LIBHOKISI LEKUFUNDZISA 10C
Lokungasisita Sivuke Sime Ngetinyawo
KUNGASICINISA kucabanga ngesifundvo lesitfolakala kulombono lomangalisako lokuHezekeli 37:1-14, lokusifundvo sonkhe lesingasisebentisa ekuphileni kwetfu. Sitsini lesifundvo?
Ngaletinye tikhatsi singahle sitive sicindzeteleke kakhulu ngenca yetimo lesiphila ngaphansi kwato kanye nebumatima kangangekutsi singativa sidziniwe futsi site emandla ekuchubekela embili. Nobe kunjalo, etimeni letinjengaleti, singatfola emandla ngekucabanga ngenchazelo lecacile yembono waHezekeli lomayelana nekubuyiselwa. Kungani? Kungobe kulesiphrofetho singafundza kutsi Nkulunkulu lonemandla ekuphefumulela kuphila kumatsambo lafile nakanjani angasiniketa emandla lesiwadzingako kute sikhone kuncoba tinkinga—ngisho naleto letibonakala timatima kakhulu kubantfu.—Fundza Tihlabelelo 18:29; Fil. 4:13.
Singahle sikhumbule kutsi emakhulwini lamanyenti eminyaka ngaphambi kwekutsi kuphile Hezekeli, umphrofethi Mosi waveta kutsi Jehova akagcini nje ngekuba nemandla kepha uphindze abe nesifiso sekusebentisa emandla akhe kute asite bantfu bakhe. Mosi wabhala watsi: “Nkulunkulu usiphephelo lebesisolo sikhona kusukela endvulo, tandla takhe letihlala njalo tingephansi kwakho.” (Dut. 33:27) Ngako, singaciniseka kutsi nangabe siya kuNkulunkulu wetfu ngetikhatsi letimatima, ngemusa Jehova utawubeka tandla takhe ngaphansi kwetfu, asiphakamise ngesineke futsi asisite kutsi sivuke sime ngetinyawo.—Hez. 37:10.