Kuyini Kukhonta?

Kukhonta kungachazwa ngekutsi “sento sekukhombisa inhlonipho nobe lutsandvo kunkulunkulu.” EBhayibhelini, emagama elulwimi lwekucala lasho “kukhonta” angaveta umcondvo wekukhombisa inhlonipho lenkhulu, nobe kutitfoba etidalweni. (Mat. 28:9) Lamagama angaphindze achaze sento senkholo sekuhlonipha Nkulunkulu nobe labanye bonkulunkulu. (Joh. 4:23, 24) Indzaba lokucocwa ngayo ngiyo leveta kutsi lamagama singawacondza njani.

NguJehova kuphela uMdali neMbusi Wendzawo Yonkhe, lokufanele simkhonte. (Semb. 4:10, 11) Sisuke sikhonta Jehova nangabe sihlonipha bukhosi bakhe futsi sidvumisa libito lakhe. (Hla. 86:9; Mat. 6:9, 10) Letintfo letimbili, lokubukhosi baJehova kanye neligama lakhe, kukhulunywa ngato kakhulu encwadzini yaHezekeli. Emavi latsi “Nkhosi Lephakeme Jehova” asetjentiswe tikhatsi letingu-217 encwadzini yaHezekeli kuphela, kantsi emavi latsi “nitawukwati kutsi mine nginguJehova,” asetjentiswe tikhatsi letingu-55.—Hez. 2:4; 6:7.

Kukhonta kwetfu akusiyo nje indlela lesitiva ngayo; kunaloko, kukhonta lokungiko kufaka ekhatsi tento. (Jak. 2:26) Nasitiniketela kuJehova, sisuke sifunga kutsi kuto tonkhe tici tekuphila kwetfu sitamlalela njengobe ayiNkhosi yetfu futsi silihloniphe kakhulu ligama lakhe. Khumbula kutsi Jesu nakaphendvula Sathane esilingweni sakhe sesitsatfu, wahlobanisa kukhonta ‘nemsebenti longcwele.’ (Mat. 4:10) Njengobe sitikhonti taJehova, sitimisele kumsebentela.a (Dut. 10:12) Sisuke sentela Nkulunkulu wetfu umsebenti longcwele nangabe senta imisebenti lehlobene nekukhonta kwetfu, futsi loko kudzinga kutidzela. Ngumiphi lemisebenti?

Imisebenti lengcwele yehlukahlukene kodvwa yonkhe iligugu kuJehova. Sisuke senta umsebenti longcwele nasishumayela labanye, nasiba nencenye emihlanganweni yelibandla, nasinakekela futsi sakha tindzawo tetfu tekukhontela. Ngetulu kwaloko, sisuke senta umsebenti longcwele nasiba nencenye ekukhonteni kwemndeni, nasisekela umsebenti wekuniketa lusito kubazalwane betfu labadzingile, nasivolontiya emihlanganweni yetfu lemikhulu, nobe nasikhonta eBethel. (Heb. 13:16; Jak. 1:27) Nangabe kukhonta lokuhlantekile kuhlale kusetingcondvweni nasetinhlitiyweni tetfu, sitawenta “umsebenti longcwele busuku nemini.” Siyajabula ngekukhonta Nkulunkulu wetfu Jehova!—Semb. 7:15.