ngaleyondlela, kodvwa tsine siyatikhetsela luhlobo lwemphilo lesifuna kuluphila nekutsi siyafuna yini kujabulisa Jehova. Ngetulu kwaloko, asifani nemishini leyenta kuphela loko leyakhelwe kutsi ikwente. Sikhululekile kutsi sitikhetsele kutsi sifuna kuba bantfu labanjani, bobani lesifuna babe bangani betfu naloko lesitawukwenta ngekuphila kwetfu. Jehova ufuna sijabule.

20, 21. Yini lencono kakhulu longayikhetsa?

²⁰ Jehova ufuna simtsandze. (Matewu 22:37, 38) Ufana nababe lojabulako nakeva umntfwanakhe asho ngalokusuka enhlitiyweni kutsi; ‘Ngiyakutsandza babe,’ abe angakatjelwa ngumuntfu kutsi asho njalo. Jehova ufuna sitikhetsele kutsi sitamkhonta yini noma ngeke. Sathane, Adamu kanye na-Eva bakhetsa kumlahla Jehova. Wena utasisebentisa njani lesipho?

²¹ Tikhetsele kukhonta Jehova. Kunetigidzi tebantfu letikhetse kujabulisa Nkulunkulu takhetsa kungamlaleli Sathane. (Taga 27:11) Yini longayenta nyalo kute usindze ngalesikhatsi Nkulunkulu acedza bonkhe bubi nekuhlupheka emhlabeni futsi aletsa live lelisha? Sihloko lesilandzelako sitawuphendvula lombuto.